Ποτές να Ισινάμ Κορκορέ

1, 2. (α) Σόσκε ισινάμ σίγουροι ότι ποτές να ισινάμ κορκορέ κάνα νακχάσα δοκιμασίες; (β) Σο κα ντικχάς ανταλέ μαθημάστε;

ΚΑΝΑ νακχάσα μπουτ μπαρέ δοκιμασίες, μπορεί τι νιωθίνασα σαρ τι αβάας κορκορέ εκχέ χουρντέ βαρκάτε αντρέ σε εκ φουρτουνιασμέ ντεριάβ. Όμως, να νακχάσα ανταλά δοκιμασίες κορκορέ. Αμαρό Ντατ σο ισί κο ουρανός ντα μανγκέλα-αμέν όχι απλά ντικχέλα οντουλά σο νακχάσα, αλλά ντέλα πο λάφι-ντα ότι κα βοηθίνελ-αμέν για τι ντας-λεν πέρα. Ο Ιεχωβά βακερέλα αμένγκε μανγκιμάσαρ: «Κα βοηθίναβ-τουτ».​—Ησ. 41:10.

² Ανταλέ μαθημάστε κα ντικχάς σαρ ο Ιεχωβά βοηθίνελα-αμέν κάνα (1) οδηγίνελα-αμέν, (2) ντέλα-αμέν οντουλά σο χρειαζίντιβασα, (3) αρακχαβέλα-αμέν, ντα (4) κοβλιαρέλα αμαρί ντουκχ. Ο Ιεχωβά ντέλα-αμέν ι σιγουριά ότι σο-ντα δοκιμασίες τι νακχάς αμαρέ ζωγιάτε, ποτές να κα μπιστρέλ-αμέν. Βοβ ποτές να κα παρατίνελ-αμέν. Οτθάρ ποτές να ισινάμ κορκορέ.

Ο ΙΕΧΩΒΑ ΟΔΗΓΙΝΕΛΑ-ΑΜΕΝ

3, 4. Σαρ οδηγίνελα-αμέν ο Ιεχωβά; (Ψαλμός 48:14)

³ Διαβάνεν Ψαλμός 48:14. Ο Ιεχωβά τζανέλα ότι ναστί οδηγίνασα αμαρό νεαυτός κορκορέ ντα ότι χρειαζίντιβασα λες για τι οδηγίνελ-αμέν. Σαρ οδηγίνελα πι αφοσιωμέ υπηρετόν αντιβές; Εκ τρόπος σο κερέλα-λες ανταβά ισί αντράλ κατά Γραφή. (Ψαλμ. 119:105) Ο Ιεχωβά χρησιμοποιήνελα πο Λάφι για τι σικλιαρέλ-αμέν τι λας λατσσέ αποφάσεις ντα τι συμπεριφερίντιβας ντα τι σκεφτίνας σαρ βοβ. Κάνα ντάσα καν οντουλέντε σο σικλιαρέλα-αμέν αντράλ κατά Γραφή, τθεράσα πο λατσσί ζωή ακανά ντα ι ελπίδα τι τζουβντιάς για πάντα.a Για παράδειγμας, ο Ιεχωβά σικλιαρέλα-αμέν τι συγχωρίνας ι γιαβερέν ντα μα τι ατσσάς χολιαμέ λέντζαρ, τι βακεράς ι αλήθεια σαρέ κο πράγματα ντα τι μανγκάς ι γιαβερέν αντράλ αμαρέ γκίσταρ. (Ψαλμ. 37:8· Εβρ. 13:18· 1 Πέτρ. 1:22) Κάνα σικαβάσα ασακέ ιδιότητες σο σικαβέλα ο Ντεβέλ, αβάσα πο λατσσέ νταντά ντα νταγιά, συμπεριφερίντιβασα πο λατσσές αμαρέ ρομέστε ή αμαρέ ρομνιάτε ντα αμαρέ αμαλέντε.

