Σαρ Μπορίνενα τι Κερέν εκ Μπιαβ σο κα Δοξάνελ ι Ιεχωβάς

1, 2. Σο μανγκέλα ο Ιεχωβά για το ντιβές σο κα παντρίνεν;

ΜΗΠΩΣ νισανλισάλεν ντα ετοιμάνενα τι παντρίνεν; Άμα βα, πρέπει τι αβέν μπουτ χαρούμενοι! Μπέκιμ τθερένα τι κερέν μπουτ πράγματα για τι ετοιμάνεν τουμαρό μπιαβ. Ο Ιεχωβά ενδιαφερίντιβελα μπουτ τουμαρέ μπιαβέσκε. Μανγκέλα τι νακχέν λατσσές κο ντιβές τουμαρέ μπιαβέσκοa ντα τι τζουβντιόν ευτυχισμέ για πάντα γιεκ.​—Παρ. 5:18· Άσμ. Ασμ. 3:11.

² Ισί μπουτ σημαντικός τουμαρό μπιαβ τι δοξάνελ ι Ιεχωβάς. Σόσκε μπορίνασα τι βακεράς-λες ανταβά; Ντα σαρ μπορίνενα τι κερέν-λες; Ανταβά μάθημας ισί πο μπουτ οντουλένγκε σο ετοιμάνενα πουμαρό μπιαβ. Όμως οντουλά σο κα ντικχάς κα βοηθίνεν-αμέν σαριλέν τι ντας δόξα κο Ιεχωβά άμα ισινάμ καλεσμέ σε εκ μπιαβ ή άμα μανγκένα αμένταρ συμβουλές για το ντιβές πουμαρέ μπιαβέσκο.

ΣΟΣΚΕ ΠΡΕΠΕΙ ΤΙ ΝΤΑΣ ΔΟΞΑ ΚΟ ΙΕΧΩΒΑ;

3. Σο πρέπει τι σκεφτίνελ εκ ζευγάρι κάνα ετοιμάνελα πο μπιαβ ντα σόσκε;

³ Κάνα ο ζευγάρια ετοιμάνενα πουμαρό μπιαβ πρέπει τι σκεφτίνεν ο συμβουλές σο βακερέλα ο Ιεχωβά πι Λαφίστε. Σόσκε; Επειδή ο Ιεχωβά λατσσαρντάς ο μπιαβ. Βοβ κερντάς ο πρώτος μπιαβ του Αδάμ ντα της Εύας. (Γέν. 1:28· 2:24) Επειδή ο Ιεχωβά κερντάς ο μπιαβ, εκ ζευγάρι σο ετοιμάνελα τι παντρίνελ πρέπει τι αβέλ σίγουρος ότι λένγκο μπιαβ κα ντελ δόξα κο Ιεχωβά.

4. Σο γιαβέρ λόγος τθερένα ο ζευγάρια για τι ντεν δόξα κο Ιεχωβά κο ντιβές πουμαρέ μπιαβέσκο;

⁴ Υπαρχίντιβενα γιαβερά-ντα σημαντικοί λόγοι σο πρέπει τι σκεφτίνεν καλά αισθήματα κα τθερέλ ο Ιεχωβά για το ντιβές σο κα παντρίνεν. Βοβ ισί τουμαρό Ντατ ντα ο πο λατσσό Αμάλ σο τθερένα. (Εβρ. 12:9) Σίγουρα μανγκένα τι συνεχίνεν τι αβέν λατσσέ αμαλά λέσαρ. Να κα μανγκένας ποτές τι αβέλ-πες κάτι οντουβά ντιβές ή εκ γιαβέρ ντιβές σο κα ντουκχαβέλας τουμαρέ Αμαλές. (Ψαλμ. 25:14) Σκεφτίνεν οντουλά σο κερέλα ακανά ο Ιεχωβά τουμένγκε ντα οντουλά σο κα κερέλ κο μέλλον. Ανταβά κα κερέλ-τουμέν τι μανγκέν τι σικαβέν τουμαρί εκτίμηση ντα τι αβέν σίγουροι ότι ο ντιβές τουμαρέ μπιαβέσκο κα δοξάνελ ι Ιεχωβάς.​—Ψαλμ. 116:12.

