Μπορίνενα τι Ντεν Μπέσα κο Ιεχωβά κο Δύσκολα Ντιβεσά

1, 2. (α) Σαρ μοιάζελα αμαρί ζωή ι ζωγιάσαρ σο τθερένας ο Ιουδαίοι σο βουρτισάλε κι Ιερουσαλήμ; (β) Βακερέν μερικές δυσκολίες σο νακχλέ ο Ιουδαίοι. (Ντικχέν ο πλαίσιος «Ο Ντιβεσά του Αγγαίου, του Ζαχαρία ντα του Έσδρα»)

ΜΗΠΩΣ ισί φαρ σο ανησυχίνενα για το μέλλον; Μπέκιμ χασαρντέν τουμαρί μπουτί ντα ανησυχίνενα σαρ κα ανέν ο αναγκαία τουμαρέ φαμιλιάτε. Μπέκιμ σκεφτίνενα σαρ κα αρακχαβέν τουμαρί φαμιλί επειδή υπαρχίντιβενα προβλήματα με την κυβέρνηση ντα ο τζενέ νικιόνα κο ντρομά για τι ντεν βίκος, επειδή τζάνα κόντρα κι λατρεία αμαρί ή επειδή τζάνα αμέντζαρ κόντρα καζόμ βακεράσα ο λατσσέ αμπέρια. Μήπως νακχένα εκ ανταλέ προβληματένταρ; Άμα βα, κα λεν ζορ καζόμ κα ντικχέν σαρ βοηθιντάς ο Ιεχωβά ι Ισραηλιτέν κάνα νακχλέ ασακέ προβλήματα.

² Ο Ισραηλίτες σο τζουβντιλέας σαρί πουμαρί ζωή κι Βαβυλώνα έπρεπε τι τθερέν ζουρανί πίστη για τι μουκχέν παλάλ ι άνετη ζωή σο τθερένας οτθέ ντα τι τζαν εκχέ τθεμέστε σο ο πο μπουτ λένταρ να τζανένας μπουτ πράγματα λέσκε. Κάνα ερεσλέ οτθέ, αρχισάλε μπουτ σουγκό τι δυσκολίντιβεν τι ανέν ο αναγκαία πουμαρέ φαμιλιάτε. Επίσης, υπαρχίντιβενας προβλήματα με την κυβέρνηση ντα ο τθεμά σο ισινέ ντονταλάι λένταρ τζάνας λέντζαρ κόντρα. Ο αποτέλεσμας ισινέ ότι μερικοί δυσκολίντιβενας τι τσσουβέν πρώτα πουμαρέ ζωγιάτε ο χτίσιμος ι ναόσκο. Οτθάρ, περίπου κο 520 Π.Κ.Χ., ο Ιεχωβά μπουτσσαντάς ντουέ προφητέν, τον Αγγαίο ντα τον Ζαχαρία, τι βοηθίνεν ι λαός τι μανγκέλ πάλι αντράλ πι γκίσταρ τι κερέλ ο έργος ι Ιεχωβάσκο. (Αγγ. 1:1· Ζαχ. 1:1) Σαρ κα ντικχάς, ανταλά προφήτες ντινέ μπουτ ζορ κο λαός. Όμως, σχεδόν 50 μπρεσά πο σοράν, ο Ιουδαίοι σο βουρτισάλεας κι Ιερουσαλήμ χρειαζίντιβενας πάλι ζορ. Ο Έσδρας, εκ μπουτ λατσσό αντιγραφέας του Νόμου, νασλό κατά Βαβυλώνα ντα γκιλό κι Ιερουσαλήμ για τι βοηθίνελ ι Ισραηλιτέν τι τσσουβέν ι λατρεία ι Ιεχωβάσκι πρώτη πουμαρέ ζωγιάτε.​—Έσδρ. 7:1, 6.

