Σο Σκοπός Τθερέλα ο Ντεβέλ ι Τζενένγκε;

1. Σο σκοπός τθερέλα ο Ντεβέλ ι τζενένγκε;

Ο ΝΤΕΒΕΛ τθερέλα εκ μπουτ σουκάρ σκοπός ι τζενένγκε. Κερντάς ι πρώτε μουρσές ντα ι πρώτε τζουβλιά, τον Αδάμ ντα την Εύα, για τι τζουβντιόν σε εκ σουκάρ κήπος. Λέσκο σκοπός ισινέ τι κερέν τσσαβέν, τι κερέν σαρί ι πφουβ παράδεισος ντα τι αρακχαβέν ο ζώα.​—Γένεση 1:​28· 2:8, 9, 15· ντικχ ι Σημείωση 6 κο παλαϊνέ σελίδες.

2. (α) Σαρ τζανάσα ότι ο Ντεβέλ κα κερέλ οντουβά σο τθερέλα πι γκοντιάτε; (β) Σαρ βακερέλα η Αγία Γραφή, καλά τζενέ κα τζουβντιόν κι πφουβ ντα καζόμ καιρός κα τζουβντιόν;

² Πακιάσα ότι κα τζουβντιάς ποτές σε εκ παράδεισος; Ο Ιεχωβά βακερέλα αμένγκε: «Αποφασιντόμ-λες ντα κα κεράβ-λες». (Ησαΐας 46:​9-11· 55:​11) Βα, ο Ντεβέλ κα κερέλ οντουβά σο τθερέλα πι γκοντιάτε ντα τίποτα να κα τσσιναβέλ-λες. Ο Ιεχωβά βακερέλα ότι κερντάς ι πφουβ για εκ σκοπός. Βοβ «να κερντάς-λα χωρίς λόγος». (Ησαΐας 45:​18) Μανγκέλα τι τζουβντιόν ο τζενέ σαρί κι πφουβ. Καλά τζενέ μανγκέλα ο Ντεβέλ τι τζουβντιόν ατθέ, ντα καζόμ καιρός κα τζουβντιόν; Η Γραφή βακερέλα: «Ο λατσσέ τζενέ [ή γιαβέρτουλους, οντουλά σο ντένα καν] κα τθερέν πουμένγκε ι πφουβ ντα κα τζουβντιόν για πάντα λάτε».​—Ψαλμός 37:​29· Αποκάλυψη 21:​3, 4.

3. Επειδή ο τζενέ νασφάλιβενα ντα μερένα, σο μπορεί τι πουτσές;

³ Όμως αντιβές ο τζενέ νασφάλιβενα, δηλαδή πασλιόνα, ντα μερένα. Μπουτέ τθεμέντε, αβένα-πες τζένγκια ντα μουνταρένα ο εκ ι γιαβερές. Σίγουρα ανταβά να ισινέ ο σκοπός ι Ντεβλέσκο. Άρα, σο αβιλό-πες, ντα σόσκε; Σάντε η Γραφή μπορίνελα τι εξηγίνελ-λες ανταβά.

ΕΚ ΝΤΟΥΣΜΑΝΙ Ι ΝΤΕΒΛΕΣΚΟ

4, 5. (α) Κον κερντάς λάφι κι Εύα αντράλ εκχέ σαπέσταρ κο κήπος της Εδέμ; (β) Σαρ μπορίνελα εκ τίμιος τζενό τι αβέλ τσορ;

⁴ Η Γραφή βακερέλα αμένγκε ότι ο Ντεβέλ τθερέλα εκχέ ντουσμανίς, σο «βακέρντιβελα Διάβολος ντα Σατανάς». Ο Σατανάς τσσουντάς εκχέ σαπές για τι κερέλ λάφι κι Εύα, κο κήπος της Εδέμ. (Αποκάλυψη 12:9· Γένεση 3:1) Βοβ κερντάς τι ντικχίντιβελ ότι κερέλας λάφι ο σαπ.​—Ντικχ ι Σημείωση 7 κο παλαϊνέ σελίδες.

