Γκιλέ Κόντρα κο Ιεχωβά

Χάνικ πο σοράν, καζόμ ο Ισραηλίτες ισινέ κι έρημος, ο Κορέ, ο Δαθάν, ο Αβιρών ντα γιαβερά 250 Ισραηλίτες γκιλέ κόντρα ι Μωυσίσαρ. Βον βακερντέ λέσκε: “Μπουχτισάλαμ τουμένταρ! Σόσκε τι αβές τούι αμαρό αρχηγός ντα ο Ααρών τι αβέλ ο αρχιερέας; Ο Ιεχωβά ισί αμέντζαρ-ντα, νανέ σάντε τούσαρ ντα με τον Ααρών”. Ανταβά να μπεϊντιντάς-λες ο Ιεχωβά. Κι πραγματικότητα γκιλέας λέσαρ κόντρα!

Ο Μωυσής βακερντάς κο Κορέ ντα οντουλέντε σο τσσίντενας λέσταρ: “Ελάν γιαβίν κι σκηνή της μαρτυρίας, πφερέν τουμαρέ σκεύη σο πφαμπαρένα ο θυμίαμας ντα ανέν-λεν τουμέντζαρ. Ο Ιεχωβά κα σικαβέλ αμένγκε κας τραμπιντάς”.

Ο γιαβέρ ντιβές, ο Κορέ ντα ο 250 μουρσά γκιλέ τι αρακχέν ι Μωυσής κι σκηνή της μαρτυρίας. Οτθέ πφαμπαρντέ θυμίαμας σαρ τι αβένας ιερείς. Ο Ιεχωβά βακερντάς κο Μωυσής ντα κο Ααρών: “Τσσίντεν-τουμέν ντουρ κατά Κορέ ντα λέσκε μουρσένταρ”.

Σάντε ο Κορέ γκιλόας κο Μωυσής κι σκηνή της μαρτυρίας. Ο Δαθάν, ο Αβιρών ντα λένγκε φαμιλιά να μανγκλέ τι τζαν. Ο Ιεχωβά βακερντάς ι Ισραηλιτένγκε τι νασέν ντουρ κατά τσαντίρια σο τθερέλας ο Κορέ, ο Δαθάν ντα ο Αβιρών. Αμέσως, ο Ισραηλίτες τσσιντιντέ-πες ντουρ. Ο Δαθάν, ο Αβιρών ντα λένγκε φαμιλιά ισινέ αβριάλ πουμαρέ τσαντιρίνταρ. Εκταέκ η πφουβ πουτάρντιλι κο ντούι ντα μπιλιαντάς-λεν! Κι σκηνή της μαρτυρίας, πελί γιακ κατά ουρανός ντα πφαμπαρντάς τον Κορέ ντα ι 250 μουρσέν σο ισινέ λέσαρ.

Ο Ιεχωβά βακερντάς κο Μωυσής: “Λε εκ μαγκούρα κατά αρχηγός σο τθερέλα κάθε φάρα ντα γράφινε οπράλ λέσκο ναβ. Αλλά κι μαγκούρα σο τθερέλα η φάρα του Λευί κα γραφίνες οπράλ ο ναβ του Ααρών. Τσσουβ-λεν αντρέ κι σκηνή της μαρτυρίας, ντα η μαγκούρα ι μουρσέσκι σο κα τραμπίναβ κα νικαβέλ λουλούδια”.

Ο γιαβέρ ντιβές, ο Μωυσής αντάς αβρί σαρέ ο μαγκούρες ντα σικαντάς-λεν κο αρχηγοί. Κι μαγκούρα του Ααρών νικίστιλεας λουλούδια ντα ισινέ οπρά-λάτε γινωμέ μπαντέμια. Ανταλέ τροπόσαρ, ο Ιεχωβά σικαντάς ξεκάθαρα ότι τραμπιντάς τον Ααρών τι αβέλ αρχιερέας.