Ισινόμ Αρακχαντό Επειδή Ντάβα Μπέσα κο Ιεχωβά

ΣΑΡ ΓΝΩΡΙΝΤΟΜ Ι ΙΕΧΩΒΑΣ ΝΤΑ ΝΤΙΝΟΜ ΛΕΣΚΕ ΜΠΕΣΑ

Μπιάντιλομ κο 1948 εκχέ χουρντέ γκαβέστε κι νοτιοδυτική Νιγηρία. Οντουβά βακίτι, μο κακ ο Μουσταφά, ο πο χουρντό πφραλ μι νταντέσκο, ντα πο σοράν ο Γουαχάμπι, μο πο μπαρό πφραλ, μπολντιλέ σαρ Μάρτυρες ι Ιεχωβάσκε. Κάνα ισινόμας εννιά μπρεσένγκο, μο ντατ μουλό. Η ντουκχ ισινέ μπουτ μπαρί. Ο Γουαχάμπι βακερντάς μάνγκε ότι κα ντικχάς πάλι αμαρέ νταντές κι ανάσταση. Ανταβά λοκχιαρντάς μο γκι ντα τσσιντιντάς-μαν τι κεράβ μελέτη κατά Αγία Γραφή. Μπολντιλόμ κο 1963. Μπουτ σουγκό, μπολντιλέ μο τριν πφραλά-ντα.

Κο 1965, γκιλόμ τι μπεσάβ κο Λάγος μι πφραλέσαρ τον Γουίλσον, σο ισινέ πο μπαρό μάνταρ, ντα κεράβας μπουτ λατσσί παρέα σκαπανίντζαρ κι Κχανγκιρί Ιγκμπόμπι. Επειδή τθερένας μπουτ χαρά ντα πφαμπόνας ι εργόσκε, αρχισάλομ με-ντα τι μανγκάβ ο σκαπανικός, ντα τελικά αρχισάλομ-λες κο Ιανουάριος 1968.

Εκ πφραλ σο υπηρετίνελας κο Μπέθελ, ο Άλμπερτ Ολουγκμπέμπι, κανονιντάς εκ συνάντηση τερνέ πφραλέντζαρ ντα βακερντάς αμένγκε καζόμ μπουτ ανάγκη υπαρχίντιβελας κι βόρεια Νιγηρία για ειδικούς σκαπανείς. Ατζέ ντάβα-μαν γκοντί καζόμ χαράσαρ βακερντάς αμένγκε ο πφραλ Ολουγκμπέμπι: «Ισινέν τερνέ, ντα μπορίνενα τι χρησιμοποιήνεν τουμαρό σαάτι ντα τουμαρί ζορ ι Ιεχωβάσκε. Υπαρχίντιβελα μπουτ έργος τουμένγκε οτθέ!» Επειδή μανγκάβας τι αβάβ σαρ ο προφήτης Ησαΐας ντα τι τζαβ κάι μανγκέλας ο Ιεχωβά τι τζαβ, κερντόμ αίτηση για ειδικός σκαπανικός.​—Ησ. 6:8.

Κο Μάιος 1968, διορισάλομ ειδικός σκαπανέας κι πόλη Κάνο, κι βόρεια Νιγηρία. Ανταβά αβιλό-πες καζόμ υπαρχίντιβελας ο Πόλεμος της Μπιάφρας, σο ατσσικιαρντάς κατά 1967 μέχρι κο 1970. Ανταβά τζένγκι αντάς μπουτ βάσανα ντα μεριπέ κι βόρεια Νιγηρία, ντα σοράν κι ανατολική Νιγηρία. Εκ πφραλ προσπαθιντάς τι κερέλ-μαν μα τι τζαβ κι βόρεια Νιγηρία επειδή να μανγκέλας τι παθίναβ κάτι. Αλλά με βακερντόμ λέσκε: «Ευχαριστώ σο πφαμπόσα μάνγκε. Όμως, άμα ο Ιεχωβά μανγκέλα τι υπηρετίναβ-λες ανταλέ διορισμόστε, ισινόμ ντιπ σίγουρος ότι κα αβέλ μάντζαρ».

