Σο Βακερέλα η Αγία Γραφή για το Φυσικές Καταστροφές;

Σο βακερέλα η Αγία Γραφή

Ο Ντεβέλ να ανέλα ο φυσικές καταστροφές σο αβένα-πες αμαρέ ντιβεσέντε, αλλά πφαμπόλα μπουτ οντουλένγκε σο νακχένα κάτι ασακό. Ο φυσικές καταστροφές ισί εκ κατά προβλήματα σο κα νασκιαρέλ η Βασιλεία ι Ντεβλέσκι. Ισί λατσσό τι τζανάς ότι, ο Ντεβέλ κοβλιαρέλα ο γκι οντουλένγκο σο νακχένα εκ φυσική καταστροφή.​—2 Κορινθίους 1:3.

• Σόσκε μπορίνασα τι αβάς σίγουροι ότι ο Ντεβέλ να ανέλα ο φυσικές καταστροφές για τι τιμωρίνελ-αμέν;

• Σικαβένα ο φυσικές καταστροφές ότι ισινάμ πασέ κο τέλος;

• Σαρ βοηθίνελα ο Ντεβέλ οντουλέν σο νακχλέ εκ φυσική καταστροφή;

• Μπορίνελα η Γραφή τι βοηθίνελ-αμέν τι αβάς έτοιμοι κάνα κα αβέλ εκ φυσική καταστροφή;

• Εδάφια ι Γραφιάκε για τι κοβλιόλ ο γκι οντουλένγκο σο νακχλέ εκ φυσική καταστροφή

Σόσκε μπορίνασα τι αβάς σίγουροι ότι ο Ντεβέλ να ανέλα ο φυσικές καταστροφές για τι τιμωρίνελ-αμέν;

Κατά Γραφή τζανάσα ότι ο Ιεχωβά χρησιμοποιηντάς ι ζορ σο τθερέλα η φύση για τι διορθώνελ τζενέν, αλλά ανταβά ισινέ διαφορετικός κατά φυσικές καταστροφές σο αβένα αμαρέ ντιβεσέντε.

• Ο φυσικές καταστροφές μουνταρένα ντα κερένα ζιάνι σαρέ κο τζενέ. Οκιά μπάνταρ, σαρ σικαβέλα η Γραφή, ο Ντεβέλ τραμπίνελας κας κα διορθώνελ. Για παράδειγμας, κάνα ο Ντεβέλ καταστραφιντάς ο Σόδομα ντα ο Γόμορρα, σωντάς εκχέ λατσσέ τζενές, τον Λωτ, ντα λέσκε ντουέ τσσαΐν. (Γένεση 19:29, 30) Ο Ντεβέλ ντικχλάς ο γκι οντουλέ τζενένγκο σο τζουβντιόνας αζομάν ντα καταστραφιντάς σάντε ι πφιρνέν.​—Γένεση 18:23-​32· 1 Σαμουήλ 16:7.

• Ο πο μπουτ φαρ να τζανάσα κάνα κα αβέλ εκ φυσική καταστροφή. Οκιά μπάνταρ, ο Ντεβέλ βακερέλας ι πφιρνένγκε ότι κα χρησιμοποιήνελας ι ζορ σο τθερέλα η φύση για τι κερέλ λένγκε ζιάνι. Ο τζενέ σο ντένας καν λέσκε λαφίντε τθερένας ι ευκαιρία τι σώντιβεν κατά καταστροφή.​—Γένεση 7:1-5· Ματθαίος 24:38, 39.

• Ο αποφάσεις ι τζενένγκε ανένα μπουτ φαρ φυσικές καταστροφές. Καλέ τροπόσαρ; Καταστραφίνενα ι πφουβ ντα κερένα κχερά τθανέντε σο αβένα-πες μπουτ φαρ σεισμοί, πλημμύρες ντα γιαβερά πράγματα. (Αποκάλυψη 11:18) Ο Ντεβέλ να φταίνελα ανταλέ πραγματένγκε σο κερένα ο τζενέ.​—Παροιμίες 19:3.

Σικαβένα ο φυσικές καταστροφές ότι ισινάμ πασέ κο τέλος;

Βα, κατά προφητείες ι Γραφιάκε αγαβάσα ότι κα αβένας-πες καταστροφές κο «τελευταία ντιβεσά ανταλέ ντουνιάσκε», ή «κο τελευταία ντιβεσά». (Ματθαίος 24:3· 2 Τιμόθεο 3:1) Για παράδειγμας, κάνα ο Ιησούς κερντάς λάφι αμαρέ ντιβεσένγκε, βακερντάς: «Κα αβέλ μποκχ ντα σεισμοί τθαν τθανέστε». (Ματθαίος 24:7) Ατζεχάνικ, ο Ντεβέλ κα νασκιαρέλ σο-ντα ανέλα ντουκχ κο τζενέ, σαρ ισί ο φυσικές καταστροφές-ντα.​—Αποκάλυψη 21:3, 4.

