Μα Τσσιναβέν τι Μανγκέν Αντράλ Τουμαρέ Γκίσταρ ι Γιαβερέν

1. Σο σικαβέλα ότι νανέ μπουτ αγάπη αντιβές;

Η ΑΓΙΑ ΓΡΑΦΗ βακερντάς ότι κο τελευταία ντιβεσά ο τζενέ “να κα τθερένας ιτς αγάπη”. (2 Τιμ. 3:1, 3) Ντικχάσα ανταγιά προφητεία τι νικιόλ μπαγιά αμαρέ ντιβεσέντε. Για παράδειγμας, μπουτ αντρόγυνα χωρίνενα. Ο ντατ ντα η ντάι ισί χολιαμέ ο εκ ι γιαβερέσκε, ντα ο τσσαβέ νιωθίνενα ότι να μανγκένα-λεν. Ατζέ-ντα ο φαμιλιά σο μπεσένα κο ίδιος κχερ μπορεί τι αβέν σαρ ξένοι. «Η ντάι, ο ντατ ντα ο τσσαβέ να κερένα λάφι ο εκ ι γιαβερέσαρ ντα ο πιο μπουτ σαάτι ισί κο υπολογιστής, κο τάμπλετ, κο κινητά ή κο βιντεοπαιχνίδια», βακερέλα εκ τζενό σο ντέλα συμβουλές κο φαμιλιά. «Παρόλο σο τζουβντιόνα κο ίδιος κχερ, να τζανένα-πες λατσσές».

2, 3. (α) Κας πρέπει τι μανγκάς αντράλ αμαρέ γκίσταρ σαρ βακερέλα ο εδάφιος Ρωμαίους 12:​10; (β) Σο κα ντικχάς ανταλέ μαθημάστε;

² Αμέν να μανγκάσα τι αβάς σαρ ο τζενέ ανταλέ ντουνιάστε σο να σικαβένα αγάπη. (Ρωμ. 12:2) Οτθάρ, χρειαζίντιβελα τι μανγκάς αντράλ αμαρέ γκίσταρ, όχι σάντε αμαρί φαμιλί, αλλά εμ αμαρέ πφραλέν ντα αμαρέ πφενίν κι κχανγκιρί. (Διαβάνεν Ρωμαίους 12:​10) Σο μανγκέλα τι βακερέλ ο λάφι τι «μανγκέν αντράλ τουμαρέ γκίσταρ»; Μανγκέλα τι σικαβέλ ι μπαρί αγάπη σο τθερένα αντρέ κι φαμιλί ο εκ ι γιαβερέσκε. Ασακί αγάπη πρέπει τι τθεράς αμαρέ πφραλένγκε ντα αμαρέ πφενίνγκε κι κχανγκιρί. Κάνα μανγκάσα-λεν αντράλ αμαρέ γκίσταρ, ατσσικιαράσα ι ενότητα σο ισί μπουτ σημαντική για τι ντας λατρεία ι Ιεχωβάς.​—Μιχ. 2:12.

³ Για τι ντικχάς σαρ τι σικαβάς ότι μανγκάσα αντράλ αμαρέ γκίσταρ ι γιαβερέν, κα ανάς αμαρέ γκοντιάτε μερικά παραδείγματα κατά Γραφή.

ΙΕΧΩΒΑ​—«ΠΦΕΡΝΤΟ ΑΦΟΣΙΩΜΕ ΑΓΑΠΗ»

4. Σαρ βοηθίνελα-αμέν ο εδάφιος Έξοδος 34:6 τι εκτιμίνας ι μπαρί αγάπη ι Ιεχωβάσκι;

⁴ Η Γραφή σικαβέλα αμένγκε ο σουκάρ ιδιότητες ι Ιεχωβάσκε. Για παράδειγμας, βακερέλα ότι «ο Ντεβέλ ισί αγάπη». (1 Ιωάν. 4:8) Κάνα σικλιάσα-λες ανταβά ι Ιεχωβάσκε, μανγκάσα τι αβάς πασέ λέστε. Αλλά η Γραφή βακερέλα επίσης ότι ο Ιεχωβά ισί «πφερντό αφοσιωμέ αγάπη». (Διαβάνεν Έξοδος 34:​6) Καζόμ σουκάρ λαφίσαρ σικαβέλα ι μπαρί αγάπη σο τθερέλα ο Ιεχωβά αμένγκε!