ΝΤΙΝΟΜ ΜΠΕΣΑ ΚΟ ΙΕΧΩΒΑ ΚΑΝΑ ΚΑΤΑΣΤΡΑΦΙΣΑΛΙ ΚΑΤΑ ΤΖΕΝΓΚΙ ΕΚ ΠΕΡΙΟΧΗ

Πφανγκιόλας το γκι σο ντικχέας σο αβιλό-πες κο Κάνο. Ο εμφύλιος τζένγκι αντάς μπαρί καταστροφή οντουλέ μπαρέ τθανέστε. Κάνα τζάας κο έργος, μπάζιμα ντικχάας σώματα τζενένγκε σο μουνταρντέας-λεν κο τζένγκι. Παρόλο σο υπαρχίντιβενας μπουτ κχανγκιριά κο Κάνο, ο πο μπουτ πφραλά νασλέας για τι σώντιβεν. Ατσσιλέ οτθέ πο χάνικ από 15 πφραλά, σο νταρένας ντα χασαρντέας πουμαρί ζορ. Όμως, αβιλό ο γκι οντουλέ πφραλένγκο κάνα γκιλάμ οτθέ αμέν ο σιοβ ειδικοί σκαπανείς. Ντινάμ-λεν ζορ ντα βον νιωσάλε πο λατσσές. Βοηθιντάμ-λεν τι αρχίνεν πάλι ο συναθροίσεις ντα ο έργος ντα τι αρχίνεν πάλι τι μπουτσσαβέν πουμαρό έργος κο Μπέθελ, ντα τι κερέν παραγγελίες για το έντυπα.

Αμέν ο ειδικοί σκαπανείς αρχισάλαμ τι σικλιάς ι τσσιπ χάουσα. Κάνα ο τζενέ οτθέ ασουνένας ο λατσσέ αμπέρια πουμαρέ τσσιμπάτε, μπουτ λένταρ ντένας προσοχή οντουλέντε σο βακεράας λένγκε. Όμως, ο τζενέ σο ισινέ κι θρησκεία σο πακιάνας ο πο μπουτ οντουλέ τθεμέστε να μπεϊντίνενας αμαρό έργος, οτθάρ έπρεπε τι αβάς μπουτ προσεκτικοί. Εκχέ περιπτωσιάτε, εκ τζενό κουλαντιντάς εκχέ τσσουριάσαρ μαν ντα ι γιαβερέ πφραλές σο ισινάμας κο έργος. Πάλι λατσσές σο αμέν τθάβνταας πο σουγκό λέσταρ ντα να μπορισάλο τι ασταρέλ-αμέν! Παρόλο σο υπαρχίντιβενας κίνδυνοι, ο Ιεχωβά κανονιντάς “τι μπεσάς εκχέ τθανέστε σο ισινάμας αρακχαντέ”, ντα καζόμ τζάλας αβένας πο μπουτ τζενέ Μάρτυρες. (Ψαλμ. 4:8) Αντιβές, πο μπουτ από 500 πφραλά υπηρετίνενα 11 κχανγκιρίντε κο Κάνο.

