Σικλιόν τι Σκεφτίνεν Αντικάς σαρ Σκεφτίνενα ο Ιεχωβά ντα ο Ιησούς

1, 2. Σαρ σικαβάσα αμαρί αγάπη κο Ιεχωβά, ντα σαρ σικαντάς ο Ιησούς ότι μανγκέλας ι Ιεχωβάς σαρέ πι γκοντιάσαρ;

Ο ΙΗΣΟΥΣ σικαντάς καβά ισινέ ο πο σημαντικός πράγμας κατά εντολές ι Ντεβλέσκε, κάνα βακερντάς: «Μανγκ ι Ιεχωβάς τι Ντεβλές σαρέ τι γκίσαρ ντα σαρέ τι ψυχιάσαρ ντα σαρέ τι ζοριάσαρ ντα σαρέ τι γκοντιάσαρ». (Λουκ. 10:27) Άρα σαρό αμαρό νεαυτός σικαβέλα ότι μανγκάσα ι Ιεχωβάς. Δηλαδή σικαβάσα αμαρί αγάπη λέσκε οντουλέντζαρ σο μανγκάσα, οντουλέντζαρ σο νιωθίνασα ντα αμαρέ ζοριάσαρ. Όμως σικαβάσα αμαρί αγάπη κο Ιεχωβά, ι τροπόσαρ-ντα σο σκεφτίνασα. Σίγουρα ποτές να κα αγαβάς ντιπ λατσσές ο τρόπος σο σκεφτίνελα ο Ιεχωβά. Αλλά μπορίνασα τι αγαβάς-λες ατζέ πο λατσσές, κάνα ρόντασα «ι γκοντί ι Χριστόσκι», επειδή ο Ιησούς σκεφτίνελα αντικάς σαρ σκεφτίνελα λέσκο Ντατ.​—1 Κορ. 2:16.

² Ο Ιησούς μανγκέλας ι Ιεχωβάς σαρέ πι γκοντιάσαρ. Τζανέλας σο μανγκέλας ο Ντεβέλ λέσταρ ντα ισινέ αποφασισμέ τι κερέλ-λες, ατζέ-ντα άμα κα χρειαζίντιβελας τι τσσίντελ μπουτ για τι κερέλ ο σωστός. Επειδή ο Ιησούς τθερέλας πι γκοντιάτε σαρ τι κερέλ ο γκι πι Νταντέσκο, να μουκχλάς τίποτα τι αβέλ πο σημαντικός λέσκε ζωγιάτε.

3. Σο σικλιλό ο απόστολος Πέτρος κατά Ιησούς, ντα σο βακερντάς πι πφραλένγκε τι κερέν; (1 Πέτρου 4:1)

³ Ο Πέτρος ντα ο γιαβερά απόστολοι τθερένας ο μπαρό προνόμιος τι νακχέν μπουτ χρόνος ι Ιησούσαρ ντα τι σικλιόν σαρ σκεφτίνελας. Κάνα ο Πέτρος γραφιντάς πο πρώτος γράμμας ι Ντεβλέσκε πνευμάσαρ, βακερντάς κο Χριστιανοί τι κερέν ο πο λατσσό σο μπορίνενας για τι σκεφτίνεν αντικάς σαρ σκεφτίνελας ο Χριστός. (Διαβάνεν 1 Πέτρου 4:1) Κι τσσιπ σο γραφισάλι κι αρχή η Γραφή, κάνα ο Πέτρος γραφιντάς “κερέν ο πο λατσσό σο μπορίνενα”, χρησιμοποιηντάς εκ λάφι σο σικαβέλα στρατιωτέν σο λιντέας πουμέντζαρ όπλα για τι αβέν έτοιμοι τι πολεμίνεν. Άρα άμα ο Χριστιανοί σικλιόνα τι σκεφτίνεν αντικάς σαρ σκεφτίνελας ο Ιησούς, κα τθερέν σο-ντα χρειαζίντιβενα εμ για τι πολεμίνεν ι επιθυμία τι κερέν κάτι μπέτι, αλλά εμ για τι τζαν κόντρα κο ντουνιάς κι Μπενγκέσκο.​—2 Κορ. 10:3-5· Εφεσ. 6:12.

