Τουμέν κα Τσσουβέν Αντρέ Τουμαρέ Γκίστε Οντουλά σο Ισί Γραμμέ;

1, 2. Σόσκε κα ντικχάς ο παράδειγμας σο μουκχλέ ο σταρ βασιλιάδες του Ιούδα;

ΑΜΑ κα ντικχένας εκχέ τζενές σο πφιρέλα κο ντρομ τι γλυστρίνελ ντα τι περέλ, σίγουρα κα προσοχίνενας τουμέν-ντα όταν κα νακχένας οτθάρ. Αντικάς αμέν-ντα, όταν ντικχάσα ο λάθη σο κερντέ γιαβερά τζενέ πουμαρέ ζωγιάτε, κα μπορίνας μα τι κεράς ο ίδια λάθη. Για παράδειγμας, μπορίνασα τι σικλιάς κατά λάθη σο κερντέ ο τζενέ σο ισί κι Γραφή.

² Ο σταρ βασιλιάδες του Ιούδα σο διαβαντάμας λένγκε κο γιαβέρ μάθημας υπηρετίνενας ι Ιεχωβάς σαστέ πουμαρέ γκίσαρ. Όμως κερντέ κάποια σοβαρά λάθη-ντα. Λένγκε εμπειρίες γραφισάλε κι Γραφή για τι σκεφτίνας-λεν ντα τι σικλιάς λένταρ σημαντικά πράγματα. Σο μπορίνασα τι σικλιάς οντουλένταρ σο κερντέ, ντα σαρ μπορίνασα μα τι κεράς ο λάθη σο κερντέ βον;​—Διαβάνεν Ρωμαίους 15:4.

ΟΤΑΝ ΣΤΗΡΙΝΤΙΒΑΣΑ ΚΙ ΤΖΕΝΕΝΓΚΙ ΣΟΦΙΑ, ΤΖΑΣΑ ΚΙ ΚΑΤΑΣΤΡΟΦΗ

3-5. (α) Παρόλο σο τθερέλας ο Ασά σαστό πο γκι ι Ιεχωβάσαρ, σο λάθος κερντάς; (β) Σόσκε μπορεί τι στηριντάς-πες ο Ασά τζενέντε όταν κερντάς τζένγκι με το Βαασά;

³ Για τι ντικχάς πρώτα ο παράδειγμας του Ασά. Βοβ στηριντάς-πες κο Ιεχωβά όταν εκ εκατομμύριος Αιθίοπες γκιλέ τι κερέν τζένγκι με τους Ιουδαίους. Όμως να στηριντάς-πες κο Ιεχωβά όταν γκιλό τι πολεμίνελ τον Βαασά, σο ισινέ ο βασιλιάς του Ισραήλ. Ο Ασά μανγκέλας τι σταματίνελ τον Βαασά τι χτίνελ ι Ραμά, σο ισινέ εκ σημαντική πόλη του Ισραήλ πασέ κο σύνορα του Ιούδα. (2 Χρονικών 16:​1-3) Ο Ασά αποφασιντάς ότι κα αβέλας λατσσό τι ντελ μπουτ λοβέ κο βασιλιάς της Συρίας για τι μανγκέλ λέσταρ βοήθεια. Όταν ο Σύριοι κερντέ επίθεση κο πόλεις του Ισραήλ, ο Βαασά «σταματιντάς αμέσως τι χτίνελ ι Ραμά ντα τσσιναντάς οντουβά σο κερέλας οτθέ». (2 Χρονικών 16:5) Κι αρχή ο Ασά μπορεί τι αμντισάλο ότι λιντάς ι σωστή απόφαση.

⁴ Αλλά σαρ νιωσάλο ο Ιεχωβά; Ο Ιεχωβά να μπεϊντιντάς σο να στηριντάς-πες ο Ασά λέστε, ντα μπουτσσαντάς τον προφήτη Ανανί τι διορθώνελ-λες. (Διαβάνεν 2 Χρονικών 16:​7-9) Ο Ανανί βακερντάς κο Ασά: «Από αντιβές κα τθερές τζένγκια». Ο Ασά κερέλας κουμάντος ι Ραμά, όμως σαρέ πο μπρεσά βοβ ντα λέσκο λαός κα τθερένας μπουτ τζένγκια.

