Η Ραάβ Γκεραντάς ι Κατασκοπόν

Κάνα ο Ισραηλίτες σο ισινέ κατάσκοποι γκιλέ κι πόλη Ιεριχώ, μπεσλέ κο κχερ εκχέ τζουβλιάκο σο βακερένας λάκε Ραάβ. Κάνα ο βασιλιάς κατά Ιεριχώ σικλιλό-λες ανταβά μπουτσσαντάς στρατιωτέν τι ρόντεν κο κχερ ανταλέ τζουβλιάκο. Βόι όμως γκεραντάς ι ντουέ κατασκοπόν κι νταράτσα ντα μπουτσσαντάς ι στρατιωτέν τι ρόντεν γιαβερτθέ. Βακερντάς κο κατάσκοποι: “Κα βοηθίναβ-τουμέν σόσκε τζανάβα ότι ο Ιεχωβά ισί τουμέντζαρ ντα ότι κα λεν ανταβά τθεμ. Μολίναβα-τουμέν, ντεν-μαν τουμαρό λάφι ότι κα σώνεν μι φαμιλί”.

Ο κατάσκοποι βακερντέ κι Ραάβ: “Ντάσα-τουτ αμαρό λάφι ότι καέκ οντουλένταρ σο κα αβέν αντρέ τι κχερέστε να κα παθίνελ ζιάνι”. Ατζέκ βακερντέ λάκε: “Τι πφάντες εκ λολό σολό τι παραθυρόστε ντα τι φαμιλί κα σώντιβελ”.

Η Ραάβ γουλιαρντάς ι κατασκοπόν εκχέ σολέσαρ κατά παράθυρος. Βον γκιλέ κο βεσά, γκεραντέ-πες οτθέ τριν ντιβεσά ντα βουρτισάλε κο Ιησούς του Ναυή. Σοράν ο Ισραηλίτες νακχλέ κατά Λεν Ιορδάνη ντα ετοιμαντέ-πες για τι λεν οντουβά τθεμ. Η Ιεριχώ ισινέ ο πρώτος τθαν σο λιντέ. Ο Ιεχωβά βακερντάς λένγκε τι πφιρέν ντονταλάι κατά Ιεριχώ εκ φαρ κο ντιβές για σιοβ ντιβεσά. Κο έβδομος ντιβές, κερντέ ντονταλάι κατά πόλη εφτά φαρ. Αζομάν ο ιερείς πφουντιντέ πουμαρέ σάλπιγγες ντα ο στρατιώτες ντινέ βίκος καζόμ πο ζουρανές μπορίνενας. Ο βουτσσέ ντουβάρια σο τθερέλας η Ιεριχώ πελέ τελέ! Αλλά ο κχερ σο τθερέλας η Ραάβ, σο ισινέ οπράλ κο βουτσσέ ντουβάρια, να πελό, ατσσιλό σαρ ισινέ. Η Ραάβ ντα λάκι φαμιλί σωσάλε επειδή βόι ντινάς μπέσα κο Ιεχωβά.