ΜΑΘΗΜΑΣ 9
Σο τι Κερέν ο Τερνέ Μουρσά για τι Ντεν Λένγκε Μπέσα ο Γιαβερά;
«Το τερνέ ισί σαρ ι δροσιά».—ΨΑΛΜ. 110:3.
ΥΜΝΟΣ 4 Τι Κεράς εκ Λατσσό Ναβ κο Ντεβέλ
ΣΟ ΚΑ ΝΤΙΚΧΑΣa
1. Σόσκε ισί σημαντικοί ο τερνέ πφραλά ι κχανγκιριάκε;
ΣΑΡ τερνέ πφραλά, τθερένα μπουτ πράγματα τι ντεν. Μπουτ τουμένταρ ισινέν ζουρανέ ντα πφερντέ ενέργεια. (Παρ. 20:29) Ισινέν μπουτ σημαντικοί τουμαρέ κχανγκιριάκε. Μπορεί τι μπεκλεντίνενα ι ντιβεσέσκε σο κα αβέν διακονικοί υπηρέτες. Όμως, μπορεί τι νιωθίνενα ότι ο γιαβερά είτε ντικχένα-τουμέν μπουτ χουρντέ είτε βακερένα ότι να ισινέν έτοιμοι για τι κερέν σημαντικά μπουτιά. Παρόλο σο ισινέν τερνέ, μπορίνενα τι κερέν μερικά πράγματα ακανά για τι ντεν τουμένγκε μπέσα ο γιαβερά κι κχανγκιρί ντα τι σεβάνεν-τουμέν.
2. Σο κα ντικχάς ανταλέ μαθημάστε;
2 Ανταλέ μαθημάστε, κα ντικχάς ι ζωή ι Δαβιδίσκι. Ντα κα ντικχάς μερικά πράγματα σο νακχλάς ο Ασά ντα ο Ιωσαφάτ, σο ισινέ βασιλιάδες κο Ιούδας. Κα ντικχάς σο δυσκολίες νακχλέ οντουλά τριν μουρσά, σο κερντέ ντα σο μπορίνενα τι σικλιόν ο τερνέ πφραλά λένγκε παραδειγμάσταρ.
ΣΙΚΛΙΟΝ ΚΑΤΑ ΒΑΣΙΛΙΑΣ ΔΑΒΙΔ
3. Καβά ισί εκ τρόπος σο ο τερνέ μπορίνενα τι βοηθίνεν ι πφουρέ πφραλέν;
3 Κάνα ισινέ τερνό, ο Δαβίδ σικλιλό τι κερέλ πράγματα σο ο γιαβερά εκτιμίνενας. Σίγουρα ισινέ λατσσό αμάλ ι Ιεχωβάσκο. Επίσης, τθερέλας ταλέντος κι μουσική ντα χρησιμοποιηντάς ανταβά ταλέντος για τι κερέλ λατσσιπέ κο Σαούλ, οντουλέστε σο ο Ντεβέλ τραμπιντάας τι αβέλ βασιλιάς. (1 Σαμ. 16:16, 23) Μουρσάλεν σο ισινέν τερνέ, μήπως τζανένα τι κερέν λατσσές μερικά πράγματα σο κα μπορίνενας τι βοηθίνεν γιαβερέν αντρέ κι κχανγκιρί; Μπουτ τουμένταρ τζανένα. Για παράδειγμας, μπορεί τι ντικχλέν ότι μερικά πφουρέ πφραλά εκτιμίνενα-λες κάνα εκ τζενό σικαβέλα λένγκε σαρ τι χρησιμοποιήνεν πουμαρό τάμπλετ ντα γιαβερά ηλεκτρονικές συσκευές για τι σικλιαρέν-πες κατά Γραφή ντα ι συναθροισιένγκε. Ο πράγματα σο τζανένα για το συσκευές ανταλά μπορίνενα τι βοηθίνεν μπουτ ασακέ τζενέν.