ΤΖΑΝΑ ΑΜΕΝΤΖΑΡ ΚΟΝΤΡΑ ΚΟ ΝΙΓΗΡΑΣ

Πο σοράν, κο Αύγουστος 1968, αφού ισινόμας σάντε χάνικ μασεκά κο Κάνο, μπουτσσαντέ-μαν κο Νιαμέι, σο ισί η πρωτεύουσα κι Δημοκρατία κο Νίγηρας, γιαβερέ ντουέ ειδικέ σκαπανίντζαρ. Μπουτ σουγκό, αγαντάμ ότι ο Νίγηρας, κι Δυτική Αφρική, ισί εκ κατά πο τατέ τθεμά κι πφουβ. Έπρεπε τι σικλιάς τι κεράς έργος κάνα υπαρχίντιβελας μπουτ κάψα. Εκτός ανταλέσταρ, έπρεπε τι σικλιάς γαλλικά, ι τσσιπ σο κερντιόλας λάφι οτθέ. Παρόλο σο υπαρχίντιβενας ανταλά δυσκολίες, ντινάμ μπέσα κο Ιεχωβά ντα αρχισάλαμ τι βακεράς ο λατσσέ αμπέρια κι πρωτεύουσα γιεκ ι χάνικ πφραλέντζαρ σο τζουβντιόνας οτθέ. Αντρέ χάνικ βακιτίστε, σαρέ οντουλά σο τζανένας τι διαβάνεν κο Νιαμέι λιντέας ο βιβλίος Η Αλήθεια που Οδηγεί στην Αιώνιο Ζωή, σο χρησιμοποιήντιβελας για το μελέτες. Ντα μερικοί ρόντενας τι αρακχέν-αμέν για τι λεν ο βιβλίος!

Μπουτ σουγκό, αγαντάμ ότι η κυβέρνηση να μανγκέλας ι Μαρτυρέν. Κο Ιούλιος 1969, γκιντισάλαμ για τι κεράς ι πρώτη συνέλευση περιοχής σο αβιλί-πες ποτές οντουλέ τθεμέστε. Αβιλέ περίπου 20 τζενέ. Ισινέ τι μπολντιόν ντούι πφραλά. Όμως, κο πρώτος ντιβές κι συνελευσιάκο, αβιλέ ο ασκέρια ντα τσσιναντέ ο πρόγραμμας. Λιντέ ι ειδικέ σκαπανίν ντα ι επισκοπός κο αστυνομικός τμήμας. Αφού κερντέ-αμέν ανάκριση, ντινέ-αμέν ι διαταγή τι τζας πάλι κο τμήμας ο γιαβέρ ντιβές. Επειδή αγαβάας ότι ο πράγματα κα αβένας χειρότερα, κανονιντάμ τι αβέλ-πες η ομιλία ι μπολντιμάσκι εκχέ κχερέστε ντα σοράν μπολντάμ ι ντουέ πφραλέν εκχέ λενιάτε χωρίς τι αγαβέν-αμέν ο γιαβερά.

Χάνικ εβδομάδες πο σοράν, ο Υπουργείος Εσωτερικών ντινάς μαν ντα παντς γιαβερέ ειδικέ σκαπανίν ι εντολή τι νασάς κατά Νιγηρία. Ντινέ-αμέν σάντε 48 σαάτια για τι νασάς κατά τθεμ, ντα έπρεπε τι αρακχάς κορκορέ τρόπος για τι νασάς. Ντινάμ καν ντα γκιλάμ αμέσως κο Μπέθελ κι Νιγηρία, σο ντινέ-αμέν νεβέ διορισμούς.

Με διορισάλομ κο γκαβ Ορισουνμπάρι, κι Νιγηρία, σο υπαρχίντιβελας εκ χουρντό όμιλος πφραλέντζαρ, ντα ο έργος οτθέ τζάλας μπουτ λατσσές. Αλλά σιοβ μασεκά πο σοράν, ο Μπέθελ καλιντάς-μαν τι βουρτίναβ κο Νίγηρας κορκορό. Για τι βακεράβ μι αλήθεια, κι αρχή σαστισάλομ ντα ανησυχισάλομ χάνικ. Αλλά σοράν, μπεσάβας σαρ σαρ τι ντικχάβ πάλι μι πφραλέν κο Νίγηρας!

Βουρτισάλομ κο Νιαμέι. Ο γιαβέρ ντιβές αφού γκιλόμ οτθέ, εκ επιχειρηματίας κατά Νιγηρία αγαντάς ότι ισινόμ Μάρτυρας ντα αρχισάλο τι κερέλ μάνγκε ερωτήσεις ι Γραφιάκε. Αρχισάλομ τι κεράβ-λες μελέτη ντα, αφού τσσιναντάς τι πιλ τσιγάρα ντα τι ματιόλ, μπολντιλό. Σοράν, τθεράβας ι χαρά τι κεράβ έργος μπουτέ τθανέντε κο Νίγηρας ντα τι ντικχάβ ι τζενέν τι δεχτίνεν ι αλήθεια καζόμ νακχένας ο μπρεσά. Κάνα γκιλόμ πρώτη φορά οτθέ, υπαρχίντιβενας 31 Μάρτυρες κο τθεμ. Κάνα νασλόμ, υπαρχίντιβενας 69.