⁴ Κι Γραφή ο Ιεχωβά βακερέλα αμένγκε παραδείγματα τζενένγκε σο νακχλέ δοκιμασίες ντα νιωθίνενας σαρ αμέν. (1 Κορ. 10:13· Ιακ. 5:17) Κάνα διαβάνασα ανταλά αληθινές ιστορίες ντα κεράσα αμαρέ ζωγιάτε οντουλά σο σικλιάσα, βοηθίντιβασα μπουτέ τροπόντζαρ. Ντούι ανταλένταρ ισί ακαλά: Πρώτον, αγαβάσα ότι να ισινάμ κορκορέ, επειδή ανταλά προβλήματα τσσιντιντέ-λεν γιαβερά-ντα τζενέ. Βον-ντα τθερένας δυσκολίες αλλά μπορισάλε τι νταϊντίνεν με τη βοήθεια ι Ιεχωβάσκι. (1 Πέτρ. 5:9) Δεύτερον, σικλιάσα σο κα βοηθίνελ-αμέν τι νταϊντίνας αμαρέ δοκιμασίες ντα τι ατσσάς χαρούμενοι.​—Ρωμ. 15:4.

5. Καλέ τζενέν χρησιμοποιήνελα ο Ιεχωβά για τι οδηγίνελ-αμέν;

⁵ Επίσης, ο Ιεχωβά χρησιμοποιήνελα πφραλέν ντα πφενίν για τι οδηγίνεν-αμέν.b Για παράδειγμας, ο επίσκοποι ι περιοχιάκε αβένα κο κχανγκιριά για τι ντεν-αμέν ζορ. Ο ομιλίες σο κερένα μπαριαρένα αμαρί πίστη ντα βοηθίνενα-αμέν τι ατσσάς ενωμέ. (Πράξ. 15:40–16:5) Ο πρεσβύτεροι-ντα μαρένα-πες για τι βοηθίνεν ι κάθε εκχές αμένταρ τι ατσσόλ πασέ κο Ιεχωβά. (1 Πέτρ. 5:2, 3) Ο νταντά ντα ο νταγιά σικλιαρένα πουμαρέ τσσαβέν τι μανγκέν ι Ιεχωβάς, σικαβένα λένγκε σαρ τι λεν γκοντιαβέρ αποφάσεις ντα βοηθίνενα-λεν τι τθερέν λατσσέ συνήθειες. (Παρ. 22:6) Ντα ο ώριμα πφενιά βοηθίνενα ι πο τερνέ πφενίν πουμαρέ παραδειγμάσαρ. Επίσης, ντένα-λεν λατσσέ συμβουλές ντα ενθαρρύνενα-λεν λατσσιμάσαρ.​—Τίτο 2:3-5.

6. Σο πρέπει τι κεράς για τι μουκχάς ι Ιεχωβάς τι οδηγίνελ-αμέν;

⁶ Ο Ιεχωβά ντινάς-αμέν σαρέ ο αρχές σο χρειαζίντιβασα για τι λας λατσσέ αποφάσεις ντα τι τθεράς εκ ευτυχισμέ ζωή. Όμως σαρ κα μουκχάς ι Ιεχωβάς τι οδηγίνελ-αμέν; Κο Παροιμίες 3:5, 6 βακερέλα: «Τι ντες μπέσα κο Ιεχωβά σαρέ τι γκίσαρ ντα μα τι στηρίντιβες κο τρόπος σο αγαβέσα τούι ο πράγματα». Κάνα κεράσα-λες ανταβά, “βοβ κα κερέλ αμαρέ ντρομά ίσια”. Ανταβά μανγκέλα τι βακερέλ ότι βοβ κα βοηθίνελ-αμέν τι νασάς ντουρ κατά προβλήματα ντα τι απολαμβάνας εκ πο ευτυχισμέ ζωή. Νιωθίνασα μπαρί εκτίμηση ι Ιεχωβάσκε επειδή τζανέλα-αμέν μπουτ λατσσές ντα μανγκέλα-αμέν αζόμ μπουτ σο ντέλα κο κάθε εκ αμένταρ ο συμβουλές σο χρειαζίντιβασα!​—Ψαλμ. 32:8.