4. Σαρ κα βοηθίνελ-αμέν ανταβά μάθημας τι κεράς ι συμβουλή ι Πετρόσκι;

⁴ Κα ντικχάς σαρ σκεφτίνελας ο Ιησούς ντα σαρ μπορίνασα αμέν-ντα τι σκεφτίνας αντικάς. Κα σικλιάς σαρ μπορίνασα (1) τι σκεφτίνας σαρ ο Ιεχωβά, σο ανταβά κα βοηθίνελ-αμέν τι τθεράς σαρέ ο ίδιος τρόπος σκέψης, (2) τι αβάς ταπεινοί, ντα (3) τι αβάς γκοντιαβέρ ντα τι ντας μπέσα κο Ιεχωβά με προσευχή.

ΣΚΕΦΤΙΝΕΝ ΑΝΤΙΚΑΣ ΣΑΡ ΣΚΕΦΤΙΝΕΛΑ Ο ΙΕΧΩΒΑ

5. Σαρ ο Πέτρος να σκεφτιντάς αντικάς σαρ σκεφτίνελα ο Ιεχωβά εκχέ περιπτωσιάτε;

⁵ Ανέν τουμαρέ γκοντιάτε εκ περίπτωση σο ο Πέτρος να σκεφτιντάς σαρ σκεφτίνελα ο Ιεχωβά. Ο Ιησούς βακερντάας πι μαθητένγκε ότι έπρεπε τι τζαλ κι Ιερουσαλήμ, σο οτθέ κα ασταρένας-λες ο αρχηγοί ι θρησκειάκε, κα τσσίντελας μπουτ ντα σοράν κα μουνταρένας-λες. (Ματθ. 16:21) Ο Πέτρος τζανέλας ότι ο Ιησούς ισινέ ο Μεσσίας σο βακερντάας ο Ντεβέλ ότι κα σώνελας ι τζενέν. Οτθάρ μπορεί τι ισινέ δύσκολος ι Πετρόσκε τι πακιάλ ότι ο Ιεχωβά κα μουκχέλας τι μουνταρέν ι Ιησούς. (Ματθ. 16:16) Άκ’ σόσκε ο Πέτρος λιντάς ι Ιησούς πο οκόρινγκ ντα βακερντάς: «Τζίτζινε τούκε, Κύριε. Να κα αβέλ-πες τούκε κάτι ασακό». (Ματθ. 16:22) Ο Ιησούς ντα ο Πέτρος να συμφωνιντέ ανταλέ πραγμάστε, επειδή ο Πέτρος να σκεφτίνελας αντικάς σαρ σκεφτίνελα ο Ιεχωβά.

6. Σαρ ο Ιησούς σικαντάς ότι σκεφτίνελα αντικάς σαρ σκεφτίνελα ο Ιεχωβά;

⁶ Ο Ιησούς τζανέλας σαρ σκεφτίνελα λέσκο Ντατ. Ντα σκεφτίνελας βοβ-ντα ντιπ σαρ ο Ιεχωβά. Ο Ιησούς βακερντάς κο Πέτρος: «Τζα παλά-μάντε, Μπενγκ! Τσσιναβέσα-μαν, σόσκε να τθερέσα τι γκοντιάτε ι Ντεβλέσκε πράγματα, αλλά ι τζενένγκε». (Ματθ. 16:23) Ο Ιησούς τζανέλας ότι για τι κερέλ οντουβά σο μανγκέλα ο Ιεχωβά έπρεπε τι τσσίντελ μπουτ ντα τι μερέλ. Οτθάρ να δεχτιντάς ι συμβουλή ι Πετρόσκι, παρόλο σο ο Πέτρος βακερντάς-λες ανταβά λέσκε λατσσιμάσκε. Ανταλέσταρ ο Πέτρος σικλιλό ότι χρειαζίντιβελα τι κερέλ ι Ντεβλέσκε σκέψεις, πιρέ σκέψεις. Ανταβά ισί κάτι σημαντικός σο χρειαζίντιβελα τι σικλιάς-λες αμέν-ντα.