Σαρ βοηθίνελα ο Ντεβέλ οντουλέν σο νακχλέ εκ φυσική καταστροφή;

• Ο Ντεβέλ κοβλιαρέλα ο γκι οντουλένγκο σο νακχλέ εκ φυσική καταστροφή αντράλ πι Λαφίσταρ, κατά Αγία Γραφή. Η Γραφή βακερέλα ότι ο Ντεβέλ πφαμπόλα αμένγκε ντα ότι κάνα αμέν τσσίντασα μπουτ ανταβά ανέλα λέσκε ντουκχ. (Ησαΐας 63:9· 1 Πέτρου 5:6, 7) Επίσης, κι Γραφή αρακχάσα ι Ντεβλέσκι υπόσχεση σο βακερέλα ότι κα αβέλ εκ βακίτι σο να κα αβέν-πες φυσικές καταστροφές.—Ντικχέν «Εδάφια ι Γραφιάκε για τι κοβλιόλ ο γκι οντουλένγκο σο νακχλέ εκ φυσική καταστροφή».

• Ο Ντεβέλ βοηθίνελα οντουλέν σο νακχλέ εκ φυσική καταστροφή αντράλ πι υπηρετόνταρ. Ο Ντεβέλ τσσίντελα μανγκιμάσαρ πι υπηρετόν τι κερέν οντουβά σο κερντάας ο Ιησούς. Εκ προφητεία βακερέλας ότι ο Ιησούς κα κοβλιαρέλας ο γκι οντουλένγκο «σο τθερένα πφανγκό γκι» ντα οντουλένγκο «σο χασαρντέ εκχέ τζενές κο μεριπέ». (Ησαΐας 61:1, 2) Ο υπηρέτες ι Ντεβλέσκε μαρένα-πες τι κερέν ο ίδιος.​—Ιωάννης 13:15.

  Επίσης, ο Ντεβέλ χρησιμοποιήνελα πι υπηρετόν για τι βοηθίνεν οντουλέν σο νακχλέ εκ φυσική καταστροφή.​—Πράξεις 11:28-30· Γαλάτες 6:10.

Μπορίνελα η Γραφή τι βοηθίνελ-αμέν τι αβάς έτοιμοι κάνα κα αβέλ εκ φυσική καταστροφή;

Βα. Παρόλο σο η Γραφή νανέ εκ βιβλίος σο γραφίντιλο για τι βακερέλ αμένγκε σαρ τι αβάς έτοιμοι για εκ καταστροφή, τθερέλα αρχές σο μπορίνενα τι βοηθίνεν-αμέν. Για παράδειγμας:

• Σκεφτίνεν από ακανά σο κα κερέν άμα κα αβέλ-πες εκ καταστροφή. «Ο τζενό σο ντικχέλα ανγκλάλ αγαβέλα ο κίνδυνος ντα γκεραβέλα-πες», βακερέλα η Γραφή. (Παροιμίες 22:3) Ισί γκοντιαβέρ τι σκεφτίνας πο τζανγκλέ σο κα κεράς άμα κα αβέλ-πες εκ φυσική καταστροφή. Για παράδειγμας, κα μπορίναας τι ετοιμάνας εκ βαλίτσα πραγματέντζαρ σο κα χρειαζίντιβας άμα ντινάμ-αμέν ή νασφάλιλαμ, για τι λας-λα σουγκό άμα κα υπαρχίντιβελ ανάγκη. Επίσης, ισί λατσσό τι τζας αμαρέ φαμιλιάσαρ κο τθαν σο κα αρακχάς ο εκ ι γιαβερές άμα κα αβέλ-πες εκ καταστροφή, για τι κεράς πρόβα.

• Τι ντικχέν ι ζωή πο σημαντική τουμαρέ πραγματένταρ. Η Γραφή βακερέλα ξεκάθαρα: «Κάνα μπιάντιβασα, να ανάσα τίποτα. Ντα κάνα μεράσα, ναστί λάσα τίποτα παλ’ αμέντε». (1 Τιμόθεο 6:7, 8) Ισί μπουτ σημαντικός τι αβάς έτοιμοι τι μουκχάς αμαρό κχερ ντα αμαρέ πράγματα για τι σώντιβας από εκ καταστροφή. Πρέπει τι τθεράς αμαρέ γκοντιάτε ότι αμαρί ζωή ισί πο σημαντική κατά πράγματα.​—Ματθαίος 6:25.