Ο ΙΕΧΩΒΑ ΝΤΕΛΑ-ΑΜΕΝ ΟΝΤΟΥΛΑ ΣΟ ΧΡΕΙΑΖΙΝΤΙΒΑΣΑ

7. Καλά ισί μερικοί τρόποι σο ο Ιεχωβά ντέλα-αμέν οντουλά σο χρειαζίντιβασα; (Φιλιππησίους 4:19)

⁷ Διαβάνεν Φιλιππησίους 4:19. Εκτός οντουλένταρ σο κερέλα για τι οδηγίνελ-αμέν, ο Ιεχωβά ευλογίνελα επίσης ο προσπάθειες σο κεράσα για τι τθεράς χαμπέ, σέα ντα κάπου τι μπεσάς. (Ματθ. 6:33· 2 Θεσ. 3:12) Παρόλο σο ισί λογικός τι ανησυχίνας ανταλέ πραγματένγκε, ο Ιεχωβά βακερέλα αμένγκε μα τι αγχώνας μπουτ. (Ματθ. 6:25) Σόσκε; Επειδή αμαρό Ντατ ποτές να κα μουκχέλ πι πιστέ υπηρετόν κάνα τθερένα ανάγκη. (Ματθ. 6:8· Εβρ. 13:5) Ο Ιεχωβά ντινάς πο λάφι τι ντελ-αμέν οντουλά σο χρειαζίντιβασα. Οτθάρ μπορίνασα τι ντας σαρί αμαρί μπέσα λέστε.

8. Σο κερντάς ο Ιεχωβά ι Δαβιδίσκε;

⁸ Σκεφτίνεν σαρ βοηθιντάς ο Ιεχωβά ι Δαβιδίς. Αζομάν σο ο Δαβίδ νακχέλας δύσκολα επειδή ο βασιλιάς Σαούλ κυνηγίνελας-λες, ο Ιεχωβά ντέλας λέστε ντα λέσκε μουρσέντε οντουλά σο χρειαζίντιβενας για τι τζουβντιόν. Κάνα ο Δαβίδ αντάς πι γκοντιάτε σαρ ο Ιεχωβά φροντίνελας-λες οντουλά μπρεσά, βακερντάς: «Ισινόμας τερνό ντα πφουρίλιλομ, αλλά να ντικχλόμ ούτε εκχέ δίκαιε τζενές τι αβέλ παρατημέ, ούτε λέσκε τσσαβέν τι μανγκέν μαντρό». (Ψαλμ. 37:25) Σαρ ο Δαβίδ, μπορεί τουμέν-ντα τι ντικχλέν σαρ ο Ιεχωβά ντινάς τουμέν ντα τουμαρέ πφραλέν ντα πφενίν οντουλά σο χρειαζίντιβενας δύσκολε ντιβεσέντε.

9. Σαρ ο Ιεχωβά ντέλα πι λαόστε οντουλά σο χρειαζίντιβελα κάνα αβέλα εκ καταστροφή; (Ντικχέν ο φωτογραφίες-ντα)

⁹ Ο Ιεχωβά ντέλα επίσης πι λαόστε οντουλά σο χρειαζίντιβελα κάνα αβέλα εκ καταστροφή. Για παράδειγμας, κάνα αβιλί κι Ιερουσαλήμ μποκχ, αζομάν σο τζουβντιόνας ο πρώτοι Χριστιανοί, λένγκε πφραλά γιαβερέ τθεμένταρ μπουτσσαβένας λένγκε οντουλά σο χρειαζίντιβενας. (Πράξ. 11:27-30· Ρωμ. 15:25, 26) Ο υπηρέτες ι Ντεβλέσκε αντιβές-ντα βοηθίνενα πουμαρέ πφραλέν ντα πφενίν σο τθερένα ανάγκη. Κάνα αβέλα εκ καταστροφή, ο Ιεχωβά τσσίντελα μανγκιμάσαρ πι λαός τι ντελ κο πφραλά οτθέ σο αβιλί η καταστροφή οντουλά σο χρειαζίντιβενα. Για παράδειγμας, μπουτσσαβένα λένγκε χαμπέ, πανί, σέα ντα φάρμακα. Ο πφραλά σο βοηθίνενα κι οικοδόμηση λατσσαρένα ο κχερά ντα ο Αίθουσες σο χαλάντιλε. Ντα ο υπηρέτες ι Ιεχωβάσκε ισί έτοιμοι τι λοκχιαρέν ο γκι οντουλένγκο σο χασαρντέ πουμαρέ κχερά ή πουμαρέ αγαπημέ τζενέν ντα τι ντεν-λεν ζορ κατά Γραφή.c

10, 11. Σο σικλιόνα κατά Μπορίς;

