Ο Μωυσής Τραμπιντάς τι Ντελ Λατρεία ι Ιεχωβάς

Κι Αίγυπτος, η φαμιλί του Ιακώβ αβιλί γνωστή ι ναβέσαρ Ισραηλίτες. Κάνα ο Ιακώβ ντα ο Ιωσήφ μουλέ, κερέλας κουμάντος εκ νεβό Φαραώ. Βοβ νταρέλας ότι ο Ισραηλίτες κα αβένας πο ζουρανέ κατά Αιγύπτιοι. Οτθάρ ο Φαραώ κερντάς ι Ισραηλιτέν τι αβέν δούλοι. Τσσουντάς-λεν ζορίσαρ τι λατσσαρέν τούβλα ντα τι κερέν μπουτ πφαρί μπουτί κο χωράφια. Όμως, καζόμ πο μπουτ τσσουβένας-λεν ο Αιγύπτιοι τι κερέν μπουτί, αζόμ πο μπουτ αβγατίντιβενας ο Ισραηλίτες. Ανταβά να μπεϊντιντάς-λες ο Φαραώ, οτθάρ ντινάς εντολή τι μουνταρέν σαρέ ι μαξιμίν ι Ισραηλιτένγκε σο ισινέ μουρσά κάνα μπιάντιβενας. Μπορίνεσα τι ανές τι γκοντιάτε καζόμ μπουτ νταρασάλε ο Ισραηλίτες;

Εκ Ισραηλίτισσα, η Ιωχαβέδ, τθερέλας εκχέ σουκάρ τσσαβορές. Για τι αρακχαβέλ-λες τσσουντάς-λες εκχέ κοφινάτε ντα γκεραντάς-λες αντρέ κο καλάμια σο τθερέλας η Λεν Νείλος. Η πφεν ι μαξιμίσκι, η Μαριάμ, μπεσλί οτθέ πασέ για τι ντικχέλ σο κα αβέλας-πες.

Η τσσάι ι Φαραώσκι γκιλί τι τθοβέλ-πες κι λεν ντα ντικχλάς ι κοφίνα. Οτθέ αντρέ αρακχλάς εκχέ μαξιμίς τι ροβέλ, ντα τζιτζισάλι λέσκε. Η Μαριάμ πουτσλάς-λα: “Τι τζαβ τι αρακχάβ εκχέ τζουβλιά σο ντέλα τσουτσί για τι παρβαρέλ-λες τούκε;” Κάνα η τσσάι ι Φαραώσκι βακερντάς βα, η Μαριάμ γκερντάς πι νταγιά, την Ιωχαβέδ. Η τσσάι ι Φαραώσκι βακερντάς λάκε: “Λε ακαλέ μαξιμίς, ντε-λες τσουτσί, ντα με κα ποκινάβ-τουτ”.

Κάνα ο τσσαβό μπαριλό, η Ιωχαβέδ γκερντάς-λες κι Φαραώσκι τσσάι, βόι νικαντάς λέσκε Μωυσή ντα μπαριαρντάς-λες σαρ τι αβέλας λάκο τσσαβό. Ο Μωυσής μπαριλό σαρ πρίγκιπας ντα μπορίνελας τι τθερέλ σο-ντα μανγκέλας. Αλλά να μπισταρντάς ποτές ι Ιεχωβάς. Τζανέλας ότι να ισινέ Αιγύπτιος, αλλά Ισραηλίτης. Ντα τραμπιντάς τι υπηρετίνελ ι Ιεχωβάς.

Κάνα ισινέ 40 μπρεσένγκο, ο Μωυσής αποφασιντάς τι βοηθίνελ πι λαός. Κάνα ντικχλάς εκχέ Αιγυπτιός τι νταπέλ εκχέ Ισραηλιτής σο ισινέ δούλος, ντινάς ι Αιγυπτιός αζόμ ζουρανές σο μουνταρντάς-λες. Ο Μωυσής γκεραντάς λέσκο σώμας κο κούμι. Σοράν σο σικλιλό-λες ανταβά ο Φαραώ, μανγκλάς τι μουνταρέλ ι Μωυσής. Αλλά ο Μωυσής νασλό ντα γκιλό κο τθεμ Μαδιάμ. Ο Ιεχωβά φροντίνελας-λες οτθέ.