Σαρ Βοηθίνασα Αμαρέ Πφραλέν Όταν Αβένα Καταστροφές;

Όταν αβέλα εκ καταστροφή, ο Μάρτυρες του Ιεχωβά γκιντίντιβενα σουγκό για τι βοηθίνεν πουμαρέ πφραλέν. Ανταλά προσπάθειες σικαβένα ι μπαρί αγάπη σο τθεράσα ο εκ ι γιαβερέσκε. (Ιωάννης 13:​34, 35· 1 Ιωάννη 3:​17, 18) Σαρ βοηθίνασα-λεν;

Ντάσα λοβέ. Μετά κατά μεριπέ ι Ιησούσκο, κι Ιουδαία αβιλί εκ μπαρί μποκχ ντα ο Χριστιανοί σο ισινέ κι Αντιόχεια μπουτσσαντέ λοβέ για τι βοηθίνεν πουμαρέ πφραλέν. (Πράξεις 11:​27-30) Αντικάς αμέν-ντα, όταν σικλιάσα ότι αμαρέ πφραλά εκχέ τθεμέστε νακχένα μπουτ δύσκολα, μπουτσσαβάσα λένγκε πράγματα αμαρέ εκκλησιάσαρ χωρίς τι μανγκάς λοβέ για τι μπορίνεν τι βοηθίντιβεν οντουλά σο τθερένα μπουτ μπαρί ανάγκη. ​—2 Κορινθίους 8:​13-15.

Ντάσα βοήθεια όταν υπαρχίντιβελα ανάγκη. Ο πρεσβύτεροι κο τθεμ σο νακχέλα εκ καταστροφή ρόντενα σαρέ ι πφραλένγκε σο ισί κι ίδια εκκλησία, για τι αβέν σίγουροι ότι να παθισάλε τίποτα. Εκ τανί ομάδα σο ντέλα βοήθεια βακερέλα σαρ κα ντιντιόλ ο χαμπέ, ο πανί, ο σέα, ο φάρμακα ντα κάι κα σοβέν. Μπουτ Μάρτυρες του Ιεχωβά σο τζανένα οντουλέ μπουτιένταρ σο χρειαζίντιβενα οτθέ τζάνα τι βοηθίνεν ι πφραλέν ντα τι ξανακερέν ο κχερά ντα ο Αίθουσες Βασιλείας σο καταστραφισάλε χωρίς τι ποκίντιβεν. Επειδή ισινάμ εκ ενωμέ λαός ντα βοηθιντάμ μπουτ φαρ σε γιαβερά-ντα καταστροφές, οτθάρ μπορίνασα τι τζας σουγκό αζομάν σο τθερένα-αμέν ανάγκη. Παρόλο σο τζάσα τι βοηθίνας οντουλέν σο τθερένα ι ίδια πίστη αμέντζαρ, όταν μπορίνασα βοηθίνασα εμ οντουλέν σο πακιάνα γιαβερτθέ.​—Γαλάτες 6:10.

Ντάσα-λεν κουράγιος ντα βοηθίνασα-λεν τι συνεχίνεν τι τθερέν ζουρανί πίστη κο Ντεβέλ. Οντουλά τζενέ σο νακχένα ανταλά προβλήματα τθερένα μπουτ ανάγκη αμαρί παρηγοριά. Αζομάν χρειαζίντιβασα τι λας ζορ κατά Ιεχωβά, σο ισί “ο Ντεβέλ σο ντέλα-αμέν παρηγοριά”. (2 Κορινθίους 1:3, 4) Χαιρίνασα τι βακεράς ο σκοπός ι Ντεβλέσκο τζενένγκε σο ισί απελπισμέ, ότι μπουτ σουγκό η Βασιλεία ι Ντεβλέσκι κα νασκιαρέλ σαρέ ο μπέτι πράγματα σο ανένα ντουκχ ντα βάσανα.​—Αποκάλυψη 21:4.

• Σόσκε ο Μάρτυρες του Ιεχωβά μπορίνενα τι τζαν τι βοηθίνεν σουγκό όταν αβέλα-πες εκ καταστροφή;

• Σαρ μπορίνασα τι ντας παρηγοριά κατά Αγία Γραφή οντουλέντε σο σωσάλε εκχέ καταστροφιάταρ;