⁵ Κο γιαβέρ μάθημας, σικλιλάμ ότι ο Ιεχωβά χαιρισάλο με τον Ασά. Παρόλο σο ο Ασά ισινέ ατελής, ο Ντεβέλ ντικχλάς ότι λέσκο γκι ισινέ αφοσιωμέ Λέστε. (1 Βασιλέων 15:​14) Όμως, όταν ο Ασά λιντάς εκ λάθος απόφαση, να μπορίνελας τι νασέλ κατά μπέτι αποτελέσματα σο αβιλέ. Σόσκε στηριντάς-πες πι νεαυτόστε ντα γιαβερέ τζενέντε ντα όχι κο Ιεχωβά; Μπορεί ο Ασά τι αμντίνελας ότι μπορίνελας τι χρησιμοποιήνελ έξυπνους τρόπους για τι νικίνελ κο τζένγκι. Ή μπορεί τι ασουντάς εκ κακή συμβουλή γιαβερένταρ.

6. Σο μπορίνασα τι σικλιάς κατά λάθος του Ασά; Βακερέν εκ παράδειγμας.

⁶ Σο μπορίνασα τι σικλιάς κατά λάθος σο κερντάς ο Ασά; Σο-ντα τι αβέλ-πες, πρέπει τι στηρίντιβας κο Ιεχωβά ντα όχι αμαρέ γκοντιάτε. Πρέπει τι μανγκάς λέσταρ βοήθεια, είτε αμαρέ προβλήματα ισί μπαρέ είτε χουρντέ. Ισί λατσσό τι σκεφτίνας ακαβά: Μήπως μερικές φορές στηρίντιβασα αμαρέ νεαυτόστε ντα προσπαθίνασα τι λύνας εκ πρόβλημας με το τρόπος σο αμντίνασα ότι ισί ο πιο λατσσό; Ή πάντα σκεφτίνασα πρώτα σο βακερέλα η Γραφή ντα σοράν προσπαθίνασα τι χρησιμοποιήνας ανταλά πληροφορίες για τι λύνας αμαρέ προβλήματα; Για παράδειγμας, σκεφτίνεν ότι τουμαρί φαμιλί να μουκχέλα-τουμέν τι τζαν κο συναθροίσεις ή κο συνελεύσεις. Κα μανγκένας κατά Ιεχωβά τι βοηθίνελ-τουμέν τι αγαβέν σαρ τι αντιμετωπίνεν οντουβά πρόβλημας; Ή μπορεί τι ισινένας χωρίς μπουτί για μπουτ καιρός, ντα τι αρακχλέν επιτέλους εκχές σο μανγκέλα τι λελ-τουμέν πι μπουτιάτε. Κα βακερένας λέσκε ότι πρέπει τι τζαν κάθε εβδομάδα κο συναθροίσεις παρόλο σο μπορεί τι χασαρέν οντιά μπουτί; Καβά-ντα τι αβέλ ο πρόβλημας, πρέπει πάντα τι σκεφτίνας ι συμβουλή του ψαλμωδού: «Μουκχ κο Ιεχωβά το ντρομ· τι στηρίντιβες λέστε, ντα βοβ κα βοηθίνελ-τουτ».​—Ψαλμός 37:5.

ΣΟ ΜΠΟΡΕΙ ΤΙ ΑΒΕΛ-ΠΕΣ ΑΜΑ ΚΑ ΤΡΑΜΠΙΝΑΣ ΛΑΘΟΣ ΑΜΑΛΕΝ;

7, 8. Σο λάθη κερντάς ο Ιωσαφάτ, ντα καβά ισινέ ο αποτέλεσμας; (Ντικχ ι φωτογραφία σο ισί κι αρχή.)

