Ο Τερνό Ιησούς

Ο Ιωσήφ ντα η Μαρία τζουβντιόνας κι Ναζαρέτ γιεκ ι Ιησούσαρ ντα πουμαρέ γιαβερέ τσσαβέντζαρ ντα τσσαΐντζαρ. Ο Ιωσήφ κερέλας μπουτί σαρ ξυλουργός για τι ντελ ο αναγκαία πι φαμιλιάτε, ντα σικλιαρέλας-λεν ι Ιεχωβάσκε ντα λέσκε Νομόσκε. Σαρί η φαμιλί τζάλας συνέχεια κι συναγωγή για τι ντεν λατρεία ι Ιεχωβάς ντα κάθε μπρες τζάνας κι Ιερουσαλήμ για τι κερέν ο Πάσχας.

Κάνα ο Ιησούς ισινέ 12 μπρεσένγκο, λέσκι φαμιλί κερντάς ατζέκ εκ φαρ ο μπαρό ταξίδι μέχρι κι Ιερουσαλήμ. Η πόλη ισινέ πφερντί τζενέ σο αβιλέας για τι κερέν ο Πάσχας. Σοράν, ο Ιωσήφ ντα η Μαρία αρχισάλε ο μπαρό ταξίδι για τι βουρτίνεν πουμένγκε κχερέ, ντα αμντίνενας ότι ο Ιησούς βουρτίνελας γιεκ λέντζαρ. Αλλά κάνα ροντιντέ λέσκε αντρέ πουμαρέ τζενέντε να μπορίνενας τι αρακχέν-λες.

Βουρτισάλε κι Ιερουσαλήμ ντα, τριν σαστέ ντιβεσά, ρόντενας πουμαρέ τσσαβέσκε. Σοράν, γκιλέ κο ναός. Ο Ιησούς ισινέ οτθέ. Μπεσέλας αντρέ κο δάσκαλοι, ασουνέλας προσεκτικά ντα κερέλας μπουτ σοφές ερωτήσεις. Ο δάσκαλοι σαστισάλε αζόμ μπουτ κατά Ιησούς σο αρχισάλε βον-ντα τι πουτσέν-λες. Ατσσόνας πουταρντέ μόσαρ κατά απαντήσεις σο ντέλας. Αγαντέ ότι ο Ιησούς αγαβέλας λατσσές ο Νόμος ι Ιεχωβάσκο.

Ο Ιωσήφ ντα η Μαρία νταρασάλεας μπουτ. Η Μαρία βακερντάς λέσκε: “Μο τσσαβό, ροντιντάμ τούκε κάι τι μανγκές! Κατέ ισινάνας;” Ο Ιησούς βακερντάς: “Να τζανένας ότι πρέπει τι αβάβ μι Νταντέσκε κχερέστε;”

Ο Ιησούς βουρτισάλο πι νταντέσαρ ντα πι νταγιάσαρ πι κχερέστε κι Ναζαρέτ. Ο Ιωσήφ σικλιαρντάς ι Ιησούς ι μπουτί σο κερέλας σαρ ξυλουργός. Σο τζενό πακιάσα ότι ισινέ ο Ιησούς τερνό; Καζόμ μπαριόλας ο Ιησούς αβέλας ατζέ πο γκοντιαβέρ ντα αβέλας εμ ο γκι ι Ντεβλέσκο εμ ι τζενένγκο λέσαρ.