Εκ Υπόσχεση σο Ντινέ κο Ιεχωβά

Ντούι μάσεκ περίπου αφού νασλέ κατά Αίγυπτος, ο Ισραηλίτες ερεσλέ κο βες Σινά ντα μπεσλέ για χάνικ οτθέ. Ο Ιεχωβά βικιντάς ι Μωυσής οπράλ κο βες. Οτθέ βακερντάς λέσκε: “Σωντόμ ι Ισραηλιτέν. Άμα κα ντεν-μαν καν ντα κα κερέν μο νόμους, κα αβέν εκ ξεχωριστός λαός μάνγκε”. Ο Μωυσής γουλίστιλο ντα βακερντάς-λες κο Ισραηλίτες. Σο κερντέ βον; Απαντιντέ: “Κα κεράς σο-ντα βακερέλα αμένγκε ο Ιεχωβά”.

Ο Μωυσής νικλιντάς πάλι κο βες. Οτθέ, ο Ιεχωβά βακερντάς λέσκε: “Σε τριν ντιβές κα κεράβ τούκε λάφι. Βάκερ ι λαόσκε μα τι νικλίλ κο βες Σινά”. Ο Μωυσής γουλίστιλο ντα βακερντάς κο Ισραηλίτες τι αβέν έτοιμοι για τι ασουνέν ι Ιεχωβάς.

Νακχλέ τριν ντιβεσά ντα ο Ισραηλίτες ντικχλέ αστραπές ντα εκ καλό σύννεφος οπράλ κο βες. Ατζέ ασουντέ ζουρανέ βροντές ντα εκ ήχος σο κερέλα εκ σινγκ. Ντα αζομάν ο Ιεχωβά γουλίστιλο κο βες αντράλ κατά γιακ. Ο Ισραηλίτες νταρένας αζόμ μπουτ σο ιζράνας. Σαρό ο βες πφερντιλό κάδος ντα αβιλό εκ ζουρανό σεισμός. Ο ήχος κατά σινγκ αβέλας ατζέ πο ζουρανό. Αζομάν ο Ντεβέλ βακερντάς: “Με ισινόμ ο Ιεχωβά. Δεν πρέπει τι ντεν λατρεία καεκχέ γιαβερέ ντεβλέστε”.

Ο Μωυσής νικλιντάς πάλι κο βες, ντα ο Ιεχωβά ντινάς-λες νόμους ι λαόσκε σο βακερένας σαρ έπρεπε τι ντεν-λες λατρεία ντα σαρ έπρεπε τι συμπεριφερίντιβεν. Ο Μωυσής γραφιντάς ο νόμοι ντα σοράν διαβαντάς-λεν κο Ισραηλίτες. Σοράν βον ντινέ πουμαρό λάφι: “Κα κεράς σο-ντα βακερέλα αμένγκε ο Ιεχωβά”. Βα, ντινέ εκ υπόσχεση κο Ντεβέλ. Αλλά κα ατσσικιαρένας πουμαρό λάφι;