ΣΑΡ ΜΠΟΡΙΝΕΝΑ ΤΙ ΔΟΞΑΝΕΝ Ι ΙΕΧΩΒΑΣ;

5. Σαρ μπορίνελα η Αγία Γραφή τι βοηθίνελ ο ζευγάρια τι λεν λατσσέ αποφάσεις πουμαρέ μπιαβέσκε;

⁵ Η Αγία Γραφή να τθερέλα κανόνες σαρ πρέπει τι αβέλ εκ μπιαβ ή ο τραπέζι σοράν σο μπορεί τι κερέν κάποιοι. Ο κάθε ζευγάρι κερέλα πο μπιαβ αντικάς σαρ μπορίνελα, σαρ συνηθίντιβελα οτθέ σο μπεσέλα ντα σαρ μπεϊντίνελα. Αλλά ο αληθινοί Χριστιανοί πρέπει τι ντεν καν κο νόμους σο τσσουβέλα ο κράτος ι μπιαβέσκε. (Ματθ. 22:21) Εκ ζευγάρι σο μουκχέλα ο συμβουλές ι Γραφιάκε τι βοηθίνεν-λες τι ετοιμάνελ πο μπιαβ ντέλα δόξα κο Ιεχωβά ντα κερέλα λέσκο γκι. Τουμέν καλά συμβουλές χρειαζίντιβελα τι τθερέν τουμαρέ γκοντιάτε;

6. Σόσκε ισί σημαντικός εκ ζευγάρι τι ντελ καν κο νόμους σο τσσουβέλα ο κράτος ι μπιαβέσκε;

⁶ Ντεν καν κο νόμους σο τσσουβέλα ο κράτος. (Ρωμ. 13:1, 2) Κο πο μπουτ τθεμά, εκ ζευγάρι πρέπει τι κερέλ ο χαρτιά σο χρειαζίντιβενα για τι αβέλ νόμιμα παντριμέ. Πρέπει τι σικλιόλ οτθέ σο μπεσέλα καλά χαρτιά χρειαζίντιβενα. Άμα μανγκέλα βοήθεια ανταλέσκε, μπορίνελα τι πουτσέλ ι πρεσβυτερόν.

7. Σαρ πρέπει τι αβέλ ο ντιβές τουμαρέ μπιαβέσκο ντα σαρ μπορίνελα τι αβέλ-πες ανταβά;

⁷ Τι αβέν σίγουροι ότι ο ντιβές τουμαρέ μπιαβέσκο κα σικαβέλ σεβασμός σαριλέντε. (1 Κορ. 10:31, 32) Μαρέν-τουμέν για τι τθερέλ ο ντιβές τουμαρέ μπιαβέσκο ο πνεύμας ι Ντεβλέσκο ντα όχι ι ντουνιάσκο. (Γαλ. 5:19-26) Επειδή ο τζαμουτρό κα αβέλ ο σορό ι νεβέ φαμιλιάκο τθερέλα ι ευθύνη τι αβέλ ο μπιαβ εκχέ σουκάρ τροπόσαρ ντα τι σικαβέλ σεβασμός σαριλέντε. Σαρ μπορίνελα εκ μπιαβ τι αβέλ-πες αντικάς; Εκ πφραλ κερέλα με σεβασμός ντα αγάπη εκ ομιλία σο βασίντιβελα κι Αγία Γραφή. Ανταγιά ομιλία βοηθίνελα σαρέ οντουλέν σο ασουνένα-λα τι αγαβέν ότι ο μπιαβ ισί εκ δώρος κατά Ιεχωβά. Επίσης, βοηθίνελα σαρέ οντουλέν σο κα αβέν τι ντικχέν καζόμ σημαντικός ισί εκ μπιαβ. Οτθάρ ο πο μπουτ ζευγάρια τραμπίνενα τι κερέν-λα σε εκ Αίθουσα αμαρί, άμα αβέλα-πες. Άμα κα αποφασίνεν τι χρησιμοποιήνεν εκ Αίθουσα αμαρί, πρέπει τι γραφίνεν εκ γράμμας κο πρεσβυτέρους για τι πουτσέν-λεν άμα αβέλα-πες τι κερέν-λες ανταβά.