⁷ Για τι σκεφτίνας ο παράδειγμας του Ιωσαφάτ, σο ισινέ ο τσσαβό του Ασά. Βοβ τθερέλας μπουτ λατσσέ ιδιότητες σο κερένας ι Ιεχωβάς χαρούμενος. Ντα όταν στηρίντιβελας κο Ιεχωβά, κερντάς μπουτ λατσσέ πράγματα. Αλλά λιντάς κάποιες αποφάσεις-ντα σο να ισινέ λατσσέ. Για παράδειγμας, κανονιντάς τι παντρίνελ ο τσσαβό λέσκο ι τσσαγιά σο τθερέλας ο πφιρνό Βασιλιάς Αχαάβ. Σοράν, ο Ιωσαφάτ γκιλό με τον Αχαάβ τι πολεμίνελ ι Συριόν, παρόλο σο βακερντάς λέσκε ο προφήτης Μιχαΐας μα τι τζαλ. Κο τζένγκι, ο Σύριοι κερντέ επίθεση κο Ιωσαφάτ ντα προσπαθιντέ τι μουνταρέν-λες. (2 Χρονικών 18:​1-32) Όταν βουρτισάλο κι Ιερουσαλήμ, ο προφήτης Ιηού πουτσλάς-λες: «Ι πφιρνές κα βοηθίνες, ντα οντουλέν σο μισίνενα ι Ιεχωβάς κα μανγκές;»​—Διαβάνεν 2 Χρονικών 19:​1-3.

⁸ Σικλιλό κάτι ο Ιωσαφάτ οντουλέσταρ σο αβιλό λέσκε ντα κατά προειδοποίηση σο ντινάς-λες ο προφήτης; Δυστυχώς όχι. Παρόλο σο συνεχίνελας τι τθερέλ αγάπη ι Ιεχωβάσκε ντα μανγκέλας τι κερέλ-λες χαρούμενος, ο Ιωσαφάτ αβιλό πάλι αμάλ εκχέ τζενέσαρ σο να μανγκέλας τι ντελ λατρεία ι Ιεχωβάς. Ανταβά τζενό ισινέ ο Βασιλιάς Οχοζίας, ο τσσαβό του Αχαάβ. Ο Ιωσαφάτ ντα ο Οχοζίας κερντέ μαζί καράβια. Αλλά οντουλά καράβια βουλιαξάλε πριν τι μπορίνεν τι χρησιμοποιήνεν-λεν.​—2 Χρονικών 20:​35-37.

9. Σο μπορεί τι αβέλ-πες άμα κα τραμπίνας λάθος αμαλέν;

⁹ Σο μπορίνασα τι σικλιάς οντουλένταρ σο αβιλέ-πες κο Ιωσαφάτ; Ο Ιωσαφάτ κερντάς ο σωστός ντα «ρόντελας ι Ιεχωβάσκε σαρέ πι γκίσαρ». (2 Χρονικών 22:9) Αλλά τραμπιντάς τι κερέλ παρέα τζενέντζαρ σο να μανγκένας ι Ιεχωβάς, ντα ανταβά αντάς σοβαρά προβλήματα λέσκε ζωγιάτε. Κι πραγματικότητα, παραλίγο τι χασαρέλ πι ζωή. Ντεν-τουμέν γκοντί ι παροιμία ι Γραφιάκι: «Οντουβά σο πφιρέλα γκοντιαβέρ τζενέντζαρ κα αβέλ γκοντιαβέρ, αλλά οντουβά σο κερέλα παρέα τζενέντζαρ σο να τθερένα γκοντί κα τθερέλ μπέτι αποτέλεσμας». (Παροιμίες 13:​20) Μανγκάσα τι κεράς λάφι κο γιαβερά ι Ιεχωβάσκε. Όμως κα αβέλας επικίνδυνος τι αβάς λατσσέ αμαλά τζενέντζαρ σο να υπηρετίνενα-λες.

