Ο Ιεχωβά Αρακχαντάς ι Ιησούς

Εκχέ τθεμέστε ανατολικά κατά Ισραήλ, ισινέ τζενέ σο πακιάνας ότι ο αστέρια μπορίνενας τι οδηγίνεν-λεν. Εκ ιράτ, μερικά μουρσά κατά Ανατολή ντικχλέ κάτι σο μοιάζελας με εκ αστέρι σο λέλας-πες τι πφιρέλ κο ουρανός ντα γκιλέ παλά-λέστε. Ο «αστέρι» ανταβά γκερντάς-λεν κι Ιερουσαλήμ. Ο μουρσά αρχισάλε τι πουτσέν ι τζενέν: “Κάι ισί ανταβά χουρντό σο κα αβέλ βασιλιάς ι Ιουδαιόνγκο; Αβιλάμ για τι περάς κοτσίντζαρ ανγκλά-λέστε”.

Κάνα ο Ηρώδης, ο βασιλιάς κι Ιερουσαλήμ, ασουντάς εκχέ νεβέ βασιλιάσκε, ανησυχισάλο μπουτ. Πουτσλάς ι μπαρέ ιερεόν: “Κάι κα μπιάντιβελ οντουβά βασιλιάς;” Βον βακερντέ λέσκε: “Ο προφήτες βακερντέ ότι κα μπιάντιβελας κι Βηθλεέμ”. Οτθάρ, ο Ηρώδης ντινάς βίκος ι μουρσέν κατά Ανατολή ντα βακερντάς λένγκε: “Τζαν κι Βηθλεέμ ντα αρακχέν μάνγκε ι χουρντές. Σοράν βουρτίνεν ντα βακερέν μάνγκε κάι ισί. Μανγκάβα με-ντα τι περάβ κοτσίντζαρ ανγκλά-λέστε”. Αλλά ανταβά ισινέ ψέμας.

Ο «αστέρι» πφιρέλας πάλι. Ο μουρσά γκιλέ παλά-λέστε μέχρι κι Βηθλεέμ. Ο «αστέρι» ατσσιλό οπράλ εκχέ κχερέσταρ ντα βον ντινέ αντρέ. Αρακχλέ ι Ιησούς γιεκ λέσκε νταγιάσαρ, ι Μαριάσαρ. Πελέ κοτσίντζαρ ανγκλάλ κο χουρντό ντα ντινέ-λες δώρα: χρυσάφι, λιβάνι ντα σμύρνα. Μπουτσσαντάας μπαγιά ο Ιεχωβά ανταλέ μουρσέν για τι αρακχέν ι Ιησούς; Όχι.

Οντιά ιράτ, ο Ιεχωβά βακερντάς κο Ιωσήφ αντράλ εκχέ σουνέσταρ: “Ο Ηρώδης μανγκέλα τι μουνταρέλ ι Ιησούς. Λε τι ρομνιά ντα τι τσσαβές ντα νασέν, τζαν κι Αίγυπτος. Μπεσέν οτθέ μέχρι τι βακεράβ τουμένγκε με ότι μπορίνενα τι βουρτίνεν ντα τι αβέν αρακχαντέ”. Αμέσως, ο Ιωσήφ ντα λέσκι φαμιλί γκιλέ κι Αίγυπτος.

Ο Ιεχωβά βακερντάς κο μουρσά κατά Ανατολή μα τι βουρτίνεν παλάλ κο Ηρώδης. Κάνα ο Ηρώδης αγαντάς ότι βον να κα βουρτίνενας παλάλ, χολιασάλο μπουτ. Επειδή να μπορίνελας τι αρακχέλ ι Ιησούς, ντινάς εντολή τι μουνταρέν σαρέ ι χουρντέν κι Βηθλεέμ σο ισινέ κι Ιησούσκι ηλικία. Αλλά ο Ιησούς ισινέ αρακχαντό οτθέ ντουρ, κι Αίγυπτος.

Σοράν, ο Ηρώδης μουλό. Ο Ιεχωβά βακερντάς κο Ιωσήφ: “Ακανά μπορίνενα τι βουρτίνεν, σόσκε οτθέ κα αβέν αρακχαντέ”. Ο Ιωσήφ, η Μαρία ντα ο Ιησούς βουρτισάλε κο Ισραήλ ντα μπεσένας κι πόλη Ναζαρέτ.