Ο Ιεχωβά Ισί Αμαρί «Πο Μπαρί Χαρά»

1, 2. (α) Σαρ νιωθίνενα μπουτ τζενέ αντιβές; (β) Σο κα ντικχάς ανταλέ μαθημάστε;

ΜΠΟΥΤ τζενέ αντιβές κερένα σο νακχέλα λένγκε βαστένταρ για τι τθερέν χαρά. Ντα παρόλο σο μαρένα-πες αζόμ μπουτ για τι αρακχέν-λα, λένγκι χαρά να ατσσικιαρέλα μπουτ. Μπουτ τζενέ ισί απογοητευμέ ντα νιωθίνενα ότι ο πράγματα λένγκε ζωγιάτε να κα τζαν ποτές πο λατσσές. Μπέκιμ αμέν-ντα σο ισινάμ αντρέ κο λαός κι Ιεχωβάσκο τι νιωθίνας αντικάς. Επειδή τζουβντιάσα «κο τελευταία ντιβεσά», τζανάσα ότι μπορεί τθεράς πφαρέ προβλήματα σο ανένα αμένγκε άγχος ντα στεναχώρια.​—2 Τιμ. 3:1.

² Ανταλέ μαθημάστε, κα ντικχάς καλά πράγματα μπορεί τι κερέν-αμέν τι χασαράς αμαρί χαρά ντα άμα κα αβέλ-πες ανταβά, σαρ μπορίνασα τι αβάς πάλι χαρούμενοι. Πρώτα, ελάν τι σικλιάς κον μπορίνελα τι βοηθίνελ-αμέν τι αβάς μπαγιά χαρούμενοι.

Ο ΙΕΧΩΒΑ ΜΠΟΡΙΝΕΛΑ ΤΙ ΒΟΗΘΙΝΕΛ-ΑΜΕΝ ΤΙ ΑΒΑΣ ΜΠΑΓΙΑ ΧΑΡΟΥΜΕΝΟΙ

3. Σο σικλιάσα ι Ιεχωβάσκε αντράλ κατά πράγματα σο κερντάς; (Ντικχέν ο φωτογραφίες-ντα)

³ Ο Ιεχωβά ισινέ ντα κα αβέλ για πάντα χαρούμενος. Ντα μανγκέλα αμέν-ντα τι αβάς χαρούμενοι ντα ευτυχισμέ. Άκ’ σόσκε δημιουργιντάς αζόμ μπουτ πράγματα για τι κερέλ-αμέν χαρούμενους. Για παράδειγμας, λάσα χαρά κάνα ντικχάσα ο σουκάρ χρώματα σο υπαρχίντιβενα ντονταλάι αμένταρ, χαιρίνασα κάνα ντικχάσα ο ζώα τι κχελέν πέσκε ντα απολαμβάνασα ο σουκάρ χαμπίματα σο χάσα. Ο Ιεχωβά τθερέλα αμένγκε μπαρί αγάπη ντα μανγκέλα τι χαιρίνας αμαρί ζωή!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (α) Σαρ ατσσικιαρέλα ο Ιεχωβά πι χαρά παρόλο σο ντικχέλα αζόμ προβλήματα κο ντουνιάς; (β) Καβά δώρος ντινάς-αμέν ο Ιεχωβά; (Ψαλμός 16:11)

⁴ Παρόλο σο ο Ιεχωβά ισί ο «ευτυχισμέ Ντεβέλ», αγαβέλα μπουτ λατσσές ι ντουκχ σο τθεράσα αμαρέ γκίστε ντα ο βάσανα σο τσσίντασα. (1 Τιμ. 1:11) Αλλά να μουκχέλα ανταβά τι λελ λέσταρ ι χαρά. Τζανέλα ότι σαρέ ο βάσανα κα σταματίνεν. Βοβ τραμπιντάς ήδη ο ντιβές σο κα νασκιαρέλ-λεν. Ντα κερέλα υπομονή μέχρι κο ντιβές σο κα εξαφανίντιβεν σαρέ ο βάσανα ντα κα αβέλ αμένγκε σαρ μα τι υπαρχίντιβενας ποτές. Μέχρι τι αβέλ-πες ανταβά, ο Ιεχωβά αγαβέλα σο νακχάσα ντα μανγκέλα τι βοηθίνελ-αμέν. Σαρ βοηθίνελα-αμέν; Εκ τρόπος ισί ότι ντέλα-αμέν ι χαρά σαρ δώρος. (Διαβάνεν Ψαλμός 16:11) Τσσουβέν σημασία σαρ ντινάς ανταβά δώρος πι Τσσαβέστε, κο Ιησούς.

