«Τραμπίνεν . . . Κας κα Υπηρετίνεν»

1. Σο πρέπει τι κεράς για τι αβάς μπαγιά χαρούμενοι, ντα σόσκε; (Ησαΐας 48:17, 18)

ΑΜΑΡΟ Ντατ σο ισί κο ουρανός μανγκέλα-αμέν μπουτ ντα τθερέλα πι γκοντιάτε τι απολαμβάνας ι ζωή ακανά ντα κο μέλλον. (Εκκλ. 3:12, 13) Σαρ τζενέ μπορίνασα τι κεράς μερικά απίστευτα πράγματα. Ο Ιεχωβά λατσσαρντάς-αμέν αντικάς. Όμως, ο Ιεχωβά να ντινάς-αμέν ι ικανότητα τι κεράς κουμάντος αμαρό νεαυτός ή τι αποφασίνας αμέν καβά ισί ο σωστός ντα καβά ισί ο λάθος. (Εκκλ. 8:9· Ιερ. 10:23) Τζανέλα ότι για τι αβάς μπαγιά χαρούμενοι πρέπει τι υπηρετίνας-λες ντα τι τζουβντιάς αντικάς σαρ μανγκέλα βοβ.​—Διαβάνεν Ησαΐας 48:17, 18.

2. Σο μανγκέλα τι πακιάς ο Μπενγκ, ντα σο κερντάς ο Ιεχωβά για τι νικαβέλ-λες ψεύτης;

² Ο Μπενγκ μανγκέλα τι πακιάς ότι μπορίνασα τι αβάς χαρούμενοι μπι ι Ιεχωβάσκο. Βακερέλα ότι ο τζενέ μπορίνενα τι κερέν κουμάντος λατσσές πουμαρό νεαυτός κορκορέ. (Γέν. 3:4, 5) Για τι νικαβέλ ι Μπενγκές ψεύτης, ο Ιεχωβά μουκχλάς ι τζενέν τι κερέν κουμάντος πουμαρό νεαυτός κορκορέ για χάνικ βακίτι. Ισί εύκολος τι ντικχάς ότι ο τρόπος σο κερένα κουμάντος ο τζενέ να τθερέλα επιτυχία. Οκιά μπάνταρ, κι Γραφή ισί παραδείγματα μουρσένγκε ντα τζουβλιένγκε σο ισινέ χαρούμενοι επειδή υπηρετίνενας ι Ιεχωβάς. Ο πο λατσσό παράδειγμας ανταλένταρ ισί ο Ιησούς Χριστός. Κο μάθημας ανταβά κα σικλιάς σόσκε ο Ιησούς τραμπιντάς τι υπηρετίνελ ι Ιεχωβάς. Σοράν, κα ντικχάς σόσκε αμαρό Ντατ σο ισί κο ουρανός αξίνελα τι ντας-λες λατρεία. Κο τέλος, κα ντικχάς μερικά πράγματα σο τσσίντενα-αμέν τι ντας λατρεία ι Ιεχωβάς.

ΣΟΣΚΕ Ο ΙΗΣΟΥΣ ΤΡΑΜΠΙΝΤΑΣ ΤΙ ΥΠΗΡΕΤΙΝΕΛ Ι ΙΕΧΩΒΑΣ

3. Σο ντινάς ο Μπενγκ κο Ιησούς ντα σο τραμπιντάς τι κερέλ ο Ιησούς;

³ Κάνα ισινέ κι πφουβ, ο Ιησούς έπρεπε τι τραμπίνελ κας κα υπηρετίνελας. Σοράν κατά μπολντιπέ ι Ιησούσκο, ο Μπενγκ βακερντάς ότι κα ντέλας κο Ιησούς σαρέ ο βασιλείες ι ντουνιάσκε άμα ο Ιησούς κα ντέλας-λες λατρεία σάντε εκ φαρ. Ο Ιησούς βακερντάς λέσκε: «Νας, Μπενγκ! Σόσκε ισί γραμμέ: “Ανγκλάλ κο Ιεχωβά τι Ντεβλέστε πρέπει τι περές κοτσίντζαρ ντα σάντε λες πρέπει τι ντες λατρεία”». (Ματθ. 4:8-10) Σόσκε ο Ιησούς λιντάς ανταγιά απόφαση; Σκεφτίνεν μερικούς λόγους.

