Εκ Βασιλεία σαρ εκ Μπαρό Δέντρος

Εκ ιράτ, ο Ναβουχοδονόσορας ντικχλάς εκ τρομακτικός σουνό. Βικιντάς ι γκοντιαβέρ μουρσέν για τι βακερέν λέσκε σο μανγκέλας τι βακερέλ ο σουνό σο ντικχλάς. Αλλά καέκ να μπορίνελας τι εξηγίνελ λέσκε ο σουνό. Σοράν, ο Βασιλιάς κερντάς λάφι κο Δανιήλ.

Ο Ναβουχοδονόσορας βακερντάς κο Δανιήλ: “Μι σουνέστε, ντικχλόμ εκ δέντρος. Μπαριλό αζόμ μπουτ σο ερεσλό μέχρι κο ουρανός. Ντικχίντιβελας σαρί κι πφουβ. Τθερέλας σουκάρ φύλλα ντα μπουτ καρπούς. Ο ζώα μπεσένας τελάλ κατά βουτσσάλ λέσκι, ντα ο τσιρικλέ κερένας πουμαρέ φωλιές κο κλαδιά λέσκε. Αζομάν, γουλίστιλο εκ άγγελος κατά ουρανός ντα ντινάς βίκος: «Τσσινέν ο δέντρος ντα λέσκε κλαδιά. Αλλά τελάλ λέσκο κορμός ντα ο ρίζες μουκχέν-λεν αντρέ κι πφουβ, ντα τσσουβέν ντονταλάι σιδερένια ντα χάλκινα μπιζιλίκια για τι πφάντεν-λες. Ο γκι ι δεντρόσκο κα αλλάνελ, ντα να κα ατσσόλ τζενέσκο γκι αλλά κα αβέλ γκι σο τθερέλα ο ζώος, ντα κα ατσσόλ αντικάς εφτά βακίτια. Σαρέ ο τζενέ κα σικλιόν ότι ο Ντεβέλ ισί Άρχοντας ντα ότι μπορίνελα τι ντελ πι βασιλεία κάστε μανγκέλα»”.

Ο Ιεχωβά σικαντάς κο Δανιήλ ι σημασία σο τθερέλας ο σουνό. Κάνα ο Δανιήλ αγαντάς σο μανγκέλας τι βακερέλ ο σουνό, νταρασάλο. Βοβ βακερντάς: “Βασιλιά, μακάρι ο σουνό τι αβέλας τι ντουσμανίνγκε, ντα όχι τούκε. Ο μπαρό δέντρος σο τσσιντιλό ισινάν τούι. Κα χασαρές τι βασιλεία ντα κα χας τσαριά κο χωράφια σαρ χάνα ο άγρια ζώα. Αλλά επειδή ο άγγελος βακερντάς τι ατσσόλ τελάλ ο κορμός ντα ο ρίζες, κα αβές πάλι βασιλιάς”.

Σοράν από εκ μπρες, ο Ναβουχοδονόσορας πφιρέλας οπράλ κι νταράτσα σο τθερέλας λέσκο παλάτι ντα καμαρώνελας ι Βαβυλώνα. Αζομάν βακερντάς: “Ντικχ σο σουκάρ πόλη κερντόμ. Σο μπαρό ντα σημαντικός τζενό ισινόμ!” Καζόμ κερέλας λάφι, ασούντιλι εκ φωνή κατά ουρανός τι βακερέλ: “Ναβουχοδονόσορα! Ακανά χασαρντάν τι βασιλεία”.

Οντουβά σαάτι, ο Ναβουχοδονόσορας ντιλίντιλο ντα αβιλό σαρ εκ άγριος ζώος. Αναγκασάλο τι νασέλ πι παλατίσταρ ντα γκιλό τι τζουβντιόλ γιεκ με το άγρια ζώα κο χωράφια. Ο μπαλά του Ναβουχοδονόσορα μπαριλέ ντα αβιλέ σαρ ο πακά σο τθερέλα ο αετός, ντα ο ναγιά λέσκε αβιλέ σαρ ο ναγιά ι τσιρικλένγκε.

Αφού νακχλέ εφτά μπρεσά, ο Ναβουχοδονόσορας αβιλό λατσσές κι γκοντί ντα ο Ιεχωβά κερντάς-λες πάλι βασιλιάς κι Βαβυλώνα. Αζομάν ο Ναβουχοδονόσορας βακερντάς: “Ντάβα δόξα κο Ιεχωβά, σο ισί βασιλιάς κο ουρανός. Ακανά τζανάβα ότι ο Ιεχωβά κερέλα κουμάντος. Περαβέλα τελέ ι μπαρικανέ τζενέν ντα μπορίνελα τι ντελ ι βασιλεία κάστε μανγκέλα”.