7. Σαρ σικαντάς πο σοράν ο Πέτρος ότι μανγκέλας τι αλλάνελ ντα τι σκεφτίνελ σαρ ο Ιεχωβά; (Ντικχέν ι φωτογραφία)

⁷ Πο σοράν ο Πέτρος σικαντάς ότι μανγκέλας τι σικλιόλ τι σκεφτίνελ αντικάς σαρ σκεφτίνελα ο Ιεχωβά. Ακανά αβιλό ο βακίτι ι Ιεχωβάσκο για τι αβέν τζενέ κατά γιαβερά τθεμά λέσκε λαόστε. Ο Ντεβέλ μπουτσσαντάς ι Πετρός για τι βακερέλ ο λατσσέ αμπέρια κο Κορνήλιος σο ισινέ εκ κατά πρώτα τζενέ κατά γιαβερά τθεμά σο αβιλέ Χριστιανοί. Ο Ιουδαίοι ο πο μπουτ φαρ να τθερένας καέκ σχέση ι τζενέντζαρ κατά γιαβερά τθεμά. Οτθάρ ο Πέτρος χρειαζίντιβελας τι αλλάνελ ο τρόπος σο σκεφτίνελας για τι μπορίνελ τι βακερέλ ο λατσσέ αμπέρια ασακέ τζενέντε. Κάνα ο Πέτρος αγαντάς σαρ σκεφτίνελα ο Ιεχωβά ανταλέ τζενένγκε αλλαντάς πο τρόπος σκέψης. Αντικάς, κάνα ο Κορνήλιος μανγκλάς κατά Πέτρος τι τζαλ λέσκε, ο Πέτρος γκιλό “χωρίς τι βακερέλ τίποτα”. (Πράξ. 10:28, 29) Βακερντάς ο λατσσέ αμπέρια κο Κορνήλιος ντα λέσκε κχερέστε ντα βον μπολντιλέ.​—Πράξ. 10:21-23, 34, 35, 44-48.

8. Σαρ μπορίνασα τι σικαβάς ότι σκεφτίνασα σαρ ο Ιεχωβά; (1 Πέτρου 3:8 ντα υποσημείωση)

⁸ Μερικά μπρεσά πο σοράν ο Πέτρος βακερντάς πι πφραλένγκε «τι τθερέν ο ίδιος τρόπος σκέψης». (Διαβάνεν 1 Πέτρου 3:8 ντα υποσημείωση) Μπορίνασα τι τθεράς ο ίδιος τρόπος σκέψης αμαρέ πφραλέντζαρ ντα αμαρέ πφενίντζαρ άμα κα τθεράς ο τρόπος σκέψης ι Ιεχωβάσκο, σο σικλιάσα-λες αντράλ κατά Γραφή. Για παράδειγμας ο Ιησούς βακερντάς πι μαθητένγκε τι τσσουβέν πο ανγκλάλ σαριλένταρ ι Βασιλεία. (Ματθ. 6:33) Άρα κάποιος τουμαρέ κχανγκιριάτε μπορεί τι τραμπίνελ τι κερέλ σκαπανικός ή τι κερέλ πο μπουτ πράγματα κι υπηρεσία κι Ιεχωβάσκι εκχέ γιαβερέ τροπόσαρ. Αντίς τι βακεράς λέσκε ότι έπρεπε τι τραμπίνελας εκ πο άνετη ζωή, πρέπει τι βακεράς λατσσέ λάφια για το στόχος σο τσσουντάς ντα τι βοηθίνας-λες τι πετυχίνελ-λες.

ΤΙ ΑΒΕΝ ΤΑΠΕΙΝΟΙ

9, 10. Σαρ σικαντάς ο Ιησούς ότι ισινέ μπουτ ταπεινός;

⁹ Ι ιράτ πριν τι μερέλ, ο Ιησούς σικλιαρντάς ι Πετρός ντα ι γιαβερέ μαθητέν σαρ τι αβέν ταπεινοί. Πο τζανγκλέ, ο Ιησούς μπουτσσαντάας ι Πετρός ντα ι Ιωαννής τι ετοιμάνεν ο πράγματα για τι χαλ ο Ιησούς γιεκ πι μαθητέντζαρ εκ τελευταία φαρ πριν τι μερέλ. Αντρέ κο πράγματα σο έπρεπε τι ετοιμάνεν ισινέ εκ λεκάνη ντα πετσέτες για τι μπορίνεν τι αβέν ο πιντρέ ι μισαφιρίνγκε τθοντέ. Αλλά κον κα κερέλας ανταγιά ταπεινή μπουτί;