3. Καλά ερωτήσεις κα εξετάνας; (Παροιμίες 22:19)

³ Σαρ ο προφητείες του Αγγαίου ντα του Ζαχαρία βοηθιντέ ι Ντεβλέσκε λαός κο πουρανέ μπρεσά τι συνεχίνελ τι ντελ μπέσα κο Ιεχωβά κάνα τζάνας λέσαρ κόντρα, αντικάς κα βοηθίνεν αμέν-ντα αντιβές ανταλά προφητείες τι ντας μπέσα κο Ιεχωβά ντα τι αβάς σίγουροι ότι κα στηρίνελ-αμέν κο δύσκολα ντιβεσά. (Διαβάνεν Παροιμίες 22:​19) Καζόμ κα εξετάνας ο λάφια ι Ντεβλέσκε σο βακερντάς ο Αγγαίος ντα ο Ζαχαρίας ντα κα ντικχάς ο παράδειγμας του Έσδρα, κα απαντίνας ακαλέ ερωτησιέντε: Σαρ επηρεασάλε ο Ιουδαίοι σαρέ ανταλέ δυσκολιένταρ; Σόσκε πρέπει τι συνεχίνας τι τσσουβάς ο θέλημας ι Ντεβλέσκο πρώτα αμαρέ ζωγιάτε κο δύσκολα ντιβεσά; Ντα σαρ μπορίνασα τι κεράς πο ζουρανί αμαρί μπέσα κο Ιεχωβά κάνα ο πράγματα ισί δύσκολα;

ΣΑΡ ΕΠΗΡΕΑΣΑΛΕ Ο ΙΟΥΔΑΙΟΙ ΣΑΡΕ ΑΝΤΑΛΕ ΔΥΣΚΟΛΙΕΝΤΑΡ

4, 5. Σόσκε ο Ιουδαίοι μπέκιμ τι χασαρντέ ι χαρά σο τθερένας για τι χτίνεν ο ναός;

⁴ Κάνα ο Ιουδαίοι ερεσλέ κι Ιερουσαλήμ, τθερένας τι κερέν μπουτ μπουτί. Χτιντέ σουγκό ο θυσιαστήριος ι Ιεχωβάσκο ντα τσσουντέ ο θεμέλια ι ναόσκε. (Έσδρ. 3:1-3, 10) Αλλά χασαρντέ σουγκό ι χαρά σο τθερένας κι αρχή. Σόσκε; Εκτός κατά ναός, έπρεπε τι χτίνεν κχερά πουμένγκε, τι φυτίνεν κο χωράφια ντα τι ανέν ο αναγκαία πουμαρέ φαμιλιάτε. (Έσδρ. 2:68, 70) Επίσης, λένγκε ντουσμάνια τζάνας λέντζαρ κόντρα ντα κερντέ εκ πφιρνικανό σχέδιος για τι τσσιναβέν ο χτίσιμος ι ναόσκο.​—Έσδρ. 4:1-5.

⁵ Ο Ιουδαίοι δυσκολίντιβενας ι λοβέντζαρ-ντα. Αλλά να ισινέ μόνο ανταβά. Ι πφουβ λένγκι λιντάας-λα η Περσική Αυτοκρατορία. Κάνα μουλό ο Πέρσης βασιλιάς Κύρος κο 530 Π.Κ.Χ., ο γιαβέρ βασιλιάς, ο Καμβύσης, αρχισάλο εκ τζένγκι για τι λελ ι Αίγυπτος. Καζόμ τζάλας κι Αίγυπτος, λέσκε στρατιώτες μάλλον μανγκένας ζορίσαρ κατά Ισραηλίτες τι ντεν-λεν χαμπέ, πανί ντα εκ τθαν τι μπεσέν. Ανταβά κερέλας ι ζωή ι Ισραηλιτένγκι ατζέ πο δύσκολη. Κάνα κι θέση του Καμβύση αβιλό ο βασιλιάς Δαρείος Α΄, υπαρχίντιβενας ατζέ μπουτ προβλήματα. Υπαρχίντιβελας αναστάτωση ντα ο τζενέ νικιόνας κο ντρομά ντα ντένας βίκος. Σαρέ ανταλά σίγουρα κερντέ μπουτέ Ιουδαιόν σο βουρτισάλεας τι ανησυχίνεν σαρ κα ανένας ο αναγκαία πουμαρέ φαμιλιάτε. Επειδή ο πράγματα να ισινέ σταθερά, μερικοί Ιουδαίοι αμντίνενας ότι ανταβά να ισινέ ο βακίτι για τι χτίνεν ο ναός ι Ιεχωβάσκο.​—Αγγ. 1:2.