10. (α) Άμα μανγκάσα τι παντρίνας, σο μπορίνασα τι σικλιάς κατά Ιωσαφάτ; (β) Σο πρέπει τι ντας-αμέν γκοντί;

¹⁰ Για παράδειγμας, άμα κα μανγκάας τι παντρίνας, σο μπορίνασα τι σικλιάς κατά Ιωσαφάτ; Μπορεί τι αρχίνας τι μανγκάς εκχές ή εκχιά σο να μανγκέλα ι Ιεχωβάς. Μπορεί τι σκεφτίνας ότι να κα αρακχάς αντρέ κο λαός κι Ντεβλέσκο κάποιον για τι παντρίνας. Ή μπορεί αμαρέ τζενέ τι βακερέν αμένγκε συνέχεια ότι πρέπει τι παντρίνας πριν τι νακχέν αμαρέ μπρεσά. Ισί μπαγιά ότι ο Ιεχωβά κερντάς-αμέν με την ανάγκη τι μανγκάς ντα τι μανγκέν-αμέν. Όμως άμα ναστί αρακχάσα ι σωστέ τζενές για τι παντρίνας, σο πρέπει τι κεράς; Εκ πράγμας σο μπορεί τι βοηθίνελ ισί τι σκεφτίνας σο αβιλό-πες κο Ιωσαφάτ. Βοβ ο πιο μπουτ φαρ μανγκέλας βοήθεια κατά Ιεχωβά. (2 Χρονικών 18:​4-6) Αλλά όταν αβιλό αμάλ με τον Αχαάβ, σο να μανγκέλας ι Ιεχωβάς, ο Ιωσαφάτ να ντινάς σημασία κι προειδοποίηση σο ντινάς-λες ο Ιεχωβά. Ο Ιωσαφάτ έπρεπε τι τθερέλ πι γκοντιάτε ότι «ο γιακχά ι Ιεχωβάσκε ντικχένα σαρί ι πφουβ για τι βοηθίνελ πι ζοριάσαρ οντουλέν σο υπηρετίνενα-λες σαρέ πουμαρέ γκίσαρ». (2 Χρονικών 16:9) Αμέν-ντα πρέπει τι ντας-αμέν γκοντί ότι ο Ιεχωβά μανγκέλα τι βοηθίνελ-αμέν. Αγαβέλα-αμέν ντα μανγκέλα-αμέν. Τουμέν πακιάνα ότι ο Ντεβέλ κα φροντίνελ ι ανάγκη σο τθερένα τι αβέν εκχέ τζενέσαρ σο κα μανγκέλ-τουμέν ντα κα μανγκέν-λες; Τι αβέν σίγουροι ότι κάποια στιγμή κα κερέλ-λες!

ΜΑ ΜΟΥΚΧΕΝ ΤΟΥΜΑΡΟ ΓΚΙ ΤΙ ΑΒΕΛ ΜΠΑΡΙΚΑΝΟ

11, 12. (α) Καβά πράγμας σο κερντάς ο Εζεκίας σικαντάς σο τθερέλας αντρέ πι γκίστε; (β) Σόσκε συγχωριντάς ο Ιεχωβά τον Εζεκία;

¹¹ Σο σικλιάσα κατά Εζεκίας; Ο Ιεχωβά βοηθιντάς τον Εζεκία τι ντικχέλ σο τθερέλας μπαγιά αντρέ πι γκίστε. (Διαβάνεν 2 Χρονικών 32:​31) Όταν ο Εζεκίας νασφάλιλο μπουτ σοβαρά, ο Ντεβέλ βακερντάς λέσκε ότι κα αβέλας λατσσές, ντα για μα τι τθερέλ καέκ αμφιβολία ντινάς-λες εκ σημείος. Ο Ιεχωβά κερντάς ι βουτσσάλ σο περέλας κι σκάλα τι τζαλ ντες σκάλες πιο παλάλ. Σοράν, σαρ αγαβάσα ο άρχοντες της Βαβυλώνας μανγκένας τι σικλιόν πιο μπουτ ανταλέ σημειόσκε, ντα μπουτσσαντέ τζενέν κο Εζεκίας για τι πουτσέν-λες ανταλέσκε. (2 Βασιλέων 20:​8-13· 2 Χρονικών 32:​24) Ο Ιεχωβά να βακερντάς κο Εζεκίας σαρ τι συμπεριφερίντιβελ λένγκε. Η Γραφή βακερέλα ότι ο Ιεχωβά «μουκχλάς-λες» για τι ντικχέλ σο κα κερέλας. Ο Εζεκίας σικαντάς κο μουρσά κατά Βαβυλώνα σαρέ πο θησαυρούς. Ανταβά σικαντάς σο τθερέλας αντρέ πι γκίστε. Σόσκε βακεράσα-λες ανταβά;

