Τι Αβέν Ταπεινοί Σαρ ο Ιεχωβά

1. Σόσκε η ταπεινότητα ι Ιεχωβάσκι ισί αζόμ ξεχωριστή;

ΚΑΝΑ σκεφτίνενα εκχέ τζενές σο κερέλα κουμάντος αντιβές, μήπως βακερένα ότι ισί ταπεινός; Μάλλον όχι. Όμως, ο Ιεχωβά, σο ισί ο πο ζουρανό σαριλένταρ, ισί ταπεινός. (Ψαλμ. 113:5-8) Καέκ νανέ αζόμ ταπεινός σαρ ο Ιεχωβά. Βοβ να τθερέλα ούτε εκ χτάλα μπαρικανιπέ αντρέ πέστε. Κα βοηθίντιβας καζόμ κα ντικχάς πο λατσσές σταρ σουκάρ πράγματα σο τθερέλα ο Ιεχωβά κο χαρακτήρας πιρό ντα σικαβένα ότι ισί μπουτ ταπεινός. Επίσης κα ντικχάς σαρ ο Ιησούς σικαντάς ταπεινότητα σαρ πο Ντατ. Σαρέ ανταλά κα βοηθίνεν-αμέν τι τζας πο πασέ κο Ιεχωβά ντα τι σικλιάς τι αβάς ατζέ πο ταπεινοί, σαρ λέστε.

ΝΙΩΘΙΝΑΣΑ ΑΝΕΤΑ ΤΙ ΠΛΗΣΙΑΝΑΣ Ι ΙΕΧΩΒΑΣ

2. Σο σικαβέλα αμένγκε ο εδάφιος Ψαλμός 62:8 ι Ιεχωβάσκε; (Ντικχέν ι φωτογραφία-ντα)

² Ι μπαρικανέ τζενέν ο πο μπουτ φαρ νανέ εύκολος τι πλησιάνας-λεν. Μπουτ φαρ ο μπαρικανέ τζενέ συμπεριφερίντιβενα μπέτι ι γιαβερένγκε επειδή σκεφτίνενα ότι ισί πο οπρέ λένταρ. Οτθάρ ο γιαβερά να μανγκένα τι αβέν πασέ λέντε. Καζόμ διαφορετικός ισί ο Ιεχωβά! Επειδή αμαρό Ντατ σο ισί κο ουρανός ισί ταπεινός, βακερέλα αμένγκε τι κεράς προσευχή λέστε ντα τι βακεράς λέσκε σαρέ ο πράγματα σο τθεράσα αντρέ αμαρέ γκίστε ντα αμαρέ γκοντιάτε. (Διαβάνεν Ψαλμός 62:8) Σαρ εκ λατσσό ντατ μανγκέλα μπαγιά τι τζανέλ σο σκεφτίνελα ντα σαρ νιωθίνελα λέσκο τσσαβό, αντικάς ο Ιεχωβά-ντα μανγκέλα μπαγιά τι ασουνέλ αμαρέ προσευχές. Οτθάρ-ντα κερντάς τι γραφίντιβεν μπουτ προσευχές κι Γραφή. Ανταβά σικαβέλα καζόμ μπουτ μανγκέλα τι πλησιάνας-λες. (Ιησ. Ναυή 10:12-14· 1 Σαμ. 1:10-18) Όμως, μπορεί μπάζιμα τι νιωθίνασα ότι να αξίνασα τι κεράς προσευχή κο Ιεχωβά επειδή κεράσα μπουτ λάθη.

3. Σόσκε μπορίνενα τι αβέν σίγουροι ότι Ιεχωβά μανγκέλα τι πλησιάνεν-λες συνέχεια αντράλ κατά προσευχή;

