Επιστολή κατά Κυβερνών Σώμας

Αγαπητά πφραλά:

Αμέν σο πακιάσα κο Ιεχωβά, μανγκάσα ο Λάφι λέσκο, ι Αγία Γραφή. Ισινάμ σίγουροι ότι ο ιστορίες λάκε ισί μπαγιά, ότι οδηγίνελα αμαρί ζωή ι πο λατσσέ τροπόσαρ ντα ότι σικαβέλα καζόμ μπουτ μανγκέλα ο Ιεχωβά σαρέ ι τζενέν. (Ψαλμός 119:105· Λουκάς 1:3· 1 Ιωάννη 4:19) Μανγκάσα μπουτ τι βοηθίνας ι γιαβερέν τι σικλιόν ο μπουτ σημαντικές αλήθειες κατά Λάφι ι Ντεβλέσκο. Οτθάρ, ισινάμ μπουτ χαρούμενοι σο κα τθερέν ο βιβλίος «Σικλιόν Ιστορίες Κατά Αγία Γραφή». Μανγκάσα τι βακεράς τουμένγκε χάνικ λάφια ανταλέσκε.

Ανταβά βιβλίος ισί πο μπουτ ι χουρντένγκε. Αλλά μπορίνελα τι βοηθίνελ εμ ι πο μπαρέν σο μανγκένα τι σικλιόν πο μπουτ ι Γραφιάκε. Ντα αφού η Γραφή ισί εκ βιβλίος σαριλένγκε, σίγουρα σαρέ κα βοηθίντιβας οντουλένταρ σο σικλιάσα λάταρ ντα ανταβά κα κερέλ-αμέν τι αβάς μπαγιά ευτυχισμέ.

Ανταβά βιβλίος χρησιμοποιήνελα ο ιστορίες ι Γραφιάκε για τι σικαβέλ ι ιστορία ι τζενένγκι από αζομάν σο κερντιλέ ο τζενέ. Προσπαθιντάμ μπουτ τι βακεράς ο ιστορίες κατά Γραφή ξεκάθαρε ντα απλέ τροπόσαρ ντα, καζόμ αβέλα-πες, με την σειρά σο αβιλέ-πες ο πράγματα.

Ανταβά βιβλίος όμως να βακερέλα απλά ο ιστορίες ι Γραφιάκε. Εμ ο λάφια αλλά εμ ο φωτογραφίες σο τθερέλα, κερντιλέ τροπόσαρ σο τζουβντιαρέλα ο ιστορίες ι Γραφιάκε ντα κερέλα-αμέν τι αγαβάς σαρ νιωθίνενας ο τζενέ κο ιστορίες.

Ανταβά βιβλίος βοηθίνελα-αμέν τι αγαβάς ότι η Γραφή ισί εκ βιβλίος σο βακερέλα τζενένγκε​—οντουλένγκε σο ντινέ καν ι Ιεχωβάς ντα οντουλένγκε σο να ντινέ καν. Επίσης βοηθίνελα-αμέν τι σικλιάς μπουτ πράγματα κατά παραδείγματα ανταλά. (Ρωμαίους 15:4· 1 Κορινθίους 10:6) Ο βιβλίος τθερέλα 14 μέρη. Κο κάθε μέρος κι αρχή ντικχάσα χάνικ λαφίντζαρ ι ιστορία ντα σο μπορίνασα τι σικλιάς λάταρ.

Άμα ισινάν ντατ ή ντάι, τι διαβάνες εκ μάθημας τι τσσαβέντζαρ ντα τι κερέν λάφι για το φωτογραφίες σο τθερέλα. Σοράν, τουμέν ο ντούι μπορίνενα τι διαβάνεν ο εδάφια σο βασίντιβελα ανταβά μάθημας. Βοήθινε τι τσσαβέν τι αγαβέν σαρ ο εδάφια σο διαβάνενα κι Γραφή ταιριάνενα με το μαθήματα σο ισί κο βιβλίος. Ο ίδιος μπορίνενα τι κερέν κάνα βοηθίνενα εκχέ μπαρέ τζενές-ντα τι αγαβέλ σο βακερέλα η Γραφή.

Μανγκάσα ανταβά βιβλίος τι βοηθίνελ σαρέ οντουλέν σο τθερένα λατσσό γκι​—χουρντέν ντα μπαρέν—​τι σικλιόν κατά Λάφι ι Ντεβλέσκο ντα τι κερέν πουμαρέ ζωγιάτε οντουλά σο σικλιόνα. Αντικάς κα μπορίνεν βον-ντα τι ντεν-λες λατρεία αντρέ λέσκε αγαπημέ φαμιλιάτε.