5, 6. Σόσκε ο Ιησούς ισί χαρούμενος;

⁵ Σαρέ οντουλένταρ σο δημιουργιντάς ο Ιεχωβά, ο Ιησούς ισί ο πο ευτυχισμέ. Σόσκε; Σκεφτίνεν ντούι λόγους. (1) «Βοβ μοιάζελα ντιπ κο Ντεβέλ» ντα σικαβέλα τέλειε τροπόσαρ ο ιδιότητες λέσκε. (Κολ. 1:15· 1 Τιμ. 6:15) (2) Καέκ γιαβέρ να νακχλό αζόμ μπουτ χρόνος ι Ιεχωβάσαρ, καζόμ νακχλάς ο Ιησούς.

⁶ Ο Ιησούς ισί χαρούμενος επειδή πάντα κερέλα οντουβά σο μανγκέλα λέσκο Ντατ. (Παρ. 8:30, 31· Ιωάν. 8:29) Άκ’ σόσκε ο Ιεχωβά καμαρώνελα μπουτ ι Ιησούς.​—Ματθ. 3:17.

7. Σαρ μπορίνασα τι αρακχάς αληθινή χαρά;

⁷ Αμέν-ντα μπορίνασα τι αρακχάς αληθινή χαρά καζόμ πλησιάνασα ι Ιεχωβάς, σο Λέσταρ αβέλα η χαρά. Καζόμ πο μπουτ σικλιάσα ι Ιεχωβάσκε ντα μοιάζασα λέστε, αζόμ πο ευτυχισμέ κα αβάς. Επίσης τθεράσα χαρά κάνα κεράσα οντουβά σο μανγκέλα αμένταρ ο Ιεχωβά ντα τζανάσα ότι κεράσα λέσκο γκι.a (Ψαλμ. 33:12) Σο αβέλα-πες όμως άμα για χάνικα ή για πο μπουτ καιρός χασαρντάμ αμαρί χαρά; Μήπως ανταβά μανγκέλα τι βακερέλ ότι χασαρντάμ ι ευλογία ι Ιεχωβάσκι; Νάα! Ισινάμ ατελείς ντα μπάζιμα τθεράσα ντουκχ, στεναχώριες ντα κατάθλιψη. Ο Ιεχωβά αγαβέλα-λες ανταβά. (Ψαλμ. 103:14) Ακανά κα ντικχάς σο μπορίνελα τι τσορέλ αμαρί χαρά ντα σο μπορίνασα τι κεράς για τι αβάς πάλι χαρούμενοι.

ΜΑ ΜΟΥΚΧΕΝ ΤΙΠΟΤΑ ΤΙ ΤΣΟΡΕΛ ΤΟΥΜΑΡΙ ΧΑΡΑ

8. Σο μπορεί τι αβέλ-πες κάνα τθεράσα προβλήματα;

⁸ Τσορνό Αρ. 1: Κάνα τθεράσα προβλήματα. Μήπως τζάνα τουμέντζαρ κόντρα, νακχένα εκ μπαρί καταστροφή, τσοροριπέ, νασφαλίματα ή πφουρίματα; Ισί εύκολος τι χασαράς αμαρί χαρά κάνα νακχάσα ασακέ προβλήματα, ειδικά άμα ναστί κεράσα κάτι ανταλένγκε. Η Γραφή βακερέλα ότι μπορεί τι αβάς αζόμ στεναχωριμέ σο μπορεί τι νιωθίνας ότι ποτές μα κα αρακχάς πάλι αμαρί χαρά. (Παρ. 15:13) Ο Μπάμπης, εκ πρεσβύτερος σο αντρέ σε σταρ μπρεσά χασαρντάς κο μεριπέ πι πφραλές, πι νταντές ντα πι νταγιά, βακερέλα: «Νιωθίναβας κορκορό ντα ότι να τθεράβας καέκ βοήθεια. Επίσης, μπάζιμα νιωθίναβας μπέτι επειδή παρόλο σο μανγκάβας τι νακχάβ πο μπουτ χρόνος μι νταντέσαρ, μι νταγιάσαρ ντα μι πφραλέσαρ πριν τι μερέν, να μπορίναβας». Ο προβλήματα ι ζωγιάκε μπορίνενα μπαγιά τι κερέν αμένγκε μπαρό ζιάνι εμ κο σώμας εμ κο γκι.