Ο Δαβίδ σικαντάς ότι ισινέ υπεύθυνος ντα μπεσαλής καζόμ φροντίνελας πι νταντέσκε μπρακέν, ντα αρακχαντάς-λεν ατζέ-ντα εκχέ αρκουδάταρ (Ντικχέν ι παράγραφος 4)
4. Σαρ ο Δαβίδ, καλά ιδιότητες πρέπει τι τθερέν ο τερνέ πφραλά; (Ντικχέν ι φωτογραφία κι ανγκλαϊνί σελίδα)
4 Πι ζωγιάτε, ο Δαβίδ σικαντάς ότι ισινέ υπεύθυνος ντα μπεσαλής. Για παράδειγμας, κάνα ισινέ τερνό, αρακχαβέλας λατσσές πι νταντέσκε μπρακέν. Ανταγιά ισινέ εκ επικίνδυνη μπουτί. Ο Δαβίδ πιο σοράν βακερντάς κο βασιλιάς Σαούλ: «Με, το υπηρέτης, αβιλόμ βοσκός κο κοπάδι μι νταντέσκο, ντα αβιλό εκ λιοντάρι ντα εκ αρκούδα, ντα ο κάθε εκ καπτιντάς εκχέ μπρακές κατά κοπάδι. Με τθαβντισάλομ παλά-λέστε ντα ντινόμ-λες ντα σωντόμ ι μπρακές λέσκε μόσταρ». (1 Σαμ. 17:34, 35) Ο Δαβίδ νιωθίνελας ότι ισινέ υπεύθυνος ι μπρακένγκε ντα αρακχαντάς-λεν μπίνταρανες. Ο τερνέ πφραλά μπορίνενα τι αβέν σαρ ο Δαβίδ κάνα κερένα λατσσές σο-ντα διορισμός ντιντιόλα-λεν.
5. Καβά ισί ο πιο σημαντικός πράγμας σο μπορίνενα τι κερέν ο τερνέ πφραλά σαρ βακερέλα ο εδάφιος Ψαλμός 25:14;
5 Ο τερνό Δαβίδ αβιλό μπουτ λατσσό αμάλ ι Ιεχωβάσκο. Ανταγιά φιλία ισινέ πιο σημαντική κατά θάρρος σο τθερέλας ο Δαβίδ ή κατά ταλέντος σο τθερέλας κι μουσική. Ο Ιεχωβά να ισινέ σάντε ο Ντεβέλ ι Δαβιδίσκο, αλλά λέσκο Αμάλ-ντα—λέσκο πιο λατσσό Αμάλ. (Διαβάνεν Ψαλμός 25:14) Μουρσάλεν σο ισινέν τερνέ, ο πιο σημαντικός πράγμας σο μπορίνενα τι κερέν ισί τι κερέν πιο ζουρανί τουμαρί φιλία ι Ιεχωβάσαρ, ντα ανταβά μπορεί τι πουτρέλ τουμένγκε ο ντρομ για τι λεν πιο μπουτ προνόμια.
6. Καλά πράγματα πακιάνας ι Δαβιδίσκε μερικά τζενέ;
6 Ο Δαβίδ έπρεπε τι νακχαβέλ ο πράγματα σο πακιάνας ο γιαβερά λέσκε. Για παράδειγμας, κάνα ο Δαβίδ βακερντάς ότι κα τζάλας τι κερέλ τζένγκι με τον Γολιάθ, ο βασιλιάς Σαούλ βακερντάς για τι τσσιναβέλ-λες: «Τούι ισινάν χουρντό». (1 Σαμ. 17:31-33) Πιο τζανγκλέ, ο ίδιος ο πφραλ ι Δαβιδίσκο κατηγοριντάς-λες ότι να ισινέ υπεύθυνος. (1 Σαμ. 17:26-30) Όμως, ο Ιεχωβά να σκεφτίνελας ότι ο Δαβίδ ισινέ μπουτ χουρντό, ούτε ότι να ισινέ υπεύθυνος. Τζανέλας λατσσές οντουλέ τερνές. Ο Δαβίδ μουκχλάς-πες πι Αμαλέστε, κο Ιεχωβά, για τι λελ ζορ ντα νικιντάς τον Γολιάθ.—1 Σαμ. 17:45, 48-51.
