Ο Αβραάμ ντα η Σάρρα Ντινέ Καν ι Ντεβλές

Πασέ κι Βαβέλ ισινέ εκ πόλη σο βακέρντιβελας Ουρ. Οτθέ ο τζενέ να ντένας λατρεία κο Ιεχωβά αλλά μπουτέ γιαβερέ ντεβλέντε. Αλλά κι Ουρ ισινέ εκ τζενό σο ντέλας λατρεία σάντε ι Ιεχωβάς. Λέσκο ναβ ισινέ Αβραάμ.

Ο Ιεχωβά βακερντάς κο Αβραάμ: “Νας τι κχερέσταρ ντα τι τζενένταρ ντα τζα κο τθεμ σο κα σικαβάβ τούκε”. Σοράν ο Ντεβέλ ντινάς πο λάφι: “Κα αβές μπαρό λαός ντα με κα κεράβ λατσσέ πράγματα μπουτέ τζενένγκε χάρη τούταρ”.

Ο Αβραάμ να τζανέλας κατέ μπουτσσαβέλας-λες ο Ιεχωβά, αλλά ντέλας μπέσα λέστε. Αντικάς, ο Αβραάμ, λέσκι ρομνί η Σάρρα, λέσκο ντατ ο Θάρα ντα λέσκο ανιψιός ο Λωτ ντινέ καν, γκιντιντέ πουμαρέ πράγματα ντα αρχισάλε ο μπαρό ταξίδι.

Ο Αβραάμ ισινέ 75 μπρεσένγκο κάνα βοβ ντα λέσκι φαμιλί ερεσλέ κο τθεμ σο μανγκέλας ο Ιεχωβά τι ντικχέν. Ανταβά τθεμ βακέρντιβελας Χαναάν. Οτθέ ο Ντεβέλ κερντάς λάφι κο Αβραάμ ντα ντινάς-λες ανταγιά υπόσχεση: “Σαρό ανταβά τθεμ σο ντικχέσα ντονταλάι τούταρ κα νταβ-λες τι τσσαβέντε”. Αλλά ο Αβραάμ ντα η Σάρρα ισινέ μπουτ μπαρέ ντα να τθερένας τσσαβέν. Άρα σαρ κα κερέλας ο Ιεχωβά τι νικιόλ μπαγιά λέσκι υπόσχεση;