9. Σο μπορίνελα τι βοηθίνελ-αμέν τι υπηρετίνας ι Ιεχωβάς πάλι χαράσαρ; (Ιερεμίας 29:4-7, 10)

⁹ Σο μπορίνελα τι βοηθίνελ-αμέν τι τθεράς πάλι χαρά; Μπορίνασα τι αβάς πο χαρούμενοι άμα κα σταματίνας τι ανησυχίνας πραγματένγκε σο να μπορίνασα τι αλλάνας ντα τι απολαμβάνας ανταλά σο τθεράσα. Ο τζενέ αμντίνενα ότι πρέπει τι αβέλ τέλεια αμαρί ζωή για τι αβάς χαρούμενοι. Αλλά ανταβά νανέ μπαγιά. Για παράδειγμας, ο Ιεχωβά βακερντάς κο τζενέ σο γκιλέας σαρ αιχμάλωτοι κι Βαβυλώνα τι κερέν ο πο λατσσό σο μπορίνενας για τι απολαμβάνεν ι ζωή οτθέ. (Διαβάνεν Ιερεμίας 29:4-7, 10) Σο σικλιάσα; Προσπαθίνεν τι ντικχέν ο λατσσέ πράγματα σο τθερένα τουμαρέ ζωγιάτε ντα τι απολαμβάνεν-λεν. Ντεν-τουμέν γκοντί ότι ο Ιεχωβά να κα μουκχέλ-τουμέν κορκορέ. Κα βοηθίνελ-τουμέν. (Ψαλμ. 63:7· 146:5) Για παράδειγμας, εκ πφεν η Έφη, εκτιμίνελα ο τρόπος σο βοηθιντάς-λα ο Ιεχωβά. Εκ ντιβές τθερέλας εκ ατύχημας ντα ντινάς-πες μπουτ. Ανταλέσκε ακανά να μπορίνελα τι πφιρέλ. Αλλά βακερντάς: «Ο Ιεχωβά, μι φαμιλί, ο πφραλά ντα ο πφενιά μι κχανγκιριάτε βοηθιντέ-μαν ντα ντινέ-μαν μπουτ ζορ. Μανγκάβα τι σικαβάβ λένγκε ότι εκτιμίναβα σαρέ οντουλά σο κερντέ μάνγκε. Αντικάς προσπαθίναβα τι κεράβ ο πο λατσσό σο μπορίναβα για τι ατσσάβ χαρούμενη».

10. Σόσκε μπορίνασα τι αβάς χαρούμενοι ατζέ-ντα κάνα νακχάσα προβλήματα;

¹⁰ Ατζέ-ντα άμα αμαρί ζωή νανέ αντικάς σαρ κα μανγκάας ή άμα αβένα μπουτ μπέτι πράγματα αμένγκε ή αμαρέ φαμιλιάτε, μπορίνασα τι αβάς χαρούμενοι.b (Ψαλμ. 126:5) Σόσκε; Επειδή οντουλά σο κερένα-αμέν μπαγιά χαρούμενους νανέ ο πράγματα σο τθεράσα αμαρέ ζωγιάτε. Εκ σκαπάνισσα η Μαρία, βακερέλα: «Κάνα τθεράσα προβλήματα, ατσσάσα χαρούμενοι επειδή ντάσα-αμέν γκοντί ο υποσχέσεις σο ντινάς-αμέν ο Ιεχωβά. Ανταβά να μανγκέλα τι βακερέλ ότι ποτές να ροβάσα ή ότι να βακεράσα οντουλά σο νιωθίνασα. Αλλά αμαρό Ντατ μπορίνελα τι βοηθίνελ-αμέν τι ατσσάς χαρούμενοι, σο-ντα προβλήματα τι τθεράς». Σκεφτίνεν ότι ατζέ-ντα άμα οντουλά σο νακχένα ακανά ισί μπουτ δύσκολα τουμένγκε, να κα ατσσόν για πάντα αντικάς ο πράγματα. Μπουτ σουγκό ο Ιεχωβά κα νασκιαρέλ σαρέ οντουλά σο ανένα αμένγκε ντουκχ ντα στεναχώρια.