¹⁰ Ο Ιεχωβά ντέλα επίσης αντράλ πι γκίσταρ κο τζενέ σο να ντένα-λες ατζέ λατρεία οντουλά σο χρειαζίντιβενα. Αμέν-ντα ρόντασα ευκαιρίες τι σικαβάς λατσσιπέ κο τζενέ σο να τθερένα ι ίδια πίστη αμέντζαρ. (Γαλ. 6:10) Ανταβά μπουτ φαρ βοηθίνελα-λεν τι σικλιόν πο μπουτ πράγματα αμένγκε ντα ι Ιεχωβάσκε. Σκεφτίνεν σο αβιλό-πες κο Μπορίς σο ισινέ διευθυντής εκχέ σχολειόστε κι Ουκρανία. Παρόλο σο ο Μπορίς νανέ Μάρτυρας ι Ιεχωβάσκο, πάντα συμπεριφερίντιβελας λατσσιμάσαρ κο τσσαβέ σο ισινέ Μάρτυρες ντα σεβάνελας οντουλά σο πακιάνας. Ιτιρί κατά τζένγκι,d ο Μπορίς αποφασιντάς τι τζαλ εκχέ γιαβερέ τθανέστε κι Ουκρανία σο να ισινέ αζόμ επικίνδυνος. Αζομάν αμαρέ πφραλά βοηθιντέ-λες μπουτ. Πο σοράν, ο Μπορίς γκιλό κι Ανάμνηση κι Χριστόσκε μεριμάσκι. Κάνα σκεφτίνελα ι βοήθεια σο ντινέ-λες ο πφραλά, βοβ βακερέλα: «Ο Μάρτυρες σικαντέ μάνγκε λατσσιπέ ντα βοηθιντέ-μαν. Εκτιμίναβα μπουτ ι Ιεχωβάσκε Μαρτυρέν».

¹¹ Αμέν-ντα μπορίνασα τι μοιάζας αμαρέ Νταντέστε σο ισί κο ουρανός ντα τζιτζίνελα ι τζενένγκε, κάνα σικαβάσα αγάπη οντουλέντε σο τθερένα ανάγκη, είτε τθερένα ι ίδια πίστη αμέντζαρ είτε όχι. (Λουκ. 6:31, 36) Μπέκιμ εκ ντιβές η αγάπη σο σικαβάσα λένγκε τι τσσίντελ-λεν τι μανγκέν τι σικλιόν ι Ιεχωβάσκε ντα τι υπηρετίνεν-λες γιεκ αμέντζαρ. (1 Πέτρ. 2:12) Σο-ντα τι αβέλ-πες όμως, κα αβάς χαρούμενοι επειδή «ισί πο ευτυχισμέ εκ τζενό κάνα ντέλα».​—Πράξ. 20:35.

Ο ΙΕΧΩΒΑ ΑΡΑΚΧΑΒΕΛΑ-ΑΜΕΝ

12. Σαρ βακερντάς ο Ιεχωβά ότι κα αρακχαβέλ πι υπηρετόν σαρ ομάδα; (Ψαλμός 91:1, 2, 14)

¹² Διαβάνεν Ψαλμός 91:1, 2, 14. Αντιβές, ο Ιεχωβά ντέλα πο λάφι ότι κα αρακχαβέλ πι υπηρετόν σαρέ κατά πράγματα σο κα μπορίνενας τι κερέν ζιάνι κι φιλία σο τθερένα λέσαρ. Ποτές να κα μουκχέλ ι Μπενγκές τι μελιαρέλ ι πάκι λατρεία. (Ιωάν. 17:15) Ντα κάνα κα αβέλ η «μπαρί στεναχώρια», μπορίνασα τι αβάς ντιπ σίγουροι ότι ο Ιεχωβά κα βοηθίνελ-αμέν τι ατσσικιαράς αμαρί πίστη ζουρανί ντα κα σώνελ-αμέν, σαρ ντινάς πο λάφι ότι κα κερέλ.​—Αποκ. 7:9, 14.

