Ο Βουτσσέ Ντουβάρια κι Ιερουσαλήμ

Κα τζας χάνικ μπρεσά παλάλ. Ο Νεεμίας, εκ υπηρέτης σο τθερέλας ο βασιλιάς Αρταξέρξης, ισινέ Ισραηλίτης σο τζουβντιόλας κο Σούσα, εκ πόλη κι Περσία. Λέσκο πφραλ αβιλό κατά Ιούδας ντα τθερέλας μπέτι αμπέρια: “Ο λαός σο βουρτισάλο κι Ιερουσαλήμ νανέ αρακχαντό. Ο βουτσσέ ντουβάρια ντα ο μπαρέ πόρτες κι Ιερουσαλήμ σο καταστραφιντέ-λεν ο Βαβυλώνιοι να κερντιλέ πάλι”. Ο Νεεμίας τσσουντάς πι γκίστε. Μανγκέλας τι βουρτίνελ κι Ιερουσαλήμ για τι βοηθίνελ. Οτθάρ κερντάς προσευχή για τι μουκχέλ-λες ο βασιλιάς τι τζαλ οτθέ.

Πο σοράν, ο βασιλιάς ντικχλάς ότι ο Νεεμίας ισινέ στεναχωριμέ. Βακερντάς: “Να ντικχλόμ-τουτ ποτές αντικάς. Σο αβιλό;” Ο Νεεμίας βακερντάς: “Σαρ αβέλα-πες μα τι αβάβ στεναχωριμέ αφού μι πόλη, η Ιερουσαλήμ, ισί κατεστραμέ;” Ο βασιλιάς πουτσλάς: “Σο μανγκέσα τι κεράβ τούκε;” Οντιά στιγμή, ο Νεεμίας κερντάς προσευχή αντρά-πέσταρ. Αζομάν βακερντάς: “Μολίναβα-τουτ, μουκχ-μαν τι τζαβ κι Ιερουσαλήμ ντα τι λατσσαράβ ο βουτσσέ ντουβάρια”. Ο βασιλιάς Αρταξέρξης μουκχλάς ι Νεεμιάς τι τζαλ ντα κανονιντάς τι αβέλ αρακχαντό κο μπαρό ταξίδι σο κα κερέλας. Κερντάς επίσης ι Νεεμιάς κυβερνήτης κο Ιούδας ντα ντινάς-λες καστά για τι λατσσαρέλ ο μπαρέ πόρτες κι Ιερουσαλήμ.

Κάνα ο Νεεμίας ερεσλό κι Ιερουσαλήμ, γκιλό ντονταλάι για τι ντικχέλ σο ζημιές τθερένας ο βουτσσέ ντουβάρια. Σοράν μανγκλάς τι γκιντίντιβεν ο ιερείς ντα οντουλά σο κερένας κουμάντος ντα βακερντάς λένγκε: “Ανταβά ισί μπουτ μπέτι. Πρέπει τι αρχίνας τι κεράς μπουτί”. Ο Λαός συμφωνιντάς, ντα αρχιντέ τι λατσσαρέν ο βουτσσέ ντουβάρια.

Αλλά ο ντουσμάνια ι Ισραηλιτένγκε πρασάνας-λεν ντα βακερντέ: “Ατζέ-ντα εκ αλεπού κα περαβέλας ο ντουβάρια σο λατσσαρένα”. Οντουλά σο κερένας μπουτί να ντένας-λεν σημασία ντα συνεχίνενας τι λατσσαρέν ο ντουβάρια. Ο ντουβάρια καζόμ τζάλας κερντιόνας πο βουτσσέ ντα ζουρανέ.

Λένγκε ντουσμάνια λιντέ ι απόφαση τι κερέν ξαφνικά επίθεση σε μπουτ σημεία κι Ιερουσαλήμ κι ίδια στιγμή. Κάνα ο Ιουδαίοι ασουντέ-λες ανταβά, νταρασάλε μπουτ. Αλλά ο Νεεμίας βακερντάς λένγκε: “Μα νταρέν. Ο Ιεχωβά ισί αμέντζαρ”. Τσσουντάς τζενέν τι αρακχαβέν οντουλέν σο κερένας μπουτί, ντα λένγκε ντουσμάνια ναστί κερένας επίθεση.

Ο βουτσσέ ντουβάρια ντα ο μπαρέ πόρτες τελειωσάλε μπουτ σουγκό, αντρέ σε 52 ντιβεσά. Ο Νεεμίας αντάς σαρέ ι Λευιτέν κι Ιερουσαλήμ για τι γιορτάνεν σο λατσσάρντιλε ο ντουβάρια. Ιλιαντάς-λεν ντουέ ομαδέντε για τι γκιλιαβέν ι Ιεχωβάσκε. Νικλιντέ κο βουτσσέ ντουβάρια κατά σκάλες σο ισινέ κι Πόρτα της Πηγής ντα σοράν ο ντούι ομάδες πφιρένας εκ ακατάρ εκ οκουτάρ ντονταλάι κατά πόλη. Κχελένας σάλπιγγα, κύμβαλα ντα άρπα ντα γκιλιαβένας ι Ιεχωβάσκε. Ο Έσδρας ισινέ κι εκ ομάδα ντα ο Νεεμίας κι γιαβέρ, ντα κο τέλος αρακχλέ-πες κο ναός. Σαρό ο λαός​—μουρσά, τζουβλιά ντα τσσαβέ—​κερντέ θυσίες ι Ιεχωβάσκε ντα ισινέ μπουτ χαρούμενοι. Ο βίκος σο ντένας κατά χαρά σο τθερένας ασούντιβελας ντουράλ.