¹² Δυστυχώς, ο Εζεκίας αβιλόας μπαρικανό. Ντα αντικάς, «να σικαντάς εκτίμηση ι λατσσιμάσκε σο σικάντιλο λέσκε». Η Γραφή να βακερέλα αμένγκε σόσκε αλλαξάλο. Μπορεί τι αλλαξάλο επειδή νικιντάς τους Ασσύριους ή επειδή ο Ιεχωβά κερντάας-λες λατσσές. Ή μπορεί τι αβιλό-πες ανταβά επειδή αβιλό χουλανό ντα μουκχλάς νάμι κο ντουνιάς. Παρόλο σο ο Εζεκίας υπηρετιντάας ι Ιεχωβάς σαστέ πι γκίσαρ, κάποια στιγμή αβιλό μπαρικανό ντα στεναχωριντάς ι Ιεχωβάς. Σοράν όμως, «ο Εζεκίας ταπεινωντάς πο νεαυτός», ντα ο Ντεβέλ συγχωριντάς-λες.​—2 Χρονικών 32:​25-27· Ψαλμός 138:6.

13, 14. (α) Καβά πράγμας κα μπορίνελας τι σικαβέλ σο τθεράσα αντρέ αμαρέ γκίστε; (β) Σαρ πρέπει τι αντιδράνας όταν ο γιαβερά ισαρένα-αμέν;

¹³ Σο μπορίνασα τι σικλιάς κατά Εζεκίας ντα κατά λάθη σο κερντάς; Τι ντεν-τουμέν γκοντί ότι ο Εζεκίας αβιλό μπαρικανό αφού πρώτα ο Ιεχωβά βοηθιντάς-λες τι νικίνελ τους Ασσύριους ντα κερντάς-λες λατσσές λέσκε νασφαλιμάσταρ. Άρα, όταν αβένα-πες λατσσέ πράγματα αμένγκε ή όταν ο γιαβερά ισαρένα-αμέν, σο κα κεράς; Ο τρόπος σο αντιδράνασα κα μπορίνελας τι σικαβέλ σο ισί αντρέ αμαρέ γκίστε. Για παράδειγμας, εκ πφραλ μπορεί τι μαρντάς-πες για τι ετοιμάνελ ντα τι κερέλ εκ ομιλία ανγκλάλ μπουτέ τζενέντε. Μπουτ τζενέ ισαρένα-λες οντουλέσκε σο κερντάς. Σαρ κα αντιδράνελ όταν ο γιαβερά ισαρένα-λες;

¹⁴ Πρέπει πάντα τι τθεράς αμαρέ γκοντιάτε ο λάφια σο βακερντάς ο Ιησούς: «Όταν κερένα σαρέ οντουλά σο πρέπει τι κερέν, τι βακερέν: “Άχρηστοι δούλοι ισινάμ. Κερντάμ οντουβά σο έπρεπε τι κεράς”». (Λουκάς 17:​10) Τι ντεν-τουμέν γκοντί ότι, όταν ο Εζεκίας αβιλό μπαρικανό, να εκτιμιντάς ι βοήθεια σο ντινάας-λες ο Ιεχωβά. Άρα, όταν ο γιαβερά ισαρένα-αμέν εκχέ ομιλιάκε σο κερντάμ, σο κα βοηθίνελ-αμέν τι ατσσάς ταπεινοί; Μπορίνασα τι σκεφτίνας ο πράγματα σο κερντάς ο Ιεχωβά αμένγκε. Ντα μπορίνασα τι κεράς λάφι λέσκε ντα για το τρόπος σο βοηθιντάς-αμέν. Εξάλλου, βοβ ντινάς-αμέν ι Γραφή ντα ο άγιος πνεύμας για τι μπορίνας τι κεράς ι ομιλία.

