Άγγελοι Βακερένα ότι Μπιάντιλο ο Ιησούς

Οντουβά σο κερέλας κουμάντος κι Ρωμαϊκή Αυτοκρατορία, ο Καίσαρας Αύγουστος, ντινάς εντολή σαρέ κο Ιουδαίοι τι τζαν κο τθεμ σο μπιάντιλε για τι δηλώνεν-πες. Οτθάρ, ο Ιωσήφ ντα η Μαρία βουρτισάλε κι Βηθλεέμ, σόσκε οτθάρ ισινέ η φαμιλί ι Ιωσηφίσκι. Η Μαρία ισινέ πι μασικέστε τι μπιανέλ.

Κάνα ερεσλέ κι Βηθλεέμ, σάντε εκ τθαν αρακχλέ για τι μπεσέν ντα ανταβά ισινέ εκ στάβλος. Οτθέ μπιαντάς η Μαρία πι τσσαβές ι Ιησούς. Πακιαρντάς-λες κοβλέ παταβέντζαρ ντα τσσουντάς-λες κι φάτνη.

Πασέ κι Βηθλεέμ, μερικά τσομπάνια μπεσένας ιράτ αβρί για τι αρακχαβέν πουμαρέ μπρακέν. Ξαφνικά, εκ άγγελος ατσσιλό ανγκλά-λέντε ντα ι Ιεχωβάσκι δόξα αρχισάλι τι λελ-πες ντονταλάι λένταρ. Ο τσομπάνια νταρασάλε μπουτ, αλλά ο άγγελος βακερντάς λένγκε: “Μα νταρέν. Τθεράβα τι βακεράβ τουμένγκε μπουτ λατσσέ αμπέρια. Ο Μεσσίας μπιάντιλο αντιβές κι Βηθλεέμ”. Οντιά στιγμή, σικαντέ-πες μπουτ άγγελοι κο ουρανός ντα βακερένας: “Δόξα κο Ντεβέλ οτθέ οπρέ κο ουρανός, ντα ειρήνη κι πφουβ”. Σοράν ο άγγελοι νασλέ. Σο κερντέ ο τσομπάνια;

Ο τσομπάνια βακερντέ ο εκ ι γιαβερέσκε: “Ελάν τι τζας σουγκό κι Βηθλεέμ”. Γκιλέ σουγκό οτθέ, ντα αρακχλέ ι Ιωσηφίς ντα ι Μαριά γιεκ με το λεχονιάρικος τσσαβό αντρέ κο στάβλος.

Σαρέ οντουλά σο ασουντέ σο βακερντέας ο άγγελοι κο τσομπάνια ατσσιλέ πουταρντέ μόσαρ. Η Μαρία σκεφτίνελας μπουτ λατσσές ο λάφια ι αγγελόσκε ντα ποτές να μπισταρντάς-λεν. Ο τσομπάνια βουρτισάλε πουμαρέ μπρακέντε, ντα ευχαριστίνενας ι Ιεχωβάς σαρέ οντουλένγκε σο ντικχλέ ντα ασουντέ.