8. Άμα σκεφτίνενα τι κερέν τραπέζι, σαρ μπορίνενα τι αβέν σίγουροι ότι κα ανέλ δόξα κο Ιεχωβά; (Ρωμαίους 13:13)

⁸ Διαβάνεν Ρωμαίους 13:13. Άμα κα τραμπίνεν τι κερέν τραπέζι, σαρ μπορίνενα μα τι επηρεάντιβεν κατά πνεύμας ι ντουνιάσκο; Ο λάφι «τι γλεντίνας χωρίς όρια» μανγκέλα τι σικαβέλ τζενέν σο γκιντίντιβενα ντα πίνα μπουτ μολ ντα τσσουβένα γκιλιά μέχρι αργά ιράτ. Άμα κα τραμπίνεν τι τθερέν μολιά, πρέπει τι σκεφτίνεν πο τζανγκλέ σο κα κερέν για τι αβέν σίγουροι ότι καέκ να κα πιλ μπουτ.b Επίσης άμα σκεφτίνενα τι τσσουβέν γκιλιά, προσοχίνεν μα τι αβέν αζόμ ζουρανές σο κα χρειαζίντιβελ τι ντεν βίκος για τι ασουνέν ο εκ ι γιαβερές. Τραμπίνεν προσεκτικά σο γκιλιά κα τσσουβέν ντα ντικχέν προσεκτικά ο λάφια σο τθερένα για μα τι προσβαλίντιβελ καέκ.

9. Σο πρέπει τι ανέλ πι γκοντιάτε ο ζευγάρι κάνα κάποιος μανγκέλα τι κερέλ λάφι, ή τι κερέλ κάτι γιαβέρ κο τραπέζι;

⁹ Μερικέ τθεμέντε, κάνα αβέλα-πες ο τραπέζι, μπορεί ο αμαλά ντα η φαμιλί ι ζευγαρίσκι τι τραμπίνεν τι ιστίν ντα τι βακερέν ανγκλάλ κο γιαβερά χάνικ λάφια ι ζευγαρίσκε. Επίσης, μπορεί τι τσσουβέν εκ βίντεος ή φωτογραφίες ι ζευγαρίσκε ή κάτι γιαβέρ ασακό. Ανταλά πράγματα μπορίνενα τι κερέν ο ντιβές ι μπιαβέσκο ατζέ πο σουκάρ. Όμως τθερέν τουμαρέ γκοντιάτε οντουβά σο κα σικάντιβελ τι ντελ ζορ ι γιαβερέν. (Φιλιπ. 4:8) Πουτσέν τουμαρό νεαυτός: “Κα σικαβέλ σεβασμός ι γιαβερένγκε; Κα σικαβέλ σεβασμός ι μπιαβέσκε;” Ντα μα μπιστρέν τι σκεφτίνεν: “Κα ντελ δόξα κο Ιεχωβά;” Ατζέ-ντα άμα ισί λατσσό τι κερέλ κάποιος σακάς κάνα βακερέλα χάνικ λάφια ανγκλάλ κο γιαβερά ι ζευγαρίσκε, δεν πρέπει τι βακερέλ κάτι μπίλατζανο. (Εφεσ. 5:3) Κον-ντα τι μανγκέλ τι ιστίλ ντα τι κερέλ λάφι, τι αβέν σίγουροι ότι να κα βακερέλ κάτι σο να μανγκένα τι βακέρντιβελ.

10. Σόσκε εκ ζευγάρι πρέπει τι σικαβέλ ταπεινότητα κάνα ετοιμάνελα πο μπιαβ; (1 Ιωάννη 2:15-17)

