Ι Ιεχωβάσκο Στρατός σο Ισί Πφερντό Γιακ

Ο βασιλιάς κατά Συρία, ο Βεν-αδάδ, συνεχίνελας τι πολεμίνελ ο Ισραήλ, αλλά κάθε φαρ ο προφήτης Ελισαιέ προειδοποιήνελας ι βασιλιάς κατά Ισραήλ, ντα αντικάς μπορίνελας τι γλιτώνελ. Ανταλέσκε, ο Βεν-αδάδ λιντάς ι απόφαση τι κερέλ απαγωγή τον Ελισαιέ. Σικλιλό ότι ο Ελισαιέ ισινέ κι πόλη Δωθάν ντα μπουτσσαντάς οτθέ ο στρατός ι Συριάκο για τι ασταρέλ-λες.

Ο Σύριοι ερεσλέ κι Δωθάν ιράτ. Κο πρωί, ο υπηρέτης σο τθερέλας ο Ελισαιέ νικίστιλο αβρί ντα ντικχλάς ότι εκ μπαρό στρατός πφαντάας ντονταλάι ι πόλη. Τσσιντιλέ λέσκε πιντρέ ντα ντινάς βίκος: “Ελισαιέ σο κα κεράς;” Ο Ελισαιέ βακερντάς λέσκε: “Ισί πο μπουτ αμέντζαρ παρά λέντζαρ”. Οντιά στιγμή, ο Ιεχωβά κερντάς ι υπηρετής σο τθερέλας ο Ελισαιέ τι ντικχέλ ότι ο βεσά ντονταλάι κατά πόλη ισινέ πφερντέ γκραστέντζαρ ντα τζενγκίσκε άμαξες σο ισινέ πφερντέ γιακ.

Κάνα ο Σύριοι στρατιώτες προσπαθιντέ τι ασταρέν τον Ελισαιέ, βοβ κερντάς προσευχή: “Ιεχωβά, μολίναβα-τουτ, τι κοριαρές-λεν”. Αζομάν, αν-ντα ο στρατιώτες μπορίνενας τι ντικχέν, να αγαβένας κάι ισινέ. Ο Ελισαιέ βακερντάς λένγκε: “Ισινέν σε λάθος πόλη. Ελάν παλά-μάντε, με κα γκεράβ-τουμέν οντουλέ μουρσέστε σο ρόντενα”. Γκιλέ παλάλ κο Ελισαιέ μέχρι κι Σαμάρεια, σο οτθέ τζουβντιόλας ο βασιλιάς ι Ισραηλίσκο.

Κάνα ο Σύριοι αγαντέ κατέ ισινέ, ναστί κερένας τίποτα. Ο βασιλιάς ι Ισραηλίσκο πουτσλάς τον Ελισαιέ: “Τι μουνταράβ-λεν;” Μήπως ο Ελισαιέ ντικχλάς-λες ανταβά σαρ ευκαιρία για τι λελ εκδίκηση οντουλέ τζενένταρ σο μανγκλέ τι κερέν λέσκε κακός; Όχι. Ο Ελισαιέ βακερντάς: “Μα μούνταρ-λεν. Ντε-λεν τι χαν ντα μουκχ-λεν τι νασέν”. Ντα αντικάς ο βασιλιάς κερντάς εκ μπαρό τραπέζι λένγκε ντα σοράν μπουτσσαντάς-λεν πουμαρέ κχερέντε.