⁵ Άρα, ισινέ ο Ντεβέλ οντουβά σο κερντάς ι Σατανάς; Όχι! Εκ άγγελος, σο ισινέ κο ουρανός όταν ο Ντεβέλ κερέλας ι πφουβ για τον Αδάμ ντα για την Εύα, αλλαξάλο ντα αβιλό Μπενγκ. (Ιώβ 38:​4, 7) Σαρ μπορίνελας τι αβέλ-πες ανταβά; Σκέφτινε: Σαρ εκ τανό τίμιος τζενό αλλάνελα ντα αβέλα τσορ; Να μπιάντιλο τσορ. Αλλά μανγκέλα κάτι σο νανέ λέσκο. Συνεχίνελα τι σκεφτίνελ-λες ντα μανγκέλα-λες ατζέκ πιο μπουτ. Σοράν, όταν ντιντιόλα-λες η ευκαιρία, τσορέλα-λες. Κερντάς πο νεαυτός τσορ.​—Διάβανε Ιακώβου 1:​13-15· ντικχ ι Σημείωση 8 κο παλαϊνέ σελίδες.

6. Σαρ εκ άγγελος αβιλό ντουσμάνι ι Ντεβλέσκο;

⁶ Ανταβά αβιλό-πες οντουλέ αγγελόσαρ-ντα. Αφού ο Ιεχωβά κερντάς τον Αδάμ ντα την Εύα, βακερντάς λένγκε τι κερέν τσσαβέν ντα «τι πφερέν ι πφουβ». (Γένεση 1:​27, 28) Ανταβά άγγελος μπορεί τι σκεφτιντάς: “Σαρέ ο τζενέ κα μπορίνενας τι ντεν λατρεία μαν αντίς τι ντεν λατρεία ι Ιεχωβάς!” Καζόμ πιο μπουτ σκεφτίνελας-λες ανταβά, αζόμ πιο μπουτ μανγκέλας τι τθερέλ οντουλά σο ισινέ ι Ιεχωβάσκε. Οντουβά άγγελος μανγκέλας τι ντεν-λες λατρεία ο τζενέ. Οτθάρ, βακερντάς ψέματα κι Εύα ντα χουχαντάς-λα. (Διάβανε Γένεση 3:​1-5) Οντουλέσαρ σο κερντάς, αβιλό Σατανάς ντα Διάβολος, εκ ντουσμάνι ι Ντεβλέσκο.

7. (α) Σόσκε μουλέ ο Αδάμ ντα η Εύα; (β) Σόσκε πφουρίλιβασα ντα μεράσα αμέν;

⁷ Ο Αδάμ ντα η Εύα να ντινέ καν ι Ντεβλές ντα χαλέ ο φρούτος. (Γένεση 2:​17· 3:6) Αμαρτιντέ ντα γκιλέ κόντρα ι Ιεχωβάσαρ ντα μετά από μπουτ μπρεσά μουλέ, ακριβώς σαρ βακερντάας ο Ιεχωβά. (Γένεση 3:​17-19) Ο τσσαβέ του Αδάμ ντα της Εύας ισινέ ατελείς ντα οτθάρ μουλέ. (Διάβανε Ρωμαίους 5:​12) Για τι μπορίνας τι αγαβάς σόσκε ο τσσαβέ του Αδάμ ντα της Εύας ισινέ βον-ντα ατελείς, σκέφτινε εκ παράδειγμας. Βάκερ ότι πεκέσα εκ μαντρό εκχέ τεψιάτε σο τθερέλα εκ γούρνα, δηλαδή εκ ελάττωμας. Ο μαντρό κα τθερέλ ι ίδια γούρνα σο ισί κι τεψία-ντα. Όταν ο Αδάμ να ντινάς καν ι Ντεβλές, αβιλό ατελής. Αμέν, επειδή ισινάμ τσσαβέ του Αδάμ, ισινάμ σαρέ ατελείς, ή γιαβέρτουλους τθεράσα ο ίδιος ελάττωμας σο τθερέλας βοβ-ντα. Οτθάρ, πφουρίλιβασα ντα μεράσα.​—Ρωμαίους 3:​23· ντικχ ι Σημείωση 9 κο παλαϊνέ σελίδες.