7. Σο σικλιάσα οντουλέσταρ σο νακχλάς ο Δαβίδ;
7 Σο σικλιάσα οντουλέσταρ σο νακχλάς ο Δαβίδ; Σικλιάσα ότι πρέπει τι κεράς υπομονή. Μπορεί τι χρειαζίντιβελ τι νακχέλ χρόνος για τι αρχίνεν ο τζενέ σο τζανένας εκχές σαρ χουρντό τι ντικχέν-λες σαρ μπαρό. Μπορίνενα όμως τι αβέν σίγουροι ότι ο Ιεχωβά να ντικχέλα-τουμέν σάντε σαρ ισινέν αβριάλ. Τζανέλα κον ισινέν ντα σο μπορίνενα τι κερέν. (1 Σαμ. 16:7) Κερέν τουμαρί φιλία ι Ντεβλέσαρ πιο ζουρανί. Ο Δαβίδ κερντάς-λες ανταβά κάνα ντικχέλας προσεκτικά οντουλά σο λατσσαρντάς ο Ιεχωβά. Σκεφτίνελας σο σικαβένας ανταλά πράγματα Οντουλέσκε σο κερντάς-λεν. (Ψαλμ. 8:3, 4· 139:14· Ρωμ. 1:20) Κάτι γιαβέρ σο μπορίνενα τι κερέν ισί τι μανγκέν κατά Ιεχωβά τι ντελ-τουμέν ι ζορ σο χρειαζίντιβενα. Για παράδειγμας, μήπως μερικοί τουμαρέ συμμαθητένταρ πρασάνα-τουμέν επειδή ισινέν Μάρτυρες ι Ιεχωβάσκε; Άμα αβέλα-πες ανταβά, κερέν προσευχή κο Ιεχωβά για τι βοηθίνελ-τουμέν τι νακχαβέν ανταγιά δυσκολία. Κερέν ο λατσσέ συμβουλές σο αρακχένα κο Λάφι κι Ντεβλέσκο, κο έντυπα ντα κο βίντεα σο νικαβάσα. Κάθε φαρ σο ντικχένα ι Ιεχωβάς τι βοηθίνελ-τουμέν τι νακχαβέν εκ δυσκολία, τουμαρί πίστη λέστε κα αβέλ πιο ζουρανί. Ντα, καζόμ ο γιαβερά κα ντικχέν ότι μουκχένα-τουμέν κο Ιεχωβά, κα ντεν τουμένγκε μπέσα.
Ο τερνέ πφραλά μπορίνενα τι βοηθίνεν ταπεινά ι γιαβερέν μπουτέ τροπόντζαρ (Ντικχέν ο παράγραφοι 8, 9)
8, 9. Σο βοηθιντάς ι Δαβιδίς τι μπεκλεντίνελ με υπομονή μέχρι τι αβέλ βασιλιάς, ντα σο μπορίνενα τι σικλιόν ο τερνέ πφραλά λέσταρ;
8 Σκεφτίνεν εκ γιαβέρ δυσκολία σο νακχλάς ο Δαβίδ. Αφού τραμπίντιλο τι αβέλ βασιλιάς, έπρεπε τι μπεκλεντίνελ μπουτ μπρεσά για τι αρχίνελ τι κερέλ κουμάντος σαρ βασιλιάς κο Ιούδας. (1 Σαμ. 16:13· 2 Σαμ. 2:3, 4) Σαρέ οντουλά μπρεσά, σο βοηθιντάς-λες τι μπεκλεντίνελ με υπομονή; Αντίς τι χασαρέλ σαρί πι ζορ, ντικχέλας ο πράγματα σο μπορίνελας τι κερέλ. Για παράδειγμας, καζόμ γκεραβέλας-πες κο τθεμ κι Φιλισταιόνγκο, να χασαρντάς ι ευκαιρία τι κερέλ τζένγκι ι Ισραηλιτένγκε ντουσμανίντζαρ. Επειδή κερντάς-λες ανταβά, αρακχαντάς ο τθεμ Ιούδας.—1 Σαμ. 27:1-12.
