Ασταρένα ι Ιησούς

Ο Ιησούς ντα ο απόστολοι πφιρντέ κατά κοιλάδα Κιδρόν ντα ερεσλέ κο Βες κι Ζιτινίνγκο. Νακχλόας μπουτ ο σαάτι ντα οντιά ιράτ τθερέλας πανσέληνος. Κάνα ερεσλέ κο κήπος της Γεθσημανή, ο Ιησούς βακερντάς λένγκε: «Μπεσέν ατθέ ντα ατσσόν τζανγκαντέ». Σοράν γκιλό χάνικ πο αντρέ κο κήπος ντα πελό κοτσίντζαρ τελέ. Ισινέ μπουτ στεναχωριμέ ντα προσευχισάλο κο Ιεχωβά: «Τι αβέλ-πες οντουβά σο μανγκέσα». Αζομάν ο Ιεχωβά μπουτσσαντάς εκχέ αγγελός για τι ντελ ζορ ι Ιησούς. Κάνα ο Ιησούς βουρτισάλο πι αποστολόντε, αρακχλάς-λεν τι σοβέν. Βακερντάς λένγκε: “Ιστίν! Νανέ ανταβά ο σαάτι για τι σοβέν! Αβιλό ο σαάτι σο κα περάβ κο βαστά μι ντουσμανίνγκε”.

Χάνικ πο σοράν αβιλό ο Ιούδας, ντα παλά-λέστε ισινέ μπουτ τζενέ σο τθερένας σπαθιά ντα ρόπαλα. Βοβ τζανέλας κατέ κα αρακχέλας ι Ιησούς σόσκε τζάλας μπουτ φαρ κο κήπος ανταβά. Ο Ιούδας βακερντάς κο στρατιώτες ότι κα σικαβέλας λένγκε ι Ιησούς. Σουγκό γκιλό κο Ιησούς ντα βακερντάς: “Γεια, Δάσκαλε” ντα σοράν τσσουμιντάς-λες. Ντα ο Ιησούς βακερντάς: “Ιούδα, προδόνεσα-μαν εκχέ τσσουμιντιμάσαρ;”

Ο Ιησούς τσσουντάς-πες ανγκλάλ ντα πουτσλάς ι τζενέν: «Κάσκε ρόντενα;» Βον βακερντέ: «Ι Ιησούσκε κατά Ναζαρέτ». Αζομάν βοβ βακερντάς λένγκε: «Με ισινόμ», ντα ο μουρσά τσσιντιντέ-πες παλάλ ντα πελέ τελέ. Ο Ιησούς πουτσλάς-λεν πάλι: «Κάσκε ρόντενα;» Βον βακερντέ πάλι: «Ι Ιησούσκε κατά Ναζαρέτ». Ο Ιησούς βακερντάς: “Βακερντόμ τουμένγκε ότι με ισινόμ. Μουκχέν ακαλέν τι νασέν”.

Κάνα ο Πέτρος αγαντάς σο αβέλας-πες, νικαντάς εκ τσσουρί ντα τσσιντάς ο καν του Μάλχου, σο ισινέ εκ δούλος του αρχιερέα. Αλλά ο Ιησούς τσσουντάς πο βας λέσκε κανέστε ντα κερντάς-λες λατσσές. Αζομάν βακερντάς κο Πέτρος: “Τσσουβ παλάλ τι τσσουρί. Αν κα χας-τουτ τσσουριάσαρ, κα μερές τσσουριάταρ”. Ο στρατιώτες ασταρντέ ι Ιησούς ντα πφαντέ λέσκε βαστά, ντα ο απόστολοι λιντέ-πες ντα νασλέ. Αζομάν ο τζενέ γκερντέ-λες κο Άννας, κο μπαρό ιερέας. Ο Άννας εξεταντάς ι Ιησούς ντα μπουτσσαντάς-λες κο κχερ του αρχιερέα, του Καϊάφα. Αλλά σο αβιλό ι αποστολόντζαρ;