Ο Ιησούς Τραμπίνελα ι Σαυλός

Ο Σαύλος ισινέ Ρωμαίος πολίτης σο μπιάντιλοας κι Ταρσός. Ισινέ Φαρισαίος ντα τζανέλας μπουτ λατσσές ο Ιουδαϊκός Νόμος. Επίσης τθερέλας μπαρό μίσος ι Χριστιανόνγκε. Λέλας ζορίσαρ ι Χριστιανόν, μουρσέν ντα τζουβλίν, λένγκε κχερένταρ ντα τσσουβέλας-λεν κι φυλακή. Μάλιστα, κάνα μπουτ χολιαμέ τζενέ μουνταρντέ μπαρέντζαρ ι Στεφανός, σο ισινέ μαθητής ι Ιησούσκο, ο Σαύλος μπεσέλας οτθέ ντα ντικχέλας.

Αλλά να ερεσέλας ι Σαυλός σο ασταρέλας ντα τσσουβέλας φυλακή ι Χριστιανόν κι Ιερουσαλήμ. Μανγκλάς κατά αρχιερέας τι μπουτσσαβέλ-λες κι Δαμασκός για τι τζαλ κόντρα ι Χριστιανόντζαρ οτθέ-ντα. Καζόμ ο Σαύλος ερεσέλας πασέ κι πόλη, ξαφνικά ντικχλάς εκ φως τι λελ-πες ντονταλάι λέσταρ, ντα πελό τελέ. Ασουντάς εκ φωνή τι βακερέλ: “Σαούλ, σόσκε τζάσα μάντζαρ κόντρα;” Ο Σαύλος πουτσλάς: “Κον ισινάν;” Η απάντηση σο λιντάς ισινέ: “Με ισινόμ ο Ιησούς. Τζα κι Δαμασκός ντα κα σικλιός σο πρέπει τι κερές”. Οντιά στιγμή, ο Σαύλος κορόλιλο, ντα έπρεπε τι ασταρέν-λες κατά βας για τι γκερέν-λες κι πόλη.

Κι Δαμασκός, ισινέ εκ πιστός Χριστιανός σο βακερένας λέσκε Ανανία. Ο Ιησούς βακερντάς λέσκε εκχέ φαντασιάτε: “Τζα κι Ιουδάσκο κχερ κο ντρομ σο βακέρντιβελα Ευθεία ντα ρόντε ι Σαυλόσκε”. Ο Ανανίας βακερντάς: “Κύριε, τζανάβα-λεν σαρέ ανταλέ μουρσέσκε! Τσσουβέλα κι φυλακή τι μαθητέν!” Αλλά ο Ιησούς βακερντάς λέσκε: “Τζα. Τραμπιντόμ ι Σαυλός για τι μουτθαβέλ ο λατσσέ αμπέρια μπουτέ τθεμέντε”.

Αζομάν, ο Ανανίας αρακχλάς ι Σαυλός ντα βακερντάς λέσκε: “Μο πφραλ, Σαούλ, ο Ιησούς μπουτσσαντάς-μαν για τι πουτράβ το γιακχά”. Αμέσως ο Σαύλος ντικχλάς πάλι. Σικλιλό ι Ιησούσκε ντα αβιλό λέσκο μαθητής. Αφού μπολντιλό σαρ Χριστιανός, ο Σαύλος αρχιντάς τι βακερέλ ο λατσσέ αμπέρια κο συναγωγές, γιεκ ι γιαβερέ Χριστιανόντζαρ. Μπορίνεσα τι σκεφτίνες καζόμ πρέπει τι σαστισάλε ο Ιουδαίοι κάνα ντικχλέ-λες τι σικλιαρέλ ι τζενέν ι Ιησούσκε; Βακερντέ: “Ανταβά νανέ ο ίδιος μουρς σο τζάλας κόντρα κο μαθητές κι Ιησούσκε;”

Τριν μπρεσά, ο Σαύλος μουτθαβέλας ο λατσσέ αμπέρια κο τζενέ σο τζουβντιόνας κι Δαμασκός. Ο Ιουδαίοι μισίνενας-λες ντα ρόντενας σαρ τι μουνταρέν-λες. Αλλά ο πφραλά σικλιλέ-λες ανταβά ντα βοηθιντέ-λες τι νασέλ. Τσσουντέ-λες αντρέ εκχέ κοφινάτε ντα γουλιαρντέ-λες εκχέ παραθυρόσταρ σο ισινέ κο μπαρέ ντουβάρια σο τθερέλας η πόλη.

Κάνα ο Σαύλος γκιλό κι Ιερουσαλήμ, προσπαθιντάς τι αρακχέλ πι πφραλέν οτθέ. Αλλά βον νταρένας λέσταρ. Αζομάν εκ μαθητής σο σικαβέλας μπουτ λατσσιπέ, ο Βαρνάβας, γκερντάς-λες κο απόστολοι ντα βοηθιντάς-λεν τι αγαβέν ότι ο Σαύλος αλλαξάλοας μπαγιά. Ο Σαύλος αρχιντάς τι μουτθαβέλ ο λατσσέ αμπέρια αντράλ πι γκίσταρ γιεκ ι κχανγκιριάσαρ κι Ιερουσαλήμ. Πο σοράν, ο γιαβερά τζανένας-λες ι ναβέσαρ Παύλος.