³ Χρειαζίντιβελα τι προσευχίντιβας κο Ιεχωβά σαρ-ντα τι νιωθίνασα αμαρέ νεαυτόσκε. Σόσκε βακεράσα-λες ανταβά; Κι ιστορία σο βακερντάς ο Ιησούς ι τσσαβέσαρ σο νασλόας πι κχερέσταρ, μοιασκιαρντάς ι Ιεχωβάς εκχέ λατσσέ νταντέσαρ. Λέσκο τσσαβό κερντάς μπουτ μπαρέ λάθη ντα νιωθίνελας ότι λέσκο ντατ να κα μανγκέλας τι δεχτίνελ-λες παλάλ. Αλλά σο κερντάς ο ντατ κάνα λέσκο τσσαβό βουρτισάλο κχερέ; Ο Ιησούς βακερντάς ότι κάνα ο ντατ ντικχλάς πι τσσαβές ντουράλ «τθαβντισάλο ντα ντινάς-λες ανγκάλι ντα τσσουμιντάς-λες γκουλντές». (Λουκ. 15:17-20) Ο Ιεχωβά ισί σαρ ανταβά ντατ. Κάνα ασουνέλα-αμέν τι κεράς προσευχή λέστε επειδή ισινάμ στεναχωριμέ για εκ λάθος σο κερντάμ, λέσκι ταπεινότητα τσσίντελα-λες τι ντελ-αμέν σαρί πι προσοχή. (Θρ. 3:19, 20) Σαρ ο ντατ τθαβντισάλο πι τσσαβέστε, αντικάς ο Ιεχωβά-ντα τζιτζίνελα αμένγκε ντα σικαβέλα αμένγκε ξεκάθαρα ότι μανγκέλα-αμέν ντα πφαμπόλα αμένγκε. (Ησ. 57:15) Σαρ κερέλα-λες ανταβά ο Ιεχωβά; Μπουτ φαρ χρησιμοποιήνελα ι πρεσβυτερόν, αμαρί φαμιλί ντα αμαρέ φιλόν σο μανγκένα-λες για τι λοκχιαρέλ αμαρό γκι. (Ιακ. 5:14, 15) Ο Ιεχωβά ντέλα-αμέν ανταγιά βοήθεια επειδή μανγκέλα τι αβάς πασέ λέστε.

4. Σόσκε ισινέ εύκολος ι τζενένγκε τι πλησιάνεν ι Ιησούς;

⁴ Ο Ιησούς μοιάζελα πι Νταντέστε. Ο Ιησούς ισί ταπεινός, σαρ πο Ντατ. Άκ’ σόσκε ο τζενέ μανγκένας τι πλησιάνεν-λες. Να νταρένας τι κερέν λέσκε ερωτήσεις. (Μάρκ. 4:10, 11) Οτθάρ, κάνα πουτσλάς-λεν σο πακιάνας εκχέ θεμάσκε, βακερντέ λέσκε οντουβά σο νιωθίνενας μπαγιά. (Ματθ. 16:13-16) Επίσης, κάνα κερένας λάθη, να νταρένας ότι ο Ιησούς κα χολιάνελας λένγκε. Τζανένας ότι ο Ιησούς ισινέ λατσσό, συγχωρίνελας ντα κερέλας υπομονή. (Ματθ. 17:24-27) Επειδή ο Ιησούς συμπεριφερίντιβελας ακριβώς σαρ πι Νταντέστε, λέσκε μαθητές σικλιλέ πο λατσσές ι Ιεχωβάς. (Ιωάν. 14:9) Κατά Ιησούς ντικχλέ ότι ο Ιεχωβά ισί ταπεινός ντα μανγκέλα τι αβέλ πασέ λέντε. Να ισινέ σαρ ο παπάζια αζομάν σο σικαβένας μπαρικανιπέ ντα να πφαμπόνας ι τζενένγκε.

5. Σόσκε ισί πο εύκολος ι γιαβερένγκε τι πλησιάνεν-αμέν κάνα ισινάμ ταπεινοί;

