Ο Ιεχωβά Μπουτσσαβέλα ι Ιερεμιάς τι Κερέλ Έργος

Ο Ιεχωβά τραμπιντάς ι Ιερεμιάς για τι αβέλ προφήτης κο λαός Ιούδας. Βακερντάς λέσκε τι τζαλ κο λαός ντα τι προειδοποιήνελ-λεν τι τσσιναβέν τι κερέν μπέτι πράγματα. Ο Ιερεμίας βακερντάς: “Με ισινόμ μπουτ τερνό. Να τζανάβα σαρ τι κεράβ λάφι κο λαός”. Ο Ιεχωβά βακερντάς λέσκε: “Μα ντάρα. Με κα βακεράβ τούκε σο κα βακερές. Κα βοηθίναβ-τουτ”.

Ο Ιεχωβά βακερντάς κο Ιερεμίας τι γκίντελ ι πρεσβυτερόν κατά λαός, τι πφανγκέλ εκ κχορό ανγκλά-λέντε ντα τι βακερέλ: “Αντικάς κα αβέλ καταστροφή η Ιερουσαλήμ”. Κάνα ο Ιερεμίας κερντάς ανταβά σο βακερντάς λέσκε ο Ιεχωβά, ο πρεσβύτεροι χολιασάλε μπουτ. Εκ ιερέας, ο Πασχώρ, νταπλάς ι Ιερεμιάς ντα πφαντάς λέσκε βαστά ντα λέσκε πιντρέ καστέντζαρ. Σαρί ι ιράτ, ο Ιερεμίας ναστί κουνιαβέλας-πες. Ο Πασχώρ μουκχλάς-λες κάνα ντισιλό. Ο Ιερεμίας βακερντάς: “Να νταϊντίναβα γιαβέρ. Κα τσσιναβάβ τι κεράβ λάφι ι Ιεχωβάσκε”. Αλλά μπαγιά τσσιναντάς; Όχι. Κάνα ο Ιερεμίας σκεφτιντάς-λες πο μπουτ βακερντάς: “Ο λάφια ι Ιεχωβάσκε ισί σαρ γιακ σο πφαμπόλα αντρέ μάντε. Ναστί τσσιναβάβα τι κεράβ ο έργος ι Ιεχωβάσκο”. Ο Ιερεμίας συνεχιντάς τι προειδοποιήνελ ι λαός.

Ο Μπρεσά νακχλέ, ντα αβιλό εκ νεβό βασιλιάς κο Ιούδας. Ο ιερείς ντα ο ψευδοπροφήτες μισίνενας οντουλά σο βακερέλας ο Ιερεμίας. Βακερντέ κο άρχοντες: “Ανταβά τζενό πρέπει τι μερέλ”. Ο Ιερεμίας βακερντάς: “Άμα κα μουνταρέν-μαν, κα μουνταρέν εκχέ λατσσέ τζενές σο να φταίνελα. Με βακεράβα ο λάφια ι Ιεχωβάσκε, όχι μιρέ”. Κάνα ασουντέ-λες ανταβά ο άρχοντες, βακερντέ: “Ανταβά τζενό δεν πρέπει τι μερέλ”.

Ο Ιερεμίας συνεχίνελας τι κερέλ λάφι, ντα ο άρχοντες χολιασάλε μπουτ. Μανγκλέ κατά βασιλιάς τι μουνταρέλ ι Ιερεμιάς. Ο βασιλιάς βακερντάς λένγκε ότι μπορίνενας τι κερέν κο Ιερεμίας σο μανγκένας. Οτθάρ, λιντέ-λες ντα φουρτιντέ-λες εκχέ αχόρτ γουρνάτε πφερντέ τσικάσαρ, για τι μερέλ οτθέ αντρέ. Ο Ιερεμίας βουλιάνελας σιγά σιγά αντρέ κι τσικ.

Αζομάν εκ υπηρέτης ι βασιλιάσκο, ο Αβδέ-μέλεχ, βακερντάς κο βασιλιάς: “Ο άρχοντες φουρτιντέ τον Ιερεμία εκχέ γουρνάτε! Άμα κα μουκχάς-λες οτθέ, κα μερέλ”. Ο βασιλιάς ντινάς εντολή κο Αβδέ-μέλεχ τι λελ 30 μουρσέν πέσαρ ντα τι τζαλ τι νικαβέλ ι Ιερεμιάς κατά γούρνα. Σο βακερέσα, νανέ σουκάρ τι αβές τούι-ντα σαρ ο Ιερεμίας, σο να μουκχλάς τίποτα τι τσσιναβέλ-λες τι κερέλ ο έργος ι Ντεβλέσκο;