8, 9. (α) Σο μανγκέλας ο Μπενγκ τι πακιάν ο Αδάμ ντα η Εύα; (β) Σόσκε να μουνταρντάς αμέσως ο Ιεχωβά οντουλέν σο γκιλέ λέσαρ κόντρα;

⁸ Όταν ο Μπενγκ κερντάς τον Αδάμ ντα την Εύα μα τι ντεν καν ι Ντεβλές, γκιλό κόντρα ι Ιεχωβάσαρ. Μανγκέλας τι πακιάν ο Αδάμ ντα η Εύα ότι ο Ιεχωβά ισί ψεύτης, ότι να κυβερνίνελα λατσσές ντα ότι να μανγκέλα λένγκο λατσσιπέ. Ο Μπενγκ βακερέλας ότι ο τζενέ να χρειαζίντιβενα ι Ντεβλές τι βακερέλ λένγκε σο τι κερέν ντα ότι ο Αδάμ ντα η Εύα έπρεπε τι αποφασίνεν κορκορέ σο ισί σωστός ντα σο ισί λάθος. Σο κα κερέλας ο Ιεχωβά; Κα μπορίνελας τι μουνταρέλ οντουλέν σο γκιλέ λέσαρ κόντρα. Αλλά κα σικαβέλας ανταβά ότι ο Μπενγκ ισί ψεύτης; Όχι, να κα σικαβέλας-λες.

⁹ Οτθάρ-ντα ο Ιεχωβά να μουνταρντάς αμέσως οντουλέν σο γκιλέ λέσαρ κόντρα. Αλλά οκιά μπάνταρ, ντινάς χρόνος κο τζενέ για τι κερέν κουμάντος κορκορέ πουμαρό νεαυτός. Ανταβά κα σικαβέλας ξεκάθαρα ότι ο Μπενγκ ισί ψεύτης ντα ότι ο Ιεχωβά τζανέλα καβά ισί ο πιο λατσσό ι τζενένγκε. Κα σικλιάς πιο μπουτ ανταλέσκε κο Κεφάλαιος 11. Όμως, σο πακιάσα τούι για την απόφαση σο λιντέ ο Αδάμ ντα η Εύα; Κερντέ λατσσές σο πακιαντέ ι Μπενγκές ντα να ντινέ καν ι Ντεβλές; Ο Ιεχωβά ντινάς κο Αδάμ ντα κι Εύα σαρέ οντουλά σο τθερένας. Ντινάας-λεν εκ τέλεια ζωή, εκ σουκάρ τθαν για τι μπεσέν ντα εκ μπουτί σο μπεϊντίνενας. Αλλά ο Μπενγκ ποτές να κερντάας λένγκε κάτι λατσσό. Άμα τούι ισινάνας οτθέ, σο κα κερέας;

10. Καγιά σημαντική απόφαση πρέπει τι λας σαρέ;

¹⁰ Αντιβές-ντα, σαρέ πρέπει τι λας εκ σημαντική απόφαση σο τθερέλα τι κερέλ αμαρέ ζωγιάσαρ. Μπορίνασα τι τραμπίνας ι Ιεχωβάς τι αβέλ αμαρό Βασιλιάς ντα τι ντας-λες καν για τι βοηθίνας τι σικάντιβελ ότι ο Μπενγκ ισί ψεύτης. Ή μπορίνασα τι τραμπίνας ι Μπενγκές τι αβέλ αμαρό βασιλιάς. (Ψαλμός 73:​28· διάβανε Παροιμίες 27:​11) Μπουτ χάνικ τζενέ ανταλέ ντουνιάστε ντένα καν ι Ντεβλές. Κι πραγματικότητα, να κυβερνίνελα βοβ ι ντουνιάς. Αλλά άμα να κυβερνίνελα ο Ντεβέλ, κον κυβερνίνελα;

ΚΟΝ ΚΥΒΕΡΝΙΝΕΛΑ Ι ΝΤΟΥΝΙΑΣ;

11, 12. (α) Σο μανγκέλας τι ντελ ο Μπενγκ κο Ιησούς, ντα σο σικλιάσα ανταλέσταρ; (β) Καλά εδάφια σικαβένα ότι ο Μπενγκ κυβερνίνελα ι ντουνιάς;