⁵ Σαρ μπορίνασα τι μοιάζας κο Ιεχωβά; Κάνα σικλιάσα τι αβάς πο ταπεινοί, ο γιαβερά κα πλησιάνεν-αμέν πο εύκολα. Άμα να ισινάμ ταπεινοί, μπορεί τι ζηλίνας ι γιαβερέν, τι νιωθίνας ότι ισινάμ πο οπρέ λένταρ ντα μα τι συγχωρίνας-λεν κάνα πληγώνενα-αμέν. Άμα συμπεριφερίντιβασα αντικάς κο γιαβερά, να κα μανγκέν τι πλησιάνεν-αμέν. Όμως η ταπεινότητα κα βοηθίνελ-αμέν τι συγχωρίνας, τι σικαβάς λατσσιπέ ντα υπομονή. Ανταβά κα κερέλ ι τζενέν τι μανγκέν τι αβέν αμαλά αμέντζαρ. (Κολ. 3:12-14) Ο πρεσβύτεροι ειδικά πρέπει τι αβέν σίγουροι ότι ο πφραλά ντα ο πφενιά νιωθίνενα άνετα λέντζαρ. Για τι αβέλ-πες ανταβά, ο πρεσβύτεροι χρειαζίντιβελα τι αβέν πασέ κο πφραλά ντα κο πφενιά. Ανταβά μανγκέλα τι βακερέλ ότι κερένα ο πο λατσσό σο μπορίνενα για τι τζαν κο συναθροίσεις πασάλ, αντίς τι ντικχέν-λεν κατά Zoom. Ντα κάνα μπορίνενα, προσπαθίνενα τι νικιόν ι πφραλέντζαρ ντα ι πφενίντζαρ κο έργος κχερ κχερέστε. Αντικάς ο πφραλά κι κχανγκιρί κα σικλιόν πο λατσσές ι πρεσβυτερόν ντα κα νιωθίνεν άνετα τι κερέν λέντζαρ λάφι κάνα χρειαζίντιβενα-λες.

Ο ΙΕΧΩΒΑ ΙΣΙ ΛΟΓΙΚΟΣ

6, 7. Αλλάνελα ο Ιεχωβά πι άποψη κάνα λέσκε υπηρέτες προσευχίντιβενα λέστε; Βακερέν παραδείγματα.

⁶ Μπουτ φορές ο μπαρικανέ τζενέ σκεφτίνενα ότι τζανένα καβά ισί ο σωστός ντα να μανγκένα τι αλλάνεν γνώμη. Όμως ο Ιεχωβά, σο πάντα τζανέλα καβά ισί ο πο σωστός, να κερέλα-λες ανταβά! Επειδή ισί ταπεινός, μανγκέλα τι ασουνέλ σο σκεφτίνενα ο γιαβερά ντα μπορεί ατζέ-ντα τι αλλάνελ πι απόφαση. Η Μαριάμ γιεκ με τον Ααρών κερένας παράπονα πουμαρέ πφραλέσκε ι Μωυσίσκε. Όμως ανταβά ισινέ μπαρό λάθος επειδή ο Ιεχωβά κερέλας λάφι αντράλ κατά Μωυσής. Άρα η Μαριάμ κι πραγματικότητα να σικαβέλας σεβασμός κο Ιεχωβά. Οτθάρ ο Ιεχωβά χολιασάλο μπουτ με την Μαριάμ ντα αντάς λάκε λέπρα. Αλλά κάνα ο Ααρών μολιντάς ι Μωυσής ντα ο Μωυσής ι Ιεχωβάς για τι κερέλ-λα λατσσές, σο κερντάς ο Ιεχωβά; Εκ μπαρικανό τζενό να κα αλλάνελας πι άποψη. Αλλά ο Ιεχωβά αλλαντάς-λα! Επειδή ισί ταπεινός, ο Ιεχωβά ασουντάς ι Μωυσής ντα κερντάς-λα λατσσές.​—Αριθ. 12:1-15.

⁷ Επίσης ντικχάσα καζόμ ταπεινός ισί ο Ιεχωβά κάνα σκεφτίνασα σαρ ασουντάς τον βασιλιά Εζεκία. Αντράλ πι προφητίσταρ, ο Ιεχωβά βακερντάς κο βασιλιάς ότι κα μερέλας. Ο Εζεκίας μολιντάς ροϊμάσαρ ι Ιεχωβάς τι κερέλ-λες λατσσές. Ο Ιεχωβά σικαντάς λέσκε λατσσιπέ. Οτθάρ ασουντάς λέσκι προσευχή ντα βακερντάς λέσκε ότι κα τζουβντιόλ ατζέ 15 μπρεσά. (2 Βασ. 20:1, 5, 6) Ο Ιεχωβά πφαμπόλα μπαγιά ι τζενένγκε, ντα επειδή ισί ταπεινός, μανγκέλα τι ασουνέλ-λεν.