4, 5. Καλά ισί μερικοί λόγοι σο ο Ιησούς τραμπιντάς τι υπηρετίνελ ι Ιεχωβάς;

⁴ Ο βασικός λόγος σο ο Ιησούς τραμπιντάς τι υπηρετίνελ ι Ιεχωβάς ισί η αγάπη. Ο Ιησούς τθερέλα μπαρί αγάπη σο να χασάρντιβελα πι Νταντέσκε. (Ιωάν. 14:31) Επίσης ο Ιησούς υπηρετίνελα ι Ιεχωβάς επειδή ανταβά ισί ο σωστός. (Ιωάν. 8:28, 29· Αποκ. 4:11) Τζανέλα ότι ο Ιεχωβά ντινάς-αμέν ι ζωή, οτθάρ μπορίνασα τι ντας λέσκε μπέσα. Επίσης τζανέλα ότι Βοβ ντέλα-αμέν μπερεκέτι λατσσέ πράγματα. (Ψαλμ. 33:4· 36:9· Ιακ. 1:17) Ο Ιεχωβά βακερέλας πάντα ι αλήθεια κο Ιησούς ντα σο-ντα τθερέλα ο Ιησούς ντινάς-λες λέστε ο Ιεχωβά. (Ιωάν. 1:14) Ο Μπενγκ, οκιά μπάνταρ, αντάς ο μεριπέ. Ισί εκ ψεύτης σο ισί μπίτσαλε γιακχάκο ντα ντικχέλα σάντε πο νεαυτός. (Ιωάν. 8:44) Ο Ιησούς τζανέλας λατσσές ι Ιεχωβάς ντα τζανέλας λατσσές εμ ι Μπενγκές. Ποτές να μανγκλάς τι αβέλ σαρ ο Μπενγκ ντα τι τζαλ κόντρα κο Ιεχωβά.​—Φιλιπ. 2:5-8.

⁵ Εκ γιαβέρ λόγος σο τραμπιντάς ο Ιησούς τι υπηρετίνελ ι Ιεχωβάς ισί επειδή τζανέλας ο λατσσέ αποτελέσματα σο κα αβένας ανταλέσταρ. (Εβρ. 12:2) Τζανέλας ότι άμα κα ατσσόλας πιστός, κα αγιάνελας ο ναβ πι Νταντέσκο ντα κα πουτρέλας ο ντρομ για τι εξαφανίντιβελ η αμαρτία ντα ο μεριπέ.

ΣΟΣΚΕ Ο ΙΕΧΩΒΑ ΑΞΙΝΕΛΑ ΤΙ ΝΤΑΣ-ΛΕΣ ΛΑΤΡΕΙΑ

6, 7. (α) Σόσκε μπουτ τζενέ αντιβές να υπηρετίνενα ι Ιεχωβάς; (β) Σόσκε ο Ιεχωβά αξίνελα αμαρί λατρεία;

⁶ Μπουτ τζενέ αντιβές να υπηρετίνενα ι Ιεχωβάς επειδή να τζανένα λέσκε σουκάρ ιδιότητες ντα σαρέ ο σουκάρ πράγματα σο κερντάς λένγκε. Ασακέ τζενέ μοιάζενα ι τζενέντζαρ κι Αθήνα σο κερντάας λένγκε έργος ο Παύλος. Βον-ντα να τζανένας ι Ντεβλές.​—Πράξ. 17:19, 20, 30, 34.

