Ο Ιεχωβά «Κερέλα Λατσσές Οντουλέν σο Τθερένα Πφανγκό Γκι»

1. Σαρ νιωθίνελα ο Ιεχωβά πι υπηρετόνγκε;

Ο ΙΕΧΩΒΑ ντικχέλα σο-ντα τσσίντενα ο υπηρέτες λέσκε. Τζανέλα κάνα ισινάμ χαρούμενοι ντα κάνα ισινάμ στεναχωριμέ. (Ψαλμ. 37:18) Κάνα ντικχέλα ότι υπηρετίνασα-λες καζόμ πο λατσσές μπορίνασα παρόλο σο ισινάμ μπουτ στεναχωριμέ, αβέλα λέσκο γκι! Ντα μανγκέλα σαρ σαρ τι βοηθίνελ-αμέν ντα τι κοβλιαρέλ αμαρί ντουκχ.

2. Σο κερέλα ο Ιεχωβά οντουλένγκε σο τθερένα πφανγκό γκι ντα σαρ μπορίνασα τι ντικχάς λατσσιπέ κατά φροντίδα λέσκι;

² Ο εδάφιος Ψαλμός 147:3 βακερέλα ότι ο Ιεχωβά “πφάντελα ο πληγές” οντουλένγκε σο τθερένα πφανγκό γκι. Ανταλέ εδαφιόστε, ντικχίντιβελα σαρ ο Ιεχωβά φροντίνελα μανγκιμάσαρ οντουλέν σο ισί πφανγκέ γκίσκε. Σο πρέπει τι κεράς για τι ντικχάς λατσσιπέ κατά φροντίδα λέσκι; Σκεφτίνεν ακαβά παράδειγμας: Εκ λατσσό γιατρός μπορίνελα τι κερέλ μπουτ πράγματα για τι βοηθίνελ εκχέ τζενές σο ντινάς-πες τι αβέλ λατσσές. Ο τζενό σο ντινάς-πες όμως πρέπει τι κερέλ ντιπ ο οδηγίες ι γιατρόσκε για τι αβέλ λατσσές. Ανταλέ μαθημάστε, κα ντικχάς σο βακερέλα ο Ιεχωβά πι Λαφίστε οντουλένγκε σο τσσίντενα μπουτ επειδή τθερένα πφανγκό γκι ντα κα σικλιάς σαρ μπορίνασα τι κεράς ο συμβουλές σο ντέλα-αμέν μανγκιμάσαρ.

Ο ΙΕΧΩΒΑ ΑΝΕΛΑ ΑΜΑΡΕ ΓΚΟΝΤΙΑΤΕ ΟΤΙ ΤΘΕΡΑΣΑ ΜΠΑΡΙ ΑΞΙΑ ΛΕΣΚΕ

3. Σόσκε μερικά τζενέ αμντίνενα ότι να τθερένα αξία;

³ Τζουβντιάσα εκχέ ντουνιάστε σο να τθερέλα αγάπη, ντα ανταλέσκε μπουτ τζενέ αμντίνενα ότι να τθερένα αξία. Εκ πφεν, η Έλεν,a βακερέλα: «Μο ντατ ντα μι ντάι να σικαβένας μάνγκε ιτς αγάπη. Μο ντατ ισινέ βίαιος, ντα κάθε ντιβές βακερέλας αμένγκε καζόμ άχρηστοι ισινάμας». Μπέκιμ, σαρ η Έλεν, τουμένγκε-ντα τι συμπεριφερισάλε μπουτ μπέτι, τι πρασάνας-τουμέν ή τι κερένας-τουμέν τι νιωθίνεν ότι καέκ ναστί μανγκέλα-τουμέν. Άμα αβιλό-πες τουμένγκε κάτι ασακό, μπέκιμ ισί δύσκολος τι πακιάν ότι ο γιαβερά πφαμπόνα μπαγιά τουμένγκε.

4. Σο ανέλα αμαρέ γκοντιάτε ο Ιεχωβά, σαρ σικαβέλα ο εδάφιος Ψαλμός 34:18;

⁴ Ατζέ-ντα άμα ο γιαβερά συμπεριφερισάλε τουμένγκε μπουτ μπέτι, μπορίνενα τι αβέν σίγουροι ότι ο Ιεχωβά μανγκέλα-τουμέν ντα ότι τθερένα μπαρί αξία λέσκε. Βοβ «ισί πασέ οντουλέντε σο τθερένα πφανγκό γκι». (Διαβάνεν Ψαλμός 34:18) Άμα ισινέν «μπουτ στεναχωριμέ», τι ντεν-τουμέν γκοντί ότι ο Ιεχωβά ντικχλάς λατσσέ πράγματα τουμαρέ γκίστε ντα ταρτιντάς-τουμέν πασέ πέστε. (Ιωάν. 6:44) Βοβ μανγκέλα πάντα τι βοηθίνελ-τουμέν σόσκε τθερένα μπαρί αξία λέσκε γιακχίντε.