8. Καλά παραδείγματα σικαβένα ότι ο Ιησούς ισί λογικός; (Μάρκος 3:1-6)

⁸ Ο Ιησούς μοιάζελα πι Νταντέστε. Κάνα ισινέ κι πφουβ, ο Ιησούς να σακιντίνελας τι κερέλ λατσσέ πράγματα ι γιαβερένγκε. Για παράδειγμας, ο Ιησούς κερντάς λατσσές τζενέν κο Σάββατος, κάτι σο ο παπάζια αζομάν βακερένας ότι δεν έπρεπε τι αβέλ-πες. Ο Ιησούς να ισινέ σουκέ γκίσκο αλλά πφαμπόλας ι γιαβερένγκε ντα ισινέ λογικός. (Διαβάνεν Μάρκος 3:1-6) Ο Ιησούς συνεχίνελα τι αβέλ λογικός ντα τι πφαμπόλ αμένγκε-ντα αντιβές. Ντικχίντιβελα ανταβά αντράλ κατά τρόπος σο οδηγίνελα ο κχανγκιριά. Για παράδειγμας κάνα εκ τζενό αντρέ κι κχανγκιρί κερέλα εκ σοβαρή αμαρτία, ο Ιησούς κερέλα υπομονή λέσαρ, ντα αντικάς ντέλα-λες μπουτ ευκαιρίες τι αλλάνελ.​—Αποκ. 2:2-5.

9. Σαρ μπορίνασα τι σκεφτίνας ντα τι συμπεριφερίντιβας λογικά; (Ντικχέν ο φωτογραφίες-ντα)

⁹ Σαρ μπορίνασα τι μοιάζας κο Ιεχωβά; Πρέπει τι σικλιάς κατά Ιεχωβά σαρ τι σκεφτίνας ντα τι συμπεριφερίντιβας με λογικός τρόπος. (Ιακ. 3:17) Φιρειπείν, ο νταντά ντα ο νταγιά σο μοιάζενα κο Ιεχωβά να μπεκλεντίνενα πουμαρέ τσσαβένταρ τι κερέν πράγματα σο να μπορίνενα. Σαρ βακερένα ο εδάφια κι Γένεση 33:12-14, εκ μπουτ λατσσό παράδειγμας οπράλ ανταλέστε ισί ο Ιακώβ επειδή σκεφτίνελας πι τσσαβέν. Επίσης, ο νταντά ντα ο νταγιά σο ισί ταπεινοί ντα λογικοί να συγκρίνενα ι εκ τσσαβές σο τθερένα ι γιαβερέσαρ. Ο πρεσβύτεροι-ντα πρέπει τι αβέν λογικοί. Για παράδειγμας, εκ πρεσβύτερος να επιμίνελα κι άποψη το τθερέλα βοβ. Οκιά μπάνταρ, υποστηρίνελα ι άποψη σο τθερένα ο πο μπουτ πρεσβύτεροι ι κχανγκιριάκε, κάνα ανταβά να τζάλα κόντρα οντουλέντζαρ σο βακερέλα η Γραφή. (1 Τιμ. 3:2, 3) Ντα σαρέ αμέν πρέπει τι μαράς-αμέν τι αγαβάς σο σκεφτίνενα ντα σαρ νιωθίνενα ο γιαβερά ατζέ-ντα κάνα αμέν ντικχάσα ο πράγματα γιαβέρτουλους. (Ρωμ. 14:1) Σαρέ κι κχανγκιρί πρέπει τι κεράς ο πο λατσσό για “τι ντικχίντιβελ σαρέ κο τζενέ ότι ισινάμ λογικοί”.​—Φιλιπ. 4:5.