9 Σο μπορίνενα τι σικλιόν ο τερνέ πφραλά κατά Δαβίδ; Τι χρησιμοποιήνεν ο ευκαιρίες σο ντιντιόνα-τουμέν για τι υπηρετίνεν τουμαρέ πφραλέν. Ντικχέν σο αβιλό-πες κο Ρικάρντο.b Από αζομάν σο ισινέ χουρντό, μανγκέλας τι κερέλ σκαπανικός. Αλλά ο πρεσβύτεροι βακερντέ λέσκε ότι να ισινέ ατζέκ έτοιμος. Αντίς τι τσσιναβέλ τι προσπαθίνελ ή τι χολιάνελ, ο Ρικάρντο αρχισάλο τι κερέλ πιο μπουτ έργος. Βοβ βακερέλα: «Καζόμ σκεφτίναβα οντουλά σο αβιλέ-πες ανγκλέ, αγαβάβα ότι έπρεπε τι αβάβ πιο λατσσό κο έργος. Τσσουντόμ στόχος τι κεράβ επανεπισκέψεις σαρέ κο τζενέ σο μανγκένας τι σικλιόν πιο μπουτ ντα τι προετοιμάντιβαβ λατσσές. Ντα για πρώτη φαρ αρχισάλομ τι κεράβ μελέτη εκχέ τζενές. Καζόμ πιο μπουτ έργος κεράβας, αζόμ πιο σίγουρος νιωθίναβας». Ακανά ο Ρικάρντο ισί εκ λατσσό τακτικός σκαπανέας ντα διακονικός υπηρέτης.
10. Σο κερντάς ο Δαβίδ εκ φαρ πριν τι λελ εκ σημαντική απόφαση;
10 Σκεφτίνεν κάτι γιαβέρ-ντα σο νακχλάς ο Δαβίδ. Εκ φαρ, κάνα βοβ ντα λέσκε μουρσά γκεραβένας-πες κατά Σαούλ κο τθεμ κι Φιλισταιόνγκο, μουκχλέας πουμαρέ φαμιλιά ντα γκιλέας εκχέ τζενγκίστε. Καζόμ βον να ισινέ οτθέ, μερικά ντουσμάνια τσσουντέ-πες λένγκε κχερέντε ντα λιντέ λένγκε πράγματα ντα λένγκε φαμιλιά. Ο Δαβίδ κα μπορίνελας τι σκεφτίνελ ότι, επειδή κερέλας μπρεσά τζένγκι, κα μπορίνελας τι αρακχέλ εκ σχέδιος για τι σώνελ οντουλέν σο ασταρντέας ο ντουσμάνια. Όμως, αντίς τι σκεφτίνελ κάτι βοβ, μανγκλάς βοήθεια κατά Ιεχωβά. Ο ιερέας Αβιάθαρ βοηθιντάς ι Δαβιδίς τι πουτσέλ ι Ιεχωβάς: «Τι κουλαντίναβ οντουλέ τσορέν;» Ο Ιεχωβά βακερντάς κο Δαβίδ ότι έπρεπε τι κερέλ-λες ανταβά ντα ότι σίγουρα κα τθερέλας επιτυχία. (1 Σαμ. 30:7-10) Σο σικλιόνα τουμέν ανταλέ ιστοριάταρ;
Ο τερνέ πφραλά πρέπει τι μανγκέν συμβουλές κατά πρεσβύτεροι (Ντικχέν ι παράγραφος 11)
11. Σο μπορίνενα τι κερέν πριν τι λεν αποφάσεις;
11 Τι μανγκέν συμβουλές πριν τι λεν αποφάσεις. Τι πουτσέν τουμαρέ νταντές ντα τουμαρέ νταγιά. Επίσης, ο πφραλά σο ισί μπρεσά πρεσβύτεροι μπορίνενα τι ντεν-τουμέν λατσσέ συμβουλές. Ο Ιεχωβά ντέλα μπέσα ανταλέ μουρσένγκε, ντα ανταβά μπορίνενα τι κερέν τουμέν-ντα. Ι Ιεχωβάσκε, βον ισί «δώρα» ι κχανγκιριάκε. (Εφεσ. 4:8) Κα αβέλ λατσσό τουμένγκε άμα τθερένα ι πίστη σο τθερένα βον ντα άμα ασουνένα λένγκε γκοντιαβέρ λάφια. Ακανά για τι ντικχάς σο σικλιάσα κατά βασιλιάς Ασά.