6. Καλά γιαβερά δυσκολίες νακχλέ ο Ιουδαίοι, ντα σο βακερντάς λένγκε ο Ζαχαρίας, σαρ βακερένα ο εδάφια Ζαχαρίας 4:6, 7;

⁶ Διαβάνεν Ζαχαρίας 4:6, 7. Εκτός κατά προβλήματα ι λοβέντζαρ ντα κατά αναστάτωση, ο ντουσμάνια ι Ιουδαιόνγκε τζάνας λέντζαρ κόντρα. Κο 522 Π.Κ.Χ., λένγκε ντουσμάνια πετυχιντέ τι τσσιναβέν ο χτίσιμος ι ναόσκο. Αλλά ο Ζαχαρίας βακερντάς κο Ιουδαίοι ότι ο Ιεχωβά κα χρησιμοποιήνελας Πο ζουρανό πνεύμας για τι νασκιαρέλ σαρέ ο εμπόδια. Κο 520 Π.Κ.Χ., ο βασιλιάς Δαρείος μουκχλάς-λεν τι συνεχίνεν τι λατσσαρέν ο ναός ντα ντινάς-λεν λοβέ για τι κερέν-λες. Επίσης ντινάς διαταγή κο κυβερνήτες οτθέ τι βοηθίνεν-λεν.​—Έσδρ. 6:1, 6-10.

7. Κάνα ο Ιουδαίοι τσσουντέ πρώτα ο θέλημας ι Ντεβλέσκο, καλά ευλογίες λιντέ;

⁷ Αντράλ κατά Αγγαίος ντα κατά Ζαχαρίας, ο Ιεχωβά ντινάς πο λάφι πι λαόστε ότι κα στηρίνελας-λεν άμα τσσουβένας πρώτα ο χτίσιμος ι ναόσκο. (Αγγ. 1:8, 13, 14· Ζαχ. 1:3, 16) Επειδή λιντέ ζορ κατά προφήτες, ο Ιουδαίοι αρχισάλε τι χτίνεν πάλι ο ναός κο 520 Π.Κ.Χ. ντα μπιτισκιαρντέ ο ναός πριν τι νακχέν παντς μπρεσά. Επειδή ο Ιουδαίοι τσσουντέ πρώτα ο θέλημας ι Ιεχωβάσκο παρόλο σο τθερένας δυσκολίες, ο Ιεχωβά στηριντάς-λεν. Ντινάς-λεν σο-ντα τθερένας ανάγκη για τι τζουβντιόν ντα βοηθιντάς-λεν τι ατσσόν πασέ λέστε. Οτθάρ, ντένας λατρεία κο Ιεχωβά χαράσαρ.​—Έσδρ. 6:14-16, 22.

ΣΥΝΕΧΙΝΕΝ ΤΙ ΤΣΣΟΥΒΕΝ Ο ΘΕΛΗΜΑΣ Ι ΝΤΕΒΛΕΣΚΟ ΠΡΩΤΑ ΤΟΥΜΑΡΕ ΖΩΓΙΑΤΕ

8. Σαρ βοηθίνενα-αμέν ο λάφια κο Αγγαίος 2:4 τι συνεχίνας τι τσσουβάς πρώτα ο θέλημας ι Ντεβλέσκο; (Ντικχέν ι υποσημείωση-ντα)

⁸ Καζόμ η μπαρί στεναχώρια αβέλα, ισί μπουτ σημαντικός τι ντας-αμέν γκοντί ότι χρειαζίντιβελα τι ντας καν κι εντολή τι βακεράς ο λατσσέ αμπέρια. (Μάρκ. 13:10) Όμως, μπέκιμ δυσκολίντιβασα τι τσσουβάς πρώτα αμαρό έργος άμα τθεράσα προβλήματα ι λοβέντζαρ ή τζάνα αμέντζαρ κόντρα κο έργος. Σο κα βοηθίνελ-αμέν τι τσσουβάς πρώτα ι Βασιλεία; Πρέπει τι αβάς σίγουροι ότι «ο Ιεχωβά σο κερέλα κουμάντος ι στρατόν»b ισί αμέντζαρ. Βοβ κα στηρίνελ-αμέν άμα συνεχίνασα τι τσσουβάς ι Βασιλεία πο οπρέ αμένταρ. Οτθάρ, να χρειαζίντιβελα τι νταραβέλ-αμέν τίποτα.​—Διαβάνεν Αγγαίος 2:4.

