Να Πελέ Τελέ Κοτσίντζαρ

Αφού νακχλό χάνικ βακίτι από αζομάν σο ντικχλάς ο Ναβουχοδονόσορας ο σουνό με το άγαλμας, λατσσαρντάς εκ μπουτ μπαρί χρυσή εικόνα. Τσσουντάς-λα εκχέ μπαρέ τθανέστε σο βακέρντιβελας Δουρά ντα βακερντάς τι γκιντίντιβεν ανγκλάλ κι εικόνα ο πο σημαντικά τζενέ ι τθεμέσκε. Αντρέ ανταλέ τζενέντε ισινέ εμ ο Σεδράχ, ο Μισάχ ντα ο Αβδενεγώ. Ο Βασιλιάς ντινάς εντολή: “Κάνα κα ασουνέν ι σάλπιγγα, ι άρπα ντα ι γκάιντα, περέν τελέ κοτσίντζαρ ανγκλάλ κο άγαλμας! Κον να κα κερέλ-λες κα φουρτίντιβελ αντρέ κι μπαρί γιακ”. Σο κα κερένας ο τριν Εβραίοι; Κα ντένας λατρεία ο άγαλμας ή κα ντένας λατρεία σάντε ι Ιεχωβάς;

Αζομάν ο βασιλιάς βακερντάς τι αρχίνεν ο γκιλιά. Σαρέ πελέ τελέ ντα ντινέ λατρεία ο άγαλμας εκτός κατά Σεδράχ, κατά Μισάχ ντα κατά Αβδενεγώ. Μερικά τζενέ ντικχλέ-λες ανταβά ντα βακερντέ κο βασιλιάς: “Ανταλά τριν Εβραίοι να μανγκένα τι ντεν λατρεία το άγαλμας”. Ο Ναβουχοδονόσορας μπουτσσαντάς τι ανέν ανταλέ τρινέ μουρσέν ντα βακερντάς: “Κα νταβ-τουμέν ατζέκ εκ ευκαιρία για τι ντεν λατρεία ο άγαλμας. Άμα να κερντέν-λες ανταβά κα φουρτίναβ-τουμέν κι μπαρί γιακ. Ντα καέκ ντεβέλ να κα μπορίνελ τι σώνελ-τουμέν μάνταρ”. Βον βακερντέ λέσκε: “Να χρειαζίντιβασα γιαβέρ ευκαιρία. Αμαρό Ντεβέλ μπορίνελα τι σώνελ-αμέν. Αλλά ατζέ-ντα άμα να κα σώνελ-αμέν, βασιλιά, αμέν να κα ντας λατρεία ο άγαλμας”.

Ο Ναβουχοδονόσορας χολιασάλο μπουτ. Βακερντάς πι υπηρετόντε: “Κερέν ι γιακ εφτά φαρ πο ζουρανί!” Σοράν βακερντάς πι στρατιωτέντε: “Πφάντεν-λεν ντα φουρτίνεν-λεν αντρέ κι γιακ!” Η γιακ πφαμπόλας αζόμ μπουτ, σο ο στρατιώτες σο γκιλέ χάνικ πασέ, αμέσως μουλέ. Ι τρινέ Εβραιόν περαντέ-λεν κι γιακ. Αλλά κάνα ντικχλάς ο Ναβουχοδονόσορας αντρέ, ντικχλάς σταρέ μουρσέν τι πφιρέν αντρέ κι μπαρί γιακ, όχι τριν. Νταρασάλο ντα πουτσλάς ι τζενέν σο ισινέ λέσαρ: “Αμέν τρινέ μουρσέν να φουρτιντάμ αντρέ κι γιακ; Με ντικχάβα σταρέν, ντα ο εκ λένταρ μοιάζελα με άγγελος!”

Ο Ναβουχοδονόσορας γκιλό πο πασέ κι γιακ ντα ντινάς βίκος: “Νικιόν αβρί τουμέν, ο υπηρέτες ι Ντεβλέσκε σο Ισί Πο Οπρέ Σαριλένταρ!” Καέκ να πακιάλας οντουβά σο ντικχέλας, ότι ο Σεδράχ, ο Μισάχ ντα ο Αβδενεγώ, νικιόνας κατά γιακ χωρίς τι παθίνεν τίποτα. Λένγκι τσίπα, λένγκε μπαλά ντα λένγκε σέα να πφαμπιλέ ιτς, ντα να κχάντενας κάπνια.

Ο Ναβουχοδονόσορας βακερντάς: “Ο Ντεβέλ σο πακιάνα ο Σεδράχ, ο Μισάχ ντα ο Αβδενεγώ ισί μπουτ μπαρό. Βοβ μπουτσσαντάς πι αγγελός ντα σωντάς-λεν. Να υπαρχίντιβελα γιαβέρ ντεβέλ σαρ λένγκο”.

Σαρ ανταλά τριν Εβραίοι, ισινάν αποφασισμέ τι ατσσός πιστός ντα αφοσιωμέ κο Ιεχωβά σο-ντα τι αβέλ-πες;