5. Σαρ σικαβέλα έλεος ο Ιεχωβά, ντα σαρ μπορίνασα τι μοιάζας λέστε;

⁵ Ο εδάφιος Έξοδος 34:6 βακερέλα ότι η αγάπη ι Ιεχωβάσκι ντα εκ γιαβέρ ιδιότητα, ο έλεος λέσκο, ταρτίνελα-αμέν πασέ λέστε. (Ιακ. 5:​11) Εκ τρόπος σο σικαβέλα ο Ιεχωβά έλεος ισί ότι συγχωρίνελα αμαρέ λάθη. (Ψαλμ. 51:1) Κι Γραφή, ο έλεος μανγκέλα τι βακερέλ πιο μπουτ πράγματα κατά συγχώρηση. Ο έλεος ισί εκ ζουρανό συναίσθημας σο νικιόλα αντράλ αμαρέ γκίσταρ κάνα ντικχάσα εκχέ τζενές σο νακχέλα στεναχώριες ντα μανγκάσα τι βοηθίνας-λες. Ο Ιεχωβά βακερέλα ότι μανγκέλα τι βοηθίνελ-αμέν πιο μπουτ ατζέ-ντα εκχέ νταγιάταρ σο μανγκέλα πι τσσαβές. (Ησ. 49:​15) Κάνα τθεράσα εκ στεναχώρια, ο έλεος ι Ιεχωβάσκο τσσίντελα-λες τι βοηθίνελ-αμέν. (Ψαλμ. 37:​39· 1 Κορ. 10:​13) Αμέν σικαβάσα έλεος αμαρέ πφραλένγκε ντα πφενίνγκε κάνα συγχωρίνασα-λεν ντα να ατσσικιαράσα χολί κάνα πφανγκένα αμαρό γκι. (Εφεσ. 4:​32) Εκ γιαβέρ σημαντικός τρόπος σο μπορίνασα τι σικαβάς έλεος ισί τι βοηθίνας-λεν τι ντεν-λεν πέρα κο δυσκολίες. Κάνα η αγάπη τσσίντελα-αμέν τι σικαβάς έλεος κο γιαβερά, μοιάζασα κο Ιεχωβά, σο μανγκέλα-αμέν αντράλ πι γκίσταρ πιο μπουτ σαριλένταρ.​—Εφεσ. 5:1.

ΙΩΝΑΘΑΝ ΝΤΑ ΔΑΒΙΔ ​—«ΑΒΙΛΕ ΜΠΟΥΤ ΛΑΤΣΣΕ ΑΜΑΛΑ»

6. Σαρ σικαβέλας ο Ιωνάθαν ντα ο Δαβίδ ότι μανγκένας αντράλ πουμαρέ γκίσταρ ο εκ ι γιαβερές;

⁶ Η Γραφή κερέλα λάφι τζενένγκε σο ισινέ ατελείς ντα μανγκένας αντράλ πουμαρέ γκίσταρ ο εκ ι γιαβερές. Ντικχέν ο παράδειγμας σο μουκχλάς ο Ιωνάθαν ντα ο Δαβίδ. Η Γραφή βακερέλα: «Ο Ιωνάθαν ντα ο Δαβίδ αβιλέ μπουτ λατσσέ αμαλά, ντα ο Ιωνάθαν μανγκλάς-λες σαρ πο νεαυτός». (1 Σαμ. 18:1) Ο Ιεχωβά τραμπιντάας ι Δαβιδίς τι αβέλ βασιλιάς σοράν κατά Σαούλ. Σοράν ανταλέσταρ, ο Σαούλ ζηλίνελας ι Δαβιδίς ντα μανγκέλας τι μουνταρέλ-λες. Αλλά λέσκο τσσαβό, ο Ιωνάθαν, να τσσιντιντάς πι νταντέσταρ κο προσπάθειες σο κερέλας για τι μουνταρέλ-λες. Ο Ιωνάθαν ντα ο Δαβίδ ντινέ πουμαρό λάφι τι ατσσόν αμαλά ντα τι βοηθίνεν πάντα ο εκ ι γιαβερές.​—1 Σαμ. 20:42.

