Η Εσθήρ Σώνελα πι Λαός

Η Εσθήρ ισινέ εκ Ιουδαία τσσάι σο τζουβντιόλας σε εκ πόλη κι Περσία, κο Σούσα. Μπουτ μπρεσά πο ανγκλέ, ο Ναβουχοδονόσορ λιντάας λάκι φαμιλί κατά Ιερουσαλήμ. Μπαριαρντάς-λα λάκο ξάδελφος ο Μαροδοχαίος, σο υπηρετίνελας τον Ασσουήρη σο ισινέ βασιλιάς κι Περσία.

Ο βασιλιάς Ασσουήρης μανγκέλας εκχέ νεβέ βασιλισσά. Ο υπηρέτες λέσκε γκερντέ λέσκε ι πο σουκάρ τζουβλίν οντουλέ τθεμέσκε. Εκ οντουλέ τζουβλίνταρ ισινέ η Εσθήρ-ντα. Σαρέ οντουλέ τζουβλίνταρ ο βασιλιάς τραμπιντάς τι αβέλ βασίλισσα η Εσθήρ. Ο Μαροδοχαίος βακερντάς λάκε μα τι μουτθαβέλ ότι ισινέ Ιουδαία.

Εκ μπαρικανό μουρς, ο Αμάν, ισινέ ο πο μπαρό σαρέ κατά άρχοντες. Μανγκέλας τι περέν σαρέ κοτσίντζαρ ανγκλά-λέστε. Ο Μαροδοχαίος όμως να κερέλας-λες ανταβά, ντα ο Αμάν χολιασάλο αζόμ μπουτ σο μανγκέλας τι μουνταρέλ-λες. Κάνα ο Αμάν σικλιλό ότι ο Μαροδοχαίος ισινέ Ιουδαίος αρακχλάς εκ τρόπος για τι μουνταρέλ σαρέ ι Ιουδαιόν σο τζουβντιόνας οντουλέ τθεμέστε. Βακερντάς κο βασιλιάς: “Ο Ιουδαίοι να μανγκένα μπέσα. Πρέπει τι κερές κάτι λέντζαρ”. Ο Ασσουήρης βακερντάς: “Κερ σο αγαβέσα”, ντα ντινάς-λες ι εξουσία τι νικαβέλ εκ νόμος. Ο νόμος σο νικαντάς ο Αμάν βακερέλας κο λαός ότι πρέπει τι μουνταρέν σαρέ ι Ιουδαιόν κο μάσεκ Αδάρ, στις 13. Ο Ιεχωβά, όμως, ντικχέλας σο αβέλας-πες.

Η Εσθήρ να τζανέλας τίποτα οντουλέ νομόσκε. Ανταλέσκε ο Μαροδοχαίος μπουτσσαντάς λάκε εκ αντίγραφος λέσκο ντα βακερντάς λάκε: “Τζα, κερ λάφι κο βασιλιάς”. Η Εσθήρ βακερντάς: “Κον τζάλα κο βασιλιάς χωρίς τι μανγκέλ-λες βοβ, μουνταρένα-λες. Νακχλέ 30 ντιβεσά σο ο βασιλιάς να μανγκλάς μάνταρ τι τζαβ οτθέ! Αλλά με κα τζαβ. Αν κα βάντελ πο ραβδίς κάρινγκ μάντε κα τζουβντιάβ. Αν όχι, κα μεράβ”.

Η Εσθήρ γκιλί κο βασιλιάς. Κάνα ο βασιλιάς ντικχλάς-λα, βαντιντάς πο ραβδίς κάρινγκ λάτε. Βόι γκιλί πασέ λέστε, ντα ο βασιλιάς πουτσλάς-λα: “Σο μανγκέσα τι κεράβ τούκε Εσθήρ;” Βόι βακερντάς: “Μανγκάβα τι κεράβ τούκε ντα για τον Αμάν εκ τραπέζι”. Κο τραπέζι η Εσθήρ βακερντάς ότι κα κερέλας λένγκε ατζέκ εκ τραπέζι. Κο γιαβέρ τραπέζι, ο βασιλιάς πουτσλάς-λα ατζέ εκ φαρ: “Σο μανγκέσα τι κεράβ τούκε;” Βόι βακερντάς: “Εκ τζενό κα μουνταρέλ μαν ντα μι λαός. Μολίνασα-τουτ, τι αρακχαβές-αμέν”. Ο βασιλιάς πουτσλάς: “Κον μανγκέλα τι μουνταρέλ-τουμέν;” Βόι βακερντάς: “Ακαβά γκεραλό τζενό, ο Αμάν”. Ο Ασσουήρης χολιασάλο αζόμ μπουτ σο βακερντάς τι μουνταρέν τον Αμάν σουγκό.

Αλλά καέκ να μπορίνελας τι λελ παλάλ ο νόμος σο νικαντάς ο Αμάν, ούτε ο ίδιος ο βασιλιάς. Οτθάρ, ο βασιλιάς κερντάς ι Μαροδοχαιός πο μπαρό σαρέ κατά άρχοντες ντα ντινάς-λες ι εξουσία τι νικαβέλ εκ νεβό νόμος. Ο νόμος σο νικαντάς ο Μαροδοχαίος μουκχέλας ι Ιουδαιόν τι αρακχαβέν πουμαρό νεαυτός κατά επίθεση. Κο 13 Αδάρ, ο Ιουδαίοι νικιντέ πουμαρέ ντουσμανίν. Οντουλέ ντιβεσέσταρ, γιορτάνενας ανταβά ντιβές κάθε μπρες.