Κερντόμ Εκχέ Τσσαβές!

Ο Αβραάμ ντα η Σάρρα ισινέ μπουτ μπρεσά παντριμέ. Μουκχλέας πουμαρό λατσσό κχερ κι Ουρ ντα τζουβντιόνας εκχέ τσαντιρίστε. Αλλά η Σάρρα να κερέλας παράπονα, επειδή ντέλας μπέσα κο Ιεχωβά.

Η Σάρρα μανγκέλας αζόμ μπουτ εκχέ μαξιμίς σο βακερντάς κο Αβραάμ: “Άμα μι υπηρέτρια η Άγαρ κερντάς μαξιμίς, κα αβέλ σαρ μιρό μαξίμι”. Αφού νακχλό χάνικ βακίτι, η Άγαρ κερντάς εκχέ τσσαβές. Λέσκο ναβ ισινέ Ισμαήλ.

Μπουτ μπρεσά πο σοράν, κάνα ο Αβραάμ ισινέ 99 μπρεσένγκο ντα η Σάρρα 89, γκιλέ λέντε τριν μισαφίρια. Ο Αβραάμ βακερντάς λένγκε τι μπεσέν τι ξεκουράντιβεν τελάλ εκχέ δεντρόσταρ ντα ντινάς-λεν χαμπέ. Τζανέσα κον ισινέ οντουλά μισαφίρια; Ισινέ άγγελοι! Βακερντέ κο Αβραάμ: “Ο γιαβέρ μπρες ασακό βακίτι, τούι ντα τι ρομνί κα τθερέν εκχέ τσσαβές”. Η Σάρρα ασουνέλας αντράλ κατά τσαντίρι. Ασάντιλι αντρέ πέσταρ ντα σκεφτιντάς: “Μπορίναβα μπαγιά τι κεράβ μαξιμίς παρόλο σο ισινόμ αζόμ μπαρί;”

Ο γιαβέρ μπρες, η Σάρρα μπιαντάς εκχέ τσσαβές, ντιπ αντικάς σαρ ντινάας πο λάφι ο άγγελος ι Ιεχωβάσκο. Ο Αβραάμ νικαντάς λέσκε Ισαάκ, σο μανγκέλα τι βακερέλ «ασαπέ».

Κάνα ο Ισαάκ ισινέ πασέ παντζέ μπρεσένγκο, η Σάρρα ντικχλάς ότι ο Ισμαήλ πρασάλας-λες. Επειδή μανγκέλας τι αρακχαβέλ πι τσσαβές, γκιλί κο Αβραάμ ντα μανγκλάς λέσταρ τι νασκιαρέλ την Άγαρ ντα τον Ισμαήλ. Κι αρχή, ο Αβραάμ να μανγκέλας τι κερέλ-λες ανταβά. Αλλά ο Ιεχωβά βακερντάς λέσκε: “Ασούν ι Σαρρά. Με κα αρακχαβάβ τον Ισμαήλ. Αλλά μο υποσχέσεις κα νικιόν μπαγιά αντράλ κατά Ισαάκ”.