Ο ΙΕΧΩΒΑ ΚΕΡΕΛΑ ΥΠΟΜΟΝΗ

10. Καλέ τροπόντζαρ κερντάς ο Ιεχωβά υπομονή;

¹⁰ Μπέκιμ τθερένα ντικχλό ότι ο μπαρικανέ τζενέ να μπεϊντίνενα τι μπεκλεντίνεν. Ασακέ τζενέ να τθερένα ιτς υπομονή. Όμως ο Ιεχωβά νανέ αντικάς. Τθερέλα ι πο μπαρί υπομονή σαριλένταρ! Για παράδειγμας, κο ντιβεσά σο τζουβντιόλας ο Νώε, ο Ιεχωβά βακερντάς ότι Βοβ κα μπεκλεντίνελας 120 μπρεσά πριν τι καταστραφίνελας ι πφιρνέν. (Γέν. 6:3) Ο Νώε τθερέλας χρόνος για τι μπαριαρέλ πι τσσαβέν ντα τι κερέν γιεκ ι κιβωτός. Πο σοράν ο άγγελος ι Ιεχωβάσκο ασουνέλας με υπομονή τον Αβραάμ καζόμ πουτσέλας για την καταστροφή σο κα αβέλας-πες κο Σόδομα ντα κο Γόμορρα. Εκ μπαρικανό τζενό μπορεί τι βακερέλας: “Τούι κα βακερές μάνγκε σο τι κεράβ;” Αλλά σαρ ο Ιεχωβά, ανταβά άγγελος-ντα κερέλας υπομονή με τον Αβραάμ.​—Γέν. 18:20-33.

11. Σαρ σικαβέλα ο εδάφιος 2 Πέτρου 3:9, σόσκε ο Ιεχωβά κερέλα υπομονή αντιβές;

¹¹ Ο Ιεχωβά κερέλα υπομονή αντιβές-ντα. Μπεσέλα τι αβέλ ο βακίτι σο τραμπιντάς για τι ανέλ ο τέλος. Σόσκε κερέλα υπομονή; «Επειδή να μανγκέλα τι καταστραφίντιβελ καέκ αλλά τι μετανιώνεν σαρέ». (Διαβάνεν 2 Πέτρου 3:9) Σκεφτίνεν ακαβά: Επειδή ο Ιεχωβά κερέλα υπομονή, εκατομμύρια τζενέ αβιλέ λέσκε αμαλά. Ντα σαρέ αμέν μανγκάσα ατζέ πο μπουτ τζενέ τι κερέν-λες ανταβά. Αλλά ο Ιεχωβά να κα κερέλ υπομονή για πάντα. Ο Ιεχωβά μανγκέλα ι τζενέν, αλλά να κα μουκχέλ-λεν τι κερέν για πάντα σο μανγκένα. Κα ανέλ εκ τέλος κο πφιρνιπέ.​—Αββακ. 2:3.

12. Σαρ ο Ιησούς κερέλα υπομονή σαρ ο Ιεχωβά;

¹² Ο Ιησούς μοιάζελα πι Νταντέστε. Για χιλιάδες μπρεσά ο Ιησούς σικαβέλα υπομονή σαρ ο Ιεχωβά. Ο Ιησούς ντικχέλα ι Μπενγκές τι βακερέλ μπαρέ ψέματα ι Ιεχωβάσκε ντα ι πιστέ τζενένγκε. (Γέν. 3:4, 5· Ιώβ 1:11· Αποκ. 12:10) Επίσης ντικχέλα μπουτέ τζενέν τι τσσίντεν μπουτ βάσανα. Σκεφτίνεν καζόμ μπουτ μανγκέλα «τι καταστραφίνελ οντουλά σο κερντάς ο Μπενγκ». (1 Ιωάν. 3:8) Σόσκε ο Ιησούς μπορίνελα τι κερέλ υπομονή μέχρι ο Ιεχωβά τι βακερέλ λέσκε ότι ισί ο σαάτι τι καταστραφίνελ σαρέ οντουλά σο κερντάς ο Μπενγκ; Εκ λόγος ισί ότι ο Ιησούς ισί ταπεινός. Τζανέλα ότι ο Ιεχωβά ισί οντουβά σο τραμπίνελα κάνα κα ανέλ ο τέλος.​—Πράξ. 1:7.

