Ο Ιησούς Κερέλα Μπουτ Θαύματα

Ο Ιησούς αβιλό κι πφουβ για τι μουτθαβέλ ο λατσσέ αμπέρια ι Ντεβλέσκε Βασιλειάκε. Για τι σικαβέλ σο κα κερέλ ο Ιησούς σαρ Βασιλιάς, ο Ιεχωβά ντινάς-λες άγιος πνεύμας για τι κερέλ θαύματα. Μπορίνελας τι κερέλ λατσσές ι τζενέν σαρέ κατά νασφαλίματα. Κατέ-ντα τι ισινέ, τζάνας λέστε νασφαλέ τζενέ για τι βοηθίνελ-λεν, ντα βοβ κερέλας λατσσές σαριλέν. Ο κορορέ μπορίνενας τι ντικχέν, ο κασουκέ μπορίνενας τι ασουνέν, ο μπανγκέ μπορίνενας τι πφιρέν ντα οντουλά σο ισινέ δαιμονισμέ ελευθερώντιβενας. Ατζέ-ντα άμα κα ασταρένας χάνικ λέσκε σέα, κα αβένας λατσσές. Ο τζενέ τζάνας παλάλ κατά Ιησούς κατέ-ντα τι τζάλας. Ατζέ-ντα κάνα μανγκέλας τι ατσσόλ κορκορό, ο Ιησούς να νασκιαρντάς ποτές καεκχές.

Εκ φαρ μερικά τζενέ γκερντέ εκχέ μπανγκέ μουρσές εκχέ κχερέστε σο μπεσέλας ο Ιησούς. Αλλά ο κχερ τθερέλας αζόμ μπουτέ τζενέν σο ναστί ντένας αντρέ. Οτθάρ πουταρντέ εκ γούρνα κο νταβάνι ντα γουλιαρντέ ι μουρσές κο Ιησούς. Αζομάν ο Ιησούς βακερντάς κο μουρς: “Ίστι ντα πφιρ”. Κάνα βοβ πφιρντάς, ο τζενέ να πακιάνας οντουβά σο ντικχένας.

Εκ γιαβέρ φαρ καζόμ ο Ιησούς ντέλας αντρέ εκχέ γκαβέστε, 10 μουρσά σο τθερένας λέπρα ντένας βίκος ντουράλ: “Ιησού, βοήθινε-αμέν!” Οντουλά μπρεσά, κον τθερέλας λέπρα να αβέλας-πες τι τζαλ πασέ γιαβερέ τζενέντε. Ο Ιησούς βακερντάς οντουλέ μουρσέντε τι τζαν κο ναός, επειδή ο Νόμος ι Ιεχωβάσκο βακερέλας ότι αντικάς έπρεπε τι κερέν ο τζενέ σο τθερένας λέπρα κάνα αβένας λατσσές. Καζόμ τζάνας οτθέ, αβιλέ λατσσές. Κάνα ο εκ τανό λένταρ αγαντάς ότι αβιλό λατσσές, βουρτισάλο κο Ιησούς για τι βακερέλ λέσκε ευχαριστώ ντα τι ντελ δόξα ι Ντεβλές. Κατά 10 μουρσά, σάντε βοβ βακερντάς ευχαριστώ κο Ιησούς.

Εκ τζουβέλ σο ισινέ νασφαλί 12 μπρεσά να νταϊντίνελας γιαβέρ ντα μανγκέλας τι αβέλ λατσσές. Κάνα ο Ιησούς ισινέ αντρέ μπουτέ τζενέντε, γκιλί παλά-λέστε ντα ασταρντάς χάνικ λέσκε σέα. Αβιλί λατσσές αμέσως. Κάνα αβιλό-πες ανταβά ο Ιησούς πουτσλάς: “Κον ασταρντάς-μαν;” Η τζουβέλ νταρασάλι μπουτ, αλλά γκιλί ντα βακερντάς ι αλήθεια. Ο Ιησούς λοκχιαρντάς λάκο γκι ακαλέ λαφίντζαρ: “Μι τσσάι τζα τούκε λατσσιμάσαρ”.

Εκ τζενό σο τθερέλας μπαρί θέση κι συναγωγή, ντα βακερένας λέσκε Ιάειρος, μολιντάς ι Ιησούς: “Έλα μι κχερέστε! Μι τσσαγιορί ισί μπουτ νασφαλί”. Αλλά πριν τι ερεσαβέλ ο Ιησούς τι τζαλ λέσκε κχερέστε η τσσάι μουλί. Κάνα ερεσλό οτθέ ο Ιησούς ντικχλάς ότι γκιντισάλεας μπουτ τζενέ για τι ροβέν λάκε γιεκ λάκε φαμιλιάσαρ. Ο Ιησούς βακερντάς: “Μα ροβέν. Η τσσάι σοβέλα”. Αζομάν ασταρντάς ο βας ι τσσαγιάκο ντα βακερντάς: “Χουρντίε, ίστι!” Αμέσως, βόι ιστίντιλι, ντα ο Ιησούς βακερντάς λάκε νταντέσκε ντα λάκε νταγιάκε τι ντεν-λα κάτι τι χαλ. Σκέφτινε σαρ νιωσάλε λάκο ντατ ντα λάκι ντάι!