5. Σο σικλιάσα κατά τρόπος σο συμπεριφερίντιβελας ο Ιησούς οντουλέντε σο ο γιαβερά κερένας-λεν πέρα;

⁵ Μπορίνασα τι σικλιάς σαρ νιωθίνελα ο Ιεχωβά αντράλ κατά παράδειγμας ι Ιησούσκο. Κάνα ισινέ κι πφουβ, ο Ιησούς ντέλας σημασία οντουλέντε σο ο γιαβερά κερένας-λεν πέρα ντα τζιτζίνελας λένγκε. (Ματθ. 9:9-12) Κάνα εκ τζουβέλ σο τθερέλας εκ μπουτ μπέτι νασφαλιπέ ασταρντάς λέσκε σέα επειδή μανγκέλας τι αβέλ λατσσές, ο Ιησούς λοκχιαρντάς λάκο γκι ντα ισαρντάς-λα σο σικαντάς πίστη. (Μάρκ. 5:25-34) Ο Ιησούς μοιάζελα ντιπ κο χαρακτήρας πι Νταντέσκο. (Ιωάν. 14:9) Άρα, μπορίνενα τι αβέν σίγουροι ότι τθερένα μπαρί αξία ι Ιεχωβάσκε ντα ότι βοβ ντικχέλα τουμαρέ λατσσέ ιδιότητες, σαρ ισί τουμαρί πίστη ντα τουμαρί αγάπη λέσκε.

6. Σο μπορίνενα τι κερέν άμα νιωθίνενα ότι να τθερένα αξία;

⁶ Σο μπορίνενα τι κερέν άμα νιωθίνενα ότι να τθερένα αξία; Τι διαβάνεν εδάφια σο ανένα τουμαρέ γκοντιάτε ότι τθερένα μπαρί αξία ι Ιεχωβάσκε ντα τι σκεφτίνεν-λεν λατσσές.b (Ψαλμ. 94:19) Μα συγκρίνεν τουμαρό νεαυτός ι γιαβερέντζαρ ντα μα ντικχέν σάντε οντουλά σο ναστί κερένα. Ο Ιεχωβά να μανγκέλα αμένταρ πο μπουτ οντουλένταρ σο μπορίνασα τι κεράς. (Ψαλμ. 103:13, 14) Άμα κάποιος τσσιντικιαρντάς-τουμέν μπουτ ανγκλέ, μα τσσουβέν ο βάρετα οπρά-τουμέντε οντουλέσκε σο αβιλό-πες. Τι ντεν-τουμέν γκοντί ότι ο Ιεχωβά κα κρίνελ οντουλέν σο τσσιντικιαρένα ι γιαβερέν, αλλά κα βοηθίνελ οντουλέν σο τσσιντιντέ μπουτ. (1 Πέτρ. 3:12) Η Σάντρα, σο τσσιντικιαρντέ-λα κάνα ισινέ χουρντί, βακερέλα: «Μπουτ φαρ μανγκάβα κατά Ιεχωβά τι βοηθίνελ-μαν τι ντικχάβ ο λατσσέ ιδιότητες μάντε, σαρ ντικχέλα-λεν βοβ».

7. Σαρ μπορίνασα τι χρησιμοποιήνας κι υπηρεσία κι Ιεχωβάσκι οντουλά σο νακχαντάμ;

⁷ Τι αβέν σίγουροι ότι ο Ιεχωβά μπορίνελα τι χρησιμοποιήνελ-τουμέν για τι βοηθίνεν γιαβερέν. Ντινάς-τουμέν ο προνόμιος τι αβέν συνεργάτες λέσκε κο έργος. (1 Κορ. 3:9) Επειδή νακχαντέν δυσκολίες, μπέκιμ τι αβέλ πο εύκολος τι τζιτζίνεν ι γιαβερένγκε ντα τι αγαβέν σαρ νιωθίνενα. Μπορίνενα τι κερέν μπουτ πράγματα για τι βοηθίνεν-λεν. Η Έλεν λιντάς βοήθεια ντα ακανά μπορίνελα τι βοηθίνελ πο λατσσές ι γιαβερέν. Βόι βακερέλα: «Νιωθίναβας ότι να τθεράβας αξία. Αλλά ο Ιεχωβά κερντάς-μαν τι αγαβάβ ότι μανγκένα-μαν ντα χρησιμοποιήνελα-μαν για τι βοηθίναβ γιαβερέν». Η Έλεν ισί χαρούμενη σο κερέλα τακτικός σκαπανικός.

