Σαρ τι Βοηθίνας Σοράν από εκ Καταστροφή

Καζόμ τζάλα, ο φυσικές καταστροφές αβένα ατζέ πο μπουτ αμαρέ ντιβεσέντε. Κάνα αβέλα εκ καταστροφή, ο προσπάθειες για τι ντιντιόλ βοήθεια πρέπει τι αβέν οργανωμέ τροπόσαρ ντα τι κεράς λατσσί μπουτί γιεκ. Οτθάρ, ο Κυβερνών Σώμας κερντάς κο κάθε γραφείος τμήματος εκ Τμήμας Παροχής Βοήθειας σε Καταστροφές.

Κάνα ο πφραλά κατά τμήμας οντουβά λένα αμπέρι ότι αβιλί-πες εκ καταστροφή, κερένα λάφι ι πρεσβυτερόντζαρ σο ισί οτθέ για τι σικλιόν σο βοήθεια τθερένα ανάγκη ο πφραλά. Άμα η ζημιά ισί πο μπαρί οντουλάταρ σο μπορίνενα τι ντεν πέρα ο πφραλά κορκορέ, ο γραφείος τμήματος κα μπουτσσαβέλ οτθέ μερικέ πφραλέν σο τζανένα μπουτ λατσσές ασακέ μπουτιένταρ για τι ντεν βοήθεια. Ανταλά πφραλά μπέκιμ τι μανγκέν βοήθεια γιαβερέ-ντα πφραλένταρ ή τι μανγκέν κατά πφραλά τι ντεν συγκεκριμέ πράγματα σο κα χρειαζίντιβεν, ή μπορεί τι κινέν ντα τι μπουτσσαβέν βον ο πράγματα σο τθερένα ανάγκη.

Κάνα ο μπουτιά κερντιόνα ανταλέ τροπόσαρ, αβένα μπουτ λατσσέ αποτελέσματα. Να αβέλα μπουτί πο μπουτ οντουλάταρ σο χρειαζίντιβελα, υπαρχίντιβελα οργάνωση ντα ο πφραλά να αποφασίνενα κορκορέ σο τι κερέν ι λοβέντζαρ ντα ι πραγματέντζαρ.

Ο πφραλά σο διορίντιβενα κατά γραφείος τμήματος μπορίνενα τι βακερέν καζόμ λοβέ ντα καζόμ τζενέ κα χρειαζίντιβεν για τι βοηθίνεν. Επίσης, μπορίνενα τι γνωρίνεν τζενέν σο τθερένα εξουσία οντουλέ τθεμέστε σο μπάζιμα μπορίνενα τι βοηθίνεν ι πφραλέν τι τελειώνεν ι μπουτί πο σουγκό. Οτθάρ, μα λεν απόφαση κορκορέ τι γκίντεν λοβέ, τι μπουτσσαβέν διάφορα πράγματα για τι βοηθίνεν ή τι κερέν ταξίδι για τι τζαν οτθέ σο αβιλί-πες η καταστροφή εκτός άμα βακερντέ τουμένγκε βον τι τζαν οτθέ.

Κάνα αβέλα-πες εκ καταστροφή, μανγκάσα τι βοηθίνας. (Εβρ 13:​16) Μανγκάσα αμαρέ πφραλέν! Σο μπορίνασα τι κεράς; Ο πο σημαντικός ισί τι προσευχίντιβας οντουλέ τζενένγκε σο ισινέ οτθέ σο αβιλί η καταστροφή ντα οντουλένγκε σο βοηθίνενα οτθέ. Επίσης, μπορίνασα τι ντας λοβέ ντα γιαβερά πράγματα ι εργόσκε σο αβέλα-πες σαρό κο ντουνιάς. Με τη βοήθεια σο ντέλα ο Κυβερνών Σώμας, ο γραφεία τμήματος τζανένα λατσσές κατέ κα βοηθίνεν πο μπουτ σαρέ ανταλά. Ντα άμα μανγκάσα τι βοηθίνας πο μπουτ, μπορίνασα τι κεράς ι Αίτηση Εθελοντή για το Τοπικό Τμήμα Σχεδιασμού/Οικοδόμησης (DC-50).

ΝΤΙΚΧΕΝ Ο ΒΙΝΤΕΟΣ ΜΠΑΡΕ ΠΛΗΜΜΥΡΕΣ ΚΙ ΒΡΑΖΙΛΙΑ ΝΤΑ ΣΟΡΑΝ ΑΠΑΝΤΙΝΕΝ ΚΙ ΕΡΩΤΗΣΗ:

Σο κερντάς τουμένγκε εντύπωση κι βοήθεια σο ντινέ ο Μάρτυρες ι Ιεχωβάσκε σοράν κατά πλημμύρα κι Βραζιλία κο 2020;