ΣΙΚΛΙΟΝ ΚΑΤΑ ΒΑΣΙΛΙΑΣ ΑΣΑ
12. Καλά ιδιότητες τθερέλας ο Ασά κάνα αβιλό βασιλιάς;
12 Κάνα ισινέ τερνό, ο βασιλιάς Ασά ισινέ ταπεινός ντα μπίνταρανο. Για παράδειγμας, κάνα αβιλό βασιλιάς σοράν πι νταντέσταρ, σο βακερένας λέσκε Αβιά, αρχισάλο τι καταστραφίνελ ο είδωλα σο ισινέ οντουλέ τθεμέστε. Επίσης, «βακερντάς κο Ιουδαίοι τι ρόντεν ι Ιεχωβάσκε, ι Ντεβλέσκε σο τθερένας λένγκε παππούδες, ντα τι κερέν ο Νόμος ντα σαρέ ο λάφια σο ισινέ λέστε». (2 Χρον. 14:1-7) Ντα κάνα ο Ζερά κατά Αιθιοπία γκιλό 1.000.000 στρατιωτέντζαρ τι κερέλ τζένγκι ι Ιουδαιόντζαρ, ο Ασά σικαντάς ότι ισινέ γκοντιαβέρ σόσκε μανγκλάς βοήθεια κατά Ιεχωβά. Βακερντάς: «Ιεχωβά, νανέ σημαντικός τούκε άμα ο τζενέ σο βοηθίνεσα ισί μπουτ ή να τθερένα δύναμη. Βοήθινε-αμέν, Ιεχωβά, τούι σο ισινάν αμαρό Ντεβέλ, επειδή στηρίντιβασα τούτε». Ανταλά σουκάρ λάφια σικαβένα καζόμ σίγουρος ισινέ ο Ασά ότι ο Ιεχωβά μπορίνελας τι σώνελ εμ λες εμ λέσκε λαός. Ο Ασά ντινάς μπέσα κο Ιεχωβά, ντα «ο Ιεχωβά κερντάς ι Αιθιοπόν τι χασαρέν».—2 Χρον. 14:8-12.
13. Σο αβιλό-πες πιο σοράν κο Ασά, ντα σόσκε;
13 Σίγουρα ο Ασά νταρασάλο κάνα 1.000.000 στρατιώτες γκιλέ τι τσσουβέν-λεν λέσαρ. Αλλά ο Ασά τθερέλας επιτυχία. Δυστυχώς όμως, κάνα τθερέλας εκ μπουτ πιο χουρντό πρόβλημας, να ντινάς μπέσα κο Ιεχωβά. Κάνα απειλιντάς-λες ο πφιρνό βασιλιάς Βαασά κατά Ισραήλ, ο Ασά μανγκλάς βοήθεια κατά βασιλιάς ι Συριόνγκο. Ανταβά αντάς μπαρέ προβλήματα. Αντράλ κατά προφήτης Ανανί, ο Ιεχωβά βακερντάς κο Ασά: «Επειδή στηριντάν-τουτ κο βασιλιάς της Συρίας ντα να στηριντάν-τουτ κο Ιεχωβά τι Ντεβλέστε, ο στρατός ι βασιλιάσκο της Συρίας νασλό τι βαστέσταρ». Οντουλέ ντιβεσέσταρ, ο Ασά τθερέλας τζένγκια. (2 Χρον. 16:7, 9· 1 Βασ. 15:32) Σο σικλιάσα ανταλέσταρ;
14. Σαρ μπορίνενα τι ντεν μπέσα κο Ιεχωβά, ντα σο τζενέ κα αβέν άμα κα κερέν-λες ανταβά σαρ βακερέλα ο εδάφιος 1 Τιμόθεο 4:12;
14 Ατσσόν ταπεινοί ντα μα τσσιναβέν τι ντεν μπέσα κο Ιεχωβά. Κάνα μπολντιλέν, σικαντέν ότι πακιάνας μπουτ κο Ιεχωβά ντα ντένας λέσκε μπέσα. Ντα ο Ιεχωβά χαιρισάλο μπουτ σο αβιλέν αντρέ λέσκε φαμιλιάτε. Ανταβά σο πρέπει τι κερέν ακανά ισί τι συνεχίνεν τι ντεν μπέσα κο Ιεχωβά. Μπορεί τι ντικχίντιβελα εύκολος τι ντεν μπέσα κο Ιεχωβά κάνα τθερένα τι λεν αποφάσεις σο κα αλλάνεν τουμαρί ζωή, αλλά σο αβέλα-πες κάνα τθερένα τι λεν πιο χουρντέ αποφάσεις; Ισί μπουτ σημαντικός τι ντεν μπέσα κο Ιεχωβά κάνα λένα αποφάσεις σο τθερένα τι κερέν με τη διασκέδαση, ι μπουτιάσαρ ντα με το στόχοι σο τθερένα! Μα ντεν μπέσα κι σοφία σο τθερένα τουμέν. Αλλά τι ρόντεν τι αρακχέν αρχές ι Γραφιάκε σο κα βοηθίνεν-τουμέν ντα σοράν κερέν-λεν. (Παρ. 3:5, 6) Άμα κα κερέν-λες ανταβά, κα κερέν ι Ιεχωβάς χαρούμενος ντα ο γιαβερά κι κχανγκιρί κα ντεν τουμένγκε μπέσα.—Διαβάνεν 1 Τιμόθεο 4:12.