⁷ Ο Παύλος εξηγιντάς ι τζενένγκε κι Αθήνα ότι ο αληθινός Ντεβέλ «ντέλα σαριλέντε ι ζωή ντα ι ανάσα ντα σαρέ ο πράγματα». Επίσης βακερντάς: «Λέσταρ τζουβντιάσα, πφιράσα ντα υπαρχίντιβασα». Ο Ντεβέλ ισί ο Δημιουργός σο «λατσσαρντάς εκχέ τζενέσταρ σαρέ ι τζενέν». Οτθάρ σάντε βοβ τθερέλα ο δικαίωμας τι λελ αμαρί λατρεία.​—Πράξ. 17:25, 26, 28.

8. Σο να κα κερέλ ποτές ο Ιεχωβά; Εξηγίνεν.

⁸ Επειδή ο Ιεχωβά ισί ο Δημιουργός ντα Οντουβά σο κυβερνίνελα ο σύμπαν, μπορίνελα τι κερέλ σο-ντα μανγκέλα. Άμα κα μανγκέλας, κα μπορίνελας τι κερέλας-αμέν με το ζόρι τι υπηρετίνας-λες. Όμως ο Ιεχωβά ποτές να κα κερέλ-λες ανταβά. Οκιά μπάνταρ, ντέλα-αμέν μπουτ αποδείξεις ότι βοβ υπαρχίντιβελα ντα ότι μανγκέλα ι κάθε εκχές αμένταρ μπουτ. Μανγκέλα καζόμ πο μπουτ τζενέ αβέλα-πες τι αβέν λέσκε αμαλά για πάντα. (1 Τιμ. 2:3, 4) Άκ’ σόσκε ο Ιεχωβά σικαβέλα αμένγκε σαρ τι σικλιαράς ι γιαβερέν για το λατσσέ πράγματα σο κα κερέλ σαρέ ι τζενένγκε ντα σαρ κα κερέλ-λεν ανταλά. (Ματθ. 10:11-13· 28:19, 20) Ντα ντέλα-αμέν ι κχανγκιρί, σο οτθέ μπορίνασα τι ντας-λες λατρεία ντα τι λας βοήθεια κατά πρεσβυτέρους σο μανγκένα-αμέν.​—Πράξ. 20:28.

9. Καλέ τροπόντζαρ σικαβέλα ο Ιεχωβά πι αγάπη σαρέ ι τζενένγκε;

⁹ Ο Ιεχωβά σικαβέλα πι αγάπη αντράλ οντουλένταρ σο κερέλα ατζέ-ντα οντουλένγκε σο να πακιάνα ότι υπαρχίντιβελα. Σκεφτίνεν ακαβά: Για χιλιάδες μπρεσά, μπουτ τζενέ αποφασιντέ τι κερέν οντουβά σο αμντίνενα βον ότι ισί σωστός ντα λάθος αντίς τι ντεν καν κο Ιεχωβά. Όμως, ο Ιεχωβά ντέλα-λεν λατσσιμάσαρ οντουλά σο χρειαζίντιβενα για τι τζουβντιόν ντα τι απολαμβάνεν ι ζωή. (Ματθ. 5:44, 45· Πράξ. 14:16, 17) Χάρη λέσταρ, μπορίνενα τι τθερέν αμαλέν, φαμιλί σο μανγκέλα-λεν ντα τσσαβέν. Μπορίνενα τι κερέν μπουτί ντα τι απολαμβάνεν πουμαρί ζωή. (Ψαλμ. 127:3· Εκκλ. 2:24) Σαρέ ανταλά σικαβένα ξεκάθαρα ότι αμαρό Ντατ σο ισί κο ουρανός μανγκέλα σαρέ ι τζενέν. (Έξοδ. 34:6) Ελάν ακανά τι ανάς αμαρέ γκοντιάτε σόσκε τραμπιντάμ τι υπηρετίνας ι Ιεχωβάς ντα σαρ βοβ ευλογίνελα οντουλέν σο τραμπίνενα τι υπηρετίνεν-λες.