9, 10. Σαρ ντικχλάς εκ ζευγάρι καζόμ μπαγιά ισί ο λάφια ι Ιησούσκε κο Ματθαίος 6:33;

⁹ Ντικχέν σο αβιλό-πες με τον Ολέγκ ντα την Ιρίνα,c εκ ζευγάρι σο ισί σκαπανείς. Κάνα ακχαρντέ-πες εκχέ γιαβερέ τθεμέστε για τι βοηθίνεν εκ κχανγκιρί, χασαρντέ πουμαρί μπουτί επειδή λένγκο τθεμ τθερέλας προβλήματα ι λοβέντζαρ. Παρόλο σο περίπου εκ μπρες να τθερένας σταθερή μπουτί, νιωθίνενας συνέχεια ι αγάπη ι Ιεχωβάσκι ντα μπάζιμα λένγκε πφραλά ντα πφενιά βοηθίνενας-λεν. Σαρ ντένας-λεν πέρα παρόλο σο τθερένας ανταλά δυσκολίες; Ο Ολέγκ, σο κι αρχή νιωθίνελας πεσμέ ψυχολογικά, εξηγίνελα: «Προσπαθίναας τι κεράς μπουτ πράγματα κο έργος, ντα ανταβά βοηθιντάς-αμέν μα τι μπιστράς καβά ισί ο πο σημαντικός πράγμας αμαρέ ζωγιάτε». Καζόμ βοβ ντα λέσκι ρομνί συνεχίνενας τι ρόντεν μπουτιάκε, κερένας ο πο λατσσό σο μπορίνενας κο έργος.

¹⁰ Εκ ντιβές σο βουρτισάλε πουμαρέ κχερέστε σοράν κατά έργος, σικλιλέ ότι εκ λατσσό αμάλ λένγκο κερντάας ταξίδι περίπου 160 χιλιόμετρα για τι ανέλ λένγκε ντούι σακούλες ψώνια. Ο Ολέγκ βακερέλα: «Οντουβά ντιβές, νιωσάλαμ ατζέκ εκ φαρ καζόμ μπουτ φροντίνελα-αμέν ο Ιεχωβά ντα η κχανγκιρί. Ισινάμ σίγουροι ότι ο Ιεχωβά ποτές να μπιστρέλα πι υπηρετόν, ατζέ-ντα άμα νιωθίνενα ότι ο πράγματα ποτές να κα τζαν λατσσές λένγκε».​—Ματθ. 6:33.

11. Σο μπορίνασα τι μπεκλεντίνας άμα συνεχίνασα τι τσσουβάς πρώτα ο θέλημας ι Ντεβλέσκο;

¹¹ Ο Ιεχωβά μανγκέλα τι τσσουβάς πρώτα αμαρέ ζωγιάτε ο έργος τι κεράς μαθητέν, επειδή ανταβά σώνελα ζωές. Σαρ ντικχλάμ κι παράγραφος 7, ο Αγγαίος βακερντάς κο λαός κι Ντεβλέσκο τι αρχίνεν πάλι τι κερέν μπουτί κο ναός. Άμα κα κερένας-λες ανταβά, ο Ιεχωβά ντινάς πο λάφι ότι κα “μπουτσσαβέλας ευλογία”. (Αγγ. 2:18, 19) Αμέν-ντα μπορίνασα τι αβάς σίγουροι ότι ο Ιεχωβά κα ευλογίνελ αμαρέ προσπάθειες άμα κα τσσουβάς πρώτα ο έργος σο ντινάς-αμέν τι κεράς.

ΣΑΡ ΤΙ ΚΕΡΑΣ ΠΟ ΖΟΥΡΑΝΙ ΑΜΑΡΙ ΜΠΕΣΑ ΚΟ ΙΕΧΩΒΑ

12. Σόσκε χρειαζίντιβενας ζουρανί πίστη ο Έσδρας ντα ο Ιουδαίοι σο βουρτίνενας κι Ιερουσαλήμ;