7. Σο κα μπορίνελας τι χαλαβέλ ι φιλία σο τθερέλας ο Ιωνάθαν ι Δαβιδίσαρ;

⁷ Άμα κα σκεφτίνας καζόμ μπουτ πράγματα κα μπορίνενας τι χαλαβέν ι φιλία σο τθερέλας ο Ιωνάθαν ι Δαβιδίσαρ, κερέλα αμένγκε μπαρί εντύπωση σο ισινέ αζόμ λατσσέ αμαλά. Για παράδειγμας, ο Ιωνάθαν νακχέλας ι Δαβιδίς περίπου 30 μπρεσά. Κα μπορίνελας τι σκεφτίνελ ότι να αβέλα-πες τι ταιριάνελ εκχέ τζενέσαρ σο ισινέ μπουτ πιο χουρντό λέσταρ ντα να νακχλάας αζόμ μπουτ πράγματα πι ζωγιάτε. Όμως, ο Ιωνάθαν να σκεφτίνελας αντικάς ντα τθερέλας μπαρό σεβασμός ι Δαβιδίσκε.

8. Σόσκε πακιάνα ότι ο Ιωνάθαν ισινέ λατσσό αμάλ ι Δαβιδίσαρ;

⁸ Ο Ιωνάθαν κα μπορίνελας τι ζηλίνελ ι Δαβιδίς. Σαρ τσσαβό ι βασιλιάσκο, κα μπορίνελας τι βακερέλ ότι πρέπει βοβ τι αβέλ βασιλιάς σοράν πι νταντέσταρ. (1 Σαμ. 20:​31) Αλλά ο Ιωνάθαν ατσσιλό ταπεινός ντα αφοσιωμέ κο Ιεχωβά. Τσσιντιντάς σαρέ πι γκίσαρ οντουλέσταρ σο τραμπιντάς ο Ιεχωβά τι αβέλ βασιλιάς, κατά Δαβίδ. Ντα ισινέ αφοσιωμέ κο Δαβίδ παρόλο σο ανταβά χολιασκιαρέλας λέσκε νταντές.​—1 Σαμ. 20:​32-34.

9. Ντικχέλας ο Ιωνάθαν ι Δαβιδίς σαρ ντουσμάνι; Εξηγίνεν.

⁹ Ο Ιωνάθαν μανγκέλας αντράλ πι γκίσταρ ι Δαβιδίς, οντουλέσκε να ντικχέλας-λες σαρ ντουσμάνι. Ο Ιωνάθαν τζανέλας τι χρησιμοποιήνελ ο τόξος μπουτ λατσσές ντα ισινέ μπίνταρανο κο τζένγκια. Σαρέ τζανένας ότι βοβ ντα λέσκο ντατ, ο Σαούλ, «τσσίντενας πιο σουγκό κατά αετοί» ντα «ισινέ πιο ζουρανέ κατά λιοντάρια». (2 Σαμ. 1:​22, 23) Οτθάρ, ο Ιωνάθαν κα μπορίνελας τι ισαρέλ-πες ι μπαρέ πραγματένγκε σο κερέλας. Αλλά να προσπαθίνελας τι αβέλ πιο λατσσό κατά Δαβίδ ντα να ζηλίνελας-λες. Οκιά μπάνταρ, ισαρέλας ι Δαβιδίς σο ισινέ μπίνταρανο ντα ντέλας μπουτ μπέσα κο Ιεχωβά. Κι πραγματικότητα, ο Ιωνάθαν αρχισάλο τι μανγκέλ ι Δαβιδίς σαρ μανγκέλας πο νεαυτός κάνα ο Δαβίδ μουνταρντάς τον Γολιάθ. Σαρ μπορίνασα αμέν-ντα τι μανγκάς αντράλ αμαρέ γκίσταρ αμαρέ πφραλέν ντα πφενίν;