Ο ΙΕΧΩΒΑ ΜΑΝΓΚΕΛΑ ΤΙ ΔΕΧΤΙΝΑΣ ΛΕΣΚΙ ΣΥΓΧΩΡΗΣΗ

8. Σο βακερέλα αμένγκε ο Ιεχωβά κο εδάφιος Ησαΐας 1:18;

⁸ Ισί μερικοί υπηρέτες ι Ιεχωβάσκε σο ατζέκ ατζέκ χάλα-λεν αντρά-λένταρ ι πραγματένγκε σο κερντέ ανγκλέ, είτε πριν είτε σοράν λένγκε μπολντιμάσταρ. Αλλά ισί λατσσό τι ντας-αμέν γκοντί ότι ο Ιεχωβά ντινάς ο λύτρος σόσκε μανγκέλα-αμέν μπουτ. Σίγουρα μανγκέλα τι δεχτίνας λέσκο δώρος. Ο Ιεχωβά βακερέλα αμένγκε ότι, αφού κα «τακτοποιήνας ο θέματα»c σο τθεράσα λέσαρ, κα μπιστρέλ αμαρέ αμαρτίες. (Διαβάνεν Ησαΐας 1:​18) Λοκχιόλα αμαρό γκι σο ο Ιεχωβά να ντέλα-πες γκοντί αμαρέ πουρανέ αμαρτίες! Οκιά μπάνταρ, βοβ ποτές να μπιστρέλα ο λατσσιπέ σο κερντάμ.​—Ψαλμ. 103:9, 12· Εβρ. 6:10.

9. Σόσκε δεν πρέπει τι συνεχίνας τι σκεφτίνας αμαρέ πουρανέ αμαρτίες;

⁹ Άμα ισί πφανγκό τουμαρό γκι οντουλένγκε σο κερντέν ανγκλέ, κερέν ο πο λατσσό σο μπορίνενα για τι ντικχέν ανταλά σο κερένα ακανά ντα οντουλά σο κα κερέν κο μέλλον. Ντικχέν ο παράδειγμας ι απόστολε Παυλόσκο. Βοβ μετανιωσάλο σο ανγκλέ τζάλας μπουτ κόντρα κο Χριστιανοί, αλλά τζανέλας ότι ο Ιεχωβά συγχωριντάας-λες. (1 Τιμ. 1:12-15) Σοράν ανταλέσταρ, σκεφτίνελας συνέχεια ο πουρανέ αμαρτίες σο κερντάας; Όχι, ο Παύλος ντικχέλας πο πουρανέ αμαρτίες σαρ ντικχέλας ο πράγματα-ντα σο μουκχλάας παλάλ. Να σκεφτίνελας-λεν ιτς. (Φιλιπ. 3:4-8, 13-15) Οκιά μπάνταρ, ο Παύλος πφαμπόλας ι εργόσκε ντα ντικχέλας ανγκλάλ. Σαρ ο Παύλος, αντικάς τουμέν-ντα ναστί αλλάνενα οντουλά σο αβιλέ-πες. Αλλά μπορίνενα τι ντεν δόξα κο Ιεχωβά ντα τι κερέν λέσκο γκι ακανά. Ντα μπορίνενα τι ντικχέν ανγκλάλ κο σουκάρ μέλλον σο ντινάς πο λάφι τι ντελ-τουμέν.

10. Σο μπορίνασα τι κεράς άμα ανγκλέ κερντάμ ζιάνι γιαβερέ τζενένγκε;

¹⁰ Μπέκιμ πφανγκιόλα τουμαρό γκι άμα ανγκλέ κερντέν ζιάνι γιαβερέ τζενένγκε. Σο μπορίνελα τι βοηθίνελ; Κερέν σο νακχέλα τουμαρέ βαστέσταρ για τι αβέν ο πράγματα σαρ ισινέ ντα μανγκέν συγνώμη αντράλ τουμαρέ γκίσταρ. (2 Κορ. 7:11) Μολίνεν ι Ιεχωβάς τι βοηθίνελ οντουλέν σο κερντέν λένγκε ζιάνι. Βοβ μπορίνελα τι βοηθίνελ τουμέν ντα οντουλέν σο κερντέν λένγκε ζιάνι για τι νταϊντίνεν ντα τι αρακχέν πάλι τουμαρί ειρήνη.