¹² Κο 468 Π.Κ.Χ., ο Έσδρας κερντάς ταξίδι με τη δεύτερη ομάδα ι Ιουδαιόνγκι ντα νασλέ κατά Βαβυλώνα για τι τζαν κι Ιερουσαλήμ. Για τι κερέν ανταβά ταξίδι, ο Έσδρας ντα ο Ιουδαίοι σο κα βουρτίνενας κι Ιερουσαλήμ, έπρεπε τι τθερέν ζουρανί πίστη. Κα κερένας ταξίδι επικίνδυνε ντρομέντε, ντα κα ακχαρένας ο μπουτ χρυσός ντα ο ασήμι σο ντινάας-λεν ο βασιλιάς ι ναόσκε. Οτθάρ, μπέκιμ τι ισινέ εύκολος τι κερέν λένγκε επίθεση ο τσορά. (Έσδρ. 7:12-16· 8:31) Επίσης, αγαντέ ότι ούτε η ίδια η Ιερουσαλήμ να ισινέ αρακχαντί. Ο τζενέ μπεσένας εκ ακατέ εκ οκουτέ, ενώ ο ντουβάρια ντα ο μπαρέ πόρτες κι Ιερουσαλήμ να ισινέ σε λατσσί κατάσταση. Σο σικλιάσα κατά Έσδρας σο κα βοηθίνελ-αμέν τι κεράς πο ζουρανί αμαρί μπέσα κο Ιεχωβά;

13. Σαρ κερντάς ο Έσδρας ατζέ πο ζουρανί πι μπέσα κο Ιεχωβά; (Ντικχέν ι υποσημείωση-ντα)

¹³ Ο Έσδρας ντικχλάας σαρ στηρίνελας ο Ιεχωβά Πι λαός κο δύσκολα ντιβεσά. Μερικά μπρεσά πο τζανγκλέ, κο 484 Π.Κ.Χ., ο Έσδρας μάλλον τζουβντιόλας κι Βαβυλώνα κάνα ο βασιλιάς Ασσουήρης ντινάς διαταγή τι μουνταρέν σαρέ ι Ιουδαιόν κατά Περσική Αυτοκρατορία. (Εσθήρ 3:7, 13-15) Η ζωή του Έσδρα ντα σαρέ ι Ιουδαιόνγκι ισινέ σε κίνδυνος! Κάνα ασουντέ-λες, ο Ιουδαίοι τσσιναντέ τι χαν ντα αρχισάλε τι ροβέν καζόμ προσευχίντιβενας κο Ιεχωβά για βοήθεια. (Εσθήρ 4:3) Ανέν τουμαρέ γκοντιάτε σαρ νιωσάλε ο Έσδρας ντα ο γιαβερά Ιουδαίοι κάνα ο πράγματα αλλαξάλε ντιπ ντα τελικά, οντουλά σο μανγκένας τι μουνταρέν ι Ιουδαιόν, μουλέ βον! (Εσθήρ 9:1, 2) Οντουβά σο νακχλό ο Έσδρας οντουλέ δύσκολε ντιβεσέντε σίγουρα βοηθιντάς-λες τι αβέλ έτοιμος γιαβερέ δυσκολιένγκε σο κα αβένας-πες κο μέλλον. Ντα αντικάς ντέλας ατζέ πο μπουτ μπέσα κο Ιεχωβά ντα ισινέ σίγουρος ότι μπορίνελα τι αρακχαβέλ Πι λαός.d

14. Σο σικλιλί εκ πφεν κάνα ο Ιεχωβά φροντίνελας-λα κο δύσκολα ντιβεσά;

¹⁴ Κάνα ντικχάσα σαρ φροντίνελα-αμέν ο Ιεχωβά κο δύσκολα ντιβεσά, κεράσα ατζέ πο ζουρανί αμαρί μπέσα λέστε. Ντικχέν σο αβιλό-πες κι Αναστασία, σο τζουβντιόλα κι Ανατολική Ευρώπη. Μουκχλάς πι μπουτί επειδή μανγκέλας τι ατσσόλ ουδέτερη σε εκ πολιτικός ζήτημας. Βόι βακερέλα: «Ισινέ η πρώτη φαρ μι ζωγιάτε σο να τθεράβας ιτς λοβέ». Ντα σοράν βακερέλα: «Μουκχλόμ ο πράγματα κο Ιεχωβά ντα ντικχλόμ καζόμ σουκάρ φροντίνελας-μαν. Άμα ποτές κα χασαράβ πάλι μι μπουτί, να κα νταράβ. Αφού μο Ντατ σο ισί κο ουρανός φροντίνελα-μαν αντιβές, κα φροντίνελ-μαν εμ γιαβίν».

