Ο Πρώτος Βασιλιάς κο Ισραήλ

Ο Ιεχωβά τσσουντάας κριτέν για τι οδηγίνεν ι Ισραηλιτέν, αλλά βον μανγκένας τι τθερέν εκχέ βασιλιάς. Βακερντέ κο Σαμουήλ: “Σαρέ ο τθεμά ντονταλάι τθερένα εκχέ βασιλιάς. Μανγκάσα αμέν-ντα εκχές”. Ο Σαμουήλ τζανέλας ότι ισινέ λάθος ανταβά. Οτθάρ, κερντάς προσευχή κο Ιεχωβά. Ντα ο Ιεχωβά βακερντάς λέσκε: “Ο λαός να κερέλα πέρα τουτ. Κερέλα πέρα μαν. Βάκερ λένγκε ότι μπορίνενα τι τθερέν εκχέ βασιλιάς αλλά ο βασιλιάς κα απαιτίνελ λένταρ μπουτ πράγματα”. Όμως ο λαός βακερντάς: “Να χάλα-αμέν ανάγκη. Αμέν μανγκάσα εκχέ βασιλιάς”.

Ο Ιεχωβά βακερντάς κο Σαμουήλ ότι εκ τζενό σο βακέρντιβελας Σαούλ κα αβέλας ο πρώτος βασιλιάς. Κάνα ο Σαούλ γκιλό κο Σαμουήλ κι Ραμά, βοβ τσσορντάς οπράλ λέσκε σορέστε λάδι ντα αντικάς κερντάς-λες βασιλιάς.

Πο σοράν, ο Σαμουήλ γκιντιντάς ι Ισραηλιτέν για τι σικαβέλ λένγκε ι νεβέ βασιλιάς. Αλλά ρόντενας λέσκε ντα να αρακχένας-λες πουθενά. Τζανέσα σόσκε; Επειδή γκεραντάας-πες. Κάνα τελικά αρακχλέ-λες, λιντέ-λες ντα τσσουντέ-λες κο μασκάρ κο λαός. Ο Σαούλ ισινέ πο βουτσσό σαριλένταρ, ντα ισινέ μπουτ σουκάρ. Ο Σαμουήλ βακερντάς: “Ντικχέν, ανταλές τραμπιντάς ο Ιεχωβά”. Ο λαός ντινάς βίκος: “Τι τζουβντιόλ ο βασιλιάς!”

Κι αρχή, ο βασιλιάς Σαούλ ασουνέλας τον Σαμουήλ ντα ντέλας καν ι Ιεχωβάς. Αλλά σοράν αλλαξάλο. Για παράδειγμας, να αβέλας-πες τι κερέλ ο βασιλιάς ο θυσίες. Εκ φαρ, ο Σαμουήλ βακερντάς κο Σαούλ τι μπεσέλ λέσκε μέχρι τι τζαλ για τι κερέλ ο θυσίες, αλλά να γκιλό αμέσως. Οτθάρ, ο Σαούλ αποφασιντάς τι κερέλ βοβ ο θυσίες. Σο κερντάς ο Σαμουήλ; Βακερντάς κο Σαούλ: “Να ισινέ σωστός σο να ντινάν καν ι Ιεχωβάς”. Κα σικλιόλας ο Σαούλ κατά λάθος σο κερντάς;

Πο σοράν, κάνα ο Σαούλ γκιλό τι κερέλ πόλεμος με το Αμαληκίτες, ο Σαμουήλ βακερντάς λέσκε μα τι μουκχέλ καεκχές τζουβντό. Αλλά ο Σαούλ αποφασιντάς μα τι μουνταρέλ ι βασιλιάς Αγάγ. Ο Ιεχωβά βακερντάς κο Σαμουήλ: “Ο Σαούλ μουκχλάς-μαν, ντα να ντέλα-μαν καν”. Ο Σαμουήλ στεναχωρισάλο μπουτ ντα βακερντάς κο Σαούλ: “Επειδή τσσιναντάν τι ασουνές ι Ιεχωβάς, βοβ κα τραμπίνελ εκχέ γιαβερέ βασιλιάς”. Κάνα ο Σαμουήλ τζάλας τι νασέλ, ο Σαούλ καπτιντάς-λες ντα πφαραντάς ι άκρη κατά σέα σο ιρίλας. Αζομάν ο Σαμουήλ βακερντάς κο Σαούλ: “Σαρ τσσιντιλό ανταβά κοτόρ, αντικάς ο Ιεχωβά κα κερέλ τι τσσιντιόλ τούταρ τι βασιλεία”. Ο Ιεχωβά κα ντέλας ι βασιλεία εκχέστε σο κα μανγκέλας-λες ντα κα ντέλας-λες καν.