Ο Ιησούς Μερέλα κο Γολγοθάς

Ο μπαρέ ιερείς γκερντέ ι Ιησούς κο κχερ κι Πιλατόσκο. Ο Πιλάτος πουτσλάς-λεν: “Σο κερντάς ανταβά τζενό;” Βον βακερντέ: “Πακιάλα ότι ισί βασιλιάς”. Ο Πιλάτος πουτσλάς ι Ιησούς: «Τούι ισινάν ο βασιλιάς ι Ιουδαιόνγκο;» Ο Ιησούς βακερντάς: «Μι Βασιλεία νανέ σαρ ανταβά ντουνιάς».

Αζομάν ο Πιλάτος μπουτσσαντάς ι Ιησούς κο Ηρώδης, σο κερέλας κουμάντος κι Γαλιλαία, για τι αρακχέλ άμα ο Ιησούς κερντάς κάτι γκεραλό. Ο Ηρώδης να αρακχέλας κάτι κο Ιησούς για τι κατηγορίνελ-λες. Οτθάρ μπουτσσαντάς-λες πάλι κο Πιλάτος. Αζομάν ο Πιλάτος βακερντάς κο λαός: “Ούτε με ούτε ο Ηρώδης αρακχάσα κάτι γκεραλό ανταλέ τζενέστε. Κα μουκχάβ-λες τι νασέλ”. Ο τζενέ ντένας βίκος: “Μούνταρ-λες! Μούνταρ-λες!” Ο στρατιώτες ντινέ ι Ιησούς βουρδαλόσαρ, τσσουνγκιαρντέ-λες ντα νταπλέ-λες. Τσσουντέ οπράλ λέσκε σορέστε εκ στέμμας καντρέντζαρ ντα βακερένας πρασαϊμάσαρ: “Γεια Βασιλιά ι Ιουδαιόνγκο”. Ο Πιλάτος βακερντάς πάλι κο τζενέ: “Να αρακχλόμ τίποτα γκεραλό ανταλέ τζενέστε”. Αλλά βον ντινέ βίκος: «Ιμπλάβ-λες κο κας!» Οτθάρ, ο Πιλάτος ντινάς ι Ιησούς λέντε για τι μουνταρέν-λες.

Σοράν λιντέ ι Ιησούς γκερντέ-λες εκχέ τθανέστε σο βακέρντιβελας Γολγοθάς, καρφωντέ-λες κο κας ντα βαντιντέ-λες οπρέ. Ο Ιησούς κερντάς προσευχή ντα βακερντάς: “Ντάντε συγχώρινε-λεν σόσκε να τζανένα σο κερένα”. Ο τζενέ πρασάνας ι Ιησούς ντα βακερένας: “Άμα ισινάν τσσαβό ι Ντεβλέσκο, γούλι τελέ κατά κας! Σώνε το νεαυτός”.

Αζομάν εκ κατά τσορά σο ισινέ ιμπλαντέ οτθέ βακερντάς: «Ιησού, μα τι μπιστρές-μαν κάνα κα αβές τι Βασιλειάτε». Ο Ιησούς ντινάς πο λάφι: «Μπαγιά βακεράβα τούκε αντιβές, κα αβές μάντζαρ κο Παράδεισος». Κο απόγευμας, πελό καρανίκι κι πφουβ σο ατσσικιαρντάς τριν σαάτια. Μερικοί μαθητές ατσσιλέ λέσαρ πασέ κο κας, γιεκ ι Μαριάσαρ ι Ιησούσκε νταγιάσαρ. Ο Ιησούς βακερντάς κο Ιωάννης τι αρακχαβέλ ι Μαριά σαρ τι αβέλας λέσκι ντάι.

Τελικά, ο Ιησούς βακερντάς: «Αβιλό-πες!» Σοράν περαντάς πο σορό ντα μουλό. Οντιά στιγμή αβιλό εκ ζουρανό σεισμός. Ντα αντρέ κο ναός, η πφαρί κουρτίνα σο χωρίνελας ο Άγια κατά Άγια των Αγίων πφαράντιλι κο ντούι. Εκ αρχηγός ι στρατόσκο βακερντάς: “Σίγουρα ανταβά ισινέ ο Τσσαβό ι Ντεβλέσκο”.