Σόσκε Χρειαζίντιβασα ι Βασιλεία ι Ντεβλέσκι;

Η Αγία Γραφή βακερέλα ότι εκ άγγελος, σο βακέρντιλο Σατανάς ο Διάβολος, γκιλό κόντρα ι Ντεβλέσαρ ντα βακερντάς ότι ο Ντεβέλ να τθερέλα ο δικαίωμας τι κερέλ κουμάντος. Βακερντάς ότι ο τζενέ κα αβένας πιο ευτυχισμέ άμα να κα βακερέλας λένγκε ο Ντεβέλ σο τι κερέν ντα άμα να κα κερέλας-λεν κουμάντος. Δυστυχώς, αμαρό πρώτος ντατ ντα αμαρί πρώτη ντάι, ο Αδάμ ντα η Εύα, λιντέ ο ντρομ ι Μπενγκέσκο ντα γκιλέ κόντρα ι Ντεβλέσαρ.​—Γένεση 3:​1-6· Αποκάλυψη 12:9.

Επειδή ο Αδάμ ντα η Εύα να μανγκλέ τι κερέλ-λεν κουμάντος ο Ντεβέλ, χασαρντέ ι ευκαιρία τι τζουβντιόν κο Παράδεισος για πάντα ντα τι τθερέν τέλεια υγεία. (Γένεση 3:​17-19) Λένγκι απόφαση κερντάς ζιάνι ι τσσαβένγκε-ντα σο κερντέ σοράν. Η Γραφή βακερέλα ότι, επειδή ο Αδάμ αμαρτιντάς, «αβιλί η αμαρτία κο ντουνιάς ντα κατά αμαρτία ο μεριπέ». (Ρωμαίους 5:​12) Η αμαρτία αντάς εκ γιαβέρ-ντα μπουτ μπέτι πράγμας: «Ο τζενέ ανένα προβλήματα κο γιαβερά επειδή κυβερνίνενα-λεν». (Εκκλησιαστής 8:9) Γιαβερέ λαφίντζαρ, κάνα κερένα κουμάντος ο τζενέ, πάντα αβένα προβλήματα.

Ο ΤΖΕΝΕ ΑΡΧΙΝΕΝΑ ΤΙ ΚΕΡΕΝ ΚΟΥΜΑΝΤΟΣ

Ο πρώτος τζενό σο βακέρντιβελα κι Αγία Γραφή ότι κερντάς κουμάντος γιαβερέν ισινέ ο Νεβρώδ, σο γκιλό κόντρα κι κυβέρνηση κι Ιεχωβάσκι. Οτθάρ μπερί, τζενέ χρησιμοποιηντέ πουμαρί ζορ για τι κερέν ζιάνι κο γιαβερά. Πριν από 3.000 μπρεσά περίπου, ο βασιλιάς Σολομών γραφιντάς: «Ντικχλόμ ο δάκρυα οντουλένγκε σο τσσίντενας μπουτ, ντα να ισινέ καέκ για τι λοκχιαρέλ λένγκο γκι. Οντουλά σο ζορισκιαρένας-λεν τθερένας ι ζορ».​—Εκκλησιαστής 4:1.

Ο πράγματα ισί αντικάς αντιβές-ντα. Κο 2009, εκ έντυπος σο νικαντέ ο Ηνωμένα Έθνη βακερντάς ότι, καζόμ τζάλα, ατζέ πιο μπουτ τζενέ πακιάνα ότι ο γκεραλέ κυβερνήσεις «κερένα σαβέ τι μανγκές μπέτι πράγματα κο ντουνιάς».

Η ΒΑΣΙΛΕΙΑ Ι ΝΤΕΒΛΕΣΚΙ ΚΕΡΕΛΑ ΚΟΥΜΑΝΤΟΣ

Ο ντουνιάς τθερέλα ανάγκη εκ πιο λατσσί κυβέρνηση. Ντα ακριβώς ανταβά ντινάς πο λάφι Οντουβά σο κερντάς-αμέν!

Ο Ντεβέλ αντάς εκ Βασιλεία, δηλαδή εκ κυβέρνηση, σο κα νασκιαρέλ σαρέ ι τζενένγκε κυβερνήσεις ντα «σάντε βόι κα ατσσόλ για πάντα». (Δανιήλ 2:​44) Ανταγιά ισί η Βασιλεία σο βακερένα πουμαρέ προσευχιάτε εκατομμύρια τζενέ. (Ματθαίος 6:9, 10) Ο Ντεβέλ τσσουντάς εκχέ Βασιλιάς σο τζουβντιλόας σαρ τζενό-ντα για τι κερέλ κουμάντος ανταγιά κυβέρνηση. Κας τραμπιντάς;