13. Σαρ ντα σόσκε κερέλας ο Ιησούς υπομονή πι μαθητέντζαρ;

¹³ Κάνα ισινέ κι πφουβ, ο Ιησούς κερέλας επίσης υπομονή πι μαθητέντζαρ. Για παράδειγμας, παρόλο σο ο μαθητές χάνας-πες συνέχεια κον ισί ο πο μπαρό, ο Ιησούς να σκεφτιντάς ότι να κα αλλάνενας ποτές. Οκιά μπάνταρ, συνεχιντάς τι κερέλ υπομονή. (Λουκ. 9:46· 22:24-27) Ισινέ σίγουρος ότι κα σικλιόνας τι αβέν πο ταπεινοί. Μήπως τουμέν-ντα τθερένα κερντό παλάλ γιαβερέστε ο ίδιος λάθος; Άμα βα, σίγουρα ισινέν πφερντέ εκτίμηση σο τθερένα εκχέ Βασιλιάς σο ισί ταπεινός ντα κερέλα υπομονή.

14. Σο κα βοηθίνελ-αμέν τι κεράς πο μπουτ υπομονή;

¹⁴ Σαρ μπορίνασα τι μοιάζας κο Ιεχωβά; Για τι σκεφτίνας ντα τι συμπεριφερίντιβας ατζέ πο μπουτ σαρ ο Ιεχωβά, πρέπει τι σικλιάς τι σκεφτίνας σαρ ο Ιησούς. (1 Κορ. 2:16) Σο κα βοηθίνελ-αμέν τι σκεφτίνας ατζέ πο μπουτ σαρ ο Ιησούς; Σάντε εκ ισί ο τρόπος. Πρέπει τι διαβάνας ο Ευαγγέλια. Σοράν πρέπει τι ντας χρόνος για τι σκεφτίνας λατσσές σο κερντάς ο Ιησούς ντα σόσκε κερντάς-λες. Επίσης χρειαζίντιβελα τι μανγκάς κατά Ιεχωβά τι βοηθίνελ-αμέν τι αβάς ταπεινοί ντα τι κεράς υπομονή σαρ ο Ιησούς. Καζόμ πο μπουτ σικλιάσα τι σκεφτίνας σαρ ο Ιησούς, αζόμ πο μπουτ κα μοιάζας κο Ιεχωβά ντα κα κεράς υπομονή αμαρέ νεαυτόσαρ ντα ι γιαβερέντζαρ.​—Ματθ. 18:26-30, 35.

Ο ΙΕΧΩΒΑ ΤΣΣΟΥΒΕΛΑ ΣΗΜΑΣΙΑ ΚΟ ΤΑΠΕΙΝΟΙ

15. Βακερέν παραδείγματα σο σικαβένα ότι ο Ιεχωβά μανγκέλα ι ταπεινέ τζενέν. (Ψαλμός 138:6)

¹⁵ Διαβάνεν Ψαλμός 138:6. Σκεφτίνεν, ο Ιεχωβά σο ισί ο πο μπαρό σαρό κο σύμπαν, ντέλα μπαρί σημασία κο τζενέ σο ισί ταπεινοί! Σαρέ ανταλά μπρεσά υπαρχίντιβενα τζενέ σο ο γιαβερά να ντένα-λεν σημασία. Όμως ο Ιεχωβά ντικχέλα-λεν. Μερικά τζενέ ανταλένταρ μπορεί μα τι αβένα εύκολα αμαρέ γκοντιάτε, αλλά ισί αντρέ κι Γραφή. Για παράδειγμας, η Δεββώρα ισινέ εκ λατσσί υπηρέτρια για περίπου 125 μπρεσά κι φαμιλί του Ισαάκ ντα του Ιακώβ! Παρόλο σο να τζανάσα μπουτ πράγματα ανταλέ πιστέ τζουβλιάκε, ο Ιεχωβά κερντάς τι γραφίντιβεν κι Γραφή κάποια πράγματα λάκε σο σικαβένα ότι ισινέ μπουτ λατσσί τζουβέλ. (Γέν. 24:59· 35:8, υποσ.) Μπουτ μπρεσά πο σοράν, ο Ιεχωβά τραμπιντάς εκχέ τερνέ τσομπανής σο βακερένας λέσκε Δαβίδ τι αβέλ βασιλιάς του Ισραήλ. (2 Σαμ. 22:1, 36) Χάνικ πο σοράν αφού μπιάντιλο ο Ιησούς, ο Ιεχωβά μπουτσσαντάς αγγελόν μερικέ τσομπανίντε ντα ντινάς-λεν ο προνόμιος τι σικλιόν βον πρώτα ότι ο Μεσσίας μπιάντιλοας κι Βηθλεέμ. (Λουκ. 2:8-11) Ντα κάνα ο Ιωσήφ ντα η Μαρία γκερντέ ι Ιησούς κο ναός, ο Ιεχωβά ντινάς ο προνόμιος ντουέ πφουρέ τζενέντε, κο Συμεών ντα κι Άννα, τι ντικχέν λέσκε Τσσαβές. (Λουκ. 2:25-30, 36-38) Βα, «παρόλο σο ο Ιεχωβά ισί οπρέ, τθερέλα πο γιακχά κο ταπεινός»!