ΣΟΣΚΕ ΤΡΑΜΠΙΝΑΣΑ ΤΙ ΥΠΗΡΕΤΙΝΑΣ Ι ΙΕΧΩΒΑΣ

10. (α) Σο τσσίντελα-αμέν πρώτα πρώτα τι υπηρετίνας ι Ιεχωβάς; (Ματθαίος 22:37) (β) Καλέ τροπόντζαρ κερέλα ο Ιεχωβά υπομονή τουμέντζαρ; (Ψαλμός 103:13, 14)

¹⁰ Σαρ ο Ιησούς, πρώτα πρώτα υπηρετίνασα ι Ιεχωβάς επειδή μανγκάσα-λες μπουτ. (Διαβάνεν Ματθαίος 22:37) Μανγκάσα τι τζας πασέ κο Ιεχωβά κάνα σικλιάσα καζόμ σουκάρ ιδιότητες τθερέλα. Για παράδειγμας, σκεφτίνεν καζόμ υπομονή κερέλα ο Ιεχωβά αμέντζαρ. Κάνα ο Ισραηλίτες να ντινέ καν λέστε, βοβ βακερντάς λένγκε: «Μολίναβα-τουμέν τι βουρτίνεν τουμαρέ γκεραλέ ντρομένταρ». (Ιερ. 18:11) Ο Ιεχωβά ντέλα-πες γκοντί ότι ισινάμ ατελείς, ότι ισινάμ τσικ. (Διαβάνεν Ψαλμός 103:13, 14) Κάνα σκεφτίνενα καζόμ φαρ συγχωριντάς-τουμέν ο Ιεχωβά, να κερέλα-τουμέν ανταβά τι μανγκέν τι υπηρετίνεν-λες για πάντα;

11. Καλά ισί μερικοί γιαβερά λόγοι σο τραμπίνασα τι υπηρετίνας αμαρέ Νταντές σο ισί κο ουρανός;

¹¹ Κάτι γιαβέρ σο τσσίντελα-αμέν τι υπηρετίνας ι Ιεχωβάς ισί ότι ανταβά ισί ο σωστός. (Ματθ. 4:10) Επίσης, τζανάσα ότι άμα κα ατσσάς αφοσιωμέ κο Ιεχωβά, κα αβέν-πες μπουτ λατσσέ πράγματα. Κάνα υπηρετίνασα πιστά ι Ντεβλές βοηθίνασα τι αγιάντιβελ ι Ιεχωβάσκο ναβ, σικαβάσα ότι ο Μπενγκ ισί εκ ψεύτης ντα κεράσα ο γκι αμαρέ Νταντέσκο. Ντα άμα τραμπίνασα τι υπηρετίνας ι Ιεχωβάς ακανά τθεράσα ι ευκαιρία τι υπηρετίνας-λες για πάντα!​—Ιωάν. 17:3.

12, 13. Σο σικλιάσα κατά Τζέιν ντα κατά Παμ;

¹² Ατζέ-ντα κάνα ισινάμ τερνέ, μπορίνασα τι σικλιάς τι μανγκάς ι Ιεχωβάς μπουτ ντα καζόμ τζάλα τι μπαριαράς αμαρί αγάπη λέσκε. Ντικχέν σο αβιλό-πες ντουέ πφενίντζαρ σο βακερένα λένγκε Τζέιν ντα Παμ.a Η Τζέιν ισινέ 11 μπρεσένγκι ντα η Παμ 10 μπρεσένγκι κάνα αρχισάλε τι κερέν μελέτη κατά Αγία Γραφή. Λένγκο ντατ ντα λένγκι ντάι να μανγκένας βον ο ίδιοι τι κερέν μελέτη. Όμως, βακερντέ λένγκε ότι κα μουκχένας-λεν τι κερέν μελέτη άμα κα τζάνας εμ λέντζαρ λένγκε κχανγκιριάτε. «Οντουλά σο σικλιαρντέ-μαν ο Μάρτυρες κατά Αγία Γραφή», βακερέλα η Τζέιν, «βοηθιντέ-μαν τι βακεράβ όχι κάνα ο γιαβερά τερνέ πιένενας-μαν τι λαβ ναρκωτικά ντα τι κεράβ λουμνιπέ».