¹⁰ Τι αβέν ταπεινοί. (Διαβάνεν 1 Ιωάννη 2:15-17) Ο Ιεχωβά εκτιμίνελα-λες κάνα λέσκε υπηρέτες μανγκένα τι γκερέν ι προσοχή λέστε αντίς τι ταρτίνεν μπέτι τροπόσαρ ι προσοχή πουμαρέ νεαυτόστε. Οτθάρ, ο ταπεινοί Χριστιανοί να μανγκένα τι κερέν εκ μπουτ πααλίς μπιαβ ντα τι “ισαρέν-πες ι πραγματένγκε σο τθερένα”. Σόσκε ισί λατσσό τι κερέν εκ απλός μπιαβ; Ντικχέν ο παράδειγμας του Μάικ σο μπεσέλα κι Νορβηγία. Βοβ βακερέλα: «Να τσσουντάμ αμένγκε χρέη ντα αντικάς μπορίναας τι συνεχίνας ο σκαπανικός. Αμαρό μπιαβ ισινέ απλός αλλά εμ σουκάρ». Εκ πφεν η Τάμπιθα κατά Ινδία βακερέλα: «Να τθεράας μπουτ άγχος. Επειδή αμαρό μπιαβ ισινέ απλός, να χρειαζίντιβελας τι κανονίνας μπουτ πράγματα ντα αντικάς αρακχάας-λεν πο εύκολα ο εκ ι γιαβερέσαρ».

11. Σαρ μπορίνενα εκ μπορί ντα εκ τζαμουτρό τι σικαβέν σεβασμός κάνα σκεφτίνενα σο κα ιρίν ντα σαρ κα λατσσαρέν-πες; (Ντικχέν ο φωτογραφίες-ντα)

¹¹ Σο κα ιρίν; Σίγουρα μανγκένα τι αβέν σουκάρ. Ατζέ-ντα κο πουρανέ μπρεσά, η μπορί ντα ο τζαμουτρό σκεφτίνενας λατσσές σο κα ιρίν ντα σαρ κα λατσσαρέν-πες. (Ησ. 61:10) Άρα, ανταβά σο κα ιρίν τουμαρέ μπιαβέστε μπορεί τι αβέλ χάνικ διαφορετικός οντουλέσταρ σο κα ιρίνας εκ γιαβέρ ντιβές, αλλά πρέπει τι αβέλ σεμνός. (1 Τιμ. 2:9) Μα μουκχέν ο σέα ή τουμαρί εμφάνιση τι αβέν ο πο σημαντικά πράγματα κο ντιβές σο κα παντρίνεν.​—1 Πέτρ. 3:3, 4.

12. Σόσκε εκ ζευγάρι δεν πρέπει τι κερέλ κάτι σο ισί συνηθισμέ αλλά τζάλα κόντρα κι Γραφή;

¹² Νασέν ντουρ κατά έθιμα σο τζάνα κόντρα κι Γραφή. (Αποκ. 18:4) Κο μπιαβά αντιβές μπουτ φαρ αβένα-πες πράγματα σο τθερένα τι κερέν με την ψεύτικη θρησκεία ντα γιαβερέ μπενγκαλέ πραγματέντζαρ. Ο Ιεχωβά όμως βακερέλα αμένγκε ξεκάθαρα τι νασάς ντουρ ανταλέ μελαλέ πραγματένταρ. (2 Κορ. 6:14-17) Μπορεί τι υπαρχίντιβενα κάποια έθιμα οτθέ σο μπεσένα σο να τζανένα άμα πρέπει τι κερέν-λεν ή όχι. Πριν τι αποφασίνεν άμα κα κερέν-λεν τουμαρέ μπιαβέστε, ρόντεν κατάρ αστάρντιβενα ντα σο βακερέλα η Γραφή ανταλένγκε.

13. Σαρ μπορίνελα εκ ζευγάρι τι μοιάζελ κο Ιεχωβά κάνα λέλα δώρα;

¹³ Ισί συνηθισμέ οτθέ σο μπεσένα τι ντεν δώρος ο καλεσμέ κο ζευγάρι σο παντρίνελα; Ανάλογα με το λοβέ σο τθερέλα εκ τζενό σο ισί καλεσμέ μπορίνελα τι αποφασίνελ σο δώρος κα ντελ. Ισί μπαγιά ότι η Γραφή βακερέλα ι Χριστιανόνγκε ότι ισί λατσσό τι ντεν κο γιαβερά ντα χαιρίνενα τι κερέν-λες ανταβά. (Παρ. 11:25· Πράξ. 20:35) Όμως να κα μανγκάας αμαρέ καλεσμέ τι νιωθίνεν ότι ισί υποχρεωμέ τι ντεν κάτι ή τι κεράς-λεν τι νιωθίνεν μπέτι άμα να μπορίνενα τι ντεν εκ πααλίς δώρος. Μοιάζασα κο Ιεχωβά κάνα σικαβάσα εκτίμηση όταν ο τζενέ ντένα-αμέν κάτι όχι επειδή πρέπει αλλά επειδή μανγκένα-λες.​—2 Κορ. 9:7.

