Ο Τζενέ σο Διαβάνενα Πουτσένα
Καγιά «σκέψη» κα τσσουβέλ μπουτ σουγκό ο Ιεχωβά κο γκιά οντουλένγκε σο κυβερνίνενα;
Ο εδάφια Αποκάλυψη 17:16, 17 βακερένα σο κα αβέλ-πες κάνα κα αρχίνελ η μπαρί στεναχώρια: «Ο 10 σινγκά σο ντικχλάν, ντα ο θηρίος, κα μισίνεν ι λουμνιά ντα κα κερέν-λα τι ατσσόλ κορκορί ντα νανγκί, ντα κα χαν λάκε μασά ντα κα πφαμπαρέν-λα σαρί γιακάσαρ. Επειδή ο Ντεβέλ τσσουντάς λένγκε γκίστε τι κερέν λέσκι σκέψη, βα, τι κερέν ι ίδια σκέψη σο τθερένα βον ντα τι ντεν πουμαρί βασιλεία κο θηρίος». Ανγκλέ, αμαρέ έντυπα βακερένας ότι η «σκέψη» σο κα τσσουβέλ μπουτ σουγκό ο Ιεχωβά κο γκιά οντουλένγκε σο κυβερνίνενα ισί τι καταστραφίνεν ι ψεύτικη θρησκεία.
Όμως ακανά αγαβάσα-λες διαφορετικά ανταβά. Η «σκέψη» σο κα τσσουβέλ ο Ιεχωβά κο κυβερνήσεις μπουτ σουγκό ισί «τι ντεν πουμαρί βασιλεία κο θηρίος». Για τι αγαβάς πο λατσσές σαρ κα νικιόλ μπαγιά ανταβά, κα απαντίνας κο ερωτήσεις σο ισί πο τελέ.
Κον ισί οντουλά σο βακέρντιβενα κι προφητεία; “Η λουμνί” σο βακέρντιβελα εμ-ντα «Βαβυλώνα η Μπαρί» μανγκέλα τι σικαβέλ σαρέ ο ψεύτικες θρησκείες ι ντουνιάσκε. Ο «λολό θηρίος» σικαβέλα εκ οργάνωση σο μανγκέλα τι ανέλ ειρήνη σαρό κο ντουνιάς. Ανταγιά οργάνωση αρχισάλι κο 1919 ντα αζομάν βακέρντιβελας Κοινωνία των Εθνών. Όμως, αντιβές ισί ο Ηνωμένα Έθνη. (Αποκ. 17:3-5) Ο «10 σινγκά» μανγκένα τι σικαβέν σαρέ ο κυβερνήσεις σο τσσίντενα κατά θηρίος.
Καγιά σχέση τθερέλα η λουμνί με το λολό θηρίος; Η λουμνί “μπεσέλα” οπράλ κο θηρίος. Ανταβά μανγκέλα τι σικαβέλ ότι υποστηρίνελα-λες ντα προσπαθίνελα τι κερέλ-λες κουμάντος.
Σο κα αβέλ-πες κι λουμνί; Ο θηρίος ντα ο 10 σινγκά σο υποστηρίνενα-λα «κα μισίνεν ι λουμνιά» αζόμ μπουτ σο κα λεν σαρό λάκο χουλανιπέ ντα κα σικαβέν κο γιαβερά καζόμ γκεραλί ισί. Ντα αζομάν κα καταστραφίνεν-λα σαρ βακερντάς ο Ιεχωβά ότι κα αβέλ-πες. (Αποκ. 17:1· 18:8) Αντικάς κα τσσιναβέν τι υπαρχίντιβεν σαρέ ο ψεύτικες θρησκείες. Όμως, πριν τι αβέλ-πες ανταβά, ο Ιεχωβά κα τσσουβέλ ο τθεμά τι κερέν κάτι σο να αβιλό-πες ποτές ξανά.
Σο κα τσσουβέλ ο Ιεχωβά τι κερέν ο τθεμά; Κα τσσουβέλ κο 10 σινγκά “πι σκέψη”, δηλαδή τι “ντεν ι ζορ ντα ο δικαίωμας σο τθερένα τι κερέν κουμάντος κο [λολό] θηρίος”, δηλαδή κο Ηνωμένα Έθνη. (Αποκ. 17:13) Ανταβά μανγκέλα τι βακερέλ ότι να κα σκεφτίνεν βον ο ίδιοι ο κυβερνήσεις τι ντεν κο θηρίος ι ζορ ντα ο δικαίωμας σο τθερένα τι κερέν κουμάντος! Η προφητεία σικαβέλα ότι ο ίδιος ο Ντεβέλ κα επηρεάνελ-λεν τι κερέν-λες ανταβά. (Παρ. 21:1· ντικχέν Ησαΐας 44:28) Μήπως ανταγιά αλλαγή κα αβέλ-πες σιγά σιγά; Όχι! Ανταγιά αλλαγή κα αβέλ-πες ξαφνικά. Αζομάν ο θηρίος κα καταστραφίνελ ντιπ σαρέ ο ψεύτικες θρησκείες.
Σο μπορίνασα τι μπεκλεντίνας ότι κα αβέλ-πες κο μέλλον; Να χρειαζίντιβελα τι ρόντας κο ειδήσεις για τι ντικχάς άμα ο κυβερνήσεις χάνικ χάνικ τσσίντενα κατά Ηνωμένα Έθνη. Ανταβά σο μπορίνασα τι μπεκλεντίνας ισί ότι ξαφνικά, ο Ιεχωβά κα κερέλ ο κυβερνήσεις τι ντεν πουμαρί ζορ κο θηρίος. Κάνα κα αβέλ-πες ανταβά, κα τζανάς ότι αβιλό ο σαάτι τι αρχίνελ η μπαρί στεναχώρια. Οτθάρ, «τι ατσσάς τζανγκαντέ ντα γκοντιαβέρ» σόσκε ανταλά ξαφνικές αλλαγές κα αβέν-πες μπουτ σουγκό!—1 Θεσ. 5:6.