«ΝΑ ΤΖΑΝΑΣΑ ΣΑΡ ΙΣΙ ΑΜΑΡΕ ΠΦΡΑΛΑ ΚΙ ΓΟΥΙΝΕΑ»

Κο Δεκέμβριος 1977, βουρτισάλομ κι Νιγηρία για τι λαβ σικλιαριπέ. Ο μαθήματα ατσσικιαρντέ τριν εβδομάδες. Καζόμ τελειώνενας ο μαθήματα, ο συντονιστής κι Επιτροπή του Τμήματος, ο Μάλκολμ Βάιγκο, ντινάς-μαν τι διαβάναβ εκ επιστολή κατά Μπέθελ κι Σιέρα Λεόνε. Ο πφραλά μανγκένας τι αρακχέν εκχέ μπίπαντριμε σκαπανεάς σο τθερέλας λατσσί υγεία ντα κερέλας λάφι αγγλικά ντα γαλλικά για τι υπηρετίνελ σαρ επίσκοπος περιοχής κι Γουινέα. Ο πφραλ Βάιγκο βακερντάς μάνγκε ότι ο λόγος σο σικλιαρένας-μαν ισινέ τι προετοιμάνεν-μαν ανταλέ διορισμόσκε. Ντινάς-μαν τι αγαβάβ ξεκάθαρα ότι να ισινέ εκ εύκολος διορισμός. «Σκέφτινε-λες πριν τι δεχτίνες», βακερντάς μάνγκε. Απαντιντόμ αμέσως: «Αφού μπουτσσαβέλα-μαν ο Ιεχωβά, κα τζαβ».

Λιντόμ ο αεροπλάνος ντα γκιλόμ κι Σιέρα Λεόνε. Οτθέ, αρακχλόμ ι πφραλέν κο Μπέθελ. Εκ πφραλ κατά Επιτροπή του Τμήματος βακερντάς μάνγκε: «Να τζανάσα σαρ ισί αμαρέ πφραλά κι Γουινέα». Παρόλο σο ανταβά Μπέθελ ισινέ υπεύθυνος ι εργόσκε κι Γουινέα, σο ισινέ εκ τθεμ πασέ οτθέ, να μπορίνενας τι κερέν λάφι ι πφραλέντζαρ κι Γουινέα επειδή υπαρχίντιβενας μπουτ προβλήματα με την κυβέρνηση ντα ο τζενέ νικιόνας κο ντρομά για τι ντεν βίκος. Επίσης, παρόλο σο ανταβά Μπέθελ κερντάς μπουτ φαρ προσπάθειες για τι μπουτσσαβέλ εκχέ πφραλές οντουλέ τθεμέστε, να καταφεριντάς-λες. Οτθάρ, βακερντέ μάνγκε τι τζαβ κι πρωτεύουσα σο τθερέλα η Γουινέα, κο Κόνακρι, ντα τι προσπαθίναβ τι λαβ άδεια κατά κυβέρνηση για τι μπεσάβ οτθέ.