¹³ Σοράν από μερικά μπρεσά, ο ντούι-ντα τσσαγιά μπολντιλέ. Πο σοράν, αρχισάλε τι κερέν σκαπανικός ντα φροντίνενας πουμαρέ νταντές ντα πουμαρέ νταγιά. Η Τζέιν βακερέλα σαρ νιωθίνελα σαρέ οντουλένγκε σο κερντάς ο Ιεχωβά λένγκε. Βόι βακερέλα: «Σικλιλόμ μπουτ λατσσές ότι ο Ιεχωβά φροντίνελα πι αμαλέν ντα σαρ βακερέλα κο 2 Τιμόθεο 2:19: “Ο Ιεχωβά τζανέλα οντουλέν σο ισί λέσκε”». Ισινάμ ντιπ σίγουροι ότι ο Ιεχωβά φροντίνελα οντουλέν σο μανγκένα-λες ντα υπηρετίνενα-λες!

14. Σαρ μπορίνασα οντουλέντζαρ σο βακεράσα ντα κεράσα τι βοηθίνας τι καθαρίντιβελ ι Ιεχωβάσκο ναβ; (Ντικχέν ο φωτογραφίες-ντα)

¹⁴ Μανγκάσα τι βοηθίνας τι καθαρίντιβελ ι Ιεχωβάσκο ναβ κατά μπέτι λάφια σο ασούντιβενα λέσκε. Σκεφτίνεν ακαβά: Τθερένα εκχέ αμαλές σο ισί λατσσό, ντέλα αντράλ πι γκίσταρ ντα συγχωρίνελα. Εκ ντιβές, ασουνένα εκχέ τζενές τι βακερέλ ότι τουμαρό αμάλ ισί πφιρνό ντα ψεύτης. Σο κα κερένας; Κα βακερένας αμέσως σο τζενό ισί μπαγιά. Αντικάς-ντα, κάνα ο τζενέ βακερένα μπέτι λάφια ι Ιεχωβάσκε, υπερασπίνασα-λες κάνα βακεράσα σο Ντεβέλ ισί μπαγιά. (Ψαλμ. 34:1· Ησ. 43:10) Σικαβάσα ότι μανγκάσα τι υπηρετίνας ι Ιεχωβάς σαρέ αμαρέ γκίσαρ αντράλ οντουλένταρ σο βακεράσα ντα κεράσα.

15. Καλά λατσσίματα τθερέλας ο Παύλος κάνα κερντάς μπαρέ αλλαγές πι ζωγιάτε; (Φιλιππησίους 3:7, 8)

¹⁵ Μανγκάσα τι κεράς αλλαγές αμαρέ ζωγιάτε για τι υπηρετίνας ι Ιεχωβάς αντικάς σαρ μανγκέλα βοβ ή για τι κεράς πο μπουτ πράγματα κι υπηρεσία λέσκι. Για παράδειγμας, ο απόστολος Παύλος τθερέλας εκ μπουτ σημαντική θέση αντρέ κι θρησκεία κι Ιουδαιόνγκι. Όμως μουκχλάς οντιά θρησκεία για τι αβέλ μαθητής ι Ιησούσκο ντα τι υπηρετίνελ ι Ιεχωβάς. (Γαλ. 1:14) Αντικάς, τθερέλας εκ μπουτ σουκάρ ζωή κι υπηρεσία κι Ιεχωβάσκι ντα ντιντιλί-λες η ευκαιρία τι κερέλ κουμάντος γιεκ ι Ιησούσαρ κο ουρανός. Ποτές να μετανιωσάλο σο λιντάς ι απόφαση τι υπηρετίνελ ι Ιεχωβάς. Ούτε αμέν κα μετανιώνας-λες ποτές!​—Διαβάνεν Φιλιππησίους 3:7, 8.