ΣΙΚΛΙΟΝ ΚΑΤΑ ΒΑΣΙΛΙΑΣ ΙΩΣΑΦΑΤ
15. Καλά λάθη κερντάς ο βασιλιάς Ιωσαφάτ σαρ βακερένα ο εδάφια 2 Χρονικών 18:1-3 ντα 19:2;
15 Σαρ ισί σαρέ ο τζενέ, αντικάς τουμέν-ντα ισινέν ατελείς ντα μπάζιμα κα κερέν λάθη. Όμως, ανταβά δεν πρέπει τι τσσιναβέλ-τουμέν τι κερέν σο νακχέλα τουμαρέ βαστένταρ κι Ιεχωβάσκι υπηρεσία. Σκεφτίνεν ο παράδειγμας σο μουκχλάς ο βασιλιάς Ιωσαφάτ. Τθερέλας μπερεκέτι λατσσέ ιδιότητες. Κάνα ισινέ τερνό, «ροντιντάς πι νταντέσκε Ντεβλέσκε ντα ακολουθιντάς λέσκι εντολή». Επίσης, μπουτσσαντάς αρχοντέν σαρό κο Ιούδας για τι σικλιαρέν ι τζενέν ι Ιεχωβάσκε. (2 Χρον. 17:4, 7) Αλλά μπάζιμα λέλας λάθος αποφάσεις. Επειδή λιντάς εκ ασακί απόφαση, εκ φαρ ο Ιεχωβά μπουτσσαντάς εκχέ προφητής για τι ντελ-λες συμβουλή. (Διαβάνεν 2 Χρονικών 18:1-3· 19:2) Σο σικλιόνα τουμέν ανταλέ ιστοριάταρ;
Ο γιαβερά εκτιμίνενα ι τερνέ πφραλέν σο ισί μπουτιαρνέ ντα μπεσαλήδες (Ντικχέν ι παράγραφος 16)
16. Σο σικλιόνα κατά Ρατζίβ;
16 Τι ασουνέν ο συμβουλές σο ντένα-τουμέν ντα τι κερέν-λεν. Σαρ μπουτ τερνέ μουρσά, μπορεί τουμέν-ντα τι δυσκολίντιβενα τι τσσουβέν ι Ιεχωβάσκι υπηρεσία πρώτα τουμαρέ ζωγιάτε. Μα χασαρέν τουμαρί ζορ. Ντικχέν σο αβιλό-πες εκχέ τερνέσκε, κο Ρατζίβ. Βοβ βακερέλα ι ντιβεσένγκε σο ισινέ πιο χουρντό: «Μπάζιμα να τζανάβας σο μανγκάβας τι κεράβ μι ζωγιάτε. Σαρ μπουτ γιαβερά τερνέ, τθεράβας μι γκοντιάτε πιο μπουτ ο αθλήματα ντα ι διασκέδαση ντα όχι αζόμ μπουτ ο συναθροίσεις ντα ο έργος». Σαρ βοηθισάλο ο Ρατζίβ; Εκ πρεσβύτερος σο ενδιαφερίντιβελας λέσκε ντινάς-λες μερικές συμβουλές. Ο Ρατζίβ βακερέλα: «Διαβαντάς μάνγκε ο εδάφιος 1 Τιμόθεο 4:8 ντα αντικάς βοηθιντάς-μαν τι αλλάναβ ο τρόπος σο σκεφτίναβας». Ο Ρατζίβ ισινέ ταπεινός, ασουντάς ι συμβουλή ντα σκεφτιντάς καβά ισινέ ο πιο σημαντικός πράγμας λέσκε ζωγιάτε. Βοβ βακερέλα: «Αποφασιντόμ τι τσσουβάβ πρώτα μι ζωγιάτε ο πνευματικά πράγματα». Καβά ισινέ ο αποτέλεσμας; «Χάνικ μπρεσά αφού λιντόμ οντιά συμβουλή», βακερέλα, «αβιλόμ διακονικός υπηρέτης».