15. Σο βοηθιντάς τον Έσδρα τι συνεχίνελ τι ντελ μπέσα κο Ιεχωβά; (Έσδρας 7:27, 28)

¹⁵ Ο Έσδρας ντικχέλας ο βας ι Ιεχωβάσκο πι ζωγιάτε. Κάνα ο Έσδρας ανέλας πι γκοντιάτε καζόμ φαρ φροντιντάς-λες ο Ιεχωβά κο παρελθόν, ανταβά βοηθίνελας-λες τι συνεχίνελ τι ντελ λέσκε μπέσα. Τσσουβέν σημασία κο λάφι «ο βας ι Ιεχωβάσκο, μι Ντεβλέσκο, ισινέ οπρά-μάντε». (Διαβάνεν Έσδρας 7:​27, 28) Ο Έσδρας βακερντάς κάτι ασακό ατζέ σιοβ φαρ κο βιβλίος σο γραφιντάς.​—Έσδρ. 7:6, 9· 8:18, 22, 31.

16. Καλέ περιπτωσιέντε μπορεί τι ντικχάς πο ξεκάθαρα ο βας ι Ντεβλέσκο αμαρέ ζωγιάτε; (Ντικχέν ι φωτογραφία-ντα)

¹⁶ Ο Ιεχωβά μπορίνελα τι βοηθίνελ-αμέν κάνα τθεράσα εκ δυσκολία. Για παράδειγμας, κάνα μανγκάσα αμαρέ αφεντικόσταρ άδεια τι τζας κι συνέλευση ή κάνα μανγκάσα τι αλλάνας ο σαάτια σο κεράσα μπουτί για τι τζας σαρέ κο συναθροίσεις, μπορίνασα τι ντικχάς μπαγιά ο βας ι Ιεχωβάσκο αμαρέ ζωγιάτε. Μπορεί τι σαστίνας κάνα κα ντικχάς ότι ο πράγματα κα τζαν λατσσές. Αντικάς, κα ντας πο μπουτ μπέσα κο Ιεχωβά.

17. Σαρ σικαντάς ο Έσδρας ταπεινότητα κο δύσκολα ντιβεσά; (Ντικχέν ι φωτογραφία κι ανγκλαϊνί σελίδα)

¹⁷ Ο Έσδρας προσευχίντιβελας ταπεινά κο Ιεχωβά για βοήθεια. Κάθε φαρ σο νιωθίνελας ότι τασαβένας-λες ο ευθύνες σο τθερέλας, ο Έσδρας προσευχίντιβελας ταπεινά κο Ιεχωβά. (Έσδρ. 8:21-23· 9:3-5) Επειδή ο Έσδρας στηρίντιβελας κο Ιεχωβά, ο γιαβερά τζενέ στηρίνενας-λες ντα μανγκένας τι τθερέν ι πίστη σο τθερέλας βοβ. (Έσδρ. 10:1-4) Κάνα νιωθίνασα ότι τασαβένα-αμέν ο ανησυχίες ντα σκεφτίνασα σαρ κα ανάς ο αναγκαία αμαρέ φαμιλιάτε ή σαρ κα αρακχαβάς αμαρί φαμιλί, πρέπει τι προσευχίντιβας κο Ιεχωβά, ντα τι αβάς σίγουροι ότι κα ασουνέλ-αμέν.

18. Σο κα βοηθίνελ-αμέν τι κεράς πο ζουρανί αμαρί μπέσα κο Ιεχωβά;

¹⁸ Άμα μανγκάσα ταπεινά ι βοήθεια ι Ιεχωβάσκι ντα μουκχάσα αμαρέ πφραλέν ντα πφενίν τι στηρίνεν-αμέν, κα κεράς πο ζουρανί αμαρί μπέσα κο Ιεχωβά. Η Έρικα, σο τθερέλα τρινέ τσσαβέν, συνεχιντάς τι ντελ μπέσα κο Ιεχωβά ατζέ-ντα κάνα νακχλάς μπαρέ βάσανα. Αντρέ χάνικ βακιτίστε, χασαρντάς πι χουρντιά σο να μπιάντιλιας ατζέ ντα πι ρομές. Καζόμ σκεφτίνελα οντουλά σο νακχλάς, βακερέλα: «Να αβέλα-πες τι τζανές πο τζανγκλέ σαρ κα βοηθίνελ-τουτ ο Ιεχωβά. Η βοήθεια αβέλα τροπόντζαρ σο να μπεκλεντίνεσα. Σικλιλόμ ότι ο απαντήσεις μπουτέ προσευχιέντε λιντόμ-λεν από κάτι σο βακερντέ ή κερντέ μο αμαλά. Άμα πουτράβα μο γκι μι αμαλέντε, μπορίνενα τι βοηθίνεν-μαν πο εύκολα».