ΤΙ ΜΟΥΚΧΕΝ Ι ΙΕΧΩΒΑΣ ΤΙ ΟΔΗΓΙΝΕΛ-ΤΟΥΜΕΝ ΟΤΑΝ ΛΕΝΑ ΑΠΟΦΑΣΕΙΣ

15, 16. Σο κερντάς ο Ιωσίας σο γκερντάς-λες κο μεριπέ;

¹⁵ Σο μπορίνασα τι σικλιάς κατά Ιωσίας; Παρόλο σο ο Ιωσίας ισινέ λατσσό βασιλιάς, κερντάς εκ λάθος σο γκερντάς-λες κο μεριπέ. (Διαβάνεν 2 Χρονικών 35:​20-22) Σο αβιλό-πες; Ο Ιωσίας αρχισάλο εκ τζένγκι με τον Νεχώ, τον βασιλιά της Αιγύπτου, παρόλο σο να υπαρχίντιβελας λόγος τι κερέλ-λες ανταβά. Κι πραγματικότητα, ο Νεχώ βακερντάς κο Ιωσίας ότι να μανγκέλας τι πολεμίνελ-λες. Η Γραφή βακερέλα ότι ο λάφια του Νεχώ ισινέ «κατά Ντεβλέσκο μούι». Όμως ο Ιωσίας γκιλό κο τζένγκι ντα μουνταρντέ-λες. Σόσκε γκιλό τι πολεμίνελ τον Νεχώ; Η Γραφή να βακερέλα αμένγκε.

¹⁶ Ο Ιωσίας έπρεπε τι σικλιόλ άμα ο λάφια του Νεχώ ισινέ μπαγιά κατά Ιεχωβά. Σαρ; Κα μπορίνελας τι πουτσέλ τον Ιερεμία, σο ισινέ προφήτης ι Ιεχωβάσκο. (2 Χρονικών 35:​23, 25) Επίσης, ο Ιωσίας έπρεπε τι σκεφτίνελ λατσσές ο πράγματα. Ο Νεχώ τζάλας κι Χαρκεμίς για τι πολεμίνελ εκ γιαβέρ τθεμ, όχι την Ιερουσαλήμ. Ντα να προσπαθιντάς τι προσβαλίνελ ι Ιεχωβάς ή λέσκε λαός. Ο Ιωσίας να σκεφτιντάς λατσσές ανταλά πράγματα πριν τι αποφασίνελ σο κα κερέλ. Σο σικλιάσα ανταλέσταρ; Όταν τθεράσα εκ πρόβλημας ντα πρέπει τι λας εκ απόφαση, πρέπει πρώτα τι σκεφτίνας σο μπορεί τι μανγκέλα αμένταρ ο Ιεχωβά τι κεράς.

17. Όταν τθεράσα προβλήματα, σαρ κα μπορίνας μα τι κεράς εκ λάθος σο κα μοιάζελας οντουλέσαρ σο κερντάς ο Ιωσίας;