ΚΕΡΕΝ Ι ΙΕΧΩΒΑΣ ΧΑΡΟΥΜΕΝΟΣ
17. Σαρ νιωθίνενα ο πφραλά σο ισί πιο μπαρέ κι ηλικία ι τερνέ μουρσένγκε σο υπηρετίνενα ι Ιεχωβάς;
17 Ο πφραλά σο ισί πιο μπαρέ κι ηλικία εκτιμίνενα μπουτ τουμέν ι τερνέ μουρσέν σο υπηρετίνενα ι Ιεχωβάς γιεκ λέντζαρ! (Σοφ. 3:9) Μπεϊντίνενα μπουτ σο ντικχένα-τουμέν τι κερέν αντράλ τουμαρέ γκίσταρ ο διορισμοί σο ντιντιόνα-τουμέν. Μανγκένα-τουμέν μπουτ.—1 Ιωάν. 2:14.
18. Σαρ νιωθίνελα ο Ιεχωβά ι τερνέ μουρσένγκε σο υπηρετίνενα-λες σαρ σικαβέλα ο εδάφιος Παροιμίες 27:11;
18 Πφραλάλεν σο ισινέν τερνέ, μα μπιστρέν ποτές ότι ο Ιεχωβά μανγκέλα-τουμέν ντα ντέλα τουμένγκε μπέσα. Βοβ βακερντάς ότι κο τελευταία ντιβεσά κα υπαρχίντιβενας μπουτ τερνέ μουρσά σο κα ντένας πουμαρό νεαυτός αντράλ πουμαρέ γκίσταρ. (Ψαλμ. 110:1-3) Τζανέλα ότι μανγκένα-λες ντα μανγκένα τι υπηρετίνεν-λες καζόμ πιο λατσσές μπορίνενα. Οντουλέσκε, τι κερέν υπομονή ι γιαβερέντζαρ αλλά τουμαρέ νεαυτόσαρ-ντα. Κάνα κερένα λάθη, τι δεχτίνεν ο σικλιαριπέ ντα ι διόρθωση σο λένα, ντα τι αγαβέν ότι αβέλα κατά Ιεχωβά. (Εβρ. 12:6) Τι κερέν λατσσές σο-ντα διορισμός ντιντιόλα-τουμέν. Ντα ο πιο σημαντικός, σαρέ κο πράγματα σο κερένα τουμαρέ ζωγιάτε, τι κερέν ι Ιεχωβάσκο γκι τι χαιρίνελ.—Διαβάνεν Παροιμίες 27:11.
ΥΜΝΟΣ 11 Τι Κεράς Χαρούμενος ο Γκι ι Ντεβλέσκο
a Καζόμ ο τερνέ πφραλά αβένα πιο λατσσέ αμαλά ι Ιεχωβάσαρ, μανγκένα τι υπηρετίνεν-λες γιαβερέ-ντα τροπόντζαρ. Για τι αβέν διακονικοί υπηρέτες, πρέπει τι κερέν ι γιαβερέν κι κχανγκιρί τι σεβάνεν-λεν ντα μα τι χασαρέν ανταβά σεβασμός. Σο μπορίνενα τι κερέν ο τερνέ πφραλά;
b Μερικά ναβά αλλαξάλε.