11. Σο σικλιάσα κατά Ιωνάς; (Ντικχέν ι φωτογραφία-ντα)

¹¹ Τι σικλιόν κατά πουρανέ λάθη σο κερντέν ντα τι αβέν έτοιμοι τι μουκχέν ι Ιεχωβάς τι χρησιμοποιήνελ-τουμέν σαρ μανγκέλα βοβ. Ντεν σημασία κο παράδειγμας σο μουκχλάς ο προφήτης Ιωνάς. Αντίς τι τζαλ κι Νινευή σαρ βακερντάας λέσκε ο Ντεβέλ, ο Ιωνάς νασλό οκιά μπάνταρ. Ο Ιεχωβά διορθωντάς-λες, ντα ο Ιωνάς αγαντάς πο λάθος. (Ιωνάς 1:1-4, 15-17· 2:7-10) Ο Ιεχωβά να τσσιναντάς τι χρησιμοποιήνελ ι Ιωνάς σαρ προφήτης. Ντινάς-λες ατζέκ εκ ευκαιρία τι τζαλ κι Νινευή, ντα ανταγιά φαρ ο Ιωνάς ντινάς καν αμέσως. Ο Ιωνάς να μουκχλάς ι στεναχώρια οντουλέσκε σο κερντάς τι περαβέλ-λες ντα μα τι δεχτίνελ ο διορισμός κατά Ιεχωβά.​—Ιωνάς 3:1-3.

Ο ΙΕΧΩΒΑ ΚΟΒΛΙΑΡΕΛΑ ΑΜΑΡΙ ΝΤΟΥΚΧ ΠΙ ΑΓΙΕ ΠΝΕΥΜΑΣΑΡ

12. Σαρ ντέλα-αμέν ο Ιεχωβά ειρήνη κάνα νακχάσα κάτι μπουτ μπέτι ή χασαράσα εκχέ τζενές κο μεριπέ; (Φιλιππησίους 4:6, 7)

¹² Πι άγιε πνευμάσαρ, ο Ιεχωβά κοβλιαρέλα αμαρί ντουκχ κάνα νακχάσα κάτι μπουτ μπέτι ή χασαράσα εκχέ τζενές κο μεριπέ. Σκεφτίνεν σο νακχαντέ ο Ρον ντα η Κάρολ, κάνα λένγκο τσσαβό μουνταρντάς-πες. Βον βακερένα: «Τθεράας νακχαντό μπαρέ δοκιμασίες, αλλά ανταγιά ισινέ η πο πφαρί σο νακχαντάμ. Μπουτ φαρ ναστί σοβάας αρατί, οτθάρ κεράας προσευχή κο Ιεχωβά ντα αγαντάμ μπαγιά ι ειρήνη σο βακερένα ο εδάφια Φιλιππησίους 4:6, 7». (Διαβάνεν) Άμα νακχένα τουμέν-ντα κάτι σο ντουκχαβέλα τουμαρό γκι, μπορίνενα τι κερέν προσευχή γκίσαρ κο Ιεχωβά. Τι κερέν λέσαρ λάφι κάνα μανγκένα ντα καζόμ μανγκένα. (Ψαλμ. 86:3· 88:1) Μα τσσιναβέν τι μανγκέν κατά Ιεχωβά λέσκο άγιος πνεύμας. Βοβ πάντα ασουνέλα κάνα μολίνενα-λες.​—Λουκ. 11:9-13.