¹⁷ Όταν πρέπει τι λας εκ απόφαση, πρέπει πρώτα τι σκεφτίνας καλά συμβουλές κατά Γραφή μπορίνενα τι βοηθίνεν-αμέν ντα σαρ μπορίνασα τι κεράς-λεν αμαρέ ζωγιάτε. Μερικές φορές, μπορεί τι χρειαζίντιβελ τι ρόντας πιο μπουτ κο έντυπα σο τθεράσα ή τι μανγκάς εκ συμβουλή εκχέ πρεσβυτερόσταρ. Βοβ κα μπορίνελας τι βοηθίνελ-αμέν τι σκεφτίνας γιαβερά-ντα συμβουλές κατά Γραφή. Σκεφτίνεν ακαγιά κατάσταση: Εκ πφεν ισί παντριμέ εκχέ τζενέσαρ σο νανέ Μάρτυρας. Εκ ντιβές κανονίνελα τι τζαλ κο έργος. (Πράξεις 4:​20) Αλλά οντουβά ντιβές, λάκο ρομ μανγκέλα λάταρ μα τι τζαλ κο έργος. Βακερέλα λάκε ότι, τελευταία, να νακχένα μπουτ χρόνος μαζί ντα ότι κα μανγκέλας τι τζαν εκ βόλτα μαζί. Οτθάρ, βόι σκεφτίνελα ο εδάφια σο μπορίνενα τι βοηθίνεν-λα τι λελ εκ λατσσί απόφαση. Τζανέλα ότι πρέπει τι ασουνέλ ι Ντεβλές ντα ότι ο Ιησούς ντινάς-αμέν ι εντολή τι κεράς μαθητέν. (Ματθαίος 28:​19, 20· Πράξεις 5:​29) Αλλά ντέλα-πες γκοντί-ντα ότι εκ ρομνί πρέπει τι ντελ καν πι ρομές ντα ότι ο υπηρέτες ι Ιεχωβάσκε πρέπει τι αβέν λογικοί. (Εφεσίους 5:​22-24· Φιλιππησίους 4:5) Μήπως λάκο ρομ προσπαθίνελα τι τσσιναβέλ-λα κατά έργος ή απλά μανγκέλα τι αβέλ λάσαρ οντουβά ντιβές; Σαρ υπηρέτες ι Ιεχωβάσκε, μανγκάσα τι λας αποφάσεις σο ισί λογικές ντα σο κερένα-λες χαρούμενος.

ΣΥΝΕΧΙΝΕΝ ΤΙ ΤΘΕΡΕΝ ΣΑΣΤΟ ΤΟΥΜΑΡΟ ΓΚΙ ΝΤΑ ΤΙ ΑΒΕΝ ΧΑΡΟΥΜΕΝΟΙ

18. Σο μπορίνενα τι σικλιόν όταν σκεφτίνενα ο παράδειγμας σο μουκχλέ οντουλά σταρ βασιλιάδες του Ιούδα;

¹⁸ Μερικές φορές, αμέν-ντα μπορεί τι κεράς εκ λάθος οντουλένταρ σο κερντέ οντουλά σταρ βασιλιάδες του Ιούδα. Μπορεί (1) τι στηρίντιβας αμαρέ γκοντιάτε, (2) τι τραμπίνας λάθος αμαλέν, (3) τι αβάς μπαρικανέ ή (4) τι λας αποφάσεις χωρίς τι σκεφτίνας πρώτα σο μανγκέλα ο Ντεβέλ. Ατζέ-ντα άμα κα αβέλ-πες ανταβά, δεν πρέπει τι σκεφτίνας ότι ποτές να κα μπορίνας τι κεράς χαρούμενος ι Ιεχωβάς. Βοβ ντικχέλα ο λατσσέ πράγματα σο τθεράσα, σαρ ντικχέλας ο λατσσέ πράγματα σο τθερένας οντουλά σταρ βασιλιάδες-ντα. Ο Ιεχωβά επίσης ντικχέλα καζόμ μπουτ μανγκάσα-λες ντα καζόμ μπουτ μανγκάσα τι υπηρετίνας-λες. Οτθάρ, ντινάς-αμέν παραδείγματα σο μπορίνενα τι βοηθίνεν-αμέν μα τι κεράς μπαρέ λάθη. Ισί λατσσό τι σκεφτίνας ανταλά παραδείγματα κατά Γραφή ντα τι εκτιμίνας σο ντινάς-λεν αμέντε ο Ιεχωβά!