16. Σο σικλιάσα κατά Τζούλια; (Ντικχέν ο φωτογραφίες-ντα)

¹⁶ Άμα ο πο σημαντικός πράγμας αμαρέ ζωγιάτε ισί τι υπηρετίνας ι Ιεχωβάς, βοβ κα ευλογίνελ-αμέν ακανά ντα κο μέλλον. Σκεφτίνεν ι εμπειρία εκχέ πφενιάκι σο βακερένα λάκε Τζούλια. Χουρντιαρέλα μπερί η Τζούλια γκιλιαβέλας σε εκ χορωδία σο τθερέλας λάκι κχανγκιρί. Γκιλιαβέλας αζόμ λατσσές σο αρχισάλι τι κερέλ μαθήματα για τι αβέλ επαγγελματίας τραγουδίστρια κι όπερα. Μπουτ σουγκό η Τζούλια αβιλί διάσημη ντα κερέλας μπαρέ συναυλίες. Κάνα γκιλίας σε εκ μπαρό μουσικός σχολείος, εκ συμμαθητής αρχισάλο τι κερέλ λάκε λάφι ι Ντεβλέσκε. Εξηγιντάς ότι ο Ντεβέλ τθερέλα εκ ναβ, ντα ότι λέσκο ναβ ισί Ιεχωβά. Χάνικ βακίτι πο σοράν η Τζούλια αρχισάλι τι κερέλ μελέτη κατά Γραφή ντούι φορές κι εβδομάδα. Τελικά, τραμπιντάς τι ντελ πο σαάτι ντα πι ζορ για τι υπηρετίνελ ι Ιεχωβάς, αντίς τι αβέλ εκ τραγουδίστρια κι όπερα. Ανταγιά απόφαση να ισινέ εύκολη. Βόι βακερέλα: «Μπουτ τζενέ βακερένας μάνγκε ότι ισί ντινιλιπέ σο τσσιναντόμ τι αβάβ τραγουδίστρια για τι υπηρετίναβ ι Ιεχωβάς. Όμως με μανγκάβας τι χρησιμοποιήναβ μι ζωή για τι υπηρετίναβ καζόμ πο λατσσές αβέλας-πες ι Ιεχωβάς». Σαρ νιωθίνελα ακανά για την απόφαση σο λιντάας πριν από 30 μπρεσά; «Τθεράβα ειρήνη αντρέ μι γκοντιάτε ντα ισινόμ σίγουρη ότι ο Ιεχωβά κα τσαλιαρέλ σαρέ μο επιθυμίες κο μέλλον».​—Ψαλμ. 145:16.

ΣΥΝΕΧΙΝΕΝ ΤΙ ΥΠΗΡΕΤΙΝΕΝ Ι ΙΕΧΩΒΑΣ

17. Σαρ επηρεάνενα ο ντιβεσά σο τζουβντιάσα οντουλέν σο τραμπιντέ τι υπηρετίνεν ι Ιεχωβάς ντα οντουλέν σο να τραμπιντέ-λες ανταβά ατζέκ;

¹⁷ Τζουβντιάσα μπουτ πασέ κο τέλος ανταλέ ντουνιάσκο. Ο απόστολος Παύλος γραφιντάς: «Επειδή “μπουτ χάνικ καιρός ατσσιλό”, ντα “οντουβά σο αβέλα κα ερεσέλ ντα να κα αργίνελ”». (Εβρ. 10:37) Σαρ επηρεάνελα-αμέν ανταβά; Να ατσσιλό μπουτ βακίτι ατζέκ ι τζενένγκε για τι τραμπίνεν τι υπηρετίνεν ι Ιεχωβάς. (1 Κορ. 7:29) Ντα άμα τραμπιντάμ ήδη τι υπηρετίνας ι Ιεχωβάς, τζανάσα ότι παρόλο σο κα νακχάς δοκιμασίες, ανταβά κα αβέλ για «μπουτ χάνικ καιρός».

