Ο Δαβίδ ντα ο Γολιάθ

Ο Ιεχωβά βακερντάς κο Σαμουήλ: “Τζα κο κχερ του Ιεσσαί. Εκ λέσκε τσσαβένταρ κα αβέλ ο γιαβέρ βασιλιάς κο Ισραήλ”. Ο Σαμουήλ γκιλό κο κχερ του Ιεσσαί. Κάνα ντικχλάς ι πο μπαρέ τσσαβές, σκεφτιντάς: “Ακαβά πρέπει τι ισί”. Αλλά ο Ιεχωβά βακερντάς κο Σαμουήλ ότι να τραμπιντάας οντουλές. Επίσης βακερντάς: “Με ντικχάβα σο ισί αντρέ κο γκι εκχέ τζενέσκο, ντα να ντικχάβα σάντε σαρ ισί αβριάλ”.

Ο Ιεσσαί γκερντάς κο Σαμουήλ πι γιαβερέ σιοβέ τσσαβέν. Αλλά ο Σαμουήλ βακερντάς: “Ο Ιεχωβά να τραμπιντάς καεκχές λένταρ. Τθερέσα γιαβερέ τσσαβέν;”. Ο Ιεσσαί βακερντάς: “Τθεράβα ατζέ εκχές, ι πο χουρντές, ι Δαβιδίς. Ισί αβρί ντα φροντίνελα μι μπρακέν”. Κάνα αβιλό ο Δαβίδ, ο Ιεχωβά βακερντάς κο Σαμουήλ: “Ακαβά ισί!” Ο Σαμουήλ τσσορντάς οπράλ λέσκε σορέστε λάδι ντα τραμπιντάς-λες για τι αβέλ βασιλιάς κο Ισραήλ κο μέλλον.

Πο σοράν, ο Ισραηλίτες πολεμίνενας με το Φιλισταίοι. Βον τθερένας εκχέ πολεμιστής σο ισινέ μπουτ βουτσσό, σαρ γίγαντας, ντα βακερένας λέσκε Γολιάθ. Κάθε ντιβές, ο Γολιάθ πρασάλας ι Ισραηλιτέν. Ντέλας βίκος: “Μπουτσσαβέν μάνγκε εκχέ μουρσές τι πολεμίνελ μάντζαρ. Άμα κα νικίνελ-μαν βοβ, κα αβάς τουμαρέ δούλοι. Αλλά άμα κα νικίναβ με, κα αβέν τουμέν αμαρέ δούλοι”.

Ο Δαβίδ γκιλό κο στρατόπεδος κι Ισραηλιτένγκο για τι γκερέλ χαμπέ πι πφραλένγκε σο ισινέ στρατιώτες. Ασουντάς τον Γολιάθ, ντα βακερντάς: “Με κα τζαβ τι πολεμίναβ λέσαρ!” Ο βασιλιάς Σαούλ βακερντάς: “Τούι ισινάν χουρντό τσσαβό”. Ο Δαβίδ απαντιντάς: “Ο Ιεχωβά κα βοηθίνελ-μαν”.

Ο Σαούλ ντινάς πι πανοπλία τι ιρίλ-λα ο Δαβίδ, αλλά ο Δαβίδ βακερντάς: “Ναστί τζάβα τι πολεμίναβ ανταλάσαρ”. Ο Δαβίδ λιντάς πι σφεντόνα ντα γκιλό εκχέ χουρντέ λενιάτε. Τραμπιντάς παντς μπαρά ντα τσσουντάς-λεν πι τσαντάτε. Σοράν ο Δαβίδ τθαβντισάλο κο Γολιάθ. Ο γίγαντας ντινάς βίκος: “Έλα μάντε χουρντέα. Κα νταβ-τουτ τι χαν-τουτ ο τσιρικλέ ι ουρανόσκε ντα ο άγρια ζώα”. Αλλά ο Δαβίδ να νταρέλας. Βακερντάς λέσκε βικόσαρ: “Τούι αβέσα μάντε σπαθίσαρ ντα δορύσαρ, αλλά με αβάβα τούτε κο ναβ κι Ιεχωβάσκο. Να κερέσα πόλεμος αμέντζαρ αλλά κερέσα πόλεμος ι Ντεβλέσαρ. Σαρέ οντουλά σο ισί ακατέ κα ντικχέν ότι ο Ιεχωβά ισί πο ζουρανό εκχέ σπαθίσταρ ντα εκχέ δορύσταρ. Βοβ κα ντελ-τουτ αμαρέ βαστέστε”.

Ο Δαβίδ τσσουντάς εκ μπαρ κι σφεντόνα ντα κερντάς-λα ντονταλάι καζόμ πο ζουρανές μπορίνελας. Ο Ιεχωβά βοηθιντάς τον Δαβίδ τι φουρτίνελ ο μπαρ ντα τι καρφώνελ τον Γολιάθ κο τσικάτ. Ο γίγαντας μουλό ντα πελό τελέ. Σοράν ο Φιλισταίοι τθάβντενας για τι γλιτώνεν. Τούι, ντέσα μπέσα κο Ιεχωβά σαρ κερντάς ο Δαβίδ;