13. Καλέ τροπόντζαρ αρακχαβέλα ο Ιεχωβά ι κάθε εκχές αμένταρ;

¹³ Σαρ αρακχαβέλα ο Ιεχωβά ι κάθε εκχές αμένταρ; Αντράλ κατά Γραφή, ο Ιεχωβά βοηθίνελα-αμέν τι ξεχωρίνας ο σωστός κατά λάθος. (Εβρ. 5:14) Κάνα τζουβντιάσα αντικάς σαρ βακερέλα λέσκο Λάφι, αρακχαβάσα αμαρί φιλία λέσαρ ντα λάσα λατσσέ αποφάσεις σο βοηθίνενα-αμέν τι αβάς πο ευτυχισμέ ντα τι τθεράς πο λατσσί υγεία. (Ψαλμ. 91:4) Επίσης, ο Ιεχωβά αρακχαβέλα-αμέν αντράλ κατά κχανγκιρί. (Ησ. 32:1, 2) Επειδή τθεράσα πασέ αμέντε τζενέν σο μανγκένα ι Ιεχωβάς ντα τζουβντιόνα αντικάς σαρ βακερέλα βοβ, λάσα ι ενθάρρυνση ντα ι ζορ σο χρειαζίντιβασα για μα τι κεράς οντουβά σο ισί λάθος.​—Παρ. 13:20.

14. (α) Σόσκε ο Ιεχωβά να αρακχαβέλα-αμέν σαρέ κατά δοκιμασίες; (β) Καλέ πραγμάσκε κερέλα-αμέν τι αβάς σίγουροι ο Ψαλμός 9:10; (Ντικχέν ι υποσημείωση-ντα)

¹⁴ Ο Ιεχωβά ανγκλέ μπάζιμα αρακχαβέλας πι υπηρετόν για μα τι παθίνεν ζιάνι. Όμως να κερέλας-λες ανταβά σαρέ κο περιπτώσεις. Η Γραφή σικλιαρέλα ότι μπορεί τι αβέν προβλήματα “σο να μπεσάας” κο κάθε εκ αμένταρ. (Εκκλ. 9:11) Επίσης, ο Ιεχωβά μουκχλάς μερικέν πι υπηρετόνταρ τι νακχέν διωγμός ντα ατζέ-ντα τι μερέν για τι σικαβέν ότι ο Μπενγκ ισί ψεύτης. (Ιώβ 2:4-6· Ματθ. 23:34) Ο ίδιος αβέλα-πες αντιβές-ντα. Παρόλο σο ο Ιεχωβά μπορεί μα τι νασκιαρέλ αμαρέ δοκιμασίες, μπορίνασα τι αβάς σίγουροι ότι ποτές να κα παρατίνελ οντουλέν σο μανγκένα-λες.e​—Ψαλμ. 9:10.

Ο ΙΕΧΩΒΑ ΚΟΒΛΙΑΡΕΛΑ ΑΜΑΡΙ ΝΤΟΥΚΧ

15. Σαρ κοβλιόλα αμαρί ντουκχ αντράλ κατά προσευχή, κατά Λάφι ι Ντεβλέσκο ντα αμαρέ πφραλένταρ ντα πφενίνταρ; (2 Κορινθίους 1:3, 4)

¹⁵ Διαβάνεν 2 Κορινθίους 1:3, 4. Μπάζιμα μπορεί τι τθεράσα μπαρί ντουκχ επειδή χασαρντάμ εκχέ τζενές κο μεριπέ. Μπορεί τι τθεράσα μπουτ ανησυχίες ντα στεναχώριες. Μπορεί τι νακχένα εκ ασακί μπαρί στεναχώρια ακανά σο κερέλα-τουμέν τι νιωθίνεν κορκορέ. Αγαβέλα κάποιος σαρ νιωθίνενα; Ο Ιεχωβά αγαβέλα. Βοβ όχι σάντε αγαβέλα αμαρί ντουκχ, αλλά επίσης «κοβλιαρέλα αμαρί ντουκχ σαρέ κο στεναχώριες σο τθεράσα». Σαρ; Κάνα πουτράσα αμαρό γκι κο Ιεχωβά αντράλ κατά προσευχή, βοβ “ντέλα-αμέν ι ειρήνη σο ναστί αγαβένα-λα ο τζενέ”. (Φιλιπ. 4:6, 7) Επίσης κοβλιόλα αμαρί ντουκχ κάνα διαβάνασα ο λάφια ι Ιεχωβάσκε αντρέ κι Γραφή. Αντρέ λάτε ο Ιεχωβά βακερέλα αμένγκε καζόμ μπουτ μανγκέλα-αμέν, σικλιαρέλα-αμέν σαρ τι αβάς γκοντιαβέρ ντα ντέλα-αμέν ελπίδα. Επίσης κοβλιόλα αμαρί ντουκχ κάνα τζάσα κο συναθροίσεις. Οτθέ σικλιάσα πράγματα κατά Γραφή σο ντένα-αμέν ζορ ντα ισινάμ γιεκ αμαρέ πφραλέντζαρ ντα πφενίντζαρ σο μανγκένα-αμέν.