ΣΑΡ ΚΑ ΣΙΚΑΒΑΣ ΑΝΤΙΒΕΣ ΟΤΙ ΜΑΝΓΚΑΣΑ ΑΝΤΡΑΛ ΑΜΑΡΕ ΓΚΙΣΤΑΡ Ι ΓΙΑΒΕΡΕΝ;

10. Σο μανγκέλα τι βακερέλ τι “μανγκάς μπουτ ο εκ ι γιαβερές αντράλ αμαρέ γκίσταρ”;

¹⁰ Η Γραφή βακερέλα αμένγκε τι “μανγκάς μπουτ ο εκ ι γιαβερές αντράλ αμαρέ γκίσταρ”. (1 Πέτρ. 1:​22) Ο Ιεχωβά ντέλα-αμέν ο παράδειγμας. Λέσκι αγάπη ισί αζόμ μπαρί σο, άμα ισινάμ αφοσιωμέ λέστε, ποτές να κα τσσιναβέλ τι μανγκέλ-αμέν. (Ρωμ. 8:​38, 39) Ο λάφι «μπουτ» ανταλέ εδαφιόστε μανγκέλα τι βακερέλ ότι εκ τζενό κερέλα σο νακχέλα λέσκε βαστένταρ για τι σικαβέλ αγάπη. Ισί φαρ σο πρέπει τι μαράς-αμέν τι σικαβάς αγάπη αμαρέ πφραλένγκε ντα πφενίνγκε. Κάνα ο γιαβερά πφανγκένα αμαρό γκι, χρειαζίντιβελα τι “νταϊντίνας ο εκ ι γιαβερές με αγάπη, ντα τι κεράς μπαρέ προσπάθειες για τι ατσσικιαράς ι ενότητα ι πνευμάσκι με την ειρήνη σο κερέλα-αμέν τι αβάς γιεκ”. (Εφεσ. 4:​1-3) Άμα μαράσα-αμέν τι ατσσικιαράς ι «ειρήνη σο κερέλα-αμέν τι αβάς γιεκ», να κα ντικχάς ο λάθη αμαρέ πφραλένγκε. Κα κεράς σο νακχέλα αμαρέ βαστένταρ για τι ντικχάς αμαρέ πφραλέν αντικάς σαρ ντικχέλα-λεν ο Ιεχωβά.​—1 Σαμ. 16:7· Ψαλμ. 130:3.

11. Σόσκε μπορεί τι δυσκολίντιβασα μπάζιμα τι μανγκάς αντράλ αμαρέ γκίσταρ αμαρέ πφραλέν ντα πφενίν;

¹¹ Νανέ πάντα εύκολος τι μανγκάς αντράλ αμαρέ γκίσταρ αμαρέ πφραλέν ντα πφενίν, ντα ατζέ πιο μπουτ κάνα τζανάσα λένγκε λάθη. Ντικχίντιβελα ότι ανταβά δυσκολίνελας μερικέ Χριστιανόν κο πρώτος αιώνας. Για παράδειγμας, η Ευοδία ντα η Συντύχη μάλλον να τθερένας πρόβλημας τι κερέν μπουτί «γιεκ [ι Παυλόσαρ] ι λατσσέ αμπερίνγκε». Αλλά δυσκολίντιβενας τι τζαν-λεν λατσσές η εκ ι γιαβεράσαρ. Οτθάρ, ο Παύλος βακερντάς λένγκε «τι σκεφτίνεν με το ίδιος τρόπος ενώ υπηρετίνενα ι Κυριός».​—Φιλιπ. 4:2, 3.