Κάνα ερεσλόμ κο Κόνακρι, γκιλόμ κο σωματείος σο τθερένας ο τζενέ κατά Νιγηρία οντουλέ τθεμέστε ντα κερντόμ λάφι ι τζενέσαρ σο ισινέ υπεύθυνος οτθέ. Βακερντόμ λέσκε ότι μανγκάβας τι κεράβ έργος κι Γουινέα. Βοβ βακερντάς μάνγκε τι νασάβ, σόσκε υπαρχίντιβελας ο κίνδυνος τι τσσουβέν-μαν κι φυλακή ή τι κερέν μάνγκε κάτι χειρότερος. «Βούρτινε κι Νιγηρία ντα κερ έργος οτθέ», βακερντάς μάνγκε, ντα με απαντιντόμ: «Ισινόμ αποφασισμέ τι μπεσάβ». Οτθάρ, ο υπεύθυνος τζενό γραφιντάς εκ επιστολή κο υπουργός εσωτερικών κι Γουινέα ντα μανγκλάς λέσταρ τι βοηθίνελ-μαν, ντα ο υπουργός βοηθιντάς-μαν λατσσιμάσαρ.

Χάνικ σοράν ανταλέσταρ, βουρτισάλομ κο Μπέθελ κι Σιέρα Λεόνε ντα βακερντόμ ι πφραλένγκε σο απόφαση λιντάς ο υπουργός. Πουτάρντιλο ι πφραλένγκο γκι κάνα ασουντέ σαρ ευλογιντάς ο Ιεχωβά μο ταξίδι. Η κυβέρνηση ντινάς-μαν άδεια για τι μπεσάβ κι Γουινέα!

Κατά 1978 μέχρι κο 1989, υπηρετιντόμ σαρ επίσκοπος περιοχής κι Γουινέα ντα κι Σιέρα Λεόνε, ντα σαρ αναπληρωτής επίσκοπος περιοχής κι Λιβερία. Κι αρχή, νασφάλιβαβας μπουτ φαρ. Μπάζιμα, ανταβά αβέλας-πες τθανέντε σο ισινέ ντουρ κατά πόλεις. Αλλά ο πφραλά κερένας ο πο λατσσό σο μπορίνενας για τι γκερέν-μαν κο νοσοκομείος.

Εκ φαρ, κολλισάλομ εκ πφαρό νασφαλιπέ σο βακέρντιβελα ελονοσία, αλλά παθισάλομ εκ πρόβλημας-ντα κο έντερος σο γκίντελας κερμέ. Κάνα τελικά αβιλόμ λατσσές, σικλιλόμ ότι ο πφραλά κερντέας λάφι κάι κα πραχούνενας-μαν! Παρόλο σο νακχλόμ σαρέ ανταλά ντα μι ζωή ισινέ σε κίνδυνος, ποτές να σκεφτιντόμ τι μουκχάβ μο διορισμοί. Ντα ισινόμ σίγουρος ότι σάντε ο Ντεβέλ μπορίνελα τι αρακχαβέλ-αμέν μπαγιά, επειδή ατζέ-ντα άμα κα μεράς, μπορίνελα τι τζουβντιαρέλ-αμέν.

ΝΤΑΣΑ ΜΠΕΣΑ ΚΟ ΙΕΧΩΒΑ ΣΑΡ ΖΕΥΓΑΡΙ

Κο 1988, γνωριντόμ την Ντόρκας, εκ μπουτ ταπεινή ντα πνευματική σκαπάνισσα. Παντρισάλαμ ντα αρχισάλαμ τι υπηρετίνας γιεκ μι διορισμόστε κο έργος περιοχής. Η Ντόρκας ισί εκ τζουβέλ σο σικαβέλα αγάπη ντα κερέλα μπουτ θυσίες. Έπρεπε τι πφιράς μπουτ. Μπάζιμα, για τι τζας κατά εκ κχανγκιρί κι γιαβέρ, πφιράας 25 χιλιόμετρα, ενώ ακχαράας αμαρέ βαλίτσες-ντα. Κάνα έπρεπε τι τζας κο κχανγκιριά σο ισινέ πο ντουρ, κεράας-λες ανταβά σο-ντα τροπόσαρ αρακχάας για τι κεράς ταξίδι κο μπέτι ντρομά σο ισινέ πφερντέ γούρνες.