11. Σαρ ο παράδειγμας ι απόστολε Παυλόσκο ντέλα-τουμέν ζορ;

¹¹ Μπάζιμα μπορεί τι νακχέλα αμαρέ γκοντιάταρ ότι τθεράσα προβλήματα επειδή χασαρντάμ ι ευλογία ι Ιεχωβάσκι. Άμα νιωθίνασα αντικάς, μπορίνασα τι σκεφτίνας γιαβερέ πιστέ τζενέν σο υπηρετίνενας ι Ιεχωβάς ντα νακχλέ μπερεκέτι δοκιμασίες. Σκεφτίνεν ο παράδειγμας ι απόστολε Παυλόσκο. Ο Ιησούς τραμπιντάς-λες για τι βακερέλ ο λατσσέ αμπέρια κο “γιαβερά τθεμά, αλλά εμ κο βασιλιάδες ντα κο τσσαβέ κι Ισραηλίσκε”. (Πράξ. 9:15) Σο μπαρό προνόμιος! Αλλά ο Παύλος-ντα τθερέλας μπουτ προβλήματα. (2 Κορ. 11:23-27) Μήπως σαρέ ανταλά προβλήματα σο τθερέλας ο Παύλος σικαβένας ότι χασαρντάας ι ευλογία ι Ιεχωβάσκι; Σίγουρα όχι! Οκιά μπάνταρ, λέσκι υπομονή σικαβέλας ότι ο Ιεχωβά ευλογίνελας-λες. (Ρωμ. 5:3-5) Ακανά σκεφτίνεν τουμαρό νεαυτός. Νταϊντίνενα πιστά παρόλο σο νακχένα σαρέ ανταλά προβλήματα. Οτθάρ, τουμέν-ντα μπορίνενα τι αβέν σίγουροι ότι τθερένα ι ευλογία ι Ιεχωβάσκι.

12. Σο μπορεί τι αβέλ-πες άμα να μπορίνασα τι κεράς οντουλά σο κα μανγκάας κι υπηρεσία κι Ιεχωβάσκι;

¹² Τσορνό Αρ. 2: Κάνα ναστί κεράσα οντουλά σο κα μανγκάας. (Παρ. 13:12) Αμαρί αγάπη ντα αμαρί εκτίμηση ι Ιεχωβάσκε τσσίντελα-αμέν τι τσσουβάς στόχους κι υπηρεσία λέσκι. Όμως, άμα ο στόχοι σο τσσουβάσα νανέ λογικοί αμένγκε, κα μπορίναας τι χασαράς αμαρί ζορ. (Παρ. 17:22) Εκ σκαπάνισσα, η Χόλι, βακερέλα: «Μανγκάβας τι νακχάβ ι Σχολή για Ευαγγελιστές της Βασιλείας, τι υπηρετίναβ εκχέ γιαβερέ τθεμέστε ή τι βοηθίναβ κι οικοδόμηση κο Ράμαπο. Αλλά ο πράγματα μι ζωγιάτε αλλαξάλε ντα να μπορίναβας τι κεράβ ανταλά πράγματα. Πφανγκιλό μπουτ μο γκι». Μπουτ υπηρέτες ι Ιεχωβάσκε νιωθίνενα αντικάς κάνα να μπορίνενα τι κερέν οντουλά σο κα μανγκένας κι υπηρεσία λέσκι.

13. Σο μπορίνασα τι κεράς σαρ-ντα τι αβέν ο πράγματα αμαρέ ζωγιάτε;

