Η Τζουβέλ κο Πηγάδι

Σοράν κατά Πάσχας, ο Ιησούς ντα λέσκε μαθητές νακχλέ κατά Σαμάρεια καζόμ βουρτίνενας κι Γαλιλαία. Πασέ κι πόλη Συχάρ, ο Ιησούς μπεσλό εκχέ τθανέστε σο βακέρντιβελας ο πηγάδι του Ιακώβ. Καζόμ ξεκουράντιβελας οτθέ, λέσκε μαθητές γκιλέ κι πόλη για τι κινέν χαμπίματα.

Αζομάν αβιλί εκ τζουβέλ κο πηγάδι για τι νικαβέλ πανί. Ο Ιησούς βακερντάς λάκε: “Ντε-μαν τι πιαβ”. Βόι βακερντάς: “Σόσκε κερέσα μάνγκε λάφι; Ισινόμ Σαμαρείτισσα. Ο Ιουδαίοι να κερένα λάφι κο Σαμαρείτες”. Ο Ιησούς βακερντάς λάκε: “Άμα τζανέας κον ισινόμ, τούι κα μανγκέας μάνταρ τι πις ντα με κα ντάβας-τουτ πανί σο ντέλα ζωή”. “Σο μανγκέσα τι βακερές;” πουτσλάς η τζουβέλ. “Τούι να τθερέσα ούτε κουβάς”. Ο Ιησούς βακερντάς: “Κον κα πιλ ο πανί σο ντάβα-λες, ποτές να κα μερέλ πάλι πανίσκε”. Η τζουβέλ βακερντάς: “Κύριε, ντε-μαν ανταβά πανί”.

Αζομάν ο Ιησούς βακερντάς λάκε: “Αν τι ρομές κο πηγάδι”. Βόι βακερντάς: “Να τθεράβα ρομές”. Βοβ βακερντάς: “Μπαγιά βακερέσα. Παντρισάλαν παντς φαρ, ντα ακανά τζουβντιόσα εκχέσαρ σο να ισινέν παντριμέ”. Η τζουβέλ βακερντάς: “Ντικχάβα ότι ισινάν προφήτης. Μο λαός πακιάλα ότι μπορίνασα τι ντας λατρεία ι Ντεβλές ανταλέ βεσέστε, αλλά ο Ιουδαίοι βακερένα ότι μπορίνασα τι ντας-λες λατρεία σάντε κι Ιερουσαλήμ. Με πακιάβα ότι, κάνα κα αβέλ ο Μεσσίας, κα σικλιαρέλ-αμέν σαρ τι ντας λατρεία”. Αζομάν ο Ιησούς βακερντάς κάτι σο να βακερντάας καεκχέ γιαβερέστε: “Με ισινόμ ο Μεσσίας”.

Η τζουβέλ γκιλί σουγκό κι πόλη σο μπεσέλας ντα βακερντάς κο Σαμαρείτες: “Πακιάβα ότι αρακχλόμ ι Μεσσιάς. Τζανέλα σαρέ ο πράγματα μάνγκε. Ελάν τι ντικχέν”. Βον γκιλέ παλά-λάτε κο πηγάδι ντα ασουντέ ι Ιησούς τι σικλιαρέλ.

Ο Σαμαρείτες βακερντέ ι Ιησούσκε τι τζαλ τι μπεσέλ κι Σαμάρεια. Ντούι ντιβεσά σικλιαρέλας οτθέ, ντα μπουτ τζενέ πακιαντέ λέστε. Βον βακερντέ κι τζουβέλ κατά Σαμάρεια: “Ασουντάμ ανταλέ τζενές ντα τζανάσα ότι μπαγιά ισί οντουβά σο κα σώνελ ι ντουνιάς”.