Η Ντόρκας τθερέλα μπουτ θάρρος. Για παράδειγμας, μπάζιμα χρειαζίντιβελας τι νακχάς αντράλ κατά λενιά σο ισινέ πφερντέ κροκόδειλους. Εκ φαρ, έπρεπε τι κεράς ταξίδι παντς ντιβεσά, ντα τι νακχάς εκχέ λενιάταρ βαρκάσαρ επειδή ο καστικανέ πφουρτιά ι λενιάκε ισινέ χαλαντέ. Κάνα η Ντόρκας ιστίντιλι για τι νασέλ κατά βάρκα, πελί αχόρτ κι λεν. Καέκ κατά ντούι να τζανέλας τι κερέλ μπάνιος, ντα η λεν τθερέλας κροκόδειλους. Πάλι λατσσές σο μερικά τερνέ φουρτιντέ-πες κι λεν ντα σωντέ-λα. Για χάνικ βακίτι, ντικχάας ο ντούι-ντα μπέτι σουνέ σο τθερένας τι κερέν ανταλέσαρ, αλλά να μουκχλάμ αμαρό διορισμός.

Κο 1992, σαστισάλαμ κάνα σικλιλάμ ότι η Ντόρκας ισινέ κχαμνί. Μήπως ανταβά κα μανγκέλας τι βακερέλ ότι κα τσσιναβάας τι υπηρετίνας σαρ ειδικοί σκαπανείς; Σκεφτιντάμ: «Ο Ιεχωβά κερντάς αμένγκε εκ δώρος!» Οτθάρ, αποφασιντάμ τι τσσουβάς αμαρέ τσσαγιάκε Τζάγκιφτ (σο μανγκέλα τι βακερέλ «δώρος του Γιαχ» κο αγγλικά). Σταρ μπρεσά σοράν κατά Τζάγκιφτ, κερντάμ ατζέκ εκχέ τσσαβές, τον Έρικ. Ο ντούι-ντα τσσαβέ ισινέ δώρα κατά Ιεχωβά αμένγκε. Η Τζάγκιφτ υπηρετιντάς για κάποιο βακίτι κο απομακρυσμέ μεταφραστικός γραφείος κο Κόνακρι, ντα ο Έρικ ισί διακονικός υπηρέτης.

Παρόλο σο η Ντόρκας χρειαζίντιλο τι σταματίνελ ο ειδικός σκαπανικός, συνεχιντάς τι υπηρετίνελ σαρ τακτική σκαπάνισσα, ατζέ-ντα καζόμ μπαριαρέλας αμαρέ τσσαβέν. Ι Ιεχωβάσκε βοηθειάσαρ, με συνεχιντόμ σαρ ειδικός σκαπανέας. Κάνα αμαρέ τσσαβέ μπαριλέ, η Ντόρκας μπορισάλι τι αρχίνελ πάλι ο ειδικός σκαπανικός. Ακανά υπηρετίνασα ο ντούι-ντα κο Κόνακρι σαρ ιεραπόστολοι.

Ο ΙΕΧΩΒΑ ΑΡΑΚΧΑΒΕΛΑ-ΑΜΕΝ

Πάντα τζάβας κάι-ντα μπουτσσαβέλας-μαν ο Ιεχωβά. Μπουτ φαρ, μι ρομνί ντα με νιωσάλαμ ότι ο Ιεχωβά αρακχαβέλα-αμέν ντα ευλογίνελα-αμέν. Επειδή ντάας μπέσα κο Ιεχωβά ντα όχι κο υλικά πράγματα, ανταβά γλιτωντάς-αμέν από μπουτ στεναχώριες. Η Ντόρκας ντα με σικλιλάμ αμαρέ ζωγιάτε ότι ο Ιεχωβά, “ο Ντεβέλ σο σώνελα-αμέν”, αρακχαβέλα-αμέν μπαγιά. (1 Χρον. 16:​35) Ισινόμ σίγουρος ότι η ζωή σαρέ οντουλένγκι σο ντένα μπέσα λέστε «κα αβέλ πακιαρντί ντα αρακχαντί κο τροβάς κι ζωγιάκο πασέ κο Ιεχωβά».​—1 Σαμ. 25:29.