Σόσκε ο Ντεβέλ Τραμπιντάς εκχέ Λαός για τι Κερέλ Οντουβά σο Μανγκέλα;

1. Σόσκε ο Ντεβέλ τραμπιντάας ο πουρανό Ισραήλ;

Ο Ντεβέλ γκιντιντάς εκχέ λαός σο ισινέ προσάγγονα του Αβραάμ ντα ντινάς-λεν νόμους σο ισινέ λένγκε λατσσιμάσκε. Οντουβά λαός, σο λιντάς ο ναβ «Ισραήλ» κατά Ντεβέλ, ισινέ ο μοναδικός λαός σο πακιάλας κο Ιεχωβά ντα αρακχαβέλας ι αλήθεια λέσκι. (Ψαλμός 147:19, 20) Αντικάς, τζενέ σαρέ κατά τθεμά κα μπορίνενας τι βοηθίντιβεν κατά Ισραήλ.​—Διαβάνεν Γένεση 22:18.

Ο Ντεβέλ τραμπιντάς ι Ισραηλιτέν για τι αβέν λέσκε μάρτυρες. Η ιστορία λένγκι σικαβέλα αμένγκε σαρ βοηθίντιβασα όταν ασουνάσα ο νόμοι λέσκε. (Δευτερονόμιο 4:6) Άρα, κατά Ισραηλίτες, μπορίνενας γιαβερά-ντα τζενέ τι σικλιόν ι Ντεβλές.​—Διαβάνεν Ησαΐας 43:10, 12.

2. Σόσκε ο αληθινοί Χριστιανοί γκιντίντιβενα για τι κερέν οντουβά σο μανγκέλα ο Ιεχωβά;

Σιγά σιγά, ο Ισραηλίτες νασλέ κατά Ντεβέλ, ντα λένγκε τθανέστε τσσουντάς ι εκκλησία ι αληθινέ Χριστιανόνγκι. (Ματθαίος 21:43· 23:37, 38) Ακανά, αντί για τους Ισραηλίτες, οντουλά σο ασουνένα ι Ντεβλές σαρ μάρτυρες λέσκε ισί ο αληθινοί Χριστιανοί.​—Διαβάνεν Πράξεις 15:14, 17.

Ο Ιησούς γκιντιντάς πι μαθητέν ντα βακερντάς λένγκε τι τζαν ντα τι βακερέν ο λατσσέ αμπέρια σαρό κο ντουνιάς. (Ματθαίος 10:7, 11· 24:14· 28:19, 20) Ακανά σο ισινάμ πασέ κο τέλος, ανταλά λατσσέ αμπέρια ασούντιβενα ατζέκ πιο μπουτ αμαρέ ντιβεσέντε. Πρώτη φορά κι ιστορία ο Ιεχωβά γκίντελα κι αληθινή θρησκεία εκατομμύρια τζενέν σαρό κατά ντουνιάς. (Αποκάλυψη 7:9, 10) Επίσης, ο αληθινοί Χριστιανοί γκιντίντιβενα μαζί για τι βοηθίνεν ντα τι ντεν θάρρος ο εκ κο γιαβέρ. Σαρό κο ντουνιάς αβένα συναθροίσεις, ντα οτθέ ασουνένα ο ίδια λάφια σο ασούντιβενα σαρέ κο γιαβερά-ντα τθεμά.​—Διαβάνεν Εβραίους 10:24, 25.

3. Σαρ ξεκινησάλε τι γκιντίντιβεν ο Μάρτυρες του Ιεχωβά αμαρέ ντιβεσέντε;

Περίπου κο 1870, εκ χουρντί ομάδα σο διαβάνελας προσεκτικά ι Αγία Γραφή αρχισάλι τι αρακχέλ αλήθειες σο χασάρντιλεας πριν από μπουτ μπρεσά. Επειδή τζανένας ότι ο Ιησούς τραμπιντάς ι εκκλησία ι αληθινέ Χριστιανόνγκι για τι βακερέν ο λατσσέ αμπέρια, οτθάρ βον-ντα ξεκινησάλε τι βακερέν-λεν σαρό κο ντουνιάς. Κο 1931, λιντέ ο ναβ Μάρτυρες του Ιεχωβά.​—Διαβάνεν Πράξεις 1:8· 2:1, 4· 5:42.

4. Κατάρ λένα οδηγίες ο Μάρτυρες του Ιεχωβά για τι βακερέν ι Ντεβλέσκε λάφια;

Μετά κατά μεριπέ ι Ιησούσκο, ισινέ εκ ομάδα αποστόλων ντα πρεσβυτέρων σο τθερένας ι Ιησούς σαρ Αρχηγός κι εκκλησία ι αληθινέ Χριστιανόγκι ντα ακολουθίνενας λέσκε οδηγίες. Ανταγιά ομάδα βοηθίνελας σαρέ ι Χριστιανόν ντα κυβερνίνελας μπουτ λατσσές ι εκκλησία. (Πράξεις 16:4, 5) Αντικάς αντιβές-ντα, ο Μάρτυρες του Ιεχωβά σαρό κο ντουνιάς βοηθίντιβενα εκχέ ομαδάταρ πιστών πρεσβυτέρων σο βακέρντιβελα Κυβερνών Σώμας. Βον ντικχένα σαρ τζάνα ο γραφεία σο τθερένα ο Μάρτυρες του Ιεχωβά. Κο γραφεία μεταφράντιβενα ντα νικιόνα περιοδικά, βιβλία ντα φυλλάδια σε πιο μπουτ από 600 τσσιμπά σο βοηθίνενα κι μελέτη κι Γραφιάκι. Αντικάς, ο Κυβερνών Σώμας μπορίνελα τι ντελ θάρρος ντα τι σικαβέλ κατά Αγία Γραφή σο τι κερέν ο Χριστιανοί σε πιο μπουτ από 110.000 εκκλησίες σαρό κο ντουνιάς. Οτθέ, ο πρεσβύτεροι, μουρσά σο ισί πιστοί ντα άξιοι, αρακχαβένα με αγάπη ο λαός ι Ντεβλέσκο.​—Διαβάνεν 1 Πέτρου 5:2, 3.

Σαρέ ο Μάρτυρες του Ιεχωβά ισινάμ γιεκ για τι βακεράς ο λατσσέ αμπέρια ντα τι σικλιαράς γιαβερέν κατά Αγία Γραφή. Τζάσα κχερ-κχερέστε σαρ ο απόστολοι. (Πράξεις 20:20) Επίσης, βακεράσα οντουλένγκε σο μανγκένα μπαγιά ι αλήθεια τι κερέν μελέτη αμέντζαρ. Αλλά ο Μάρτυρες του Ιεχωβά νανέ σάντε εκ θρησκεία. Ισινάμ εκ φαμιλί με εκ Ντατ σο μανγκέλα-αμέν μπουτ. Ισινάμ πφραλά ντα πφενιά σο πφαμπόνα ο εκ ι γιαβερέσκε. (2 Θεσσαλονικείς 1:3) Ο λαός ι Ντεβλέσκο ισί η πιο ευτυχισμέ φαμιλί, επειδή ισί σαρέ γιεκ για τι ευχαριστίνελ ι Ιεχωβάς ντα τι βοηθίνελ γιαβερέν.​—Διαβάνεν Ψαλμός 33:12· Πράξεις 20:35.