Η Ρουθ ντα η Ναομί

Κάνα πελί μποκχ κο Ισραήλ, εκ Ισραηλίτισσα σο βακερένας λάκε Ναομί νασλί ντα γκιλί τι μπεσέλ κο τθεμ Μωάβ πι ρομέσαρ ντα πι ντουέ τσσαβέντζαρ. Πο σοράν ο ρομ λάκο μουλό. Ο τσσαβέ λάκε παντρισάλε τσσαΐντζαρ κατά Μωάβ, ι εκχιάκε βακερένας λάκε Ρουθ ντα ι γιαβεριάκε Ορφά. Η Ναομί ισινέ μπουτ μπεζαβά, σόσκε μουλέ εμ ο τσσαβέ λάκε.

Κάνα η Ναομί ασουντάς ότι νακχλί η μποκχ κο Ισραήλ, αποφασιντάς τι βουρτίνελ παλάλ. Η Ρουθ ντα η Ορφά γκιλέ παλά-λάτε, αλλά καζόμ πφιρένας η Ναομί βακερντάς λένγκε: “Ισινένας λατσσέ ρομνιά μι τσσαβένγκε ντα λατσσέ μποριά μάνγκε. Μανγκάβα τι τζαν τουμένγκε τουμαρέ κχερέντε κο Μωάβ ντα τι ξαναπαντρίνεν”. Βον βακερντέ: “Μανγκάσα-τουτ μπουτ! Ντα να μανγκάσα τι μουκχάς-τουτ κορκορί”. Όμως η Ναομί συνεχίνελας τι βακερέλ λένγκε τι νασέν. Τελικά, η Ορφά νασλί αλλά η Ρουθ μπεσλί λάσαρ. Η Ναομί βακερντάς λάκε: “Ντικχ! Η Ορφά βουρτίνελα πι λαόστε ντα πι ντεβλέντε. Τζα τούι-ντα γιεκ λάσαρ, τζα τι νταγιάτε”. Αλλά η Ρουθ βακερντάς λάκε: “Να κα μουκχάβ-τουτ. Το λαός κα αβέλ μο λαός ντα το Ντεβέλ μο Ντεβέλ”. Σαρ πακιάσα ότι νιωσάλι η Ναομί κάνα η Ρουθ βακερντάς-λες ανταβά;

Η Ρουθ ντα η Ναομί ερεσλέ κο Ισραήλ κο μάσεκ σο αρχίνενας τι γκίντεν ι τζοβ. Εκ ντιβές, η Ρουθ γκιλί τι γκίντελ ι τζοβ σο ατσσιλίας κο χωράφι εκχέ μουρσέσκο σο βακερένας λέσκε Βοόζ. Ανταβά τζενό ισινέ ο τσσαβό της Ραάβ. Βοβ ασουντάας ότι η Ρουθ ισινέ εκ Μωαβίτισσα σο ατσσιλί γιεκ με τη Ναομί ντα σικαντάας λάκε αφοσιωμέ αγάπη. Βακερντάς κο εργάτες σο τθερέλας τι μουκχέν πο μπουτ τζοβ κο χωράφι για τι γκίντελ-λα η Ρουθ.

Οντιά ιράτ, η Ναομί πουτσλάς την Ρουθ: “Κάσκο ισινέ ο χωράφι σο κερντάν μπουτί αντιβές;” Η Ρουθ βακερντάς: “Κερντόμ μπουτί κο χωράφι εκχέ μουρσέσκο σο βακερένα λέσκε Βοόζ”. Η Ναομί βακερντάς λάκε: “Ο Βοόζ ισί τζενέ μι ρομέσαρ. Συνέχινε τι κερές μπουτί λέσκε χωραφίστε ι γιαβερέ τσσαΐντζαρ. Κα αβές αρακχαντί οτθέ”.

Η Ρουθ συνεχίνελας τι κερέλ μπουτί κο χωράφι σο τθερέλας ο Βοόζ μέχρι σο γκιντιντέ σαρί ι τζοβ. Ο Βοόζ ντικχλάς ότι η Ρουθ μαρέλας-πες κι μπουτί ντα ότι ισινέ μπουτ ξεχωριστή τζουβέλ. Οντουλά μπρεσά, άμα εκ παντριμέ μουρς μερέλας ντα να κερντάας τσσαβέν, έπρεπε εκ τζενό λέσκο τι παντρίνελ λέσκε ρομνιάσαρ. Οτθάρ, ο Βοόζ παντρισάλο με τη Ρουθ. Κερντέ εκχέ τσσαβές, σο βακερένας λέσκε Ωβήδ, ντα βοβ αβιλό ο πάππους του βασιλιά Δαβίδ. Ο αμαλινά σο τθερέλας η Ναομί ισινέ μπουτ χαρούμενες. Βακερντέ λάκε: “Πρώτα, ο Ιεχωβά ντινάς-τουτ την Ρουθ, σο ισί μπουτ λατσσί τούσαρ, ντα ακανά ντινάς-τουτ εκχέ αγγονίς. Τι αβέλ δοξασμέ ο Ιεχωβά”.