Κον Ισί ο Βασιλιάς κι Βασιλεία κι Ντεβλέσκι;

• Κα τραμπίντιβελας κατά Ντεβέλ. «Με τσσουντόμ μι βασιλιάς . . . Κα νταβ-τουτ τθεμά σαρ κληρονομιά ντα σαρί ι πφουβ κα λες-λα τούκε».​—Ψαλμός 2:6, 8.

• Κα αστάρντιβελας κατά βασιλιάς Δαβίδ. «Μαξίμι μπιάντιλο αμέντε, τσσαβό ντιντιλό αμέντε . . . Κα κερέλ κουμάντος σαρί κι πφουβ ντα η ειρήνη να κα τσσιναβέλ τι μπαριόλ, κο θρόνος κι Δαβιδίσκο ντα λέσκε βασιλειάτε. Λέσκι βασιλεία κα αβέλ ζουρανί».​—Ησαΐας 9:6, 7.

• Κα μπιάντιβελας κι Βηθλεέμ. «Βηθλεέμ . . . , τούταρ κα νικιόλ μάνγκε οντουβά σο κα αβέλ άρχοντας . . . Σαρέ ο τζενέ κι πφουβ κα σικλιόν καζόμ μπαρό ισί».​—Μιχαίας 5:2, 4.

• Ο τζενέ να κα μανγκένας-λες ντα κα μουνταρένας-λες. «Ο τζενέ να σεβαντέ-λες, ντα αμντισάλαμ ότι να τθερέλας καέκ αξία . . . Καρφωντέ-λες αμαρέ αμαρτιένγκε· τσσιντιντάς μπουτ αμαρέ λαθίνγκε».​—Ησαΐας 53:3, 5.

• Κα ιστίλας κατά μουλέ ντα κα δοξάντιβελας. «Να κα μουκχές-μαν κο Μεζάρι. Να κα μουκχές οντουλές σο ισί αφοσιωμέ τούτε τι κερνιόλ κι γούρνα . . . Κο δεξιά τούταρ ισί ευτυχία για πάντα».​—Ψαλμός 16:​10, 11.

Ο Ιησούς Χριστός Ισί ο πιο Λατσσό για τι Αβέλ Βασιλιάς

Σαρέ οντουλά σο πρέπει τι τθερέλ ο πιο λατσσό Βασιλιάς, τθερέλα-λεν σάντε ο Ιησούς Χριστός. Εκ άγγελος βακερντάας κι Μαρία, κι ντάι κι Ιησούσκι: «Ο . . . Ντεβέλ κα ντελ-λες ο θρόνος ι Δαβιδίσκο, λέσκε Νταντέσκο, . . . ντα λέσκι Βασιλεία να κα τθερέλ τέλος».​—Λουκάς 1:​31-33.

Ο Ιησούς ποτές να κερντάς κουμάντος κι πφουβ. Αλλά κα κερέλ κουμάντος ι τζενέν κατά ουρανός σαρ Βασιλιάς κι Βασιλεία κι Ντεβλέσκι. Σόσκε ισί ο πιο λατσσό για τι αβέλ Βασιλιάς; Ντικχέν σο κερντάς κάνα ισινέ κι πφουβ.

• Ο Ιησούς πφαμπόλας ι τζενένγκε. Ο Ιησούς βοηθίνελας μουρσέν ντα τζουβλίν, τερνέν ντα πφουρέν, χουλανέν ντα τσορορέν κατάρ-ντα τι αβένας. (Ματθαίος 9:​36· Μάρκος 10:​16) Κάνα εκ λεπρός βακερντάς λέσκε: «Άμα τούι μανγκέσα, μπορίνεσα τι καθαρίνες-μαν», ο Ιησούς τζιτζισάλο λέσκε ντα κερντάς-λες λατσσές.​—Μάρκος 1:​40-42.

• Ο Ιησούς σικλιαρντάς-αμέν σαρ τι κεράς ι Ντεβλέσκο γκι. Βοβ βακερντάς: «Ναστί υπηρετίνενα σαρ δούλοι ι Ντεβλές ντα ο Χουλανιπέ». Επίσης, βακερντάς ότι πρέπει τι κεράς κο γιαβερά οντουβά σο κα μανγκάας τι κερέν βον αμένγκε. Ντα σικαντάς ότι ι Ντεβλές χάλα-λες ανάγκη, όχι σάντε οντουβά σο κεράσα, αλλά οντουβά-ντα σο τθεράσα αμαρέ γκοντιάτε ντα αμαρέ γκίστε. Οτθάρ, για τι κεράς ι Ντεβλέσκο γκι, πρέπει τι κεράς κουμάντος οντουλά σο τθεράσα αμαρέ γκίστε. (Ματθαίος 5:​28· 6:​24· 7:​12) Κάτι γιαβέρ σο βακερντάς ο Ιησούς ισί ότι, για τι αβάς μπαγιά ευτυχισμέ, πρέπει τι σικλιάς σο μανγκέλα αμένταρ ο Ντεβέλ ντα σοράν τι κεράς-λες.​—Λουκάς 11:28.

• Ο Ιησούς σικλιαρντάς σο μανγκέλα τι βακερέλ τι μανγκάς. Οντουλά σο κερέλας ντα βακερέλας ο Ιησούς τθερένας ζορ ντα ερεσένας κο γκι οντουλένγκο σο ασουνένας-λες. «Ο τζενέ ατσσιλέας πουταρντέ μόσαρ λέσκε σικλιαριμάσταρ, σόσκε οντουλά σο σικλιαρέλας-λεν αβένας κατά Ντεβέλ». (Ματθαίος 7:​28, 29) Βακερντάς ι τζενένγκε: «Τι μανγκέν τουμαρέ ντουσμανίν». Ντα προσευχισάλο μερικέ τζενένγκε οντουλένταρ σο μουνταρντέ-λες: «Ντάντε, συγχώρινε-λεν, σόσκε να τζανένα σο κερένα».​—Ματθαίος 5:​44· Λουκάς 23:34.

Ο Ιησούς, σο μανγκέλα αντράλ πι γκίσταρ τι βοηθίνελ ι τζενέν ντα ισί πφερντό λατσσιπέ, τθερέλα σαρέ οντουλά σο πρέπει τι τθερέλ για τι αβέλ λατσσό Βασιλιάς σαρί κι πφουβ. Αλλά κάνα αρχίνελα τι κερέλ κουμάντος;