Свынто тайна
9 О панчто анӷело заӷудисардя андэ труба. И мэ додиқлэм черӷай, сави па небо пэля пэ ԥув. Лати динэ тия па входо андэ пропость. 2 И черӷай ԥэрнадя о входо андэ пропость, и андар латэ, сар анда баро бов, вазгляпэ ҭув, савэстар калеля о қам и о воздухо. 3 Анда ҭув повихуклэ пэ ԥув кузнечикоря*, и лэндэ сас кацаво жэ зор, саво исин пэ ԥув кай и скарпионоря. 4 Лэнди сас ԥэндо тэ на терэн вэрыто ни ла чаряти, ни лэ виткэнди, ни аврэ растениенди пэ ԥув, ай кати лэ манушэнди, савэндэ по чикат нинай лэ Дэвлэстири печать.
5 Лэ кузнечиконэнди на сас домэкло тэ умарэн лэ манушэн, но вонэ моӷли тэ мучин лэн панч шон, када сас, ԥэнэса лэн халя о скарпионо. 6 Андэ кодэла деса и мануша лэна тэ родэн пэсти смэрть, но на виарақэна, закамэна тэ мэрэн, но и смэрть унашэла лэндар.
7 И кузнечикоря шонаспэ пэ граста, савэ ӷотови тэ марэнпэ. Пэ лэндирэ шэрэ сас варисо кацаво, ԥэнэса сомнакунэ короны, лэндэ сас манушыканэ муя, 8 и бал лэндэ сас сар кай и жувля, ай и данда — сар кай и леворя. 9 Пэр лэндэ сас саструнэ гада, и о шумо лэндирэ ԥақэндар шоласпэ по шумо лэ вурдонэндар, савэ нашэн тэ марэнпэ. 10 Кадяжэ лэндэ пэ пуря сас сувья, сар кай и скарпионоря, и андэ лэндирэ пуря сас зор тэ терэн вэрыто лэ манушэнди панч шон. 11 Лэнго царё — анӷело пэ пропость. Пэ еврейско шыб лэс ақарэн Авадо́но*, ай пэ греческо — Апалио́но*.
12 Ек бида прожыля. Пала латэ жан инке дуй.
13 О шовто анӷело заӷудисардя андэ труба. Амэ ашундям о ӷолосо — во ашундёлас лэ роӷонэндар по сомнакуно жэртвенико, саво тердёл англа Дэл. 14 О ӷолосо ԥэндя лэ шовтонэ анӷелости ла трубаса: «Одмэк лэ штарэ анӷелонэн, савэ сԥанглэ паша ашунгли лэн Ефра́то». 15 И штар анӷелоря, савэ сас стидэ́ важ кадэва часо, дес, шон и бэрш, сас одмэклэ, кай тэ умарэн бутэ* манушэн.
16 Мэ ашундэм, кай лэ халавдэн пэ граста сас 200 милионоря. 17 И грас, ай кадяжэ и халавдэ, савэ ездинас пэр лэндэ, дицонас кадя: и саструнэ гада пэ халавдэ сас лолэ, сини и галбэни, лэ грастэндирэ шэрэ шонаспэ пэ шэрэ сар кай и леворя, ай анда лэнго муй вижалас яг, ҭув и ядовито паро*. 18 Через кадэя бида* — яг, ҭув и ядовито паро, савэ вижанас анда лэнго муй, — хынделя бут* миро. 19 Лэ грастэнго зор — андо муй и андэ пури. Лэндирэ пуря лэ шэрэнца шонпэ пэ сапа, савэнца вонэ терэн вэрыто.
20 Ай ко на хынделя через кадэя бида*, вонэ кадя и на каисайлэ андэ пэстири дила и на парашэлэ тэ тэлён лэ найвужэнди и лэ дэвлорэнди* анда сомнак, анда руп, анда харкум, анда бар и анда каш, савэ на диқэн, на ашунэн и на ԥирэн. 21 Вонэ на каисайлэ и на парашэлэ тэ умарэн, тэ драбатярэн, тэ терэн билажавардимос* и тэ чорэн.