ΣΑΡ ΜΠΟΡΙΝΕΝΑ ΤΙ ΓΛΙΤΩΝΕΝ Ο ΔΥΣΚΟΛΙΕΣ Ή ΤΙ ΝΑΚΧΑΒΕΝ-ΛΕΝ

14. Καλά δυσκολίες τθερένα κάποια ζευγάρια;

¹⁴ Μπορεί τι τθερέν δυσκολίες καζόμ προσπαθίνενα τι ετοιμάνεν εκ μπιαβ σο κα δοξάνελ ι Ιεχωβάς. Για παράδειγμας μπορεί τι δυσκολίντιβενα τι κερέν εκ απλός μπιαβ. Ο Τσάρλι σο μπεσέλα κο Νησιά Σολομώντος βακερέλα: «Ισινέ μπουτ δύσκολος τι αποφασίνας κας κα καλίνας κο τραπέζι. Τθεράσα μπουτέ αμαλέν, ντα οτθέ σο μπεσάσα σαρέ ο καλεσμέ μπεκλεντίνενα τι αβέν κο τραπέζι!» Η Τάμπιθα βακερέλα: «Οτθέ σο τζουβντιάβα συνηθίντιβελα τι κερέν μπαρέ τραπέζια. Λιντάς χρόνος αμαρέ νταντένγκε ντα νταΐνγκε τι δεχτίνεν ότι αποφασιντάμ τι καλίνας σάντε 100 τζενέν περίπου». Η Σάρα κατά Ινδία, βακερέλα: «Μερικά τζενέ τσσουβένα μπαρί σημασία καζόμ λοβέ τθερένα ντα σο σκεφτίνενα ο γιαβερά λένγκε. Μο ξαδέλφια κερντέας εκ πααλίς μπιαβ, ντα νιωσάλομ ότι έπρεπε με-ντα τι κεράβ εκ ατζέ πο πααλίς μπιαβ». Σο μπορίνελα τι βοηθίνελ-τουμέν τι νακχαβέν ανταλά ντα γιαβερά δυσκολίες;

15. Σόσκε πρέπει τι προσευχίντιβεν μπουτ φαρ κάνα ετοιμάνενα τουμαρό μπιαβ;

¹⁵ Τι κερέν προσευχή μπουτ φαρ καζόμ ετοιμάνενα τουμαρό μπιαβ. Μπορίνενα τι κερέν προσευχή κο Ιεχωβά για κάθε απόφαση σο πρέπει τι λεν ντα για κάθε πράγμας σο ανησυχίνελα-τουμέν. (Φιλιπ. 4:6, 7) Μπορίνενα τι μανγκέν λέσταρ τι βοηθίνελ-τουμέν τι λεν λατσσέ αποφάσεις ντα τι ατσσόν ήρεμοι κάνα ανησυχίνενα. Επίσης μανγκέν κατά Ντεβέλ τι ντελ-τουμέν θάρρος κάνα αποφασίνενα κάτι διαφορετικός ανταλέσταρ σο μανγκένα ο γιαβερά τι κερέν. (1 Πέτρ. 5:7) Τουμαρί μπέσα κο Ιεχωβά κα μπαριόλ καζόμ κα ντικχέν τι απαντίνελ κο προσευχές τουμαρέ. Η Τάμπιθα βακερέλα: «Μο νισανλίς ντα με ανησυχίναας μήπως να κα μανγκάας ο ίδια πράγματα ή να κα συμφωνίναας οντουλέντζαρ σο κα μανγκένας αμαρέ φαμιλιά. Οτθάρ, κάθε φαρ σο μπεσάας τι συζητίνας σαρ κα κεράς αμαρό μπιαβ, αρχίναας με εκ προσευχή. Νιωσάλαμ μπαγιά ι βοήθεια ι Ιεχωβάσκι ντα τθεράας ειρήνη ο εκ ι γιαβερέσαρ ντα αμαρέ φαμιλίντζαρ».