18. Σο μανγκέλα ο Ιησούς ντα ο Ιεχωβά τι κεράς;

¹⁸ Ο Ιησούς βακερντάς πι μαθητένγκε όχι απλά τι αρχίνεν τι ακολουθίνεν-λες, αλλά επίσης τι συνεχίνεν τι κερέν-λες ανταβά. (Ματθ. 16:24) Άρα άμα υπηρετίνασα ι Ιεχωβάς μπουτ μπρεσά, πρέπει τι αβάς αποφασισμέ μα τι τσσιναβάς τι κεράς-λες ανταβά. Πρέπει τι μαράς-αμέν μπουτ για τι συνεχίνας τι υπηρετίνας ι Ιεχωβάς. Μπορεί μα τι αβέλ εύκολος ανταβά, όμως μπορίνασα τι αβάς χαρούμενοι ντα τι απολαμβάνας μπουτ ευλογίες κάνα υπηρετίνασα-λες ατζέ-ντα ακανά!​—Ψαλμ. 35:27.

19. Σο σικλιάσα κατά Τζιν;

¹⁹ Μερικοί νιωθίνενα ότι άμα κα υπηρετίνεν ι Ιεχωβάς, να κα μπορίνεν τι απολαμβάνεν πουμαρί ζωή. Άμα ισινάν τερνό, μήπως νιωθίνεσα ότι ισί μπουτ δύσκολος τι υπηρετίνες ι Ιεχωβάς; Εκ τερνό πφραλ, ο Τζιν, βακερέλα: «Νιωθίναβας ότι να μπορίναβας τι νακχάβ λατσσές επειδή ισινόμας Μάρτυρας ι Ιεχωβάσκο. Ντικχίντιβελα ότι μπουτ τσσαβέ σο μπαριλόμ λέντζαρ απολαμβάνενας πράγματα σαρ ο πάρτι, ο ραντεβού ή κχελένας παιχνίδια σο τθερένας βία, ενώ με νακχάβας μο σαάτι κο συναθροίσεις ντα κο έργος». Σαρ επηρεαντάς ανταβά τρόπος σκέψης τον Τζιν; «Αρχισάλομ τι κεράβ κάποια μπέτι πράγματα σο κερένας ο γιαβερά τερνέ», βακερέλα ο Τζιν, «ντα νακχάβας λατσσές για χάνικ. Αλλά να ισινόμας μπαγιά ευτυχισμέ. Αρχισάλομ τι σκεφτίναβ ο λατσσιπέ σο τθεράβας κάνα ντάβας καν οντουλέντε σο βακερέλας η Γραφή ντα αποφασιντόμ τι υπηρετίναβ ι Ιεχωβάς σαρέ μι γκίσαρ. Από αζομάν ντικχίντιβελα ότι ο Ιεχωβά απαντίνελα κι κάθε προσευχή σο κεράβα».

20. Καγιά πρέπει τι αβέλ αμαρί απόφαση;

²⁰ Εκ ψαλμωδός γκιλιαντάς κο Ιεχωβά: «Ευτυχισμέ ισί οντουβά σο τραμπίνεσα ντα ανέσα πασέ για τι μπεσέλ κο αυλές τιρέ». (Ψαλμ. 65:4) Μακάρι τι αβάς αποφασισμέ τι συνεχίνας τι υπηρετίνας ι Ιεχωβάς. Σαρ ο Ιησούς του Ναυή, βακεράσα: «Με ντα μι φαμιλί κα πακιάς σάντε κο Ιεχωβά».​—Ιησ. Ναυή 24:15.