¹¹ Ο Ιησούς τζανέλας κον κυβερνίνελα μπαγιά ανταλέ ντουνιάς. Εκ φαρ, ο Μπενγκ «σικαντάς λέσκε σαρέ ο βασιλείες ι ντουνιάσκε ντα λένγκι δόξα». Ο Μπενγκ βακερντάς κο Ιησούς: «Σαρέ ανταλά κα νταβ-λεν τούτε, άμα κα περές τελέ ντα κα προσκυνίνες-μαν». (Ματθαίος 4:​8, 9· Λουκάς 4:​5, 6) Σκέφτινε: “Άμα οντουλά βασιλείες να ισινέ ι Μπενγκέσκε, κα μπορίνελας τι ντελ-λεν κο Ιησούς;” Όχι. Σαρέ ο κυβερνήσεις ισί ι Μπενγκέσκε.

¹² Μπορεί τι πουτσές: “Σαρ αβέλα-πες τι κυβερνίνελ ο Μπενγκ ι ντουνιάς; Νανέ ο Ιεχωβά Ντεβέλ ο πιο Ζουρανό σο κερντάς ο σύμπαν;” (Αποκάλυψη 4:​11) Βα, βοβ ισί, αλλά ο Ιησούς βακερντάς ξεκάθαρα ότι ο Μπενγκ ισί «ο άρχοντας ι ντουνιάσκο». (Ιωάννης 12:​31· 14:​30· 16:​11) Ο απόστολος Παύλος βακερντάς ότι ο Μπενγκ ισί «ο ντεβέλ ανταλέ ντουνιάσκο». (2 Κορινθίους 4:​3, 4) Επίσης, ο απόστολος Ιωάννης γραφιντάς ότι «σαρέ ι ντουνιάς κερέλα-λες κουμάντος ο πφιρνό».​—1 Ιωάννη 5:19.

ΣΑΡ ΚΑ ΚΑΤΑΣΤΡΑΦΙΝΤΙΒΕΛ Ι ΜΠΕΝΓΚΕΣΚΟ ΝΤΟΥΝΙΑΣ;

13. Σόσκε τθεράσα ανάγκη τι αβέλ εκ νεβό ντουνιάς;

¹³ Ανταβά ντουνιάς αβέλα ατζέκ πιο επικίνδυνος. Ντικχάσα τι αβέν-πες τζένγκια, μπέτι πράγματα, πφιρνιπέ ντα βία παντού. Ο τζενέ να μπορίνενα τι νασέν ανταλέ προβληματένταρ, καμπόρ-ντα τι προσπαθίνεν. Αλλά ατζεχάνικ ο Ντεβέλ, πι τζενγκίστε σο βακέρντιβελα Αρμαγεδδώνας, κα καταστραφίνελ ανταλέ πφιρνέ ντουνιάς, ντα λέσκε θεσιάτε κα ανέλ εκχέ νεβέ ντουνιάς σο κα αβέλ δίκαιος.​—Αποκάλυψη 16:​14-16· ντικχ ι Σημείωση 10 κο παλαϊνέ σελίδες.

14. Κας τραμπιντάς ο Ντεβέλ τι αβέλ Βασιλιάς λέσκε Βασιλειάτε; Σο βακερντάς η Γραφή ι Ιησούσκε;

¹⁴ Ο Ιεχωβά τραμπιντάς ι Ιησού Χριστός τι αβέλ Βασιλιάς λέσκε Βασιλειάτε οπράλ κο ουρανός. Χιλιάδες μπρεσά πριν, η Γραφή βακερντάς ότι ο Ιησούς κα κυβερνίνελ σαρ «Άρχοντας Ειρήνης» ντα λέσκι κυβέρνηση κα ατσσόλ για πάντα. (Ησαΐας 9:​6, 7) Ο Ιησούς σικλιαρντάς πι μαθητέν τι προσευχίντιβεν τι αβέλ ανταγιά κυβέρνηση, όταν βακερντάς: «Τι αβέλ τι βασιλεία. Τι αβέλ οντουβά σο μανγκέσα, σαρ αβέλα-πες κο ουρανός, αντικάς τι αβέλ-πες οπράλ κι πφουβ-ντα». (Ματθαίος 6:​10) Κο Κεφάλαιος 8, κα σικλιάς σαρ η Βασιλεία ι Ντεβλέσκι κα αβέλ η μόνη κυβέρνηση σο κα κυβερνίνελ κι πφουβ. (Διάβανε Δανιήλ 2:​44) Σοράν, η Βασιλεία ι Ντεβλέσκι κα κερέλ ι πφουβ εκ σουκάρ παράδεισος.​—Ντικχ ι Σημείωση 11 κο παλαϊνέ σελίδες.