16, 17. Σαρ μπορίνελα ο ζευγάρι τι κερέλ λάφι με σεβασμός κάνα ετοιμάνελα πο μπιαβ;

¹⁶ Κερέν λάφι με σεβασμός ο εκ κο γιαβέρ ντα τουμαρέ φαμιλίντε. (Παρ. 15:22) Σαρ ζευγάρι, κα χρειαζίντιβελ τι λεν μπουτ αποφάσεις για το ντιβές τουμαρέ μπιαβέσκο. Πρέπει τι τραμπίνεν εκ ντιβές σο κα κερέν τουμαρό μπιαβ, τι αποφασίνεν καζόμ λοβέ κα χαλαβέν, κας κα καλίνεν ντα μπουτ γιαβερά-ντα πράγματα. Πριν τι λεν εκ απόφαση, ντικχέν γιεκ σο επιλογές τθερένα ντα συζητίνεν καλά συμβουλές κατά Γραφή μπορίνενα τι βοηθίνεν-τουμέν. Επίσης μανγκέν συμβουλές από γκοντιαβέρ ζευγάρια σο ισί λατσσέ παραδείγματα. Κάνα συζητίνενα κορκορέ ή τουμαρέ φαμιλίντζαρ οντουλένγκε σο μανγκένα τι κερέν, τι αβέν ευγενικοί, λογικοί ντα τι μπορίνεν τι αλλάνεν τουμαρί άποψη. Για παράδειγμας, κάνα τουμαρέ νταντά ντα νταγιά μανγκένα τι κερέν κάτι κο μπιαβ τουμαρό σο ντικχίντιβελα λογικός, προσπαθίνεν τι κερέν-λες. Ανταβά ισί εκ μπουτ σημαντικός ντιβές εμ λένγκε-ντα. Άμα να μπορίνενα τι κερέν οντουλά σο μανγκένα τουμένταρ, εξηγίνεν λένγκε λατσσιμάσαρ σόσκε να μπορίνενα. (Κολ. 4:6) Εξηγίνεν ξεκάθαρα κο τζενέ τουμαρέ φαμιλιάκε ότι ο πο σημαντικός πράγμας τουμένγκε ισί τι αβέλ εκ χαρούμενος ντιβές σο κα δοξάνελ ι Ιεχωβάς.

¹⁷ Κάνα εξηγίνενα τουμαρέ φαμιλίνγκε σο σκεφτίνενα τι κερέν, ανταβά μπορεί τι αβέλ ατζέ πο δύσκολος άμα νανέ κι αλήθεια, αλλά μπορίνενα τι καταφερίνεν-λεν. Εκ πφραλ κατά Ινδία, ο Σάντος βακερέλα: «Αμαρέ φαμιλιά μανγκένας τι κεράς διάφορα έθιμα σο τθερένα τι κερέν με τη θρησκεία λένγκι, τον Ινδουισμό. . . . Λιντάς-αμέν μπουτ χρόνος για τι εξηγίνας λένγκε αμαρέ αποφάσεις. Κερντάμ κάποιες αλλαγές σο πακιάας ότι μπορίναας τι κεράς-λεν χωρίς τι στεναχωρίνας ι Ιεχωβάς. Για παράδειγμας αλλαντάμ ο χαμπέ σο σκεφτίναας τι τθεράς ντα τσσουντάμ ο χαμπέ σο μανγκένας βον τι τθεράς κο τραπέζι. Επίσης αποφασιντάμ μα τι τσσουβάς γκιλιά ντα μα τι κχελάς επειδή μι φαμιλί νανέ συνηθισμέ ασακέ πραγματέντε».