16. Σο σικλιλέν κατά Νέιθαν ντα κατά Πρισίλα;

¹⁶ Για τι αγαβάς σαρ ο Ιεχωβά κοβλιαρέλα αμαρί ντουκχ ντα ντέλα-αμέν ενθάρρυνση αντράλ πι Λαφίσταρ, σκεφτίνεν σο αβιλό-πες κο Νέιθαν ντα κι Πρισίλα σο τζουβντιόνα κι Αμερική. Μερικά μπρεσά πο τζανγκλέ αποφασιντέ τι τζαν εκχέ γιαβερέ τθεμέστε σο ισινέ ανάγκη τι κερέν έργος. Ο Νέιθαν βακερέλα: «Ντινάμ μπέσα κο Ιεχωβά ότι κα ευλογίνελας αμαρέ προσπάθειες». Όμως, αφού ερεσλέ πουμαρέ νεβέ διορισμόστε, αρχισάλε τι τθερέν προβλήματα υγείας ντα προβλήματα ι λοβέντζαρ χωρίς τι μπεκλεντίνεν-λεν. Οτθάρ έπρεπε τι βουρτίνεν κχερέ. Οτθέ-ντα συνεχισάλε ο προβλήματα ι λοβέντζαρ. Ο Νέιθαν βακερέλα: «Σκεφτιντόμ σόσκε ο Ντεβέλ να ευλογιντάας-αμέν αντικάς σαρ μπεσάας ότι κα κερέλας; Αρχισάλομ ατζέ-ντα τι σκεφτίναβ άμα κερντόμας κάτι λάθος». Σιγά σιγά όμως ο Νέιθαν ντα η Πρισίλα αρχισάλε τι αγαβέν ότι ο Ντεβέλ να παρατιντάας-λεν αζομάν σο τθερένας ανάγκη. Ο Νέιθαν βακερέλα: «Οντουλέ δύσκολε βακιτίντε, η Γραφή αβιλί σαρ εκ γκοντιαβέρ αμάλ, σο ντέλας-αμέν ενθάρρυνση ντα οδηγίνελας-αμέν. Κάνα τσσιναντάμ τι σκεφτίνας ο προβλήματα σο τθεράας ντα αρχισάλαμ τι σκεφτίνας σαρ ο Ιεχωβά βοηθιντάς-αμέν τι νταϊντίνας-λεν, ανταβά κερντάς-αμέν σίγουρους ότι ο Ιεχωβά κα συνεχίνελ τι αβέλ αμέντζαρ κο μέλλον-ντα».

17. Σαρ λοκχιλό ο γκι της Χέλγκα; (Ντικχέν ι φωτογραφία-ντα)

¹⁷ Ο Ιεχωβά λοκχιαρέλα επίσης αμαρό γκι αντράλ αμαρέ πφραλένταρ ντα πφενίνταρ. Μπορίνασα τι ντικχάς-λες ανταβά αντράλ κατά παράδειγμας της Χέλγκα, σο μπεσέλα κι Ουγγαρία. Για μπουτ μπρεσά, νακχέλας μπερεκέτι δοκιμασίες σο κερένας-λα τι νιωθίνελ απελπισμέ ντα ότι να τθερέλας αξία. Όμως, κάνα σκεφτίνελα οντουλά σο νακχλάς, αγαβέλα ότι ο Ιεχωβά χρησιμοποιήνελας ι πφραλέν ντα ι πφενίν κι κχανγκιρί για τι λοκχιαρέλ λάκο γκι. Βόι βακερέλα: «Ο Ιεχωβά πάντα βοηθίνελας-μαν κάνα να τθεράβας μπουτ ζορ ιτιρί μι μπουτιάταρ, επειδή φροντίναβας μι νασφαλέ τσσαβές ντα νακχάβας γιαβερά-ντα δοκιμασίες. Να υπαρχίντιβελας ούτε εκ ντιβές ανταλά 30 μπρεσά σο να ατσσικιαρντάς ο λάφι σο ντινάς τι λοκχιαρέλ μο γκι. Μπουτ φαρ ντέλα-μαν ζορ αντράλ κατά λατσσέ ντα σουκάρ λάφια σο βακερένα μάνγκε ο γιαβερά, για τι σικαβέν μάνγκε πουμαρί εκτίμηση. Μπουτ φαρ λιντόμ εκ μήνυμας, εκ κάρτα ή εκ ισαριπέ ακριβώς αζομάν σο χρειαζίντιβαβας-λες».