ΕΚ ΝΕΒΟ ΝΤΟΥΝΙΑΣ ΙΣΙ ΠΑΣΕ!

15. Σο ισί η «νεβί πφουβ»;

¹⁵ Η Γραφή βακερέλα αμένγκε: «Μπεσάσα τι αβέλ νεβό ουρανός ντα νεβί πφουβ» ντα «οτθέ κα αβέλ δικαιοσύνη». (2 Πέτρου 3:​13· Ησαΐας 65:​17) Μερικές φορές, η λέξη «πφουβ» σο ισί κι Γραφή μανγκέλα τι σικαβέλ ι τζενέν σο μπεσένα οπράλ κι πφουβ. (Γένεση 11:1) Άρα, η δίκαια «νεβί πφουβ» ισί σαρέ ο τζενέ σο ντένα καν ι Ντεβλές ντα ευλογίντιβενα λέσταρ.

16. Καβά σουκάρ δώρος κα κερέλ ο Ντεβέλ οντουλένγκε σο κα τζουβντιόν κο νεβό ντουνιάς, ντα σο πρέπει τι κεράς αμέν για τι λας ανταβά δώρος;

¹⁶ Ο Ιησούς ντινάς πο λάφι ότι οντουλά σο κα τζουβντιόν κο νεβό ντουνιάς κι Ντεβλέσκο κα τθερέν «αιώνια ζωή». (Μάρκος 10:​30) Σο πρέπει τι κεράς για τι λας ανταβά δώρος; Παρακαλίνασα-τουτ, διάβανε ο εδάφια Ιωάννης 3:​16 ντα 17:3 για τι αρακχές ι απάντηση. Ακανά κα ντικχάς σαρ κα αβέλ η ζωή κο Παράδεισος κι πφουβ, αντικάς σαρ βακερέλα η Γραφή.

17, 18. Σαρ τζανάσα ότι κα υπαρχίντιβελ ειρήνη σαρί κι πφουβ ντα ότι κα νιωθίνας ασφάλεια;

¹⁷ Ο πφιρνιπέ, ο τζένγκια, ο μουνταρίματα ντα η βία να κα υπαρχίντιβεν. Ο πφιρνέ τζενέ να κα υπαρχίντιβεν οπράλ κι πφουβ. (Ψαλμός 37:​10, 11) Ο Ντεβέλ “κα σταματίνελ ο τζένγκια σαρί κι πφουβ”. (Ψαλμός 46:9· Ησαΐας 2:4) Η πφουβ κα αβέλ πφερντί τζενέντζαρ σο μανγκένα ι Ιεχωβάς ντα ντένα-λες καν. Κα υπαρχίντιβελ ειρήνη για πάντα.​—Ψαλμός 72:7.

¹⁸ Οντουλά τζενέ σο υπηρετίνενα ι Ιεχωβάς κα νιωθίνεν ασφάλεια. Κο πουρανέ μπρεσά, όταν ο Ισραηλίτες ντένας καν ι Ντεβλές, να παθίνενας τίποτα κακός επειδή ο Ντεβέλ αρακχαβέλας-λεν. (Λευιτικό 25:​18, 19) Κο Παράδεισος, να κα νταράς τίποτα ντα καεκχέσταρ. Κα αβάς σίγουροι ότι να κα παθίνας κακός!​—Διάβανε Ησαΐας 32:​18· Μιχαίας 4:4.

19. Σόσκε μπορίνασα τι αβάς σίγουροι ότι κο νεβό ντουνιάς κι Ντεβλέσκο κα υπαρχίντιβελ μπουτ χαμπέ;

¹⁹ Κα υπαρχίντιβελ μπουτ χαμπέ. «Κα υπαρχίντιβελ μπουτ γκιβ κι πφουβ· ντιπ οπράλ κο βεσά κα αβέλ γκιβ μπερεκέτι». (Ψαλμός 72:​16) Ο Ιεχωβά, «αμαρό Ντεβέλ, κα ευλογίνελ-αμέν», ντα «η πφουβ κα ντελ σίγουρα οντουλά σο νικαβέλα».​—Ψαλμός 67:6.