12. Σαρ μπορίνασα τι μανγκάς αντράλ αμαρέ γκίσταρ αμαρέ πφραλέν ντα πφενίν;

¹² Σαρ μπορίνασα αντιβές τι μανγκάς αντράλ αμαρέ γκίσταρ αμαρέ πφραλέν ντα πφενίν; Κάνα σικλιάσα πιο λατσσές αμαρέ πφραλέν, μπορεί τι αβέλ πιο εύκολος τι αγαβάς-λεν ντα τι μανγκάς-λεν ατζέ πιο μπουτ. Μπορίνασα τι αβάς λατσσέ αμαλά λέντζαρ ατζέ-ντα άμα ισί πιο χουρντέ ή πιο μπαρέ αμένταρ ή ισί γιαβερτθάρ. Ντεν-τουμέν γκοντί ότι ο Ιωνάθαν νακχέλας ι Δαβιδίς 30 μπρεσά, αλλά αβιλό λέσκο λατσσό αμάλ. Κα μπορίνενας τουμέν-ντα τι αβέν λατσσέ αμαλά εκχέσαρ σο ισί πιο μπαρό ή πιο χουρντό τουμένταρ; Αντικάς, κα σικαβέν ότι “μανγκένα σαρέ ι πφραλέν”.​—1 Πέτρ. 2:17.

13. Σόσκε μπορεί μα τι αβάς λατσσέ αμαλά σαριλέντζαρ κι κχανγκιρί;

¹³ Επειδή μανγκάσα αντράλ αμαρέ γκίσταρ ι πφραλέν ντα ι πφενίν, μήπως ανταβά μανγκέλα τι βακερέλ ότι πρέπει τι αβάς λατσσέ αμαλά σαριλέντζαρ κι κχανγκιρί; Νάα, ανταβά να αβέλα-πες. Νανέ λάθος τι νιωθίνας πιο πασέ μερικέ τζενέντε επειδή μπεϊντίνασα ο ίδια πράγματα. Ο Ιησούς βακερντάς ότι ισινέ «αμαλά» σαρέ πι μαθητέντζαρ, αλλά νιωθίνελας πιο πασέ κο Ιωάννης. (Ιωάν. 13:​23· 15:​15· 20:2) Όμως, να τσσουβέλας ι Ιωαννής πιο οπρέ κατά γιαβερά. Για παράδειγμας, κάνα ο Ιωάννης ντα λέσκο πφραλ ο Ιάκωβος μανγκλέ σημαντικές θέσεις κι Βασιλεία κι Ντεβλέσκι, ο Ιησούς βακερντάς λένγκε: «Νανέ μιρί μπουτί τι βακεράβ κον κα μπεσέλ δεξιά ντα αριστερά μάνταρ». (Μάρκ. 10:​35-40) Σαρ ο Ιησούς, αμέν-ντα δεν πρέπει τι τσσουβάς αμαρέ αμαλέν πιο οπρέ κατά γιαβερά τζενέ. (Ιακ. 2:3, 4) Ανταβά κα ανέλας διχόνοια​—κάτι σο δεν πρέπει τι αβέλ αντρέ κι κχανγκιρί.​—Ιούδα 17-19.

14. Σαρ βοηθίνελα-αμέν ο εδάφιος Φιλιππησίους 2:3 μα τι προσπαθίνας τι αβάς πιο λατσσέ κατά γιαβερά κι κχανγκιρί;

¹⁴ Κάνα μανγκάσα αντράλ αμαρέ γκίσταρ ο εκ ι γιαβερές, να προσπαθίνασα τι αβάς πιο λατσσέ κατά γιαβερά κι κχανγκιρί. Ντεν-τουμέν γκοντί ότι ο Ιωνάθαν να ζηλίνελας ι Δαβιδίς, ντα να προσπαθιντάς τι αβέλ βασιλιάς αντίς λέσκε. Σαρέ μπορίνασα τι μοιάζας λέστε. Μα ζηλίνεν τουμαρέ πφραλέν επειδή ισί λατσσέ μερικέ πραγματέντε, «αλλά με ταπεινότητα τι πακιάν ότι ο γιαβερά ισί πιο σημαντικοί τουμένταρ». (Διαβάνεν Φιλιππησίους 2:3) Τι ντεν-τουμέν γκοντί ότι ο κάθε εκ αμένταρ μπορίνελα τι κερέλ κάτι για τι βοηθίνελ κι κχανγκιρί. Άμα κα ατσσάς ταπεινοί, κα ντικχάς ο λατσσό αμαρέ πφραλέντε ντα πφενίντε ντα κα βοηθίντιβας λένγκε πιστέ παραδειγμάσταρ.​—1 Κορ. 12:​21-25.