18. Σαρ μπορίνασα τι κοβλιαράς ι γιαβερένγκι ντουκχ;

¹⁸ Κάνα κοβλιαράσα ι γιαβερένγκι ντουκχ τθεράσα ο προνόμιος τι μοιάζας αμαρέ Ντεβλέστε. Σαρ μπορίνασα τι κεράς-λες ανταβά; Μπορίνασα τι ασουνάς-λεν με υπομονή, τι κεράς λέντζαρ λάφι γκουλντές ντα τι κεράς πράγματα για τι βοηθίνας-λεν. (Παρ. 3:27) Προσπαθίνασα τι κοβλιαράς ι ντουκχ σαρέ οντουλένγκι σο τσσίντενα μπουτ, ατζέ-ντα ι τζενένγκι σο να υπηρετίνενα ατζέκ ι Ντεβλές. Κάνα αμαρέ γείτονες τθερένα ντουκχ πουμαρέ γκίστε επειδή χασαρντέ εκχέ τζενές κο μεριπέ, κάνα ισί νασφαλέ ή ανησυχίνενα, αμέν τζάσα λέντε, ασουνάσα-λεν ντα βακεράσα λένγκε λάφια κατά Γραφή σο ντένα-λεν ζορ. Κάνα μοιάζασα κο Ιεχωβά, “κο Ντεβέλ σο κοβλιαρέλα αμαρί ντουκχ”, βοηθίνασα εμ αμαρέ πφραλέν τι νταϊντίνεν ο δοκιμασίες, αλλά μπορεί επίσης τι βοηθίνας οντουλέν σο να υπηρετίνενα ατζέκ ι Ντεβλές τι σικλιόν λέσκε.​—Ματθ. 5:16.

Ο ΙΕΧΩΒΑ ΠΑΝΤΑ ΚΑ ΒΟΗΘΙΝΕΛ-ΑΜΕΝ

19. Σο κερέλα ο Ιεχωβά αμένγκε, ντα σαρ μπορίνασα τι μοιάζας λέστε;

¹⁹ Ο Ιεχωβά πφαμπόλα μπουτ σαρέ οντουλένγκε σο μανγκένα-λες. Βοβ να παρατίνελα-αμέν κάνα τθεράσα δυσκολίες. Σαρ εκ λατσσό ντατ πφαμπόλα πι τσσαβέσκε, αντικάς ο Ιεχωβά-ντα πφαμπόλα πι πιστέ υπηρετόνγκε. Οδηγίνελα-αμέν, ντέλα-αμέν οντουλά σο χρειαζίντιβασα, αρακχαβέλα-αμέν ντα κοβλιαρέλα αμαρί ντουκχ. Κάνα βοηθίνασα ι γιαβερέν ντα ντάσα-λεν ζορ κάνα νακχένα δοκιμασίες, μοιάζασα αμαρέ λατσσέ Νταντέστε σο ισί κο ουρανός. Παρόλο σο μπορεί τι αβένα αμαρέ ζωγιάτε δυσκολίες ντα στεναχώριες, μπορίνασα τι αβάς σίγουροι ότι ο Ιεχωβά ισί αμέντζαρ. Βοβ ντέλα-αμέν πο λάφι: «Μα ντάρα, σόσκε με ισινόμ τούσαρ». (Ησ. 41:10) Σο μπουτ λοκχιαρέλα αμαρό γκι ανταβά λάφι! Μπαγιά να ισινάμ ποτές κορκορέ.