18. Σο μπορίνελα τι βοηθίνελ-τουμέν τι αβέν σίγουροι ότι ο ντιβές τουμαρέ μπιαβέσκο κα τζαλ λατσσές; (1 Κορινθίους 14:40) (Ντικχέν ι φωτογραφία-ντα)

¹⁸ Ετοιμάνεν ο ντιβές τουμαρέ μπιαβέσκο προσεκτικά. Άμα κα αβέν σαρέ ο πράγματα εκχέ σειράτε, κα τθερέν πο χάνικ άγχος κο ντιβές τουμαρέ μπιαβέσκο. (Διαβάνεν 1 Κορινθίους 14:40) Ο Γουέιν, κατά Ταϊβάν, βακερέλα: «Χάνικ ντιβεσά πριν αμαρέ μπιαβέσταρ, γκιντισάλαμ τι κεράς λάφι ι τζενέντζαρ σο κα βοηθίνενας-αμέν μερικέ μπουτιέντζαρ οντουβά ντιβές. Συζητιντάμ σο σκεφτίναας τι κεράς οντουβά ντιβές ντα κερντάμ πρόβα κάποια πράγματα για τι αβάς σίγουροι ότι κα τζαν λατσσές». Για τι σικαβέν σεβασμός κο καλεσμέ, κερέν ο πο λατσσό για τι αβέν σαρέ ο πράγματα κο σαάτι σο βακερντέν.

19. Σο μπορίνελα τι βοηθίνελ-τουμέν τι αβέν σίγουροι ότι ο πράγματα κο τραπέζι τουμαρέ μπιαβέσκο κα τζαν λατσσές;

¹⁹ Μπορίνενα τι γλιτώνεν μπουτ προβλήματα άμα κα σκεφτίνεν σο δυσκολίες κα μπορίνενας τι αβέν κο ντιβές τουμαρέ μπιαβέσκο. (Παρ. 22:3) Για παράδειγμας, άμα τουμαρέ τθεμέστε ισί συνηθισμέ τι αβέν κο τραπέζι τζενέ σο νανέ καλεσμέ, σκεφτίνεν σο μπορίνενα τι κερέν για μα τι αβέλ-πες ανταβά. Τι αβέν σίγουροι ότι σαρέ ο τζενέ σο νανέ κι αλήθεια τζανένα σο τι μπεκλεντίνεν, ντα τι εξηγίνεν λένγκε σο άποψη τθερένα για μερικά έθιμα ι μπιαβέσκε. Κα μπορίνενας τι μανγκέν εκχέ πφραλέσταρ τι αβέλ υπεύθυνος τι ντικχέλ σο αβέλα-πες κο τραπέζι κι μπιαβέσκο. (Ιωάν. 2:8) Άμα κα κερέν λάφι ανταλέ πφραλέσαρ ι πραγματένγκε σο σκεφτίνενα τι κερέν κο ντιβές τουμαρέ μπιαβέσκο, κα μπορίνελ τι βοηθίνελ-τουμέν τι κερέν ο πο λατσσό για τι αβέν ο πράγματα αντικάς σαρ μανγκένα.

20. Σο πρέπει τι ντελ-πες γκοντί εκ ζευγάρι για το ντιβές πι μπιαβέσκο;

²⁰ Μπορεί τι ανησυχίνενα χάνικ κάνα σκεφτίνενα σαρέ ο σχέδια για το ντιβές τουμαρέ μπιαβέσκο. Όμως, τι ντεν-τουμέν γκοντί ότι κα ατσσικιαρέλ σάντε εκ ντιβές. Τθερένα ανγκλά-τουμέντε εκ μπουτ σουκάρ ζωή κι υπηρεσία κι Ιεχωβάσκι γιεκ. Ο ντιβές τουμαρέ μπιαβέσκο ισί σάντε η αρχή. Κερέν ο πο λατσσό για τι αβέλ ο ντιβές τουμαρέ μπιαβέσκο απλός ντα τι σικαβέλ σεβασμός. Τι ντεν μπέσα κο Ιεχωβά. Λέσκε βοηθειάσαρ, κα μπορίνεν τι ετοιμάνεν εκ μπουτ σουκάρ μπιαβ σο κα ανέν-λες τουμαρέ γκοντιάτε χαράσαρ ντα χωρίς τι μετανιώνεν για κάτι.​—Ψαλμ. 37:3, 4.