¹⁰ Ο Ιησούς να σακιντισάλο τι κερέλ ανταγιά μπουτί. Σικαντάς ότι ισινέ μπουτ ταπεινός. Ο μαθητές μάλλον σαστισάλε σο ντικχλέ ι Ιησούς τι κερέλ κάτι σο κανονικά κερένας-λες ο υπηρέτες. Ο Ιησούς νικαντάς πο αβραϊνέ σέα, πφαντάς πι ντουμέστε εκ πετσέτα, τσσουντάς πανί αντρέ κι λεκάνη ντα τθοντάς λένγκε πιντρέ. (Ιωάν. 13:4, 5) Ο Ιησούς τθοντάς ο πιντρέ ι 12-ντα αποστολόνγκε. Ανταβά μάλλον λιντάς λέσταρ μπουτ χρόνος. Ντα τθοντάς ατζέ-ντα ο πιντρέ ι Ιουδάσκε, σο κα προδόνελας-λες. Αλλά ο Ιησούς κερντάς ταπεινά σαρί ανταγιά μπουτί. Σοράν βακερντάς λένγκε λατσσιμάσαρ: «Αγαβένα σο κερντόμ τουμένγκε; Τουμέν ντένα-μαν βίκος “Δάσκαλε” ντα “Κύριε”, ντα λατσσές βακερένα, σόσκε ισινόμ. Άμα με, ο Κύριος ντα Δάσκαλος, τθοντόμ τουμαρέ πιντρέ, τουμέν-ντα τι τθοβέν ο πιντρέ ο εκ ι γιαβερέσκε».​—Ιωάν. 13:12-14.

11. Σαρ σικαντάς ο Πέτρος ότι σικλιλόας τι αβέλ ταπεινός; (1 Πέτρου 5:5) (Ντικχέν ι φωτογραφία-ντα)

¹¹ Ο Πέτρος σικλιλό κατά Ιησούς τι αβέλ ταπεινός. Αφού ο Ιησούς βουρτισάλο κο ουρανός, ο Πέτρος αντράλ εκχέ θαυμάσταρ κερντάς λατσσές εκχέ τζενές σο ισινέ μπανγκό από αζομάν σο μπιάντιλο. (Πράξ. 1:8, 9· 3:2, 6-8) Μπουτ τζενέ σο ντικχλέ ανταβά θαύμας, γκιντισάλε ντονταλάι κατά Πέτρος. (Πράξ. 3:11) Αλλά ο Πέτρος να μανγκλάς τι ταρτίνελ ι προσοχή ι τζενένγκι, παρόλο σο μπαριλόας εκχέ κουλτουράτε σο ο τζενέ μανγκένας μπουτ τι σικαβέν-πες. Οκιά μπάνταρ, ισινέ ταπεινός ντα να λιντάς ι δόξα βοβ αλλά ντινάς-λα κο Ιεχωβά ντα κο Ιησούς. Βακερντάς λένγκε: «Αντράλ [κατά ναβ ι Ιησούσκο], ντα αντράλ κατά πίστη σο τθεράσα λέσκε ναβέστε, αβιλό λατσσές ανταβά τζενό σο ντικχένα ντα τζανένα». (Πράξ. 3:12-16) Πο σοράν, ο Πέτρος γραφιντάς κο Χριστιανοί καζόμ σημαντικός ισί τι αβέν ταπεινοί. Κι τσσιπ σο γραφίντιλι η Αγία Γραφή κι αρχή, χρησιμοποιήντιλε κάποια λάφια σο σικαβένα ότι πρέπει τι ιριάς ι ταπεινότητα αντικάς σαρ ιριάσα ο σέα. Ανταβά ανέλα αμαρέ γκοντιάτε αζομάν σο ο Ιησούς πφαντάς εκ πετσέτα πι ντουμέστε ντα τθοντάς ο πιντρέ πι μαθητένγκε.​—Διαβάνεν 1 Πέτρου 5:5.