16. Σαρ ο Ιησούς μοιάζελα πι Νταντέστε κο τρόπος σο συμπεριφερίντιβελα κο γιαβερά;

¹⁶ Ο Ιησούς μοιάζελα πι Νταντέστε. Σαρ πο Ντατ, ο Ιησούς σικαντάς ότι μανγκέλα ι ταπεινέ τζενέν. Σικλιαρέλας ι Ντεβλέσκε Βασιλειάκε οντουλέντε σο “να τζανένας μπουτ γράμματα ντα ισινέ συνηθισμέ τζενέ”. (Πράξ. 4:13· Ματθ. 11:25) Επίσης ο Ιησούς κερέλας λατσσές ι νασφαλέν εκχέ τροπόσαρ σο σικαβέλας λένγκε αγάπη ντα σεβασμός. (Λουκ. 5:13) Ι ιράτ πριν τι μερέλ, ο Ιησούς τθοντάς ο πιντρέ πι μαθητένγκε. Ανταγιά μπουτί κερέλας-λα κανονικά εκ υπηρέτης. (Ιωάν. 13:5) Ντα πριν τι τζαλ κο ουρανός, ντινάς σαρέ πι μαθητέντε, εμ αμέντε-ντα αντιβές, ο προνόμιος τι κεράς ο πο σημαντικός έργος, τι βοηθίνας γιαβερέν τι τζουβντιόν για πάντα.​—Ματθ. 28:19, 20.

17. Σαρ μπορίνασα τι μανγκάς ντα τι σεβάνας ι γιαβερέν; (Ντικχέν ι φωτογραφία-ντα)

¹⁷ Σαρ μπορίνασα τι μοιάζας κο Ιεχωβά; Σικαβάσα ότι μανγκάσα ντα σεβάνασα ι τζενέν κάνα βακεράσα ο λατσσέ αμπέρια σαριλέντε, κατάρ-ντα τι αβέν, σο-ντα χρώμας τι τθερέν, ή καζόμ-ντα γραμματισμέ τι αβέν. Ντα σικαβάσα αγάπη ντα σεβασμός αμαρέ πφραλένγκε ντα αμαρέ πφενίνγκε, καζόμ-ντα προνόμια τι τθεράσα ή ατζέ-ντα άμα μπορίνασα τι κεράς κάποια πράγματα πο λατσσές λένταρ. (Φιλιπ. 2:3) Κεράσα ι Ιεχωβάσκο γκι κάνα ισινάμ ταπεινοί ντα σικαβάσα αγάπη ντα σεβασμός ο εκ κο γιαβέρ μπουτέ τροπόντζαρ.​—Ρωμ. 12:10· Σοφ. 3:12.

18. Σόσκε μανγκένα τι αβέν ταπεινοί σαρ ο Ιεχωβά;

¹⁸ Κάνα μαράσα-αμέν μπουτ τι σικαβάς ταπεινότητα σαρ αμαρό Ντατ σο ισί κο ουρανός, ο γιαβερά κα μπορίνεν τι πλησιάνεν-αμέν πο εύκολα, κα αβάς πο λογικοί ντα κα κεράς πο μπουτ υπομονή. Επίσης κα μανγκάς ντα κα σεβάνας ι γιαβερέν, σαρ κερέλα ο Ιεχωβά. Ντα τι ντεν-τουμέν γκοντί ότι κάνα κεράσα σο νακχέλα αμαρέ βαστέσταρ για τι μοιάζας αμαρέ ταπεινέ Ντεβλέστε, ο κάθε εκ αμένταρ κα αβέλ πο πολύτιμος κο γιακχά λέσκε!​—Ησ. 43:4.