¹³ Σο μπορίνελα τι βοηθίνελ-αμέν τι τθεράς πάλι χαρά; Ο Ιεχωβά νανέ σουκέ γκίσκο. Τι ντεν-τουμέν γκοντί ότι να μανγκέλα τι κεράς πο μπουτ απ’ ό,τι μπορίνασα. Ο Ιεχωβά εκτιμίνελα-αμέν ατζέ-ντα άμα να μπορίνασα τι κεράς ο πράγματα σο μπορίνενα τι κερέν ο γιαβερά. Μανγκέλα τι αγαβάς αμαρέ όρια ντα τι ατσσάς πιστοί. (Μιχ. 6:8· 1 Κορ. 4:2) Ο Ιεχωβά ντέλα πο μπουτ σημασία κο σκέψεις, κο αισθήματα ντα κο ιδιότητες αμαρέ παρά κο πράγματα σο κεράσα. Κα αβέλας λογικός τι μπεκλεντίνας πο μπουτ αμαρέ νεαυτόσταρ απ’ ό,τι μπεκλεντίνελα αμένταρ ο Ιεχωβά;c Σίγουρα όχι! Ατζέ-ντα άμα να μπορίνενα τι κερέν ανταβά σο κα μανγκένας τι κερέν ι Ιεχωβάσκε, σκεφτίνεν ο πράγματα σο μπορίνενα τι κερέν ακανά. Για παράδειγμας, μπορίνενα τι βοηθίνεν εκχέ τερνές τι κερέλ πο ζουρανί πι φιλία ι Ιεχωβάσαρ ή τι ντεν ζορ κο πφουρέ πφραλά ντα πφενιά. Μπέκιμ κα μπορίνενας τι τζαν τι ντικχέν εκχέ πφραλές, ή τι λεν-λες τηλέφωνος, ή τι μπουτσσαβέν λέσκε εκ μήνυμας για τι ντεν-λες ζορ. Ο Ιεχωβά χαιρίνελα κάνα κερένα ο πράγματα σο μπορίνενα τι κερέν ντα κα ντελ-τουμέν μπουτ μπαρί χαρά! Τι ντεν-τουμέν γκοντί ότι κο νεβό ντουνιάς κα υπηρετίνας ι Ιεχωβάς τροπόντζαρ σο να μπεκλεντίναας ποτές! Σαρ βακερντάς η Χόλι: «Κάνα νιωθίναβα ότι χασαράβα μι ζορ, μπεσάβα ντα σκεφτίναβα ότι κα τζουβντιάβ για πάντα. Ντα κο μέλλον κα μπορίναβ τι κεράβ κάποια κατά πράγματα σο μανγκάβα ι Ιεχωβάσκε με τη βοήθεια λέσκι».

14. Σο γιαβέρ μπορίνελα τι κερέλ-αμέν τι χασαράς αμαρί χαρά;

¹⁴ Τσορνό Αρ. 3: Κάνα κεράσα σάντε αμαρό γκι. Κο Ίντερνετ, μπορεί τι ντικχάς τζενέν σο ντικχίντιβενα μπουτ χαρούμενοι επειδή απολαμβάνενα σουκάρ πράγματα συνέχεια. Μπέκιμ τι αρχίνας τι πακιάς ότι κάνα κεράσα πράγματα σο μπεϊντίνασα ή κινάσα σο-ντα μανγκάσα ή κεράσα ταξίδια κα αβάς μπαγιά χαρούμενοι. Νανέ λάθος τι κεράς ασακέ πράγματα. Ο Ιεχωβά μανγκέλα τι απολαμβάνας ο σουκάρ πράγματα σο λατσσαρντάς αμένγκε. Όμως, μπουτ τζενέ αγαντέ ότι οντουβά σο πακιάνας ότι κα ανέλας λένγκε χαρά, κι πραγματικότητα ισί οντουβά σο τσσορντάς λένταρ ι χαρά. Η Εύα, εκ σκαπάνισσα, βακερέλα: «Κάνα χάλα-αμέν ανάγκη σάντε σαρ κα νακχάς λατσσές, ποτές να κα αβάς ικανοποιημέ». Άμα τθεράσα συνέχεια αμαρέ γκοντιάτε σαρ κα κεράς αμαρό γκι, κα αβάς στεναχωριμέ ντα απογοητευμέ.