ΑΤΣΣΙΚΙΑΡΕΝ ΤΟΥΜΑΡΙ ΜΠΕΣΑ ΚΟ ΙΕΧΩΒΑ ΜΕΧΡΙ ΚΟ ΤΕΛΟΣ

19, 20. Σο σικλιάσα κατά Ιουδαίοι σο να μπορίνενας τι βουρτίνεν κι Ιερουσαλήμ;

¹⁹ Σικλιάσα κάτι σημαντικός εμ κατά Ιουδαίοι σο να μπορίνενας τι βουρτίνεν κι Ιερουσαλήμ. Μερικοί ναστί βουρτίνενας επειδή ισινέ πφουρέ, νασφαλέ ή τθερένας υποχρεώσεις κι φαμιλί. Αλλά ντινέ μπουτ πουμαρέ πραγματένταρ οντουλέντε σο βουρτισάλε για τι χτίνεν ο ναός. (Έσδρ. 1:5, 6) Ντικχίντιβελα ότι περίπου 19 μπρεσά από αζομάν σο βουρτισάλι η πρώτη ομάδα ι Ιουδαιόνγκι κι Ιερουσαλήμ, οντουλά σο ατσσιλέ κι Βαβυλώνα συνεχίνενας τι μπουτσσαβέν πράγματα κι Ιερουσαλήμ.​—Ζαχ. 6:10.

²⁰ Ατζέ-ντα άμα νιωθίνασα ότι να μπορίνασα τι κεράς μπουτ πράγματα κι υπηρεσία κι Ιεχωβάσκι, μπορίνασα τι αβάς σίγουροι ότι βοβ εκτιμίνελα ο μπαρέ προσπάθειες σο κεράσα για τι ανάς λέσκε χαρά. Σαρ τζανάσα-λες ανταβά; Κο μπρεσά σο τζουβντιόλας ο Ζαχαρίας, ο Ιεχωβά μανγκλάς πι προφητίσταρ τι κερέλ εκ στέμμας κατά χρυσός ντα κατά ασήμι σο μπουτσσαντέ ο Ιουδαίοι σο ισινέ κι Βαβυλώνα. (Ζαχ. 6:11) Ανταβά εντυπωσιακός «στέμμας» κα ανέλας κι “γκοντί” κι Ιεχωβάσκι ο μπουτ πράγματα σο ντινέ. (Ζαχ. 6:14) Μπορίνασα τι αβάς σίγουροι ότι ο Ιεχωβά ποτές να κα μπιστρέλ ο προσπάθειες σο κεράσα αντράλ αμαρέ γκίσταρ για τι υπηρετίνας-λες κο δύσκολα ντιβεσά.​—Εβρ. 6:10.

21. Σο κα βοηθίνελ-αμέν τι ντας μπέσα κο Ιεχωβά σο-ντα δυσκολίες τι νακχάς κο μέλλον;

²¹ Ισί σίγουρος ότι κα συνεχίνας τι τθεράς δυσκολίες ανταλέ τελευταίε ντιβεσέντε, ντα ο πράγματα μπέκιμ τι αβέν χειρότερα κο μέλλον. (2 Τιμ. 3:1, 13) Όμως, να χρειαζίντιβελα τι χαλ-αμέν η ανησυχία. Ντεν-τουμέν γκοντί σο βακερντάς ο Ιεχωβά πι λαόσκε κο μπρεσά σο τζουβντιόλας ο Αγγαίος: «Με ισινόμ τουμέντζαρ... Μα νταρέν». (Αγγ. 2:4, 5) Αμέν-ντα μπορίνασα τι αβάς σίγουροι ότι ο Ιεχωβά κα αβέλ αμέντζαρ άμα κεράσα ο πο λατσσό σο μπορίνασα για τι κεράς λέσκο θέλημας. Κάνα κεράσα αμαρέ ζωγιάτε ο πράγματα σο σικλιλάμ κατά προφητείες του Αγγαίου ντα του Ζαχαρία ντα κατά παράδειγμας του Έσδρα, κα ατσσικιαράς αμαρί μπέσα κο Ιεχωβά σο-ντα δυσκολίες τι νακχάς κο μέλλον.