12. Σαρ μπορίνασα τι συνεχίνας τι αβάς ταπεινοί σαρ ο Πέτρος;

¹² Μπορίνασα τι μοιάζας κο Πέτρος ντα τι συνεχίνας τι σικλιάς τι αβάς ταπεινοί. Αλλά ντεν-τουμέν γκοντί ότι για τι αβέλ κάποιος μπαγιά ταπεινός να ερεσέλα σάντε τι βακερέλ ο σωστά λάφια. Ο λάφι σο χρησιμοποιηντάς ο Πέτρος ντα μεταφράντιβελα «ταπεινότητα», σικαβέλα ότι η ταπεινότητα τθερέλα τι κερέλ ι τροπόσαρ σο σκεφτίνασα αμαρέ νεαυτόσκε ντα ι γιαβερένγκε. Κεράσα λατσσέ πράγματα ι γιαβερένγκε επειδή μανγκάσα ι Ιεχωβάς ντα μανγκάσα ι τζενέν, όχι επειδή μανγκάσα τι ισαρέν-αμέν ο γιαβερά. Σικαβάσα ότι ισινάμ μπαγιά ταπεινοί άμα υπηρετίνασα χαράσαρ ι Ιεχωβάς ντα αμαρέ πφραλέν, ατζέ-ντα άμα ο τζενέ να ντικχένα οντουλά σο κεράσα.​—Ματθ. 6:1-4.

«ΤΙ ΑΒΕΝ ΓΚΟΝΤΙΑΒΕΡ»

13. Σο μανγκέλα τι βακερέλ “τι αβάς γκοντιαβέρ”;

¹³ Σο μανγκέλα τι βακερέλ “τι αβάς γκοντιαβέρ”; (1 Πέτρ. 4:7) Άμα ισινάμ γκοντιαβέρ κα σκεφτίνας σαρ ντικχέλα ο Ιεχωβά ο πράγματα κάνα λάσα αποφάσεις. Κα ντας-αμέν γκοντί ότι αμαρί φιλία ι Ιεχωβάσαρ ισί ο πο σημαντικός πράγμας αμαρέ ζωγιάτε. Επίσης να κα σκεφτίνας ότι ισινάμ μπουτ σημαντικοί ντα ότι τζανάσα-λεν σαρέ. Άμα ισινάμ γκοντιαβέρ κα σικαβάς ότι ντάσα μπέσα κο Ιεχωβά κάνα προσευχίντιβασα λέστε για τι οδηγίνελ-αμέν.a

14. Σαρ ο Πέτρος να μπορισάλο τι ντελ μπέσα κο Ιεχωβά εκχέ περιπτωσιάτε;

¹⁴ Ι τελευταία ιράτ πριν τι μερέλ, ο Ιησούς προειδοποιηντάς πι μαθητέν: «Σαρέ τουμέν κα μουκχέν-μαν ανταγιά ιράτ». Ο Πέτρος ντινάς μπουτ μπέσα πι νεαυτόστε ντα βακερντάς: «Ατζέ-ντα άμα σαρέ ο γιαβερά κα μουκχέν-τουτ, με ποτές να κα μουκχάβ-τουτ!» Οντιά ιράτ ο Ιησούς ντινάς πι μαθητέντε ι συμβουλή: «Ατσσόν τζανγκαντέ ντα μα τσσιναβέν τι προσευχίντιβεν». (Ματθ. 26:31, 33, 41) Άμα ο Πέτρος κα κερέλας ανταγιά συμβουλή πο τζανγκλέ, μάλλον κα τθερέλας ο θάρρος τι βακερέλ ότι ισινέ μαθητής ι Ιησούσκο. Οκιά μπάνταρ, ο Πέτρος βακερντάς ότι να τζανέλας πι Κυριός, ντα σοράν μετανιωσάλο μπουτ ανταλέσκε.​—Ματθ. 26:69-75.