20. Σαρ τζανάσα ότι η πφουβ κα αβέλ παράδεισος;

²⁰ Σαρί η πφουβ κα αβέλ παράδεισος. Ο τζενέ κα τθερέν σουκάρ κχερά ντα κήπους. (Διάβανε Ησαΐας 65:​21-24· Αποκάλυψη 11:​18) Σαρί η πφουβ κα αβέλ αζόμ σουκάρ καζόμ ισινέ ο κήπος της Εδέμ-ντα. Ο Ιεχωβά πάντα κα ντελ-αμέν σαρέ οντουλά σο τθεράσα ανάγκη. Η Γραφή βακερέλα αμένγκε ι Ιεχωβάσκε: «Πουτρέσα το βας ντα τσαλιαρέσα ι επιθυμία σαρέ οντουλένγκι σο τζουβντιόνα».​—Ψαλμός 145:16.

21. Σαρ τζανάσα ότι κα υπαρχίντιβελ ειρήνη κο τζενέ ντα κο ζώα;

²¹ Κα υπαρχίντιβελ ειρήνη κο τζενέ ντα κο ζώα. Ο ζώα να κα κερέν κακός ι τζενένγκε. Ο χουρντέ τσσαβέ ντα τσσαγιά κα νιωθίνεν ασφάλεια, ατζέ-ντα πασέ σε ζώα σο ακανά ισί επικίνδυνα.​—Διάβανε Ησαΐας 11:​6-9· 65:25.

22. Σο κα κερέλ ο Ιησούς οντουλένγκε σο ισί νασφαλέ;

²² Καέκ τζενό να κα αβέλ νασφαλό. Όταν ο Ιησούς ισινέ κι πφουβ, κερντάς λατσσές μπουτέ τζενέν. (Ματθαίος 9:​35· Μάρκος 1:​40-42· Ιωάννης 5:​5-9) Αλλά σαρ Βασιλιάς κι Βασιλεία κι Ντεβλέσκι, ο Ιησούς κα κερέλ λατσσές σαρέ ι τζενέν. Καέκ να κα βακερέλ πάλι: «Ισινόμ νασφαλό».​—Ησαΐας 33:​24· 35:​5, 6.

23. Σο κα κερέλ ο Ντεβέλ οντουλένγκε σο μουλέ;

²³ Ο μουλέ κα τζουβντιόν πάλι. Ο Ντεβέλ ντέλα πο λάφι ότι κα αναστίνελ εκατομμύρια τζενέν σο μουλέ. «Κα αναστίντιβεν εμ οντουλά σο ισί δίκαιοι εμ οντουλά σο νανέ».​—Διάβανε Ιωάννης 5:​28, 29· Πράξεις 24:15.

24. Σαρ νιωθίνεσα σο ντιντιόλα-τουτ η ευκαιρία τι τζουβντιός κο Παράδεισος;

²⁴ Ο κάθε εκ αμένταρ πρέπει τι αποφασίνελ. Μπορίνασα τι τραμπίνας τι σικλιάς ι Ιεχωβάσκε ντα τι υπηρετίνας-λες ή μπορίνασα απλά τι κεράς σο μανγκάσα αμέν. Άμα τραμπιντάμ τι υπηρετίνας ι Ιεχωβάς, μπορίνασα τι τθεράς εκ μπουτ σουκάρ μέλλον. Όταν εκ τζενό πριν τι μερέλ μανγκλάς κατά Ιησούς μα τι μπιστρέλ-λες, ο Ιησούς ντινάς-λες πο λάφι: «Κα αβές μάντζαρ κο Παράδεισος». (Λουκάς 23:​43) Έλα τι σικλιάς πιο μπουτ ι Ιησού Χριστόσκε ντα σαρ κα κερέλ τι αβέν-πες μπαγιά σαρέ οντουλά σουκάρ πράγματα σο βακερντάς ο Ντεβέλ.