13. Σαρ μπορίνελα ο άγιος πνεύμας τι βοηθίνελ-αμέν τι συνεχίνας τι υπηρετίνας ι Ιεχωβάς πιστά; (Εφεσίους 3:16)

¹³ Μήπως οντουλά σο ντουκχαβένα-τουμέν λένα σαρί τουμαρί ζορ; Ο άγιος πνεύμας μπορίνελα τι ντελ-τουμέν ι ζορ τι συνεχίνεν τι υπηρετίνεν ι Ιεχωβάς πιστά. (Διαβάνεν Εφεσίους 3:​16) Ντικχέν ο παράδειγμας εκχέ πφενιάκο σο βακερένα λάκε Φλόρα. Γιεκ πι ρομέσαρ ισινέ ιεραπόστολοι κάνα βοβ γκιλό γιαβεράσαρ, ντα λιντέ διαζύγιος. Η Φλόρα βακερέλα: «Η ντουκχ σο τθεράβας ανταλέσταρ σο αβιλό-πες χάλας-μαν αντράλ. Προσευχίντιβαβας κο Ιεχωβά τι ντελ-μαν πο άγιος πνεύμας για τι μπορίναβ τι νταϊντίναβ. Ο Ιεχωβά κοβλιαρντάς μι ντουκχ ντα ντέλας-μαν σο-ντα χρειαζίντιβαβας για τι αβάβ λατσσές». Επειδή αγαντάς ι βοήθεια ι Ντεβλέσκι, η Φλόρα ακανά ντέλα πο μπουτ μπέσα λέστε ντα ισί σίγουρη ότι κα αβέλ λάσαρ οντουλέντε σο νακχέλα. Επίσης, βακερέλα: «Ο εδάφιος Ψαλμός 119:32 νικίστιλο μπαγιά μάνγκε: “Κα μανγκάβ σαρέ μι γκίσαρ τι ασουνάβ το εντολές, επειδή κερέσα τθαν λένγκε μι γκίστε”».

14. Σαρ μπορίνασα τι μουκχάς ο πνεύμας ι Ντεβλέσκο τι βοηθίνελ-αμέν;

¹⁴ Κάνα μανγκένα κατά Ιεχωβά τι ντελ-τουμέν πο άγιος πνεύμας, σο πρέπει τι κερέν σοράν; Τι κερέν πράγματα σο κα βοηθίνεν-τουμέν τι πφερντιόν κατά πνεύμας ι Ντεβλέσκο. Αντρέ ανταλέντε ισί ο συναθροίσεις ντα ο έργος. Διαβάνεν ι Γραφή κάθε ντιβές για τι πφερέν τουμαρί γκοντί ι Ιεχωβάσκε λαφίντζαρ. (Φιλιπ. 4:8, 9) Καζόμ διαβάνενα, ντεν σημασία τζενέντε κι Γραφή σο νακχαντέ δοκιμασίες ντα σκεφτίνεν λατσσές σαρ βοηθιντάς-λεν ο Ιεχωβά τι νταϊντίνεν. Η Σάντρα, σο νακχαντάς μπουτ μπέτι πράγματα πι ζωγιάτε, βακερέλα: «Η ιστορία ι Ιωσηφίσκι ερεσέλα αντρέ μι γκίστε. Βοβ να μουκχλάς κο δοκιμασίες ντα κο αδικίες τι κερέν ζιάνι κι φιλία σο τθερέλας ι Ιεχωβάσαρ».​—Γέν. 39:21-23.

Ο ΙΕΧΩΒΑ ΚΟΒΛΙΑΡΕΛΑ ΑΜΑΡΙ ΝΤΟΥΚΧ ΑΝΤΡΑΛ ΑΜΑΡΕ ΠΦΡΑΛΕΝΤΑΡ

15. Καλά τζενέ μπορίνενα τι κοβλιαρέν αμαρί ντουκχ, ντα σαρ μπορίνενα τι βοηθίνεν-αμέν; (Ντικχέν ι φωτογραφία-ντα)

¹⁵ Κάνα νακχάσα βάσανα, αμαρέ πφραλά μπορίνενα τι “λοκχιαρέν μπουτ αμαρό γκι”. (Κολ. 4:11) Αμαρέ πφραλά ντα πφενιά ισί εκ τρόπος σο ο Ιεχωβά σικαβέλα καζόμ μπουτ μανγκέλα-αμέν. Μπορίνενα τι κοβλιαρέν αμαρί ντουκχ κάνα ασουνένα-αμέν μανγκιμάσαρ ή τι ντεν-αμέν ζορ κάνα νακχένα χρόνος αμέντζαρ. Μπέκιμ τι βακερέν αμένγκε εκ εδάφιος ή τι προσευχίντιβεν αμέντζαρ.d (Ρωμ. 15:4) Μπάζιμα, εκ πφραλ ή εκ πφεν μπέκιμ τι ανέλ αμαρέ γκοντιάτε σαρ σκεφτίνελα ο Ιεχωβά ντα αντικάς τι βοηθίνελ-αμέν τι νταϊντίνας. Επίσης, μπορίνενα τι ανέν αμένγκε χαμπέ για τι βοηθίνεν-αμέν κάνα να ισινάμ λατσσές.

