Ο Ντεβέλ Κερντάς ο Ουρανός ντα ι Πφουβ

Ο Ιεχωβά Ντεβέλ ισί Οντουβά σο κερντάς-αμέν. Κερντάς σαρέ ο πράγματα, εμ οντουλά σο ντικχάσα εμ οντουλά σο ναστί ντικχάσα. Πριν τι κερέλ ο πράγματα σο ντικχάσα, κερντάς μπερεκέτι μπουτέ αγγελόν. Τζανέσα σο ισί ο άγγελοι; Ο άγγελοι ισί πλάσματα σο κερντάς ο Ιεχωβά ντα βον μοιάζενα λέστε. Ναστί ντικχάσα-λεν, σαρ ναστί ντικχάσα ούτε ι Ντεβλές. Ο πρώτος άγγελος σο κερντάς ο Ιεχωβά αβιλό λέσκο βοηθός. Ανταβά άγγελος βοηθίνελας κάνα ο Ιεχωβά κερέλας ο αστέρια, ο πλανήτες ντα σαρέ ο γιαβερά πράγματα. Εκ κατά πλανήτες οντουλά ισί η πφουβ, αμαρό μπουτ σουκάρ κχερ.

Σοράν, ο Ιεχωβά ετοιμαντάς ι πφουβ για τι τζουβντιόν οτθέ ο ζώα ντα ο τζενέ. Κερντάς ο φως ι κχαμέσκο τι ντελ κι πφουβ. Κερντάς ο βεσά, ι ντεριάβ ντα ο λενιά.

Σο αβιλό-πες πο σοράν; Ο Ιεχωβά βακερντάς: “Κα κεράβ τσαριά ντα φυτά ντα δέντρα”. Αρχισάλε τι μπαριόν μπουτ ντα διαφορετικά φρούτα, λαχανικά ντα λουλούδια. Μετά ο Ιεχωβά κερντάς σαρέ ο ζώα​—ζώα σο πετάνενα, ζώα σο ισί κι ντεριάβ, ζώα σο λένα-πες σβάρνα ή πφιρένα οπράλ κι πφουβ. Κερντάς χουρντέ, σαρ ισί ο κουνέλια, αλλά εμ μπαρέ-ντα, σαρ ισί ο ελέφαντες. Τούι καβά ζώος μπεϊντίνεσα πο μπουτ;

Σοράν ο Ιεχωβά βακερντάς κο πρώτος άγγελος: «Τι κεράς τζενές». Ο τζενέ κα αβένας διαφορετικοί κατά ζώα. Κα μπορίνενας τι λατσσαρέν πράγματα. Κα μπορίνενας τι κερέν λάφι, τι ασάν ντα τι κερέν προσευχή. Κα αρακχαβένας ι πφουβ ντα ο ζώα. Τζανέσα κον ισινέ ο πρώτος τζενό; Για τι ντικχάς.