Ο Τζενέ σο Διαβάνενα Πουτσένα

Ο τζενό σο γραφιντάς ο Παροιμίες 30:18, 19 βακερντάς ότι «ο ντρομ εκχέ μουρσέσκο εκχέ τζουβλιάσαρ» ισινέ κάτι σο “να λέλας-λες λέσκι γκοντί”. Σο μανγκέλας τι βακερέλ;

Μπουτ τζενέ ρόντενα σο μανγκένα τι βακερέν ανταλά λάφια, ατζέ-ντα μερικοί σο τζανένα μπουτ πράγματα ι Γραφιάκε. Ο εδάφια Παροιμίες 30:18, 19 κι Μετάφραση Νεβέ Ντουνιάσκι βακερένα: «Υπαρχίντιβενα τριν πράγματα σο να λέλα-λεν μι γκοντί, ντα σταρ πράγματα σο ναστί αγαβάβα: ο ντρομ ι αετόσκο κο ουρανός, ο ντρομ ι σαπέσκο οπράλ κο βράχος, ο ντρομ ι καραβίσκο αντρέ κι ντεριάβ ντα ο ντρομ εκχέ μουρσέσκο εκχέ τζουβλιάσαρ».

Ανγκλέ αγαβάας ότι ο λάφι «ο ντρομ εκχέ μουρσέσκο εκχέ τζουβλιάσαρ» σικαβέλας κάτι μπέτι. Σόσκε; Γιαβερά εδάφια ανταλέ κεφαλαιόστε σικαβένα μπέτι πράγματα σο να βακερένα ποτές «ερεσέλα». (Παρ. 30:15, 16) Ντα ο εδάφιος 20 κερέλα λάφι “εκχέ λουμνέ τζουβλιάκε” σο βακερέλα ότι να κερντάς τίποτα μπέτι. Οτθάρ, πακιάας ότι ο εδάφιος βακερέλα οντουλένγκε σο κερένα κάτι χωρίς τι σικλιόν-λες ο γιαβερά. Σκεφτίναας ότι σαρ εκ αετός πετάνελα οπρέ κο ουρανός, ή εκ σαπ τσσίντελα-πες κο βράχος ή εκ καράβι νασέλα αντρέ κι ντεριάβ ντα να μουκχένα καέκ σημάδι κατάρ νακχλέ, αντικάς εκ μουρς-ντα μπορεί τι κερέλ κάτι χωρίς τι μουκχέλ καέκ σημάδι για τι αγαβέν-λες. Οτθάρ, βακεράας ότι ο λάφι «ο ντρομ εκχέ μουρσέσκο εκχέ τζουβλιάσαρ» βακέρντιβελας εκχέ μπέτι πραγμάσκε, δηλαδή εκχέ τερνέ μουρσέσκε σο χουχαβέλα εκχέ τερνέ τζουβλιά για τι σοβέλ λέσαρ.

Όμως, σαρ ντικχίντιβελα, τθεράσα λόγους τι πακιάς ότι ανταλά εδάφια κερένα λάφι για κάτι λατσσό. Ο τζενό σο γραφιντάς-λεν απλά κερέλας λάφι μερικέ πραγματένγκε σο κερένας-λες τι σαστίνελ.

Ο πουρανό εβραϊκός κείμενος-ντα σικαβέλα ότι ανταλά εδάφια μανγκένα τι σικαβέν κάτι λατσσό. Σαρ βακερέλα ο Θεολογικός Λεξικός της Παλαιάς Διαθήκης (Theological Lexicon of the Old Testament), ο εβραϊκός λάφι σο μεταφράντιβελα «να λέλα-λεν μι γκοντί» κο Παροιμίες 30:18 «σικαβέλα κάτι σο εκχέ τζενέσκε . . . ντικχίντιβελα περίεργος, ντικχίντιβελα ότι να αβέλα-πες ή ατζέ-ντα κερέλα-λες τι ατσσόλ πουταρντέ μόσαρ».

Ο καθηγητής-ντα Κρόφορντ Χ. Τόι κο Πανεπιστήμιος Χάρβαρντ κι Αμερική βακερντάς ότι ανταλά εδάφια να κερένα λάφι για κάτι μπέτι. Βακερντάς: «Ο τζενό σο γραφιντάς-λεν μανγκέλα τι σικαβέλ καζόμ σουκάρ ισί ανταλά πράγματα σο βακερέλα».

Οτθάρ, ντικχίντιβελα λογικός τι πακιάς ότι ο λάφια κο Παροιμίες 30:18, 19 βακέρντιβενα πραγματένγκε σο κερένα-αμέν τι σαστίνας ντα μπορεί ατζέ-ντα μα τι μπορίνας τι αγαβάς-λεν. Σαρ ο τζενό σο γραφιντάς ανταλά λάφια ι Γραφιάκε, αντικάς αμέν-ντα σαστίνασα κάνα ντικχάσα σαρ εκ αετός μπορίνελα τι πετάνελ αζόμ οπρέ, σαρ εκ σαπ σο να τθερέλα πιντρέ μπορίνελα τι τσσίντελ-πες κο βράχος, σαρ εκ πφαρό καράβι μπορίνελα τι κερέλ ταξίδι κι ντεριάβ ντα σαρ εκ τερνό μουρς ντα εκ τερνί τζουβέλ μπορίνενα τι τσσουβέν μεράκι ο εκ ι γιαβερέσκε ντα τι τζουβντιόν γιεκ ντα ευτυχισμέ.