15. Σαρ σικαντάς ο Ιησούς, ι τελευταία ιράτ σο τζουβντιλό σαρ τζενό, ότι ισινέ γκοντιαβέρ;

¹⁵ Ο Ιησούς ντινάς σαρί πι μπέσα κο Ιεχωβά. Παρόλο σο ο Ιησούς ισινέ τέλειος, προσευχίντιβελας συνέχεια ι τελευταία ιράτ πριν τι μερέλ. Ανταβά ντινάς-λες ο θάρρος τι κερέλ οντουβά σο μανγκέλας λέσταρ ο Ιεχωβά. (Ματθ. 26:39, 42, 44· Ιωάν. 18:4, 5) Σίγουρα ο Πέτρος ποτές να μπισταρντάας ότι ο Ιησούς προσευχισάλο αζόμ μπουτ φαρ ι τελευταία ιράτ πριν τι μερέλ.

16. Σαρ σικαντάς ο Πέτρος ότι αβιλό γκοντιαβέρ; (1 Πέτρου 4:7)

¹⁶ Καζόμ νακχέλας ο βακίτι, ο Πέτρος αρχισάλο τι προσευχίντιβελ πο μπουτ φαρ κο Ιεχωβά ντα αντικάς σικαντάς ότι ντέλας λέστε μπέσα. Κάνα ο Ιησούς αναστισάλο βακερντάς κο Πέτρος ντα κο γιαβερά απόστολοι ότι κα λένας άγιος πνεύμας για τι μπορίνεν τι μουτθαβέν ο λατσσέ αμπέρια. Όμως, ο Ιησούς μανγκλάς λένταρ τι μπεσέν κι Ιερουσαλήμ μέχρι τι αβέλ-πες ανταβά. (Λουκ. 24:49· Πράξ. 1:4, 5) Σο κερντάς ο Πέτρος καζόμ μπεσέλας; Ο Πέτρος ντα ο γιαβερά Χριστιανοί «να τσσιναβένας τι προσευχίντιβεν». (Πράξ. 1:13, 14) Πο σοράν, πι πρώτε γραμμάστε, ο Πέτρος βακερντάς πι πφραλένγκε τι αβέν γκοντιαβέρ ντα τι προσευχίντιβεν πο μπουτ φαρ. Αντικάς κα σικαβένας ότι ντένα μπέσα κο Ιεχωβά. (Διαβάνεν 1 Πέτρου 4:7) Ο Πέτρος σικλιλό τι στηρίντιβελ κο Ιεχωβά ντα μπορίνελας τι βοηθίνελ ντα τι ντελ ζορ πι πφραλέν ντα πι πφενίν.​—Γαλ. 2:9.

17. Σο χρειαζίντιβελα τι συνεχίνας τι κεράς; (Ντικχέν ι φωτογραφία-ντα)

¹⁷ Για τι αβάς γκοντιαβέρ πρέπει τι πλησιάνας ι Ιεχωβάς μπουτ φαρ αντράλ κατά προσευχή. Αγαβάσα ότι χρειαζίντιβελα τι συνεχίνας τι προσευχίντιβας κο Ιεχωβά ατζέ-ντα άμα αμντίνασα ότι κάποια πράγματα ισί εύκολα αμένγκε τι κεράς-λεν. Άρα, ατζέ πο μπουτ κάνα τθεράσα τι λας σημαντικές αποφάσεις, προσευχίντιβασα κο Ιεχωβά για τι οδηγίνελ-αμέν. Ισινάμ σίγουροι ότι βοβ τζανέλα καβά ισί ο πο λατσσό αμένγκε!

18. Σαρ μπορίνασα τι αλλάνας ο τρόπος σο σκεφτίνασα για τι ταιριάνελ πο μπουτ με το τρόπος σο σκεφτίνελα ο Ιεχωβά;

¹⁸ Καζόμ χαρούμενοι ισινάμ σο ο Ιεχωβά κερντάς-αμέν εκχέ τροπόσαρ για τι μπορίνας τι σικαβάς ο ιδιότητες σο σικαβέλα βοβ-ντα. (Γέν. 1:26) Ισί μπαγιά ότι ναστί μοιάζασα τέλεια κο Ιεχωβά. (Ησ. 55:9) Όμως σαρ ο Πέτρος, μανγκάσα τι συνεχίνας τι σκεφτίνας σαρ σκεφτίνελα ο Ιεχωβά, τι αβάς ταπεινοί ντα γκοντιαβέρ.