15. Σο μπορίνασα τι σικλιάς κατά βασιλιάς Σολομών;

¹⁵ Μπορίνασα τι σικλιάς κατά παράδειγμας ι βασιλιάσκο Σολομών καζόμ μπέτι νιωθίνελα εκ τζενό κάνα κερέλα συνέχεια πο γκι. Κερντάς σο-ντα ντέλας λέσκο γκι για τι αρακχέλ χαρά. Σαρ για παράδειγμας, απολαμβάνελας ο λατσσό χαμπέ, ο σουκάρ γκιλιά ντα κινέλας πααλίς πράγματα. Παρόλο σο τθερέλας σαρέ ανταλά πράγματα, νιωθίνελας τσουτσό. Βοβ βακερντάς: «Η γιακχ να τσαλιόλα τι ντικχέλ ούτε ο καν πφερντιόλα οντουλέντζαρ σο ασουνέλα». (Εκκλ. 1:8· 2:1-11) Κάποια τζενέ πακιάνα ότι άμα τθερένα λοβέ ντα κερένα σο-ντα μανγκένα, κα αβέν χαρούμενοι. Αλλά ανταβά ισί εκ ψέμας. Ανταλά πράγματα ποτές να κα κερέν-αμέν μπαγιά χαρούμενους.

16. Σόσκε μπορίνασα τι αβάς πάλι χαρούμενοι κάνα κεράσα πράγματα ι γιαβερένγκε; (Ντικχέν ο φωτογραφίες-ντα)

¹⁶ Σο μπορίνελα τι βοηθίνελ-αμέν τι τθεράς πάλι χαρά; Ο Ιησούς σικλιαρντάς-αμέν ότι «ισί πο ευτυχισμέ εκ τζενό κάνα ντέλα παρά κάνα λέλα». (Πράξ. 20:35) Εκ πρεσβύτερος, ο Αλέκος, βακερέλα: «Προσπαθίναβα τι κεράβ χουρντέ πράγματα για βοηθίναβ ι γιαβερέν. Κάνα ντάβα κο γιαβερά, σκεφτίναβα πο χάνικ μο νεαυτός ντα ανταβά ανέλα μάνγκε χαρά». Τουμέν, σο μπορίνενα τι κερέν ι γιαβερένγκε; Άμα ντικχένα εκχέ τζενές τι αβέλ στεναχωριμέ, κερέν λέσαρ λάφι. Μπέκιμ να μπορίνενα τι λύνεν λέσκε προβλήματα, αλλά μπορίνενα τι ντεν-λες ζορ. Μπορεί τι νιωθίνελ πο λατσσές άμα κα ασουνέν-λες προσεκτικά ντα κα προσπαθίνεν τι αγαβέν σαρ νιωθίνελα. Μπορίνενα τι ανέν λέσκε γκοντιάτε τι πουτρέλ πο γκι κο Ιεχωβά επειδή βοβ πφαμπόλα λέσκε. (Ψαλμ. 55:22· 68:19) Μπορίνενα επίσης τι βοηθίνεν-λες τι ντελ-πες γκοντί ότι ο Ιεχωβά να μουκχλάς-λες. (Ψαλμ. 37:28· Ησ. 59:1) Μπορίνενα ατζέ-ντα τι βοηθίνεν-λες σε κάτι σο χρειαζίντιβελα, σαρ για παράδειγμας τι ετοιμάνεν λέσκε χαμπέ ή τι τζαν λέσαρ εκ βόλτα. Νικιόν λέσαρ κο έργος. Κάνα βακεράσα ο λατσσέ αμπέρια κο γιαβερά, πάντα ισινάμ πο χαρούμενοι. Μουκχέν ι Ιεχωβάς τι χρησιμοποιήνελ-τουμέν για τι ντεν ζορ ι γιαβερέν. Κάνα ντάσα αμαρέ σαατίσταρ για τι βοηθίνας ι γιαβερέν, τθεράσα αληθινή χαρά!​—Παρ. 11:25.

17. Σο πρέπει τι κεράς άμα μανγκάσα τι αβάς μπαγιά χαρούμενοι; (Ψαλμός 43:4)

¹⁷ Μπορίνασα τι αβάς μπαγιά χαρούμενοι άμα συνεχίνασα τι πλησιάνας αμαρέ Νταντές σο ισί κο ουρανός. Η Γραφή βακερέλα ότι ο Ιεχωβά ισί οντουβά σο “ανέλα αμένγκε ι πο μπαρί χαρά”. (Διαβάνεν Ψαλμός 43:4) Ατζέ-ντα κάνα τθεράσα προβλήματα, να χρειαζίντιβελα τι ανησυχίνας ή τι νταράς. Μακάρι τι συνεχίνας τι τθεράς αμαρέ γιακχά κο Ιεχωβά, σο Λέσταρ αβέλα η αληθινή χαρά!​—Ψαλμ. 144:15.