Σταρ Τερνέ σο Ντένας Καν ι Ιεχωβάς

Κάνα ο Ναβουχοδονόσορας γκερντάς ι αρχοντέν κατά Ιούδας κι Βαβυλώνα, τσσουντάς εκχέ υπηρετής υπεύθυνος λένγκε, τον Ασφενάζ. Ο Ναβουχοδονόσορας βακερντάς κο Ασφενάζ τι αρακχέλ καλά τερνέ τθερένας ι πο λατσσί υγεία ντα ισινέ ο πο γκοντιαβέρ. Ανταλά τερνέ μουρσά κα λένας σικλιαριπέ για τριν μπρεσά. Ανταβά σικλιαριπέ κα κερέλας-λεν τι λεν μπαρέ θέσεις κι Βαβυλώνα. Βον έπρεπε τι σικλιόν τι διαβάνεν, τι γραφίνεν ντα τι κερέν λάφι ι ακκαδική τσσιπ σο κερντιόλας λάφι κι Βαβυλώνα. Επίσης έπρεπε τι χαν ο χαμπίματα σο χάλας ο βασιλιάς ντα λέσκε υπηρέτες. Σταρ οντουλέ τερνένταρ ισινέ ο Δανιήλ, ο Ανανίας, ο Μισαήλ ντα ο Αζαρίας. Ο Ασφενάζ ντινάς-λεν νεβέ ναβά σο ισινέ συνηθισμέ κι Βαβυλώνα: Βαλτασάσαρ, Σεδράχ, Μισάχ ντα Αβδενεγώ. Μήπως ανταβά σικλιαριπέ σο λένας κα τσσιναβέλας-λεν τι υπηρετίνεν ι Ιεχωβάς;

Ανταλά σταρ μουρσά ισινέ αποφασισμέ τι ντεν καν κο Ιεχωβά. Τζανένας ότι να αβέλας-πες τι χαν μερικά χαμπίματα ι βασιλιάσκε σόσκε ο Νόμος ι Ιεχωβάσκο να μουκχέλας τι χαν μερικά ζώα. Ανταλέσκε, βακερντέ κο Ασφενάζ: “Μολίνασα-τουτ, μα τσσουβ-αμέν τι χας ζορίσαρ ο χαμπίματα ι βασιλιάσκε”. Ο Ασφενάζ βακερντάς λένγκε: “Άμα να κα χαν ντα ο βασιλιάς ντικχλάς ότι ισινέν σαρ νασφαλέ, κα μουνταρέλ-μαν!”

Ο Δανιήλ τθερέλας εκ ιδέα. Βακερντάς κο φύλακας: “Μολίνασα-τουτ τι ντες-αμέν σάντε λαχανικά ντα πανί για 10 ντιβεσά. Σοράν ντικχ σαρ κα ντικχίντιβας αμέν ντα σαρ κα ντικχίντιβεν ο τερνέ σο χάνα ο χαμπίματα ι βασιλιάσκε”. Ο φύλακας συμφωνιντάς.

Κάνα νακχλέ ο 10 ντιβεσά, ο Δανιήλ ντα ο τριν αμαλά λέσκε ντικχίντιβενας πο ζουρανέ κι υγεία κατά γιαβερά τερνέ. Ο Ιεχωβά ισινέ μπουτ χαρούμενος σο ντινέ-λες καν. Ντα ντινάς κο Δανιήλ ι σοφία τι αγαβέλ φαντασίες ντα σουνέ.

Κάνα τελειωσάλο λένγκο σικλιαριπέ, ο Ασφενάζ γκερντάς ανταλέ τσσαβέν κο Ναβουχοδονόσορας. Ο βασιλιάς κερντάς λάφι λέντζαρ ντα ντικχλάς ότι ο Δανιήλ, ο Ανανίας, ο Μισαήλ ντα ο Αζαρίας, ισινέ πο γκοντιαβέρ ντα τσσινέλας πο μπουτ λένγκι γκοντί κατά γιαβερά τσσαβέ. Τραμπιντάς ανταλέ σταρέν για τι κερέν μπουτί κι βασιλική αυλή. Ο βασιλιάς μανγκέλας μπουτ φαρ λένγκι συμβουλή κάνα έπρεπε τι λελ σημαντικές αποφάσεις. Ο Ιεχωβά κερντάς-λεν τι τθερέν πο μπουτ σοφία σαρέ κατά γιαβερά μουρσά ντα μάγους σο τθερέλας ο βασιλιάς.

Παρόλο σο ο Δανιήλ, ο Ανανίας, ο Μισαήλ ντα ο Αζαρίας να ισινέ πουμαρέ τθεμέστε να μπισταρντέ ότι ισινέ λαός ι Ιεχωβάσκο. Τούι, κα ντες-τουτ γκοντί πάντα ι Ιεχωβάς, ατζέ-ντα άμα το ντατ ντα τι ντάι να κα αβέν τούσαρ;