Ο Ιησούς Σικλιαρέλα πι Μαθητέν Σαρ τι Προσευχίντιβεν

Σο-ντα κερένας ο Φαρισαίοι κερένας-λες για τι ντικχέν-λεν ο γιαβερά. Άμα κερένας κάτι λατσσό, ισινέ για τι ισαρέν-λεν ο τζενέ. Προσευχίντιβενας αβρί για τι μπορίνεν τι ντικχέν-λεν σαρέ. Ο Φαρισαίοι σικλιόνας αβριάλ μπαρέ προσευχές ντα βακερένας-λεν πάλι ντα πάλι κο συναγωγές ντα κο ντρομά σο νακχένας μπουτ τζενέ για τι ασουνέν-λεν ο γιαβερά. Οτθάρ, ο τζενέ σαστισάλε κάνα ο Ιησούς βακερντάς λένγκε: “Μα προσευχίντιβεν σαρ ο Φαρισαίοι. Βον πακιάνα ότι ο Ντεβέλ κα μπεϊντίνελ ο μπουτ λάφια σο βακερένα, αλλά ανταβά να αβέλα-πες. Κάνα προσευχίντιβενα ισινέν τουμέν ντα ο Ιεχωβά. Μα βακερέν εμ ο ίδια λάφια. Ο Ιεχωβά μανγκέλα τι βακερέν λέσκε σαρ νιωθίνενα μπαγιά αντρέ-τουμέντε.

“Άκ’ αντικάς πρέπει τι προσευχίντιβεν: «Ντάντε σο ισινάν κο ουρανός, τι αγιάντιβελ το ναβ. Τι αβέλ τι Βασιλεία. Τι αβέλ-πες οντουβά σο μανγκέσα, σαρ κο ουρανός, αντικάς οπράλ κι πφουβ-ντα»”. Σοράν ο Ιησούς βακερντάς λένγκε ότι έπρεπε τι προσευχίντιβεν για τι τθερέν χαμπέ κάθε ντιβές, για τι συγχωρίντιβεν λένγκε αμαρτίες ντα γιαβερέ πραγματένγκε σο απασχολίνενα-λεν.

Ο Ιησούς βακερντάς: “Ποτές μα τσσιναβέν τι προσευχίντιβεν. Συνεχίνεν τι μανγκέν τουμαρέ Νταντέσταρ, κατά Ιεχωβά, λατσσέ πράγματα. Κάθε ντατ μανγκέλα τι ντελ λατσσέ πράγματα πι τσσαβέστε. Άμα τουμαρό τσσαβό κα μανγκέλας τουμένταρ μαντρό, κα ντένας-λες μπαρά; Άμα κα μανγκέλας ματσσό, κα ντένας-λες εκχέ σαπές;”

Σοράν ο Ιησούς σικαντάς λένγκε σο μπορίνενα τι σικλιόν: “Αφού τουμέν τζανένα σαρ τι ντεν λατσσέ δώρα τουμαρέ τσσαβέντε, ισί σίγουρος ότι τουμαρό Ντατ, ο Ιεχωβά, κα ντελ άγιος πνεύμας τουμέντε! Ανταβά σο πρέπει τι κερέν τουμέν ισί τι μανγκέν”. Κερέσα τούι ι συμβουλή σο ντινάς ο Ιησούς; Καλέ πραγματένγκε προσευχίντιβεσα τούι;