16. Σο μπέκιμ χρειαζίντιβελα τι κεράς για τι λας βοήθεια;

¹⁶ Ισί φαρ σο μπέκιμ χρειαζίντιβελα τι μανγκάς βοήθεια κατά γιαβερά. Αμαρέ πφραλά ντα πφενιά μανγκένα-αμέν ντα μανγκένα τι βοηθίνεν. (Παρ. 17:17) Αλλά μπέκιμ να τζανένα σαρ νιωθίνασα ή σο χρειαζίντιβασα. (Παρ. 14:10) Άμα τθερένα ντουκχ κο γκι, τι αβέν έτοιμοι τι βακερέν σαρ νιωθίνενα αμαλέντε σο ισί ζουρανέ κι πίστη. Βακερέν λένγκε σο χρειαζίντιβενα. Μπέκιμ τι κερέν λάφι πρεσβυτερόντζαρ σο νιωθίνενα άνετα λέντζαρ. Ντα ισί πφενιά σο κερένα λάφι γιαβερέ πφενίντε σο ισί ώριμες πνευματικά.

17. Καλά ισί μερικές δυσκολίες σο κα μπορίνενας τι τσσιναβέν-αμέν τι λας ζορ, ντα σαρ κα νακχάς-λεν;

¹⁷ Μα νακχέν μπουτ σαάτι κορκορέ. Ιτιρί κατά ντουκχ σο τθερένα κο γκι, μπέκιμ να ντέλα τουμαρό γκι τι κερέν παρέα γιαβερέντζαρ. Μπάζιμα, τουμαρέ πφραλά ντα πφενιά μπέκιμ να αγαβένα-τουμέν ή να βακερένα ο πο σωστά λάφια. (Ιακ. 3:2) Μα μουκχέν ασακέ πράγματα τι τσσιναβέν-τουμέν τι λεν ι ζορ σο χρειαζίντιβενα. Εκ πρεσβύτερος, ο Γκάβιν, σο τθερέλα κατάθλιψη, βακερέλα: «Μπουτ φαρ να μανγκάβα τι κεράβ παρέα μι αμαλέντζαρ». Όμως, ο Γκάβιν να μουκχέλα κο αισθήματα τι κερέν-λες κουμάντος ντα ντικχέλα λατσσιπέ επειδή κερέλα παρέα γιαβερέντζαρ. Εκ πφεν, η Έιμι, βακερέλα: «Οντουλένταρ σο νακχαντόμ, νανέ εύκολος τι νταβ μπέσα κο τζενέ. Αλλά σικλιάβα τι μανγκάβ ντα τι νταβ μπέσα μι πφραλέντε ντα μι πφενίντε σαρ κερέλα ο Ιεχωβά. Τζανάβα ότι ανταβά ντέλα χαρά εμ κο Ιεχωβά εμ μάντε».

Ο ΥΠΟΣΧΕΣΕΙΣ Ι ΙΕΧΩΒΑΣΚΕ ΓΙΑ ΤΟ ΜΕΛΛΟΝ ΚΟΒΛΙΑΡΕΝΑ ΑΜΑΡΙ ΝΤΟΥΚΧ

18. Σο μπεκλεντίνασα τι αβέλ κο μέλλον, ντα σο μπορίνασα τι κεράς ακανά;

¹⁸ Μπορίνασα τι ντικχάς ανγκλάλ με σιγουριά, σόσκε τζανάσα ότι ο Ιεχωβά μπουτ σουγκό κα νασκιαρέλ ι στεναχώρια ντα ι ντουκχ σο νιωθίνασα. (Αποκ. 21:3, 4) Αζομάν, οντουλά σο νακχαντάμ «να κα αβέν . . . κο γκι». (Ησ. 65:17) Σαρ ντικχλάμ, ο Ιεχωβά “πφάντελα αμαρέ πληγές” ατζέ-ντα ακανά. Τι δεχτίνεν οντουλά σο ντέλα-τουμέν ο Ιεχωβά για τι κοβλιαρέλ τουμαρί ντουκχ ντα τι βοηθίνελ-τουμέν. Τι αβέν ντιπ σίγουροι ότι «βοβ πφαμπόλα τουμένγκε».​—1 Πέτρ. 5:7.