Ο Ιεχωβά Κερντάς Υπομονή ι Ιωνάσαρ

Κι πόλη Νινευή σο ισινέ κι Ασσυρία, ο τζενέ ισινέ γκεραλέ. Ο Ιεχωβά βακερντάς πι προφητίστε κο Ιωνάς τι τζαλ κι Νινευή ντα τι βακερέλ ι τζενένγκε τι αλλάνεν. Αλλά ο Ιωνάς νταρασάλο ντα αντίς τι τζαλ οτθέ γκιλό γιαβερτθέ. Τσσουντάς-πες εκχέ καραβίστε για τι τζαλ κι Θαρσείς ντα αντικάς νασλό μπουτ ντουρ.

Καζόμ ο καράβι ισινέ αντρέ κι ντεριάβ, βαντίντιλι εκ ζουρανί μπαρμπάλ ντα ο ναύτες νταρασάλε. Κερένας προσευχή πουμαρέ ντεβλέντε ντα πουτσένας-λεν: “Σόσκε αβέλα-πες ανταβά;” Τελικά, ο Ιωνάς βακερντάς λένγκε: “Με φταίναβα. Προσπαθίναβα τι νασάβ ντουρ κατά Ιεχωβά ντα μα τι κεράβ οντουβά σο βακερντάς. Φουρτίνεν-μαν κι ντεριάβ, ντα η μπαρμπάλ κα τσσινάντιβελ”. Ο ναύτες να μανγκένας τι φουρτίνεν ι Ιωνάς κι ντεριάβ, αλλά ο Ιωνάς επιμίνελας. Τελικά φουρτιντέ-λες κι ντεριάβ, ντα η μπαρμπάλ ατσσιλί.

Ο Ιωνάς πακιάλας ότι κα μερέλας. Καζόμ πφερέλας πο αχόρτ αντρέ κι ντεριάβ, κερντάς προσευχή κο Ιεχωβά. Αζομάν ο Ιεχωβά μπουτσσαντάς εκχέ μπουτ μπαρέ ματσσές. Ο ματσσό μπιλιαντάς ι Ιωνάς αλλά να μουνταρντάς-λες. Αντράλ κατά ματσσέσκο περ, ο Ιωνάς κερντάς προσευχή ντα βακερντάς: “Ντάβα-τουτ μο λάφι Ιεχωβά, πάντα κα νταβ-τουτ καν”. Ο Ιεχωβά αρακχαντάς ι Ιωνάς τριν ντιβεσά αντρέ κο περ κι ματσσέσκο ντα σοράν κερντάς ι ματσσές τι φουρτίνελ-λες αβριάλ κατά ντεριάβ.

Αφού ο Ιεχωβά σωντάς ι Ιωνάς, μήπως ανταβά μανγκέλας τι βακερέλ ότι να χρειαζίντιβελας τι τζαλ κι Νινευή; Όχι. Ο Ιεχωβά βακερντάς πάλι κο Ιωνάς τι τζαλ οτθέ. Ανταγιά φαρ ο Ιωνάς ντινάς καν. Γκιλό ντα βακερντάς κο γκεραλέ τζενέ: “Ατζέ 40 ντιβεσά ντα η Νινευή κα καταστραφίντιβελ”. Αζομάν αβιλό κάτι σο να μπεκλεντίνελας-λες​—ο Νινευίτες ασουντέ ντα τσσιναντέ τι κερέν γκεραλέ πράγματα. Ο βασιλιάς σο τθερέλας η Νινευή βακερντάς πι λαόσκε: “Ντεν βίκος κο Ντεβέλ για βοήθεια, ντα μετανιώνεν ι γκεραλέ πραγματένγκε σο κερντέν. Μπέκιμ μα τι καταστραφίνελ-αμέν”. Κάνα ο Ιεχωβά ντικχλάς ότι ο τζενέ μετανιωσάλε μπαγιά, να κερντάς καταστροφή ι Νινευή.

Ο Ιωνάς χολιασάλο σο να καταστραφισάλο ο τθεμ. Σκέφτινε: Ο Ιεχωβά κερντάς υπομονή ι Ιωνάσαρ ντα τζιτζισάλο λέσκε, αλλά ο Ιωνάς να τζιτζισάλο ι τζενένγκε κι Νινευή. Αντίς τι κερέλ-λες ανταβά, μπεσλό περαντέ μόσαρ αβρί κατά τθεμ τελάλ εκχέ βουτσσαλιάτε σο κερέλας εκ νεροκολοκυθιά. Σοράν η νεροκολοκυθιά σουκιλί, ντα ο Ιωνάς χολιασάλο. Αζομάν ο Ιεχωβά βακερντάς λέσκε: “Τούι πφαμπόσα ανταλέ φυτόσκε πο μπουτ από ότι πφαμπόσα ι τζενένγκε κι Νινευή. Με τζιτζισάλομ λένγκε ντα βον σωσάλε”. Σο μανγκέλας τι σικλιαρέλ-λες; Ότι ο τζενέ κι Νινευή ισινέ πο σημαντικοί σαρέ κατά φυτά.