15. Σο σικλιόνα κατά Τάνια ντα λάκε φαμιλιάταρ;

¹⁵ Κάνα νακχάσα δοκιμασίες σο να μπεκλεντίναας, ο Ιεχωβά λοκχιαρέλα αμαρό γκι αντράλ κατά μπαρί αγάπη σο σικαβένα αμένγκε αμαρέ πφραλά ντα κατά βοήθεια σο ντένα-αμέν. Ντικχέν σο αβιλό-πες εκχέ φαμιλιάκε εκ Σάββατος σο βουρτίνελας εκχέ Διεθνής Συνελευσιάταρ «Η Αγάπη Ποτές να Χασάρντιβελα»! σο αβιλί-πες κο 2019 κο Ηνωμένες Πολιτείες. Η Τάνια, σο τθερέλα τρινέ τσσαβέν, βακερέλα: «Βουρτίναας ι αυτοκινητόσαρ κο ξενοδοχείος, κάνα εκ οδηγός νασλό πι ντρομέσταρ ντα πελό οπρ’ αμέντε. Καέκ να ντινάς-πες, αλλά νικίστιλαμ κατά αυτοκίνητος ντα μπεσλάμ κο ντρομ σαρ χασαρντέ. Εκ τζενό σο ατσσιλόας κι νάκρη βακερντάς αμένγκε τι τζας λέσκε αυτοκινητόστε σόσκε ισινέ επικίνδυνα οτθέ σο μπεσάας. Ισινέ εκ πφραλ σο βοβ-ντα μόλις νασλόας κατά συνέλευση. Ντα να ατσσιλόας σάντε βοβ. Ατσσιλέας παντς γιαβερά-ντα πφραλά ντα πφενιά κατά Σουηδία σο αβιλέας ι συνελευσιάκε. Ο πφενιά λιντέ μι τσσαγιά ντα μαν πουμαρέ αγκαλιάτε, εκ τατί αγκάλι σο τθεράας μπουτ μπαρί ανάγκη! Βακερντόμ λένγκε ότι ισινάμας λατσσές, αλλά να νασένας. Μπεσλέ αμέντζαρ ατζέ-ντα αφού αβιλό ο ασθενοφόρος ντα ισινέ σίγουροι ότι τθεράας σο-ντα χρειαζίντιβαας. Καζόμ τθεράας ανταγιά δυσκολία, νιωθίναας ι αγάπη ι Ιεχωβάσκι. Ανταβά σο νακχλάμ μπαριαρντάς αμαρί αγάπη ι πφραλένγκε ντα ι πφενίνγκε ντα αβιλί πιο μπαρί αμαρί αγάπη ντα εκτίμηση ι Ιεχωβάσκε». Ντένα-τουμέν γκοντί καέκ φαρ σο χρειαζίντιβενας βοήθεια ντα εκ πφραλ σικαντάς τουμένγκε καζόμ μπουτ μανγκέλα-τουμέν;

16. Καλά λόγους τθεράσα τι σικαβάς αγάπη ο εκ ι γιαβερέσκε;

¹⁶ Σκεφτίνεν καλά λατσσέ πράγματα τθεράσα κάνα μανγκάσα αντράλ αμαρέ γκίσταρ ι γιαβερέν. Λοκχιαράσα ο γκι αμαρέ πφραλένγκο ντα πφενίνγκο κάνα τθερένα-λες ανάγκη. Μπαριαράσα ι ενότητα ι Ντεβλέσκε λαόσκι. Σικαβάσα ότι ισινάμ μαθητές ι Ιησούσκε, ντα ανταβά κερέλα ι λατσσέ τζενέν τι μανγκέν τι υπηρετίνεν ι Ιεχωβάς. Ντα ο πιο σημαντικός ισί ότι δοξάνασα ι Ιεχωβάς, ι “Νταντές σο σικαβέλα έλεος αντράλ πι γκίσταρ ντα ι Ντεβλές κάθε παρηγοριάς”. (2 Κορ. 1:3) Σαρέ μανγκάσα τι μπαριαράς αμαρί αγάπη ντα τι σικαβάς-λα αντράλ αμαρέ γκίσταρ!